Macmescama Dios acyanmongam apsilhnanomap
1 Asoc acmatnam macmescama Dios acyanmongam apsilhnanomap enlhit acvisay actamila santísima. Apquilanyacpec sacerdotes yavamlha eltimjic: 2 Incaymalhquic enlhit aptoscama ematong payjoc acticyovamaclha apnatoscama, yoyam colhic alvatna talha, colhic sat acyanquina ema pac netin altar najan (niyava) altar apquilvatnamaclha. 3 Colhic sat alvatna talha acyovoclhojo aptipilhmoc apvalhoc apmatnam najan apyicpacyic. 4 Najan maa anit alyayem pac najan aptipilhmoc acyipitcay alyayem pac, acyipitcay lomos, najan acyipitcay apicjic. Colhic sat alvatna talha apicjic najan alyayem pac. 5 Elvitic sat talha sacerdote netin altar apquilvatnamaclha, cotnejic sat macmescama Dios actemaclha ningayo. Acvisay macmescama Dios acyanmongam apsilhnanomap apanco enlhit. 6 Elpasmiclhac sat sacerdotes eltovamcoc apjapitic, payjoc lugar acponquinomalhca, ayinyema aptomjaclha sacerdote actomja santísima actamila.
7 Asoc acmatnam acyanmongam apsilhnanomap enlhit colhojoc sat acmatnam acyanmongam meyascalhma enlhit. Acno moc anit aptomjaclha sacerdote: Elhcac sat mataa acmatnam sacerdote apcanyomap epenacsojo acmatnam acyanmongam meyascalhma enlhit. 8 Elhcac sat sacerdote ayimpejic aptoscama acmatnam acyanmongam meyascalhma enlhit actemaclha holocausto. 9 Elhcac sat sacerdote mocjam macmescama Dios nintom mocjetic ayinyema apjanma vaynca, najan sartén, allanomalhca harina. 10 Eltovamcoc sat mataa Aarón aptovana niptamin sacerdotes apquilpasmeyquiclha acvisay ofrenda allanomalhca harina, najan moc ofrenda allanomalhca harina alpalhquemalhca aceite — nic nat aptomjac Moisés.
Macmescama Dios actemaclha singasicjayquiclha mocjam
11 Eycaso apcanyomacpilha sacerdote, yavamlha etnejic asoc macmescama Dios: 12 Actemaclha asoc macmescama Dios acvisay singasicjayquiclha mocjam, ayinyema aptimem gracias enlhit napato Dios. Comatong sat aptoscama macmescama Dios. Esantac sat enlhit tortas mepqui levadura alpalhquemalhca aceite, cotnejic macmescama Dios, najan nilpayescama mepqui levadura alpalhquemalhca aceite, najan tortas de harina alpalhquemalhca aceite. 13 Tasic najan apsayquinta enlhit tortas de pan con levadura asoc acyipjescama. 14 Elcoc sat mataa sacerdote nicja nilpayescama, cotnejic sat napato Dios contribución, yoyam etoc mataa sacerdote aptomja aptimesaycam apquilhpajay ema acticyovam aptoscama nicja altar, acvisay acmatnam macmescama Dios actemaclha singasicjayquiclha.
15 Incaymalhquic elsavojo aptoycaoc apitic asoc acmatnam as acnim nac jay. Cotalhquejec sat moc acnim apitic ayaymomalhca. 16 Intomjac sat ancoc asoc acmatnam macmescama Dios actemaclha aplhanma enlhit mepqui apyeycajascaoc, najan moc asoc acmatnam macmescama Dios ofrenda voluntaria, apvanquic mataa eltovamcoc apitic as acnim nac jay, najan eltovamcoc sat apitic ayaymomalhca moc acnim sat. 17 Moc apitic ayaymomalhca tercer acnim, colhic sat alvatna talha, comyetic sat. 18 Aptovquic sat ancoc enlhit tercer día apitic macmescama Dios actemaclha singasicjayquiclha, colhic sat acyanmongseclho aptemaclha maa, ayinyema aptanoncama Dios asoc macmescama.
19 Colhic sat alvatna talha apitic ayamosilha, comyetic sat, colapvanquejec eltovamcoc apitic ayamosilha.
Moclhama enlhit acyitna inlhojo actamilaycam apvalhoc napato Dios (mepqui comasis apyimpejic), eltovamcoc sat as apitic macmescama Dios.
20 Etvasacpoc sat moclhama enlhit mepqui actamilaycam apquilvalhoc (comasis apyimpeoc) napato Dios, ayinyema aptom as apitic macmescama Dios actemaclha singasicjayquiclha. Etipsacpoc sat enlhit apmapsom nipyesicsa apnaymacoc.
21 Moclhama enlhit aptomja apmongvoyam asoc ayamosilha (comasis ayimpejic), ayinyema aptanoncama Dios, acvisay asoc ápac apyamasma enlhit, najan asoc ápac ayinyema ninatoscama, najan moc asoc ápac aptanoncama Dios. Aptovquic sat ancoc as enlhit appasmeyquiclha poc, apitic macmescama Dios actemaclha singasicjayquiclha, etvasacpoc sat nipyesicsa apnaymacoc, ematong sat maa — nic nat aptomjac.
