Apquiltajayclha israelitas apquilmomap
1 Naso, ingyasicjiclhojoc sat mocjam apquilmolhama Israel Visqui ingac. Eltimjic sat mocjam israelitas Dios apquilyacyescama, eltajiclhac sat mocjam apquilaoclha. Elpalhavomoc sat metnaja israelitas nipyesicsa enlhitaoc Israel. 2 Apquillhalhmaa eltimjic sat metnaja israelitas naysicsa apquiltajayclha israelitas, eltimesam sat nipyesicsa israelitas. Elmacpoc sat singilpilhtetemo metnaja israelitas, eltimjic sat apquilmomap apquilviscaa metnaja israelitas, apquiltomja siclhoc alhta apquilyimtalhnamo naysicsa apquilmomacpilha israelitas.
Macvenéycam apvisqui co Babilonia
3 Quellhip israelitas, emascocsic sat Visqui ingac actemaclha apquillingaycamco acyimtalhnama quellhip, najan actemaclha apquilmomap quellhip nipyesicsa metnaja israelitas. 4 Elvenam sat quellhip apvisqui co Babilonia naysicsa apquilminaycmascama:
¡Apquilvatasquic aptemaclha apanco tirano apmapsom! ¡Apquilvatasquic aptemaclha apyimtalhnamo apvisqui apmapsom!
5 Apmascosquic Visqui ingac aptemaclha apmopvan apmapsom. Apmascosquic apmaycam apmic yamit ayitcoc tirano apvisqui apmapsom.
6 Apquilyicpilhquetacpec metnaja israelitas, naysicsa aplom pac apvisqui apmapsom. (Am alhta elmiyavac enlhit) Apminlhinquic alhta enlhitaoc mepqui apquilasicjayquiclha mocjam.
7 Quilhvoc actamilaycam apquilvalhoc apyovoclhojo enlhitaoc as nalhpop. Avanjec acpayjayclha apquilvalhoc najan apquilitsovascama.
8 Inquilitsovasoc yamtaa pinos najan cedros alimja netin inquilhe Líbano. Inquiltomjac alpayvam as yamit: Tasic anco apmatnam lhip, mongacyejec sat mocjam jingilyatemenic lhip apnaymacoc — inquiltomjac yamtaa.
9 Pilapcasquic alhta nipyesicsa apquilmasquingvaycmo, inquilmec alhta tacja apquiljangaoc, alvita inlhojo lhip apjangaoc. Inquillhaticjac alhta apquiljangaoc alvisay pisquisca, najan apquiljangaoc apquilviscaa ninga, yoyam colmoc tacja, najan maa apyovoclhojo apquilviscaa ninga, alaneclho netin.
10 Inquiltomjac alhta apquiljangaoc alpasmeyquiclha: Lhip najan lha mepqui apyimnatem, ningno nincoo lha — alhta inquiltomjac.
11 Inmasquec lhip apyimtalhnesomacpo apanco najan lhip apanco música cítaras. Lhip aptajanma acvisay acnaycamcolha yapa, najan apcalomap apvisay ascoc gusanos.
12 Lhip apvisay apyova apyivey maa netin, aptiyacmo as nalhpop. Lhip alhta apyimnatem apanco nipyesicsa enlhitaoc lhalhma anco as nalhpop.
13 Lhip alhta aclhanma apvalhoc: Omyaclhac sat coo netin, olhic sat netin apvisqui aptajanem. Olhic sat nitno tacjaplhit apyová apquillanay nic nat Dios. Olhic sat nitno tacjaplhit apyová apquillanay nic nat Dios. Olhic sat mocjay anco nilhqueyja, payjoc ayaneyquiclha dioses quilaycmasquiscama.
14 Olhic sat nitno tacjalhit yipjopay, olhojoc sat Dios apyimtalhnamo apanco — alhta intomjac apvalhoc.
15 Apvayventac alhta lhip nipyesicsa apquilmasquingvaycmo alyascamaclha ingjangaoc, payjoc ayaptovnilha alyascamaclha ingjangaoc.
