Apmomap Jesús
(Mt 26.47-56Mr 14.43-50Lc 22.47-53)1 Natamin apquilmalhnancama alhta aplhinga mocjam Jesús. Apquillhalhmaa alhta apquiltamsoycaoc. Apquilmiyaclhec alhta tap alvata acvisay Cedrón. Yitnec alhta maa yoclhilhma (amyip). Apvoclhec alhta Jesús najan apquiltamsoycaoc. 2 Apyasamcoc alhta najan as amyip Judas, aptomja apcanem emacpoc Jesús. Ayinyemaclha apcaneyclhec alhta mataa maa Jesús najan apquiltamsoycaoc. 3 Lhama alhta apquilanyamcaa Judas lhama tropa singilpilhtetemo najan apquiltamilquiscama tingma apponquinomap, apquilinyema fariseos najan apquilimja apmamyi sacerdotes. Apquilsovquic alhta apquiltotseycaoc apmamyi talha najan calevascama najan apquilmaycam (sovo acvinatem najan moc apquilmaycam). Apquilvoclhec alhta maa amyip.
4 Apyasamcoc alhta Jesús aclhamoclhojo asoc, yoyam cotnejic. Apquilamyilhamquic alhta Jesús. Aptomjac alhta apquilanya:
—¿So apquiltingya yi? —alhta aptomjac.
5 Apquilatingmavoc alhta singilpilhtetemo:
—Jesús co Nazaret ninquitamac —alhta apquiltomjac.
Apcatingmavoc alhta Jesús:
—Coo nac aso —alhta aptomjac.
Apcanvocmoc alhta lhama apquillhalhmaa Judas, aptomja apcanem yoyam emacpoc Jesús. 6 Lhama alhta apquillinga singilpilhtetemo Jesús appayvam: “Coo nac aso.” Yejemoc alhta apquilalhingaoclho apnalhpolintamo nalhpop. 7 Yejemoc alhta apquilmalhna mocjam Jesús:
—¿So apquiltingya yi? —alhta aptomjac.
Apquilatingmavoc alhta:
—Jesús co Nazaret ninquitamac —alhta apquiltomjac.
8 Aptomjac alhta inyicje: Coo nac aso. Selquitamsama sat ancoc coo, elane sat eltajiclha sellhalhmaa —alhta aptomjac.
9 Invocmec alhta acvamlha aplhanmaclha Jesús: “Am alhta alhnanacmoc lhama enlhit selmescama alhta coo Tata.” 10 Yejemoc alhta aplica sovo acvinatem apmaycam Simón Pedro. Apticponquic alhta Pedro. Apyatemenquic alhta apaycoc actamilaclha enlhit apvisay Malco. Apquimja apmamyi sacerdote apquilancam alhta Malco. 11 Aptomjac alhta Jesús apcanya Pedro:
—Ingyitsiclha alhancoc sovo acvinatem. ¿Apcanayqui ya lhquip movanqueje oynic asoc acmasca ayinyema coo Tata, seyanem alhta yoyam oynic? —alhta aptomjac.
Jesús napato apquimja apmamyi sacerdote
(Mt 26.57-58Mr 14.53-54Lc 22.54)12 Yejemoc alhta appasmacpo singilpilhtetemo najan judíos apquilancam. Apmacpec alhta Jesús. Apquilpilhtetacpec alhta. Aplhalhma alhta singilpilhtetemo apvisqui. 13 Apquilyantamaclhec alhta Jesús Anás tingma pac. Caifás apipyata Anás. Apquimja apmamyi sacerdote alhta Caifás as año nac jay. 14 Eyca as Caifás aptomja alhta apquilanya siclho judíos: “Intasi nac ingyitsapoc lhama enlhit acyanmongam apnaymacoc lhalhma anco.”
Apyinimquiscama Pedro
(Mt 26.69-70Mr 14.66-68Lc 22.55-57)15 Innec alhta apyantama Jesús. Apyiplaclhec Simón Pedro najan poc apquiltamescama. Aptalhningvocmec alhta Jesús najan poc apquiltamescama Caifás tingma pac, apquimja apmamyi sacerdote. Ayinyemaclha apyicpilcoc alhta Caifás, malha aptimem poc alhta. 16 Apquiningvocmec alhta Pedro apatong tingma. Yejemoc alhta aptepa apquiltamescama aptomja apyicpilquemo Caifás. Appamejitcasquic alhta siclho quilvana actamilquiscama atong. Apcanayquic alhta, yoyam etalhningvota Pedro. 17 Yejemoc alhta actomja quilvana actamilquiscama atong ayanya Pedro:
—¿Jave ya lhquip Jesús apquiltamescama? —alhta intomjac.
