Noeltime nasa malha apquilmomap
1 Apmascosquic alhta Cristo actemaclha malha ningmomalhca. Ingilvatescasquic ningyiplovquiscama singanamaclha. Noeliltamjo nasa eliltimjic mocjam malha apquilmomap. Eltime sat mataa malha enlhit metnaja apquilmomap.
2 Quip elaylhojo. Actomjac coo silanya quellhip: Apquilyiplovcasquic sat ancoc quellhip apquiltemaclha judíos yoyam colhic asoc monquinatquiscama apyimpeoc, ayajemo sat cotnejic quellhip melyasquiyam Cristo. 3 Pac otnejic ongvanic mocjam quellhip: Apquilyiplovcasquic sat ancoc quellhip apquiltemaclha judíos yoyam colhic asoc monquinatquiscama apyimpeoc. Incaymalhquic elsavojoc apquilyiplovquiscama acyovoclhojo singanamaclha. 4 Apquililtamjoc sat ancoc quellhip elyiplovcasojo apquiltemaclha judíos yoyam colhic altimesa apquilpeyvomo napato Dios, comascoc sat quellhip apquilpasmeyquiclha Cristo. Mongvityejec sat najan actemaclha singimlaycmo Dios. 5 Apnec nincoo ingilvalhoc Espíritu apanco Dios ayinyema mongyasquiyam. Yitnec aljalhneycam ingvalhoc yoyam jingiltimesic ningilpeyvomo Dios. 6 Ningilanalhco ningiltomja ninpasmeyquiclha Cristo Jesús. Colhenalhquejec mataa asoc monquinatquiscama ingyimpejic najan mepqui asoc monquinatquiscama ingyimpejic. Incaymalhquic coytic mongyasquiyam naysicsa ningyiplovquiscama actemaclha ningasicjayo.
7 Actamila anco actemaclha apquilyiplovquiscama quellhip siclhoc anco. ¿Soc alhta ayinyema apquilvatseycaoc quellhip apquilyiplovquiscama actomja nasoc anco? 8 Jave ayinyema Dios actemaclha apquilvatseycaoc quellhip. Ayinyemaclha Dios aptomja apcanama quellhip, malha apquileyvoycam. 9 Elyasamcojo quellhip: “Ningincajac sat ancoc ayimpascaoc ayitcoc, eyaveclhac sat sepo yompac actomja acyelaquiscama apyovoclhojo”. 10 Am oyascacmoc coo sictomja sicpasmeyquiclha Visqui ingac yoyam melyiplovsejec quellhip moc actemaclha. Dios sat eyanmongsiclha aptemaclha enlhit aptomja apquillhinganimquiscama quellhip. Colhenalhquejec sat apvisay enlhit naysicsa apyanmongsayclha Dios.
11 Quellhip elyalhinga. Pac olhenic sictemaclha mataa sillhicmoscama: Apquilanayquic napocja ingilyalhinga sicmasma apquiltemaclha judíos yoyam coytic asoc monquinatquiscama ingyimpejic. Acmiyovquic sat ancoc, mejelyamacsejec sat mataa judíos. Meltanovejec sat mataa amyaa ayinyema asoc timyescama. 12 Incaymalhquic colhic actimesa yamquilvana enlhitaoc apquillhinganimquiscama. Ayinyemaclha apquilanama yoyam eltingya quellhip asoc monquinatquiscama apyimpeoc.
13 Quellhip elyalhinga. Dios aptomja apquilanama quellhip, malha apquevoycam yoyam eltimjic mepqui apquilmomap. Noelquinatquis nasa: Nocollhen nasa apquilvalhoc apquiltomja mepqui apquilmomap, yoyam elvajanamcoc mocjam ayitsepma apnenyaoc apquiltemaclha nano. Elpasim sat mataa poc nipyesicsa quellhip, naysicsa apquilyiplovquiscama actemaclha ningasicjayo. 14 Ingvanquic onsavojo singanamaclha naysicsa ningyiplovquiscama ayimja amamyi acvisay: “Ingyasicjojo sat poc, acno apcasicjamacpo apanco” —intomjac mataa singanamaclha. 15 Noeltime nasa quellhip actemaclha asoc navjac. Intaclhec mataa moc, intovquic najan. Innasipquic mataa moc. Noellov nasa quellhip, malha yoyam eltovc poc.
Nintemaclha nano najan actemaclha ningiltamilcasomalhco inganco ayinyema Espíritu apanco Dios
16 Actomjac silanya quellhip: Eltamilsacpojo apanco ayinyema Espíritu apanco Dios. Comascoc sat apquilvajaneycaoc apquiltemaclha nano. 17 Ayinyemaclha nintemaclha nano actomja ayinmelhaycam Espíritu apanco Dios. Najan lha Espíritu apanco Dios aptomja apquinmelhaycam nintemaclha nano. Inlhenquic mataa ingvalhoc nintemaclha nano najan aptemaclha Espíritu apanco Dios, malha alnapomalhca intomjac ingvalhoc. Colapvanquejec quellhip elyiplovsic apquilmayjayoclha apanco. 18 Apquililyajaclhoc sat ancoc quellhip apcanama Espíritu apanco Dios, comascoc sat apquilanyomap quellhip elyiplovsic singanamaclha actomja malha avisqui apancaoc.
