Esaú aptovana
(1~Cr 1.34-54)1 Eycaso ilhnic nat Esaú apquitquic, moc apvisay Edom.
2 Aptimec nic nat aptava quilvana ayinyema Canaán. Lhama ilhnic nat acvisay Ada. Inyap nic nat apvisay Elón aptemolhama nic nat hitita. Moc aptava ilhnic nat acvisay Aholibama. Inquin nic nat acvisay Aná. Inyata ilhnic nat apvisay Zibeón, aptemolhama ilhnic nat heveo. 3 Moc aptava ilhnic nat Basemat. Inyap nic nat apvisay Ismael. Inyipma ilhnic nat apvisay Nebaiot. 4 Ada ayitca ilhnic nat apvisay Elifaz. Basemat ayitca ilhnic nat apvisay Reuel. 5 Aholibama ayitquic nic nat apquilvisay Jeús najan Jaalam najan Coré. Eycaso ilhnic nat apquilvisay Esaú apquitquic. Apquilaoclha ilhnic nat yoclhilhma Canaán.
6 Apyinyovquic nic nat apmaclha Esaú. Apnalaclhec nic nat apnatamcaa najan apquitquic najan aplhamoclhojo apmolhama. Apnalaclhec nic nat Esaú aplhamoclhojo apnatoscama najan apquilnatam ayinyema yoclhilhma Canaán. Am nic nat colcac apvalhoc Esaú apmaclha ningato Jacob. 7 Inlhamoc nic nat apnatoscama Esaú najan Jacob. Cascama nic nat apquilnatam. Paj nic nat aptovaclha apnatoscama. 8 Apyinyovquic nic nat as yoclhilhma Esaú, moc apvisay Edom. Apmiyaclhec nic nat yoclhilhma acma inquilhe acvisay Seir.
9 Eycaso apquilvisay nic nat aptovana Esaú, moc apquilvisay edomitas. Apquileyvomaclha ilhnic nat yoclhilhma acma inquilhe acvisay Seir. 10 Apquilvisay nic nat Esaú apquitquic: Lhama ilhnic nat apvisay Elifaz, inquin nic nat Ada. Poc nic nat apvisay Reuel, inquin nic nat Basemat. 11 Eycaso apquilvisay nic nat Elifaz apquitquic: Temán najan Omar najan Zefo najan Gatam najan Cenaz. 12 Elifaz moc aptava ilhnic nat acvisay Timna. Ayitca ilhnic nat apvisay Amalec. Eycaso ilhnic nat aptovana Esaú najan moc aptava Ada. 13 Reuel apquitquic nic nat apquilvisay: Nahat najan Zera najan Sama najan Miza. Inquin nic nat acvisay Basemat. 14 Aholibama acvisay nic nat moc aptava Esaú. Ayitquic nic nat apquilvisay: Jeús najan Jaalam najan Coré. Aholibama inquin nic nat acvisay Naá, inyata ilhnic nat apvisay Zibeón.
15 Eycaso ilhnic nat Esaú aptovana apquiltomja apquilviscaa: Apteyam apmamyi ilhnic nat apvisay Elifaz. Elifaz apquitquic nic nat apquiltomja apquilviscaa: apvisay Temán najan Omar najan Zefo najan Cenaz, 16 najan Coré najan Gatam najan Amalec. Eycaso ilhnic nat Elifaz apquitquic apquiltomja apquilviscaa yoclhilhma Edom. Ada atovana ilhnic nat aplhamoclhojo apquilviscaa. 17 Reuel apquitquic nic nat apquiltomja apquilviscaa: apvisay Nahat najan Zera najan Sama najan Miza. Eycaso ilhnic nat Reuel apquitquic apquiltomja apquilviscaa yoclhilhma Edom. Basemat atovana ilhnic nat aplhamoclhojo apquilviscaa. 18 Eycaso ilhnic nat Aholibama ayitquic apquiltomja apquilviscaa: apvisay Jeús najan Jaalam najan Coré. 19 Eycaso ilhnic nat apquilvamlha Esaú aptovana, moc apvisay Edom, apquiltomja apquilviscaa.