Actemaclha nintom acpilhmoc najan ema
22 Aptomjac nic nat Dios apcanya Moisés:
23 Iltimnas sat lhip israelitas yavamlha eltimjic: Colapvanquejec mataa enlhit eltovamcoc vayqui acpilhmoc, najan nipquesic najan yataay aptipilhmoc. 24 Apquilvitac sat ancoc apnatoscama apquilitsepma, najan apticyovam, eljalhyovas sat mataa aptipilhmoc, ellanac apquiltamjoclha ellana, colapvanquejec mataa eltovamcoc.
25 Aptovquic sat ancoc enlhit aptipilhmoc aptoscama apmatnam macmescama Dios malvatnama talha, etvasacpoc sat nipyesicsa apnaymacoc, ematong sat maa.
26 Noeltovaoc nasa ema apnatoscama, najan ema apnatoscama acma alhimpancoc najan ema ac nata navjac. 27 Aptovquic sat ancoc enlhit ema actema nac jay, etvasacpoc sat nipyesicsa apnaymacoc, ematong sat — nic nat aptomjac.
Apquillhoy sacerdotes apitic ayinyema asoc acmatnam
28 Aptomjac nic nat Dios apcanya Moisés:
29 Iltimnas sat lhip israelitas actemaclha asoc acmatnam macmescama Dios actemaclha singasicjayquiclha napato Dios. 30 Esantac sat enlhit napato Dios acpilhmoc (aptipilhmoc) nayi (najan nipye), najan apitic nayi. Emyasiclhac sat netin as asoc, malha yoyam emoc tacja Dios. 31 Colhic sat alvatna talha acpilhmoc (aptipilhmoc) netin altar. Apitic nayi ellhovamcoc sat sacerdotes Aarón aptovana. 32 Elhcac sat sacerdote asoc acmatnam ayvoc derecho, ayinyema macmescama Dios actemaclha singasicjayquiclha, acvisay contribución. 33 Elhcac sat sacerdote ayvoc derecho, aptomja aptimesaycam napato Dios. 34 Ellhovamcoc sat sacerdotes Aarón (aptovana) apquitquic, eltovamcoc asoc acmatnam nayi, najan ayvoc, malha contribución, ayinyema israelitas. Apquilanyacpec apyovoclhojo israelitas melmiyovejec mataa actema nac jay, actomja singanamaclha Dios.
35 Cotnejic sat mataa mayayoclha Dios asoc macmescama Dios malvatnama talha. Ellhovamcoc sat mataa Aarón najan aptovana, apquiltimesacpo inlhojo sacerdotes napato Dios. 36 Eycaso apcanama ilhnic nat Dios napatavo israelitas, yoyam melmiyovejec sat mataa aptoycaoc sacerdotes, ayenmo acnim apquiltimesomap sacerdotes. Comasquejec sat mataa singanamaclha nac jay — nic nat aptomjac Moisés.
37 Eycaso acvisay apquilanyomacpilha sacerdotes najan enlhitaoc; actemaclha holocaustos macmescama Dios, actemaclha nintom macmescama Dios, actemaclha asoc acmatnam acyanmongam meyascalhma enlhit, najan acyanmongam apsilhnanomap apanco, actemaclha macmescama Dios naysicsa mactimesquiscama sacerdote napato Dios, actemaclha macmescama Dios aptomja singasicjayquiclha mocjam. 38 Aplhocac nic nat Moisés as singanamaclha ayinyema Dios payjoc netin inquilhe acvinatem acvisay Sinaí. Apquileyvec nic nat yoclhilhma actamopeycaoc israelitas, apquilanyacpo eltingyac mataa asoc macmescama Dios.
Kélnaqtósso ektekyawa ekyaqmageykekxa nensexnánémaxche'
1 “Aqsok ekpagkanamaxche agko' ma'a kélnaqtósso ektekyawa ekyaqmageykekxa nak nensexnánémaxche'. Keso segánamakxa agkok se'e: 2 Kéltósso kélmésso nak chá'a ekyaqmageykekxa nensexnánémaxche', kólyaqténchesek sa' chá'a ayespok ma'a ektekyómakxa nak chá'a kélnaqtósso, kélmésso nak chá'a yaqwayam kalwatnaxche', keñe sa' éma agkok kólexpaqheykha chá'a m'a nekhaw'ék nak ekwatnamáxchexa aqsok. 3 Kólmések sa' chá'a ekyókxoho m'a pexmok agkok nak kéltósso: cham'a ekhéyak nak épakyek, tén han ma'a ekwakheykekxa nak kañe' awáxok, 4 tén han ma'a ánet élyaqye agkok, yetlo m'a pexmok ekwakheykekxa nak, tén han ma'a ekyetno nak akpok, ekhawo nahan ma'a pexmok ekwakheykekxa nak ahekhek, kólhaxyawaksohok sa' xamo' ma'a élyaqye agkok nak. 5 Keñe sa' apkelmaxnéssesso Dios énxet'ák apagkok elwatnek ma'a néten nak ekwatnamáxchexa aqsok, yaqwayam etnéssesek aqsok kélmésso naqsa kélwatnésso m'a Wesse' egegkok. Hakte cháxa xama aqsok ekmatñá ekyaqmageykekxa nensexnánémaxche. 6 Apyókxoho apkelmaxnéssesso Dios énxet'ák apagkok sa' chá'a apwanchek etawagkok ma'a, sa' eyke etawagkok ma'a ekpagkanamaxchexa nak, hakte aqsok ekpagkanamaxche agko' xa.
