Daniel najan apnaymacoc apquilmomap
1 Invocmec nic nat tres años aptimem apvisqui Joacim nipyesicsa apquilmolhama Judá. Apquillanac nic nat apquilimpocjay tingma Jerusalén apvisqui Nabucodonosor co Babilonia najan apyovoclhojo apnaymacoc. 2 Am nic nat emyavac Dios aptomjaclha apvisqui Nabucodonosor. Apmacpec nic nat apvisqui Joacim. Apquilpatmaoclhec nic nat aclhamoclhojo apquilmaycam alinyema Dios tingma pac apponquinomap. Apnalaclhec nic nat apvisqui Nabucodonosor tingma Babilonia judíos apquilmomap. Apninquinquic nic nat alhanaoc najan ingjaycaoc alponquinomalhca, appalhaquisa asoc acnaycaoc acyitnamaclha quilaycmasquiscama mayayo, acyitsomalhca dios. 3 Apcanyacpec nic nat yatapvisqui Aspenaz, aptamjaycamó lhama apvisqui rey, elponquinsic apquilyimnanic apquilmomap nipyesicsa apvisqui co Judá apquilmolhama apquilmomap. 4 Incaymalhquic nic nat apquilyimnanic eltimjic apquilyimnatem, najan actamila apyimpeoc, najan acyivey apquilyascamco najan apquilmopvan eltimesam apvisqui rey tingma pac. Colhic sat allhicmosa nimpayvam inganco najan nintalhesaycaoc nintemaclha caldeos — nic nat intomjac amyaa. 5 Yitnec nic nat mocjam apcanama apvisqui Nabucodonosor. Incaymalhquic ellhovamcoc mataa nintom apquilyimnanic, acno aptom apvisqui rey, najan apyinaycaoc uva ayingmenic. Colhic sat altamescama acvaycmo tres años, natamin eltimesam sat apvisqui rey.
Apnaclha apvisqui rey
6 Apnam nic nat apquilyimnanic apquilvisay Daniel, najan Ananías, najan Misael, najan Azarías, apquilmolhama ilhnic nat Judá. 7 Apquiltimec nic nat yatapvisqui moc apquilvisay apquilyimnanic: Daniel nic nat moc apvisay Beltsasar; Ananías nic nat moc apvisay Sadrac; Misael nic nat moc apvisay Mesac; Azarías nic nat moc apvisay Abed-nego. 8 Am nic nat eltamjoc Daniel esilhnanacpoc apanco napato Dios, ayinyema nintom najan uva ayingmenic, apcanama ilhnic nat apvisqui rey, yoyam eltovamcoc. Appamejitsacpec nic nat yatapvisqui, yoyam emyoc nintom singascama ontoc napato Dios. 9 Appasmec nic nat Dios. Apquiljalhnoc nic nat inyicje yatapvisqui Daniel appayvam.
10 Aptomjac nic nat yatapvisqui apcanya: —Ayacac coo visqui ingac rey, apcanama alhta yavamlha eltovamcoc quellhip. Apvitac sat ancoc am colhno apyimpeoc quellhip nipyesicsa apyovoclhojo apquilyimnanic, jeyanic sat omatong coo — nic nat aptomjac.
11 Aptomjac nic nat Daniel apcanya apquimja apmamyi nintom, apcanyomap eltamilquisic apquilyimnanic Daniel, Ananías, Misael najan Azarías.
Aptomjac nic nat Daniel apcanya: 12 —Altamjoc lhip eyipconic moc nintom, yoyam colhic singmesa nincoo. Ingyane sat lhip diez acnim jingilmecsic nintom ninganma ayitcoc legumbre, najan ningyam yingmin, vamlha maa. 13 Invocmec sat ancoc diez acnim, iyitquis sat actemaclha ingyimpejic nincoo najan apyimpeoc apquilyimnanic apquillhoy nintom ayinyema apvisqui rey. Natamin eyasamcojoc sat yavamlha etnejic — nic nat aptomjac Daniel.
14 Inlicavoc nic nat apvalhoc apquimja apmamyi nintom. Apyipconquic nic nat elmesacpoc moc nintom acvaycmo diez acnim. 15 Invocmec nic nat diez acnim. Apquiltamila ilhnic nat as apquilyimnanic, am nic nat elhno apquilyimnanic apquillhoy nintom ayinyema apvisqui rey. 16 Am nic nat esantimcasac mocjam yatapvisqui nintom najan ningyam uva ayingmenic. Apsantimcasquic nic nat mataa ninganma ayitcoc legumbre.