16 Pilapcasquic apvitacpo lhip, intomjac apquilpayvam: Lhip alhta apyimtalhnamo apanco apnatovascama enlhitaoc lhalhma anco as nalhpop.
17 Lhip alhta aptimesquiscama yoclhilhma actamopeycaoc apquileyvomaclha enlhit apmasma enlhitaoc apquilmomap comopvan eltajiclha.
18 Yitnec tacjalhpopayc moclhama apquilviscaa ninga, moclhama acnaycamcaclha apquiljangaoc.
19 Lhip eyca apyitnama mocjay, jave congne malhic. Apyitsomacpo lhip asoc ápac, malha apmatnam apquiltoyam ticyovam yapmayc, malha apyinyovmap malhic acnaycamcaclha mataymong.
20 Mengyatoynacpejec sat lhip apno poc apquilviscaa, ayinyema lhip apquilnapma apnaymacoc, lhip alhta aptovascama yoclhilhma lhalhma anco. Colhenalhquejec sat mataa apquilvisay apquilmapsomcaa cotmongvoycamlha nelha.
21 Elane sat eticyoc apquitquic, acyanmongayclha apquiltemaclha apquilyapmayc. Colapvanquejec apquitquic eltimjic mocjam apquilviscaa, colapvanquejec mataa ellanac tingma apquilvanyam.
22 Eycaso appayvam Visqui ingac: Ongvinmelham sat apquiltemaclha apancaoc, omascocsic sat apvisay tingma Babilonia, osavojoc sat silnapma enlhitaoc, najan apquitquic, najan aptovana.
23 Etniclhac sat tingma aptamopongviyam (apyamasma) alyancaclha asoc navjac sovaya. Tava apac sat otnejic sicmintamaycam tingma, yoyam etvasacpoc. Eycaso sicpayvam sicvisay Visqui sicyimtalhnamo — alhta aptomjac — nic nat aptomjac profeta.
Enatovasacpoc sat co Asiria
24 Aptomjac alhta Visqui apyimtalhnamo apquillhenacpo co Asiria: Osavojoc sat aclhanma evalhoc coo, osavojoc sat siclhanma nasoc anco.
25 Onatovacsic sat co Asiria apnaycam as yoclhilhma, najan apnaycam netin inquilhe. Comascoc sat apquillingaycamco acyimtalhnama israelitas apquilsoycam malha yamit nanyetaoc najan apquilsoycam apquilpatam acyimtalhnama.
26 Eycaso aclhanma evalhoc, yavamlha otnejic as nalhpop. Coo emic sicmaycam apyovoclhojo enlhitaoc as nalhpop — alhta aptomjac.
27 Yitnec sat ancoc aclhanma apvalhoc Dios yavamlha etnejic, copvanquejec lhama enlhit ingyinmelham. Yitnec appayescama apmic Visqui ingac, paj lhama enlhit comopvan etajicsojo apmic.
Enatovasacpoc sat co Filistea
28 Naysicsa aptimem apvisqui najan natamin apquitsepma apvisqui Acaz, aclingalhco amyaa ayinyema Dios, aplhanma profeta Isaías:
29 Quellhip co Filistea, noelitsovacsojo nasa apquilvita inlhojo ayintem yamit actomja ayasquiscama apyimpeoc quellhip. Siclhoc acvisay nimisma, natamin cotniclhac sat acyeyva, natamin cotniclhac sat sinavocpo asoc navjac aclom.
30 Elvitac sat ayimjaclha paat aptoycaoc apnatoscama enlhit mepqui apquilnatam. Comascoc sat apquillingaycamco acyimtalhnama, elhnam sat mataa mepqui apquilay. Elitsapoc sat apnaymacoc quellhip ayinyema mayic alnapma, eticyoc sat poc apquilaymomap apnaymacoc.