Seir aptovana
20 Apnec nic nat as yoclhilhma apvisay Seir, aptemolhama ilhnic nat horeo. Seir apquitquic nic nat apquilvisay: Lotán najan Sobal najan Zibeón najan Aná 21 najan Disón najan Ezer najan Disán. Eycaso ilhnic nat apquilviscaa nipyesicsa horeos apquileyvam yoclhilhma Edom. Seir aptovana ilhnic nat. 22 Lotán apquitquic nic nat apquilvisay Horí najan Hemam. Lotán apyalhing acvisay nic nat Timna. 23 Sobal apquitquic nic nat apquilvisay Alván najan Manahat najan Ebal najan Sefo najan Onam. 24 Zibeón apquitquic nic nat apvisay Aja najan Aná. Apvitangvocmec nic nat actiyapmaclha yingmin yoclhilhma actamopeycaoc. Aptamilcasquic nic nat maa apyap Zibeón apnatoscama yamelyeyjaycoc. 25 Aná apquitca ilhnic nat apvisay Disón najan quilvana acvisay Aholibama. 26 Disón apquitquic nic nat apquilvisay Hemdán najan esbán najan etrán najan Querán. 27 Ezer apquitquic nic nat apquilvisay Bilhán najan Zaaván najan Acán. 28 Disán apquitquic nic nat apquilvisay Uz najan Arán.
29 Apquilviscaa nipyesicsa horeos nic nat apquilvisay Lotán najan Sobal najan Zibeón najan Aná, 30 najan Disón najan Ezer najan Disán. Eycaso ilhnic nat apquilvisay apquilviscaa moclhama apmolhama apnaycam yoclhilhma Seir.
Apquilviscaa yoclhilhma Edom
31 Paj nic nat lhama apvisqui nipyesicsa israelitas. Apnam nic nat apquilviscaa apquiltomja apquilaoclha yoclhilhma Edom.
32 Lhama ilhnic nat apvisay Bela aptomja apvisqui yoclhilhma Edom. Apyap nic nat apvisay Beor. Tingma apvanyam nic nat apvisay Dinaba. 33 Apquitsepquic nic nat Bela. Apvisqui nic nat aptomjaclha Jobab. Apyap nic nat apvisay Zera. Tingma pac nic nat apvisay Bosra. 34 Apquitsepquic nic nat Jobab. Apvisqui nic nat aptomjaclha Husam. Tingma pac nic nat yoclhilhma Temán. 35 Apquitsepquic nic nat Husam. Apvisqui nic nat aptomjaclha Hada. Apyap nic nat apvisay Bedad. Tingma apvanyam nic nat apvisay Avit. Apquilnapacpec nic nat amyip Moab, apquileyvomaclha ilhnic nat enlhitaoc Madián. 36 Apquitsepquic nic nat Hadad. Apvisqui nic nat aptomjaclha Salma. Tingma pac nic nat apvisay Masreca. 37 Apquitsepquic nic nat Salma. Apvisqui nic nat aptomjaclha Saúl. Tingma pac nic nat nicja vatsam acvisay Rehobot. 38 Apquitsepquic nic nat Saúl. Apvisqui nic nat aptomjaclha Baal-hanán. Apyap nic nat apvisay Acbor. 39 Apquitsepquic nic nat Baal-hanán. Apvisqui nic nat aptomjaclha Hadar. Tingma apvanyam nic nat apvisay Pau. Hadar aptava ilhnic nat acvisay Mehetabel, inquin nic nat acvisay Matred. Inyata ilhnic nat apvisay Mezaab.
40 Eycaso ilhnic nat Esaú apquitquic apquiltomja apquilviscaa. Moclhama apmolhama najan moclhama yoclhilhma, apquilvisay: Timna najan Alva najan Jetet 41 najan Aholibama najan Ela najan Pinón 42 najan Cenaz najan Temán najan Mibzar 43 najan Magdiel najan Iram. Eycaso apquilvamlha ilhnic nat apquilviscaa najan yoclhilhma apancaoc apquileyvomaclha Edom. Esaú moc apvisay nic nat Edom.