17 Cuatro ilhnic nat apquilyimnanic. Inyangvocmec nic nat apquilyascamco ayinyema Dios. Inmec nic nat apquilvalhoc actemaclha singyascasingvoyam aclhamoclhojo vaycajac. Apyascamco ilhnic nat innac Daniel actemaclha acvitay ningvanmoncama najan moc singvanmescama. 18 Invocmec nic nat acnim yoyam colhic acnalaclho apquilyimnanic apnaclha apvisqui rey. 19 Apquilpamejitsacpec nic nat apvisqui rey. Avanjec nic nat apquilyascamco Daniel, najan Ananías, najan Misael, najan Azarías, am nic nat colhno poc apquilyimnanic. 20 Yitnec nic nat apquilmalhnaycam apvisqui rey elyipconic apquilyimnanic. Inyangvocmec nic nat diez veces apquilyascamco apquilyimnanic, am nic nat elhno apquilyascamco apquiltemaclha najan quillaney poc apnaycam as yoclhilhma. 21 Apnaclhec nic nat maa Daniel acvaycmo lhama año aptimem apvisqui rey Ciro.
Introducción
1 Apwokmek axta Jerusalén ma'a wesse' apwányam Nabucodonosor, wesse' apwányam nak Babilonia, ekweykmo axta apqántánxo apyeyam apteme wesse' apwányam ma'a Joaquim, wesse' apwányam axta m'a Judá, apwakhegwokmek axta sẽlpextétamo apagkok ma'a tegma apwányam. 2 Apméssek axta Wesse' egegkok Nabucodonosor yaqwayam emok ma'a Joaquim, tén han apkeltamho elmok ekxámokma agko' ma'a aqsok kélmeykegkaxa ekhéyak axta m'a Dios tegma appagkanamap apagkok. Apnaqlákxeyk axta Nabucodonosor Babilonia m'a énxet apkelma axta, tén axta apnegkenwákxo aqsok kélmeykegkaxa élpagkanamaxche m'a apxátamakxa axta chá'a aqsok élmomnáwa, tegma appagkanamap agkok ma'a aqsok apcháyókxa'; 3 apkeltamhók axta han elyésha nepyeseksa israelitas ma'a wesse' apwányam apnámakkok, tén han kelwesse'e apketchek ma'a Aspenaz, apteme axta apkemha apmonye' m'a nepyeseksa apkeláneykha, yaqwayam enaqlanta', 4 cham'a wokma'ák apkeltaqmalma, meyke nak ekmaso apyókxa', apkelya'áseykegkoho aqsok, tén han apmopwancha'a, apkelya'ásegwayam nak ekyókxoho ektémakxa negya'ásegwayam, apmopwancha'a nak yaqwayam eltemeykha m'a wesse' apwányam apxagkok. Kólxekmósek sa' ma'a ektémakxa amya'a, tén han ektémakxa nak ektáxésamaxche m'a caldeos apkelpeywa. 5 Apkeltamhók axta han Nabucodonosor kólmések chá'a yókxoho ekhem aptéyak tén han vino, ekhawo ektémakxa nak chá'a apto m'a tén han apyá, cháxa wokma'ák nak, apkeltamhók axta kólxekmósek ekweykmoho apqántánxo apyeyam, keñe ekwokmo enxoho xa apyeyam nak, eltemeykha m'a aphakxa nak.