31 ¡Elyapcalhaoc sat quellhip apnaycam tingma apquilvanyam co Filistea! ¡Eliclhangvom sat quellhip, acyiplomo apquilpilhyinamam! Payjoc nilhqueyja apquilinyema singilpilhtetemo, malha etin acvanyam intomjac ningvitay, mepqui lhama apquimjayquinta.
32 ¿Co laa ontimjic ongilatingmojo, ningvita inlhojo apquilsoycam amyaa filisteos? Ongiltimjic sat ningilanya: Dios Visqui ingac apanco tingma Jerusalén. Elyilhanmoc sat maa Visqui ingac apnaymacoc, elhnam sat mepqui apquilay — sat ontimjic — nic nat aptomjac profeta.
Apkelweykta makham ma'a kélnaqleykekxa axta megkatnahakxa apkelókxa
1 Yepyóshok sa' elanok Wesse' egegkok ma'a Jacob. Apkelyéseykha sa' etnekxak makham ma'a Israel, yának sa' elhakxak makham israelitas ma'a xapop apagkok nak. Elyepetchegwak sa' nahan ma'a megkatnaha nak apkelókxa xamo', epaxqeykxak sa' ma'a Jacob énxet'ák apagkok. 2 Elmok sa' takha' apxámokma apagko' pók aptémakxa énxet'ák ma'a israelitas, elyetlakxak sa' ekweykekxoho m'a apkelókxa, elmok sa' nahan yaqwayam etnéssesagkok apkelásenneykha naqsa m'a israelitas, cham'a Wesse' egegkok nak kañe' xapop apagkok. Elmok sa' israelitas ma'a ektáha axta chá'a apkelma, kóneg sa' etnessásekxak ma'a ektáha axta chá'a apnaqtawáseykegkoho.
Wesse' apwányam Babilonia kélwanyeykha
3 Énxet'ák Israel, apkellókassessek sa' agkok kéxegke kélyampe Wesse' egegkok eñama m'a ektémakxa nak kéllegeykegkoho, tén han ekyentaxnamo kélwáxok tén han kélmésso ekyentaxno agko' kélteme m'a kélásenneykha naqsa, 4 kólyetsetek sa' se'e eknaqtáxésamaxche nak amya'a yaqwayam sa' kólwanyaha m'a wesse' apwányam Babilonia:
“¡Kóllano ektáhakxa wesse' aplo!
¡Kóllano ektáhakxa
ekmassegwokmo m'a
apcheymákpoho!
5 Apmasséssessek
Wesse' egegkok
ektémakxa nak apkelyennaqte
m'a énxet'ák
élmasagcha'a nak apkeltémakxa,
apkelekkexchásekxeyk yámet
apmeykha nak chá'a m'a
wesse' aplo,
6 apkellegassáseykegkoho nak chá'a
énxet'ák yetlo aplo
apkeltekpageykencha'a nak chá'a
meyke néxa,
apkelteyammeykencha'a nak chá'a
énxet'ák yetlo aplo,
apmenxeneykencha'a nak chá'a
meyke apkelmopyósa apkelányo.
7 Sawhékxók kaxwók
meyke ektáhakxa
apheykha énxet'ák
ekyókxoho keso náxop,
taqmelákxeyk apheykha,
apkelwehéseykha nahan
élpayheykxo apkelwáxok.
8 Wokmók yámet pinos
tén han cedros
élaqnéyak nak Líbano
élpayheykekxa awáxok
kélmasséssekmo exchep,
táhak élpaqmeta s'e:
‘Méko sa' kaxwók negko'o
hẽlyaqtennek
apmassegwokmo nak xép.’
9 Yennegkexma s'e
kóneg xapop nak
nepyeseksa nak ma'a
apkeletsapma,
apkelántekkek nahan
peya emok takha' exchep.