Esaú aptawán'ák neptámen
(1 Cr 1.34-54)1 Keso Esaú aptawán'ák neptámen se'e, apwesey axta han Edom. 2 Apkelmomchek axta Esaú kelán'ák Canaán: cham'a Adá, Elón axta apketche, apteme axta hitita; tén han ma'a Oholibamá, Aná axta apketche, Sibón axta aptáwen, apteme axta heveo; 3 tén axta han ma'a Basemat, Ismael axta apketche, Nebaiot axta apyáxeg. 4 Elifaz axta apwesey étche m'a Adá, apwetasso axta m'a Esaú; keñe axta Basemat ekweteya m'a Reuel; 5 keñe axta Oholibamá ekweteya étchek, cham'a Jeús, Jaalam, tén han Coré. Cháxa apketchek axta Esaú, appalleyam axta m'a aphakxa axta Canaán.
6 Apmaheykegkek axta mók yókxexma Esaú, apyamasma m'a apyáxeg Jacob, apnaqlókek axta m'a apnaqteyegka'a, apketchek apkelennay'a tén han kelwán'ák, keñe han ma'a apyókxoho apkelxegexma'a. Apnaqlókek axta m'a ekyókxoho aqsok apnaqtósso, tén han ekyókxoho aqsok apwetágwayam axta m'a Canaán, 7 xámokmeyk axta aqsok apagkok xa apqánet nak, massegkek axta apmopwána exek xamók pók; ketsék axta han yókxexma m'a apheykegkaxa, axta kaxnémok chá'a ektéyak ma'a apnaqtósso. 8 Axta keñamak apheykmo yókxexma élámhakxa nak meteymog élwenaqte Seír ma'a Esaú, apwesey nak han Edom.
9 Keso Esaú axta aptawán'ák neptámen se'e, apyapmeyk nano' axta m'a edomitas, apheykencha'a axta m'a yókxexma élámhakxa nak meteymog élwenaqte m'a Seír. 10 Keso apkelwesey axta Esaú apketchek se'e: Elifaz, Adá axta étche, tén han Esaú; keñe han ma'a Reuel, Basemat axta étche, apketche axta han ma'a Esaú. 11 Keso Elifaz axta apketchek se'e: Temán, Omar, Sefó, Gatam, tén han Quenaz. 12 Yetneyk axta han kelán'a apmeykha naqsa m'a Elifaz, ekwesey axta Timná; wetassegkek axta han xama apketche apwesey axta Amalec. Cháxa atawán'ák natámen axta Adá xa, mók aptáwa' axta m'a Esaú. 13 Keso Reuel apketchek axta s'e: Náhat, Zérah, Samá, tén han Mizá; cháxa atawán'ák natámen axta m'a Basemat, mók aptáwa' axta han ma'a Esaú. 14 Oholibamá axta han ekwesey mók aptáwa' m'a Esaú, keso apketchek axta ekwetasso s'e: Jeús, Jaalam, tén han Coré. Aná axta apketche xa, keñe axta aptáwen ma'a Sibón.
15 Keso apkelámha apmonye'e axta chá'a Esaú aptawán'ák neptámen, Elifaz axta aptawán'ák neptámen, apketche átnaha apketkok axta m'a Esaú: Temán, Omar, Sefó, Quenaz, 16 Coré, Gatam, tén han Amalec. Cháxa ektáha axta chá'a apkelámha apmonye'e Elifaz aptawán'ák neptámen ma'a yókxexma Edom, Adá axta atawán'ák natámen xa apyókxoho nak. 17 Keñe axta Reuel apketchek, Esaú axta han apketche, keso apkelámha apmonye'e axta s'e: Náhat, Zérah, Samá, tén han Mizá. Cháxa aptáha axta apkelámha apmonye'e Reuel aptawán'ák neptámen ma'a yókxexma Edom, Basemat axta atawán'ák natámen, aptáwa' axta m'a Esaú. 18 Keñe axta Oholibamá étchek, Aná axta apketche, aptáwa' axta m'a Esaú, keso apkelámha apmonye'e axta s'e: Jeús, Jaalam, tén han Coré. 19 Esaú axta aptawán'ák neptámen xa apyókxoho nak, mók apwesey axta han Edom, apkelámha apmonye'e axta chá'a nepyeseksa énxet'ák apagkok.