Apcatingmavoc alhta Pedro:
—Jave coo —alhta aptomjac.
18 Eyquey alhta intomjac. Apquilvatnec alhta talha. Apcanam alhta nicja talha apquilancam najan singilpilhtetemo. Apquilhtamquic alhta talha. Appalhavocmec alhta maa Pedro. Apquilhtangvocmec alhta lhama talha.
Jesús napato apquimja apmamyi sacerdote
(Mt 26.59-66Mr 14.55-64Lc 22.66-71)19 Aptomjac alhta apquimja apmamyi sacerdote apcanya Jesús:
—¿Soc enlhit lhip apquiltamsoycaoc qui? ¿Jalhco actema apquillhicmoscama lhip? —alhta aptomjac.
20 Apcatingmavoc alhta Jesús:
—Am oyilhalhcoc coo siltimnascama amyaa enlhit lhalhma anco. Allhicmosquic coo mataa amyaa apcaneyquiclhilha judíos. Congne tingma apcaneyquiclhilha najan congne tingma apponquinomap. Am oyilhalhcoc alhta siltimnascama amyaa. 21 ¿Soctomja selmalhnamcaa nac coo? Ilmalhna sat lhip enlhitaoc apquillingay alhta siltimnaycam. Apquilyasamcoc actemaclha siltimnascama alhta —alhta aptomjac.
22 Lhama alhta apquiltimnasa Jesús. Yejemoc alhta apticponga napaat lhama singilpilhtetemo apquinmaycamo lhama. Aptomjac alhta singilpilhtetemo apcanya Jesús:
—¿Intasi ya apcatingmoctama lhip actema nac jay napato apquimja apmamyi sacerdote? —alhta aptomjac.
23 Apcatingmavoc alhta Jesús:
—¿Asomco ya actomjaclha sicpayvam? Ilhen sat lhip acvisay acmasom. ¿Intasi ya actomjaclha sicpayvam? ¿Soctomja seticponga nac lhip? —alhta aptomjac.
24 Apcanayquic alhta Anás elpilhtetacpoc Jesús. Apcapajasquic alhta apnaclha Caifás, aptomja apquimja apmamyi sacerdote.
Apyinimquiscama mocjam Pedro
(Mt 26.71-75Mr 14.69-72Lc 22.58-62)25 Apquilhtec alhta mocjam talha Pedro. Yejemoc alhta apquiltomja apquilanya Pedro:
—¿Jave ya lhquip lha Jesús apquiltamescama? —alhta apquiltomjac.
Apcatingmavoc alhta Pedro actemaclha apyinimquiscama:
—Jave coo —alhta aptomjac.
26 Apnec alhta maa apquilancam apquimja apmamyi sacerdote. Aptomja alhta apmolhama apyatemenquiscama alhta Pedro apaycoc.
Aptomjac alhta apquilancam apcanya Pedro:
—Acvitac alhta lhip aplhalhma Jesús yoclhilhma maa —alhta aptomjac.
27 Aptomjac alhta Pedro actemaclha mocjam apyinimquiscama. Yejemoc alhta acpayva tataa.
Jesús napato Pilato
(Mt 27.1-2Mt 11-14Mr 15.1-5Lc 23.1-5)28 Apnec alhta mocjam Jesús tingma pac Caifás. Yejemoc alhta apquilyantamaclho Jesús tingma pac aptomja yatapvisqui co Roma. Acmopeyam congne alhta intomjac. Am alhta elantalhningvocmoc judíos Pilato tingma pac. Incacoc alhta apnenyaoc judíos eltimjic comasis apyimpeoc napato Dios. Ayinyemaclha apquililtamjoc alhta eltovamcoc pascua aptom actemaclha actamila apquilvalhoc. 29 Yejemoc alhta aptepa Pilato. Aptomjac alhta apquilanya:
—¿Soc asoc acmasom pa ellhenic quellhip? —alhta aptomjac.