Naqxétekhágkek apkelhagák ma'a
apkeletsapma axta,
apkelanyexakmek xép
apyókxoho m'a
apkelámha apmonye'e
axta keso náxop;
apkelchampákxeyk
néten apkeltaháno
apyókxoho m'a kelwesse'e
apkelwányam axta
ekyókxoho apheykegkaxa.
10 Apyókxoho nahan
apheyásawók mók apkelpeywa m'a,
aptáhak apcháneya s'e:
‘Méko exchepxa
entáhak apyennaqte,
eghágweykxók negko'o.
11 Keso néxa exchep
apcheymákpoho s'e
tén han apháxenmo
apkelpáwá m'a
arpa apagkok.
Élchónamaxche kaxwók ma'a
apyetnamakxa néten,
yápa apketkók nahan ma'a
apchaqlamap.’
12 “¡Apteyekmek xép néten
yaw'a apwányam apteyapmól'a
amonye' élseye!
Kélyenyenteyk xép náxop,
apnaqtawáseykegkoho
axta chá'a m'a
pók aptémakxa énxet'ák.
13 Aptéma axta chá'a
kalchetmok apwáxok se'e:
‘Wántek sa' ko'o
ekweykmoho m'a néten;
apekkenwók sa' sektaháno ekyawe
ektaqmalma m'a néten nak Dios
yaw'a apagkok;
axek sa' ko'o m'a
makhawók agko' nak nexcheyha,
cham'a egkexe eyaqneykekxexa nak
ma'a aqsok kéláyókxa.
14 Wántek sa' ma'a teyp
netnók agko' nak ma'a yaphope;
atnehek sa' ma'a aptémól'a
Dios meyke nak Ekhémo.’
15 ¡Apteyekmek eyke m'a kañe'
apkelmaheykegkaxa nak chá'a
apkeletsapma,
cham'a kañók agko' nak máxek!
16 Apchaqneyk nahan chá'a
apkelano m'a
ektáha nak chá'a apkelwete,
aptáhak nahan chá'a apkelpaqmeta
neyseksa apkelányo s'e:
‘¿Enxoho énxet
apkelyegwakkáseykencha'a
axta chá'a énxet'ák
ekyókxoho apheykegkaxa xa,
apmassesseykmo nak
ma'a apkelókxa
apheykegkaxa nak chá'a pók
aptémakxa énxet'ák,
17 aptemessáseykekxo nak meyke
xama aqsok keso nélwanmégkaxa,
apmassesseykmo nak ma'a
tegma apkelyawe,
mekxeykekxo axta m'a
énxet'ák apkelmomap axta?’
18 Apyókxoho kelwesse'e
apkelwányam apkelókxa chá'a
apkeletsapmak yetlo kéláyo,
yetneyk chá'a takhaxpop
apagkok apagko' xama;
19 keñe exchep kélyenyawa aqsa
megkatnahakxa takhaxpop,
máxa m'a aqsok ápak kélyamasmal'a
megkaleklól'a kélwáxok kóllano',
máxa m'a kélhápak
élteyammomáxchel'a
nepyeseksa m'a énxet'ák aptekyawa,
kélyaqténcháséyak la'a apyespa'ák,
kélchexakhál'a m'a kañe' máxek
ekxámokmakxal'a m'a meteymog.
20 Megkólátawanyek sa'
ektéma nak ma'a nápakha
kelwesse'e apkelwányam nak,
hakte aptawáseykha m'a apchókxa,
apkelnapmeyk ma'a
énxet'ák apagkok.
Megkawegqók sa' chá'a
apkelweynchámeykha m'a
énxet'ák élmasagcha'a nak
apkeltémakxa
aptawán'ák neptámen.
21 Kóllánekxa sa' kéltáhakxa
yaqwayam kólnápekxak
kélketchek apkelennay'a
eñama ekmaso apkeltémakxa m'a
apyapmeyk nak,
yaqwayam sa' megkalxének kaxwók
apkelwáxok etnahagkok apagkok
keso náxop,
tén han exámaksek
tegma apkelyawe
keso nélwanmégkaxa.”