20 Keso apketchek axta Seír apteme nak horeo, aphama axta m'a yókxexma nak: Lotán, Sobal, Sibón, Aná, 21 Disón, Éser, tén han Disán. Cháxa apkelámha apmonye'e apagkok axta chá'a m'a horeos, Seír axta aptawán'ák neptámen, apkeleñama axta m'a Edom. 22 Keso Lotán axta apketchek se'e: Horí, tén han Hemam. Lotán axta apyáxeg kelwána m'a Timná. 23 Keso Sobal axta apketchek se'e: Alván, Manáhat, Ebal, Sefó, tén han Onam. 24 Keso Sibón axta apketchek se'e: Aiá, tén han Aná. Aná axta apwete ekteyapmakxa yegmen ma'a meykexa énxet, neyseksa apkeláneseykha apyáp Sibón apnaqtósso yámelyeheykok. 25 Apweteyak axta han xama apketche m'a Aná, apwesey axta Disón, tén han xama apketche kelwána ekwesey axta Oholibamá. 26 Keso Disón axta apketchek se'e: Hemdán, Esbán, Itrán, tén han Querán. 27 Keso Éser axta apketchek se'e: Bilhán, Zaaván, tén han Acán, 28 Keso Disán axta apketchek se'e: Us, tén han Arán.
29 Keso apkelámha apmonye'e apagkok axta énxet'ák horeos se'e: Lotán, Sobal, Sibón, Aná, 30 Disón, Éser, tén han Disán. Cháxa apkelámha apmonye'e énxet'ák horeos xa, ektáhakxa nak chá'a aphawóxama apagko' ma'a yókxexma nak Seír.
31 Keso apkelwesse'e apkelwányam apmonye'e axta m'a Edom, meykexa axta makham wesse' apwányam apagkok ma'a israelitas: 32 Bela, Beor axta apketche, apteme axta wesse' apwányam ma'a Edom, Dinhaba axta apwesey m'a tegma apwányam apagkok. 33 Xama axta apketsapa m'a Bela, keñe apyaqmagkasa apteme wesse' apwányam ma'a Jobab, Zérah axta apketche, apkeñama axta m'a Bosrá. 34 Xama axta apketsapa m'a Jobab, keñe apyaqmagkasa apteme wesse' apwányam ma'a Husam, apkeñama axta m'a yókxexma Temán. 35 Xama axta apketsapa m'a Husam, keñe apyaqmagkasa apteme wesse' apwányam ma'a Hadad, Bedad axta apketche, ektáha axta apmenxenma énxet'ák Madián ma'a yókxexma nak Moab; Avit axta apwesey m'a tegma apwányam apagkok. 36 Xama axta apketsapa m'a Hadad, keñe apyaqmagkasa apteme wesse' apwányam ma'a Samlá, apkeñama axta Masrecá. 37 Xama axta apketsapa m'a Samlá, keñe apyaqmagkasa apteme wesse' apwányam ma'a Saúl, apkeñama axta yókxexma Rehobot, cham'a ekyetnama nak neyáwa wátsam. 38 Xama axta apketsapa m'a Saúl, keñe apyaqmagkasa apteme wesse' apwányam ma'a Baal-hanán, Acbor axta apketche. 39 Tén axta apketsapa han ma'a Baal-hanán, keñe apyaqmagkasa apteme wesse' apwányam ma'a Hadad; Pau axta apwesey m'a tegma apwányam apagkok. Mehetabel axta ekwesey aptáwa' m'a Hadad, Matred axta apketche, aptáwen nak Mezaab.
40 Keso apkelwesey axta Esaú apnámakkok, ektáhakxa nak chá'a aphawóxama apagko', tén han yókxexma, keñe han ma'a apkelwesey: Timná, Alvá, Jetet, 41 Oholibamá, Elá, Pinón, 42 Quenaz, Temán, Mibsar, 43 Magdiel, tén han Iram. Edom axta han mók apwesey Esaú, cháxa apkelámha apmonye'e axta Edom xa, apheykha axta chá'a m'a yókxexma apheykegkaxa axta chá'a, tén han ektáhakxa axta chá'a apagkok.