30 Apquilatingmavoc alhta enlhitaoc:
—Paj ancoc aptamjaycam acmasom as enlhit, mongvanquejec nincoo ongyantamentac apnaclha lhip —alhta apquiltomjac.
31 Aptomjac alhta Pilato apquilanya enlhitaoc:
—Elyantamiclha sat quellhip maa. Yitnec quellhip apquilanamaclha apancaoc. Elpeyvasiclhojo sat aptemaclha as enlhit —alhta aptomjac.
Apquilatingmavoc alhta enlhitaoc:
—Nincoo ningilvisay judíos. Mongvanquejec nincoo ongilanic, yoyam ematong lhama enlhit —alhta apquiltomjac.
32 Invocmec alhta aplhanmaclha Jesús actemaclha yoyam ematong. 33 Yejemoc alhta aptalhningvoclho mocjam Pilato congne tingma. Apcanyam alhta Pilato Jesús. Aptomjac alhta apcanya:
—¿Lhip ya judíos apvisqui apancaoc? —alhta aptomjac.
34 Apcatingmavoc alhta Jesús:
—¿Selmalhnaycam apanco ya lhquip, inlhoyqui laa ayinyema apquiltimnascama apnaymacoc? —alhta aptomjac.
35 Aptomjac alhta Pilato apcanya Jesús:
—Jave coo judío. Apquilyantamentac lhac lhip apnaymacoc najan apquilimja apmamyi sacerdotes. ¿Jalhco lhac aptomjaclha lhip? —alhta aptomjac.
36 Apcatingmavoc alhta Jesús:
—Am conyemac coo silnancascama as nalhpop. Intimec sat ancoc silnancascama as nalhpop, elnapacpoc sat singilpilhtetemo ajancaoc, yoyam jelmeyvoc coo. Colapvanquejec jelmoc judíos. Jave coo silnancascama as nalhpop —alhta aptomjac.
37 Aptomjac alhta mocjam Pilato:
—¿Naso ya aptomja lhip Apvisqui? —alhta aptomjac.
Apcatingmavoc alhta Jesús:
—Naso coo sictomja Visqui. Acvaac coo aso nalhpop ayinyema sictiyam alhta sictomja enlhit. Altamjoc olngacsic amyaa actomja nasoc anco. Apquiljalhnoc mataa sicpayvam enlhit apquiltomja apquilyajayquiclho amyaa actomja nasoc anco —alhta aptomjac.
38 Aptomjac alhta Pilato apcanya Jesús:
—¿Soc asoc actomja nasoc anco? —alhta aptomjac.
Aplhenamap Jesús yoyam ematong
(Mt 27.15-31Mr 15.6-20Lc 23.13-25)Natamin appamejitquiscama Pilato aptiyapveclho mocjam tingma. Aptomjac alhta Pilato apquilanya enlhitaoc:
—Am coo otac apmapsom as enlhit —alhta aptomjac. 39 Yitne inyicje apquiltemaclha quellhip, yoyam oyamyiclhac lhama enlhit apquilpilhtetomap nipyesicsa caya. ¿Apquililtamjo ya quellhip oyamyiclha judíos apvisqui apancaoc? —alhta aptomjac.
40 Yejemoc alhta apquilpalhamamcaa enlhitaoc:
—Jave eyqui lha, Barrabás eyca —alhta apquiltomjac apquilpamesma. Barrabás eyca aptomja enlhit apminyilhma.
Jesús apmomap
(Mt 26.47-56Mc 14.43-50Lc 22.47-53)1 Apteyepmeyk axta Jesús yetlo apkeltáméséyak apmáheyo emyekxak ma'a neyp wátsam aktog Cedrón natámen apteme appeywa xa. Yetnegkek axta anhan kélcheneykekxexa aqsok ma'a, aptaxnegweykenxa axta Jesús yetlo apkeltáméséyak. 2 Apya'áseykegkók axta anhan Judas ma'a yókxexma nak, cham'a Judas apmáheyo axta yának etlakkassesek emakpok ma'a Jesús, hakte hágkaxwe axta elya'ásekxak chá'a yánchásekxak Jesús apkeltáméséyak ma'a. 3 Apweykmek axta Judas yetlo apkelxegexma'a sẽlpextétamo m'a, tén han nápakha m'a aptaqmelchesso axta chá'a tegma appagkanamap, apkeláphasso axta m'a apkelámha apmonye'e nak apkelmaxnéssesso Dios énxet'ák apagkok, tén han ma'a fariseos. Yetlo apkelmeykha axta nahan apkelweykmok ma'a, cháléwasso, tén han ma'a yámet eyáléwomól'a naw'a. 4 Apkelanyexeykegkek axta eyke Jesús, hakte apya'áseykegkók axta yaqweykenxa katnehek, axta aptemék apkelmaxneyeykencha'a s'e:
—¿Yaqsa kélchetama?