Daniel yetlo apkelxegexma'a apkeltamheykha m'a wesse' apwányam apxagkok
6 Daniel axta han apkelxegexma'a xa wokma'ák nak, tén han Ananías, Misael, Azarías, apkeleñama axta nepyeseksa Judá énxet'ák apagkok, 7 apkelyaqmagkassessama axta apkelwesey m'a apkemha apmonye' nak wesse' apwányam apxagkok: Beltsasar axta aptemessásekxak apwesey m'a Daniel; keñe Ananías aptemessásekxo apwesey Sadrac; tén axta Misael aptemessásekxo apwesey Mesac; keñe Azarías aptemessásekxo apwesey Abed-negó. 8 Xeyenmeyk axta eyke apwáxok Daniel mepasmehek apto tén han apyá vino m'a wesse' apwányam nak, yaqwayam enxoho metwasakpehe', tén axta apkelmaxnagkama m'a apkemha apmonye' nak wesse' apwányam apxagkok, megyánhek etwok xa nento nak, yaqwayam enxoho metwasakpehe'. 9 Taqmeleykha axta chá'a apwáxok apkelányo Daniel ma'a apkemha apmonye' axta wesse' apwányam apxagkok, hakte Dios axta keñamak apteméssesso, 10 axta eyke aptemék apkenagkama s'e:
—Eyekak ko'o m'a wesse', wesse' apwányam ahagkok nak. Hakte cham'a séltennasso ko'o yaqwánxa enxoho chá'a kóltók ma'a, tén han kólyenagkok, apwet'ak sa' agkok élesagko kélnaqta'a kéxegke nepyeseksa m'a pók wokma'ák nak, kéxegke sa' hélsexnenak yának amatñekxak ma'a wesse' apwányam.
11 Tén axta Daniel appaqhetchesa m'a aptaqmelchesso axta, apkeltémo axta etnehek apkeláneykha m'a apkemha apmonye' nak wesse' apxagkok, apkeláneykha axta m'a: Daniel, Ananías, Misael tén han Azarías. Aptáhak axta apcháneya s'e:
12 —Hegyepkón hana hẽlagkok negko'o ekweykmoho diez ekhem wánxa m'a pánaqte nento áwa' nak, tén han yegmen aqsa, negko'o nentáha nak xép apkeláneykha. 13 Wokmek sa' agkok xa ekhem nak, heghésho sa' ektáhakxa nápaqta'a m'a wokma'ák, kéléyak nak nento ektéma nak kélmésso apto m'a wesse' apwányam, keñe sa' henteméssesek negko'o ektáhakxa enxoho apwete egyempe'ék.
14 Leyawók axta han apwáxok ektáha axta apkeltaqmelchesso aptáhakxa apcháneya, apkelyepkeynchek axta ekweykmoho diez ekhem. 15 Wokmek axta diez ekhem, kéllanawok axta ektáhakxa nápaqta'a, keltásek axta, kalyeyha'ak axta han apyempe'ék nepyeseksa m'a apyókxoho wokma'ák, apteykegko axta chá'a wesse' apwányam apto. 16 Massék axta han apkelsákxésa aptéyak, tén han vino, yaqwayam axta eykhe chá'a etawagkok ma'a tén han énagkok ma'a ektáha axta chá'a apkeláneykha, pánaqte nento áwa' axta aqsa chá'a apkelsákxeyásak.
17 Apméssegkek axta Dios apmopwancha'a tén han apkelya'áseykegkoho aqsok xa cuatro wokma'ák nak, yaqwayam enxoho elya'ásegwók ekyókxoho ektémakxa nak chá'a weykcha'áhak, tén han negmowána nak nélxekmowásamáxche'. Apwanchek axta han ey'asagkohok Daniel ektémakxa m'a ekyókxoho aqsok negwete, tén han negwanmagko. 18 Xama axta ekwokmo ekhem apxeyenmakxa axta wesse' apwányam, yaqwayam kólnaqlakxak aphakxa m'a wokma'ák nak. Apnaqlákxeyk axta aphakxa m'a apteme axta apkemha apmonye' m'a apxagkok nak. 19 Apkelpaqhetchessek axta m'a wesse' apwányam, axta han ét'ak xama aphawo Daniel, Ananías, Misael tén han Azarías, nepyeseksa m'a apyókxoho wokma'ák nak; axta keñamak aptáha apkeláneykha m'a wesse' apwányam. 20 Apwet'ak axta han wesse' apwányam ekyeykhágwokmoho agko' apkelya'áseyak aqsok ma'a apyókxoho ekha nak apkelmopwancha'a, tén han ma'a apkelya'áseykegkoho nak aqsok ekpowásamáxche', apheykha axta m'a aptémakxa nak wesse' apwányam, hakte apkelya'ásegweykmek axta ekyókxoho m'a eyeyméxchexa nak agya'ásegwók, tén han negmowána aqsok. 21 Keñe axta apheykekxo Daniel ma'a ekwokmoho aptáha xama apyeyam apteme wesse' apwányam ma'a Ciro.