19 Cotnatsalhquejec mataa nintemaclha nano: actemaclha ningilanatama najan actemaclha nintamongvaycmolhma najan actemaclha mongiltamilcasomalhco inganco. 20 Najan actemaclha ningayo quilaycmasquiscama acyitsomalhca Dios najan actemaclha nintimem apyojolhma najan actemaclha nintanoncama najan actemaclha ningilatingmoctamo najan actemaclha ningilmiyoycam intava najan actemaclha ninlom najan actemaclha ningiltemo ontimjic ningimja ingmamyi najan actemaclha colhno moc ingvalhoc najan actemaclha ningilhpansomalhca. 21 Najan actemaclha ningyasipquiscama najan actemaclha mongascama ongyinic anmin najan mongascama ontoc nintom najan acno moc aclhamoclhojo asoc. Altimnasquic alhta siclhoc quellhip, pac oltimnasiclhoc mocjam: Ningilvajanamquic sat ancoc as asoc, mongvanquejec ongilpalhavomoc Dios apquilnancascama.
22 Asoc altamila eyca, malha acyilhna ayinyema Espíritu apanco Dios acvisay: actemaclha ningasicjayo najan actemaclha acpayjayclha ingvalhoc najan actemaclha actamilaycam ingvalhoc najan actemaclha nintamilquiscamo ingvalhoc najan actemaclha acliclamo ingvalhoc najan actemaclha ningamliyam najan actemaclha mongilvatseycaoc ningyiplovquiscama. 23 Najan actemaclha mepqui ningyimtalhnesomalhco inganco najan actemaclha ningiltamilcasomalhco inganco. Am coyitnac lhama singanamaclha yoyam conmelham as asoc. 24 Apquilvatsamquic apquiltemaclha nano enlhitaoc apquiltomja apquilyipitcayo Cristo. Inmasquec actemaclha anco ingvalhoc nano. 25 Ningyiplovcasquic nincoo actemaclha ayinyema Espíritu apanco Dios. Espíritu Santo aptimesquiscama ingvalhoc yoyam ongyiplovcasojo.
26 Incaymalhquic mongilyiplovsic mocjam actemaclha ningilyimtalhnesomalhco inganco najan actemaclha ninglovquiscama ingmoc najan actemaclha ningyasipquiscama nipyesicsa ingnaymacoc.
Kóllenxanmoho kélwasqápeykekxoho eñama ekmasse kélteme kélásenneykha naqsa
1 Egméssegkek axta negko'o Cristo yaqwayam mantamhagkek kaxwók máxa kélásenneykha naqsa. Kólwasqápekxoho kólmeyók xa ekmasse nak kélteme kélásenneykha naqsa, nágkóltemekxa makham kélásenneykha naqsa.
2 Kóleyxho sa sekpeywa. Ko'o Pablo éltennássek ko'o kéxegke, kél'awo enxoho kóllanaksek ma'a ektémakxa nak chá'a sẽlyenyekhássesso nekha egyempehek, máxa mékoho sa' etnehek ma'a Cristo. 3 Peyk altennásekxohok makham kéxegke, énxet ektáhakxa enxoho kélyenyekhássesso nekha apyempehek, yáneykpok chá'a elának ekyókxoho m'a éltémókxa nak antéhek segánamakxa. 4 Kéxegke kélmámenyého nak exének Dios kélteme kélpéwomo eñama kéllane m'a éltémókxa nak antéhek segánamakxa, kamaskok kóltéhek kélyepetcheyo m'a Cristo; kóltaqnók ma'a ektémakxa nak ektaqmeleykha apwáxok henlanok ma'a Dios. 5 Keñe negko'o nélhaxanmeyk henxének Dios nenteme nélpéwomo eñama Espíritu apmopwána, segyánchessesso nak nenteme magya'ásseyam. 6 Cristo keñamak, méko kaxwók katnehek ma'a ekha enxoho sẽlyenyekhássesso nekha egyempehek essenhan ma'a méko enxoho. Akke tásek keytek negko'o m'a magya'ásseyam, cham'a magya'ásseyam ekha nak ektamheykha eñama nélásekhamaxkoho.
7 Tásek axta kélxega kéxegke. ¿Yaqsa axta megkahayo kólyahakxohok kéxegke m'a amya'a ekmámnaqsoho nak? 8 Háwe axta Dios apteméssesso kéxegke xa, cham'a aptáha axta apkelwóneykha kéxegke. 9 Kaxénaxkohok chá'a “ketsék kempáseyak kampasagkok apyókxoho m'a hótáhap kélyélaqtésso nak”, 10 makke ko'o ay'ásseykmok Wesse' egegkok peya megkatnehek kéxegke mók ektémakxa élchetamso kélwáxok; Dios sa' eyke eñássesagkohok ma'a énxet aptawassáseykencha'a nak chá'a élchetamso kélwáxok kéxegke, megkeyxek ma'a aptémakxa enxoho énxet.