5 Axta aptemék apkelátegmoweykegko s'e:
—Negketámak negko'o m'a Jesús apkeñama nak Nazaret.
Keñe axta Jesús aptéma s'e:
—Ko'o neykhe s'e.
Judas axta anhan apkelxegexma'a m'a, cham'a Judas ektáha axta appelakkassesso apkeltémo emakpok ma'a Jesús. 6 Xama axta aptéma Jesús apkelanagkama s'e: “Ko'o neykhe s'e”, apkelaqxegeykegkokxeyk axta, keñe apkelyaqneneykegko náxop. 7 Axta aptemék makham Jesús apkelmaxneyeykekxoho s'e:
—¿Yaqsa kélchetama?
Keñe axta aptéma makham apkelátegmoweykegkokxo s'e:
—Negketámak negko'o m'a Jesús apkeñama nak Nazaret.
8 Axta aptemék makham Jesús apkelanagkama s'e:
—Éltennássek xeyk sektáha ko'o. Ko'o sa' agkok élchetámak, kólho sa' eltaqhekxak se'e sélyetleykha nak.
9 Temegkek axta xa, yaqwayam enxoho katnehek ma'a aptémakxa axta appeywa Jesús aptéma axta s'e: “Táta, mexyáneykmok xama enxoho m'a sélmésso axta exchep.” 10 Tén axta m'a Simón Pedro, ekha axta sókwenaqte apagkok aplekweykekxo, apyaqténchessegkek axta apeykok ekpayhókxa apkelya'assamakxa m'a xama apwesey axta Malco, apchásenneykha axta m'a apkemha apmonye' nak apkelmaxnéssesso Dios énxet'ák apagkok. 11 Axta aptemék Jesús apkenagkama Pedro s'e:
—Yaqxegkásekxa axagkok sókwenaqte apagkok. Egkéssek agkok ko'o Táta yaqwayam añegkohok ma'a seklegeykegkoho peya nak hegkések, ¿malyahakxéya sa' ko'o?
Jesús kélya'asso aphakxa Anás
(Mt 26.57-58Mc 14.53-54Lc 22.54)12 Apmomchek axta Jesús ma'a sẽlpextétamo, yetlo m'a sẽlpextétamo apkemha apmonye', tén han judíos aptaqmelchesso axta m'a tegma appagkanamap, apnaqtehetchessegkek axta apmék. 13 Axta kélya'assók sekxók ma'a Anás apxagkok, hakte Caifás axta apepyáta' m'a, apteme axta apkemha apmonye' apkelmaxnéssesso Dios énxet'ák apagkok xa yeyam nak. 14 Cháxa Caifás aptéma axta apkelanagkama judíos ektaqmela yetsapok xama énxet ekyánmaga m'a apyókxoho énxet'ák nak.
Pedro mexeyenma apya'áseyak Jesús
(Mt 26.69-70Mc 14.66-68Lc 22.55-57)15 Apyetlamchek axta Simón Pedro m'a Jesús, tén han ma'a pók apkeltáméséyak axta m'a Jesús. Nanók apweteykxa axta nahan pók Jesús apkeltáméséyak ma'a apkemha apmonye' nak apkelmaxnéssesso Dios énxet'ák apagkok, axta keñamak aptaxnamo xamo' Jesús ma'a kañe' tegma; 16 keñe axta Pedro apkenmeykencha'a yókxexma, nekha axta m'a átog. Apteyepmeyk axta nahan ma'a Jesús apkeltáméséyak ektáha axta nanók apweteykxa m'a apkemha apmonye' nak apkelmaxnéssesso Dios énxet'ák apagkok, appaqhetchessegkek axta nahan ma'a kelán'a ektaqmelchesso axta m'a átog, aptaxnéssegkek axta kañe' m'a Pedro. 17 Axta entemék kelán'a ektaqmelchesso axta átog élmaxneyeykencha'a Pedro s'e:
—¿Háweya exchep xama apkeltáméséyak nak xa énxet nak?