22 Aptáhak Wesse'
ekha nak apyennaqte s'e:
“Alenmexek sa' ko'o xa énxet'ák nak,
amasséssók sa' apkelxénamap ma'a
Babilonia,
yetlo m'a apkeleymomap
nak ma'a kañe',
tén han ma'a apketchek
ekweykekxoho m'a aptawán'ák nak.
23 Ekyetnamakxa yelpa'
ekmomhápa sa' atnessásekxa'
tén han yókxexma
apxámokmakxa sawe apkelyawe.
Wáxñeksek sa' ma'a kéláxñesso
ekmassesseykmoho nak aqsok”
Wesse' egegkok
ekha nak apyennaqte
apxeyenma xa.
Asiria yaqwayam kólmasséssók
24 Naqsók aptáha appeywa
Wesse' ekha nak apyennaqte s'e:
“Megkatnehek sa'
megkalánamáxche m'a
sekxeyenma axta ko'o kalanaxche';
aqsok sekmámenyého axta katnehek,
katnehek sa'.
25 Amasséssók sa'
énxet'ák Asiria m'a seyókxa,
alteyammaha sa' ma'a
néten meteymog
élekhahéyak ahagkok nak.
Kamaskok sa' elhakpok
énxet'ák ahagkok ma'a
apkeltamheykha ekyentaxno
apkelmésso nak chá'a m'a,
kamaskok sa' apkelpata m'a
aqsok ekyentaxno
apkelpatmeykencha'a nak chá'a.
26 Cháxa sekxéna nak ko'o alának
ekyókxoho keso náxop.
Xénchek ewáxok
allegássesagkohok ma'a
ekyókxoho apheykegkaxa nak chá'a
pók aptémakxa énxet.”
27 Apxénchek katnehek
Wesse' ekha nak apyennaqte xa,
méko nahan kawának kanókasha.
Peyk ellegássesagkoho',
méko nahan
kayaqmagkassessók mók
ma'a yaqwánxa etnehek.
Dios apxeyenma ellegássesagkohok filisteos
28 Apxeyenmeyk axta Isaías apyeyam apketsapma axta wesse' apwányam Ahaz se'e amya'a nak:
29 Filisteos, nágkalpayhekxa aqsa
kélwáxok kélekkexchesa m'a yámet
kéltekyaweykencha'a axta chá'a,
hakte sa' kañék katyapok
xama yéwa m'a
ekteyapmakxa nak chá'a m'a yéwa,
katyapok sa' xama yéwa ekwányam
ekmowána kampa'.
30 Keytek sa' pa'at
yaqwayam elagkok apnaqtósso
énxet'ák ahagkok meyke nak
aqsok apagkok ma'a
yókxexma ahagkok nak,
tásek sa' katnehek apkellókasso
apkelyampe m'a énxet'ák
meyke nak aqsok ma'a apxanák.
Keñe sa' ko'o wának emaskok
meyk élnapma m'a énxet'ák apagkok,
alnáhakkasek sa' nahan ma'a
apkeleymomap enxoho apqántawo'.
31 ¡Filisteos, kélheykha nak apyókxoho
tegma apkelyawe, kallapwomák,
kalpayheykha kélatña'ák
kóllekxagwaha,
kólpexyennem kélaye!
Hakte apkelxegakmek énxet
apxámokma yaqwayam
yempakhak ma'a
ekpayho nak nexcheyha,
máxa éten ekpánmal'a aptáhak;
méko nahan xama enxoho
apteyapma neyseksa m'a
apkeleyweykekxa nak apkelxega.
32 ¿Háxko sa' kóltéhek
kólátegmowagkokxak
ektáha nak élápháseykha m'a
apchókxa nak?
“Dios appekkenma m'a Sión.
Sa' elyexánegwakxak chá'a
énxet'ák apagkok
ekyentaxnamo nak chá'a
apheykha m'a”.