11 Keñe ko'o élyáxeg'a, élenxanakmók agkok ko'o makham séltémo kalanaxchek ma'a sẽlyenyekhássesso nak nekha egyempehek, meheyaqmasha axta ko'o m'a judíos, hakte ektemék axta agkok ko'o xa, megkallókasek axta judíos ma'a amya'a ekxénamaxche nak Cristo kélyepetchesso axta aqsok ektegyésso. 12 Keñe m'a aptawassáseykencha'a nak chá'a élchetamso kélwáxok kéxegke, émenyeyk nak la'a ko'o elyaqténhok apagko' apancha'ák.
13 Élyáxeg, kélwóneyha axta kéxegke yaqwayam kamaskok kéltamhéyak máxa kélásenneykha naqsa. Eyke nágkólásenneykxa aqsa kéxegke xa ekmasse nak kélteme máxa kélásenneykha naqsa, yaqwayam kóllának ma'a aqsok ekyespagko nak kélyókxa. Kólpásem aqsa chá'a kélmók yetlo kélásekhamaxkoho. 14 Hakte keso ekteme nak eksawhomo ekyókxoho ektémakxa nak eknaqtáxésamaxche segánamakxa s'e: “Yásekhoho pók, ekhawo ektémakxa nak apchásekhamakpoho apagko' xép.” 15 Kóláwho sa', hakte kéltemék sa' agkok kéxegke m'a ektémól'a aqsok nawhak eklo kaltakxaxche tén han katwok mók, kélmassésamaxche kélagko' sa' kóltéhek kéxegke.
Espíritu tén han negyespagko nak nenteme énxet
16 Ékeso éñamakxa sektáha nak séláneya kéxegke s'e: kólteme chá'a m'a apkeltémókxa nak chá'a kóltéhek ma'a Espíritu, nágkóltegyaha chá'a yaqwayam kagkések ekpayheykekxa kélwáxok ma'a aqsok ekmaso kélyespagko nak. 17 Hakte énmexma Espíritu m'a aqsok ekmaso negyespagko nak, apkenmexma nahan Espíritu m'a aqsok ekmaso negyespagko nak. Élenmexamaxche nahan katnehek xa ánet nak. Cháxa keñamak megkólmowagko nak kéxegke kóllának ma'a kélmakókxa enxoho kóllána'. 18 Aptemék agkok kéxegke appékessáseyak ma'a Espíritu, kamaskok kóltéhek kélsawhomo kélyaheykekxoho m'a éltémókxa nak antéhek segánamakxa.
19 Yahamok chá'a agyekpelkohok aqsok apkeláneyak ma'a énxet apkeláneykegkoho nak chá'a aqsok ekmaso apkelyespagkamakxa nak: elanagkok chá'a m'a ekmeyámáxchexa nak antéhek negmeykha mansexta, tén han ma'a aqsok ekmanyása, tén han apkelyeykháseykegkoho nak chá'a apkelmeykha m'a megkalmopsexta'a, 20 elpeykeshok nahan chá'a m'a aqsok kéleykmássesso, kelyohóxma nahan chá'a etnahagkok. Melwátéssemek nahan aptaqnagko pók, tén han apkelenmexamap, tén han apnathe. Ñohok nahan chá'a ellók, etekkessesek chá'a apkelenmexamap énxet, tén han apkexpánchásamap, apkelánésamakpoho xama nekha nahan chá'a etnéssesek énxet. 21 Apyásekkesso aqsok apagkok pók nahan ma'a, anmen át'ák, megyésso etawagkok aptéyak, tén han mók aqsok ekhawo nak xa. Éltennássek ko'o kéxegke seyésa xa, ekhawo sektémakxa axta sélanagkama m'a nano' axta, énxet apteme nak chá'a xa ektéma nak mexkayek sa' ma'a aptémakxa nak Wesse' apwányam Dios.
22 Espíritu eyke apteme aptekkesso m'a nélásekhamaxkoho, ekpayheykekxa egwáxok, meyke ektáhakxa egwáxok, mampekhésamaxche', negápeykha egmók, ektaqmeleykha egwáxok, magyenyaweykha, 23 megkeymáxkoho egwáxok, tén han negmowána nenláneykegkoho nentémakxa. Méko xama enxoho énmexma segánamakxa xa ekyókxoho aqsok nak. 24 Keñe m'a Cristo énxet'ák apagkok nak, apkelchexneyk kaxwók aqsok tegyésso m'a apkeltémakxa nak chá'a énxet melya'assáxma yetlo m'a aqsok apkelyespagkamakxa nak tén han aqsok ekmaso apkelmopmenyého nak. 25 Naqsók agkok negko'o segmésso ekyenneykha egyempehek ma'a Espíritu, kéméxcheyk nahan óghok etnehek apkeláneykha negyókxa.
26 Tásek sa' mantéhek néleymáxkoho, mantekkesek sa' nahan nélenmexamaxche', tén han negnathe nepyeseksa egnámakkok.