Axta aptemék Pedro apchátegmoweykegko s'e:
—Ma', háwe ko'o.
18 Apkelwatneykegkek axta nahan táxa m'a ektáha axta kélásenneykha tén han ma'a apkeltaqmelchesso axta tegma appagkanamap, hakte samágek axta m'a, apheykha axta apkelaxteykegko táxa m'a. Aphegkek axta nahan xamók Pedro m'a, apkextama xamo' ma'a táxa.
Apkemha apmonye' apkelmaxnéssesso Dios énxet'ák apagkok apkelmaxneyeykha Jesús
(Mt 26.59-66Mc 14.55-64Lc 22.66-71)19 Apcheynamók axta apkelmaxneyeykha Jesús apkeltémo ey'asagkohok apkeltáméséyak ma'a apkemha apmonye' nak apkelmaxnéssesso Dios énxet'ák apagkok, tén han ma'a ektémakxa nak chá'a apkelxekmósso. 20 Axta aptemék apkenagkama Jesús se'e:
—Apaqméthok chá'a ko'o meyke seyeygweykekxa nápaqta'awók énxet'ák; alxekmóshok nahan chá'a énxet'ák ma'a kañe' apchaqneykekxexa nak judíos, tén han ma'a kañe' tegma appagkanamap, apchaqneykekxexa nak chá'a apyókxoho judíos; meyxaxkók chá'a ko'o axének aqsok. 21 ¿Yaqsa ektáha sélmaxneyáncha'a nak ko'o? Elmaxneyha m'a ektáha axta apkellege sekpeywa, sa' eltennaksek xép yaqsa séltennassama chá'a ko'o m'a. Apkelya'ásegkók séltennassama axta chá'a ko'o m'a.
22 Xama axta aptéma appeywa Jesús xa, aptekpagkassegkek axta nápát xama m'a aptaqmelchesso axta tegma appagkanamap, axta aptemék apkenagkama s'e:
—¿Keya kéltémakxa kólátegmowagkok apkemha apmonye' apkelmaxnéssesso Dios énxet'ák apagkok xa?
23 Keñe axta Jesús aptéma apchátegmoweykegkokxo s'e:
—Sagkek agkok sektáhakxa seyáneya, héltennés yaqsa eyesagko; tásek agkok nahan sektáhakxa seyáneya ¿yaqsa ektáha setekpaga nak?
24 Tén axta Anás apcháphassama yetlo kélnaqtete apmék ma'a aphakxa axta Caifás, apteme axta apkemha apmonye' apkelmaxnéssesso Dios énxet'ák apagkok.
Pedro mexeyenma makham apya'áseyak ma'a Jesús
(Mt 26.71-75Mc 14.69-72Lc 22.58-62)25 Aphegkek axta makham Pedro m'a nekha táxa, apkextama. Axta kéltemék makham kélmaxneyeykencha'a s'e:
—¿Háweya exchep xama apkeltáméséyak nak xa énxet nak? Axta eyke aptemék Pedro mexeyenma s'e:
—Ma', háwe ko'o.
26 Tén axta apkelmaxneyeykencha'a makham xama m'a apkemha apmonye' apkelmaxnéssesso Dios énxet'ák apagkok apkeláneykha, apnámakkok axta m'a apyaqténchessama axta apeykok ma'a Pedro, axta aptemék se'e:
—¿Ya exchek ót'ak ko'o exchep apxegexma m'a nélwokmo exchek ma'a kélcheneykekxexa nak aqsok?
27 Axta eyke exeyenmak makham ma'a Pedro, yetlómók axta nahan ekpáwà tat'a kennawo'.
Jesús kélyentama aphakxa Pilato
(Mt 27.1-2Mt 11-14Mc 15.1-5Lc 23.1-5)28 Kélyentamomchek axta Jesús tegma apyawe apagkok axta m'a apkeláneykha apchókxa romanos, apkeñama m'a Caifás apxagkok. Axta nahan elántaxnegweykekxak makham judíos ma'a tegma apyawe wesse' apxagkok, hakte kaxwók axta peyk kalse', apkelántaxnegwákxeyk axta agkok ma'a, etwasha axta m'a ektémakxa nak segánamakxa ekxeyenma nak eyáxñeyo egyempehek, keñe axta mopwancha'ak etáswók ma'a nento ektámáxche nak ekhem melwagqayam judíos kéltéma nak Pascua. 29 Axta keñamak apteyapma Pilato yaqwayam elpaqhetchesek. Axta aptemék apkelanagkama s'e:
—¿Yaqsa aqsok kélxéna kéxegke eksexnenagko xa énxet nak?
30 Axta aptemék apkelátegmoweykegko s'e: Kaxtemék axta metne apkelane aqsok ekmaso, magyentegkásenteyk axta exchep.
31 Tén axta Pilato aptéma apkelanagkama s'e:
—Kólyentemekxa sa' kéxegke, kólyekpelkoho sa' ekhawo ektémakxa nak ma'a segánamakxa kélagkok.
Keñe axta m'a apkelámha apmonye' nak judíos aptéma apkelátegmoweykegkokxo s'e:
—Akke kapayhawok negko'o agának emátog xama énxet nenteme nak judíos.
32 Temegkek axta m'a aptémakxa axta appeywa Jesús apxeyenma yaqweykenxa katnehek apketsapma. 33 Aptaxneykekxeyk axta makham Pilato m'a kañe' apxagkok apyawe, apwóneykha axta Jesús, keñe aptéma apkelmaxneyeykencha'a s'e:
—¿Xépya apteme judíos Wesse' apwányam apagkok?
34 Axta aptemék Jesús apkenagkama s'e:
—¿Sélmaxneyeykha apagkóya exchep xa aptáhakxa nak seyáneya, pók énxet enxeykel'a apkeltennáseykha?
35 Axta aptemék apchátegmoweykegko Pilato s'e:
—¿Judío enxeykel'a ko'o? Apkelenyémeyo xamo' xeyk xép séntegkáseykenta ko'o tén han ma'a apkelámha apmonye'e nak apkelmaxnéssesso Dios énxet'ák apagkok. ¿Yaqsa aqsok apkeláneya exchep?
36 Keñe axta Jesús aptéma apchátegmoweykegkokxo s'e:
—Háwe ko'o wesse' apwányam keso náxop. Kaxtemék axta sekteme, exek axta séláneykha yaqwayam elnapakpok yaqwayam enxoho ko'o mehélmések ma'a judíos. Háwe eyke ko'o sektémakxa wesse' apwányam se'e.
37 Tén axta aptéma apkelmaxneyeykencha'a Pilato s'e:
—¿Wesse' apwányam neyke exchep?
Axta aptemék apchátegmoweykegko Jesús se'e:
—Aptemék xép appeywa: ko'o wesse' apwányam. Ektéyeykmek axta ko'o, ekwayak axta anhan keso náxop, yaqwayam enxoho axének ma'a amya'a ekmámnaqsoho nak. Yeyxhok chá'a ko'o sekpeywa m'a apyókxoho apkelmopmenyého nak amya'a ekmámnaqsoho.
38 Axta aptemék apkenagkama Pilato s'e:
—¿Yaqsa m'a amya'a ekmámnaqsoho nak?
Jesús apxénamap yaqwayam emátog
(Mt 27.15-31Mc 15.6-20Lc 23.13-25)Aptépeykekxeyk axta makham Pilato apmáheyo elpaqhetchásekxak makham judíos natámen apkelmaxneyeykha m'a Jesús. Axta aptemék apkelanagkama s'e:
—Mót'ak ko'o aqsok ekmaso apkelane s'e énxet nak. 39 Yetneyk eyke kéltémakxa chá'a kéxegke, kólának chá'a ayenyekxak énxet apmomap ma'a neyseksa élánamáxche m'a ekhem megkólwagwayam Pascua: ¿kéltamhóya ayenyekxak ko'o judíos Wesse' apwányam apagkok?
40 Apyókxoho axta makham aptáhak apkelyennaqtésawo apkelpeywa s'e:
—¡Ná ényekxa xa! ¡Ényekxa m'a Barrabás!
Ekmaso aptémakxa axta m'a Barrabás.