7 “Hawók kéltósso kélaqhe ekyánmaga nak nensexnánémaxche m'a kéltósso kélaqhe nak ekyánmaga magya'assáxma, hawók ektémakxa segánamakxa agkok xa ánet nak: apkelmaxnéssesso Dios énxet'ák apagkok sa' chá'a elmekxak ma'a aqsok kélmésso nak, aptamheykha nak chá'a apwetasso megkólyaqmagkáseykekxa megkólya'assáxma. 8 Emekxak sa' chá'a kéltósso émpehek apchaqhe m'a apkelmaxnéssesso Dios énxet'ák apagkok, apmésso nak chá'a yaqwayam kawatnaxchek ma'a xama énxet. 9 Apkelmaxnéssesso Dios énxet'ák apagkok sa' han elmekxak ekyókxoho m'a aqsok kélmésso naqsa nak aktek kélmakhetchesso nak kélmakhetchessamakxal'a kelpasmaga, tén han kélhanma nak chá'a yánsógweygke, tén han ma'a yánsógweygke appayhe, kélseykekxésso nak chá'a aqsok kélmésso naqsa kélagkok. 10 Ekhawo han ma'a ekyókxoho kélmésso naqsa nak chá'a aqsok aktek, tén han ma'a kélyélaqtésso nak chá'a yetlo pexmok égmenek, tén han ma'a meyke nak kélenchehe pexmok égmenek, apyókxoho Aarón aptawán'ák neptámen sa' chá'a elmekxa', exnéshok sa' chá'a mók apmelassamap.
Kélnaqtósso ektekyawa ekyaqmageykekxa nélásekhamaxchekxoho
11 “Keso segánamakxa ektémakxa nak chá'a élánamáxche kélnaqtósso ektekyawa ekyaqmageykekxa nak nélásekhamaxchekxoho, kélseykekxésso nak chá'a Wesse' egegkok: 12 Kélméssek sa' agkok kéltósso kélaqhe negmésso nak ekpayheykekxa egwáxok, kólyepetchesek sa' kélmésso m'a hótáhap kélyaqyesso meyke nak kempáseyak, kélyelaqtésso nak kélenchehe pexmok égmenek, tén han ma'a kélpeykesso apkelexyawe meyke nak kempáseyak, kélexpaqhe nak pexmok égmenek, tén han ma'a kélyaqyesso nak hótáhap aptaqmalma apagko' nak, kélyélaqtésso nak pexmok égmenek; 13 kólyepetcheshok sa' han kelpasmaga meyke nak kempáseyak ma'a kélmésso nak ekxeyenma kélwáxok, tén han nélásekhamaxchekxoho nak. 14 Kólmekxak sa' chá'a nekha m'a ekyókxoho aqsok kélmésso naqsa nak, keñe sa' kólsakxések chá'a Wesse' egegkok yaqwayam kóltéhek kélmésso, keñe sa' emekxak ma'a apkelmaxnéssesso Dios énxet'ák apagkok apkexpaqheykha nak chá'a kéltósso ekmatñá éma agkok, ekyaqmageykekxa nak nélásekhamaxchekxoho.
15 “Ápetek kélmésso nak ekxeyenma kélwáxok, tén han ma'a segwetassamo nak sẽlásekheykekxoho, kéméxcheyk katawaxchek ma'a ekhem kélmésakxa enxoho; megkeyméxchek kóltaqmelchesek ketsék enxoho yaqwayam kólmaha mók ekhem. 16 Temék agkok han kéltósso kélmésso élánamáxche m'a aqsok ekxénamaxche nak kalanaxche', essenhan ma'a kélmésso naqsa kélmáheyo kélagko nak kólmések, kéméxcheyk katawaxchek xa ekhem nak, eyaqhawo enxoho kélmésakxa', keñe sa' ma'a eyeymomáxche nak, kélwanchek kóltaqmelchesek yaqwayam kólmaha mók ekhem; 17 ántánxo ekhem sa' agkok wokmok ekyetno makham xa kéltósso ápetek agkok kélmésso nak, kéméxcheyk kólwatnek ekyókxoho. 18 Aptókek sa' agkok kélxama ekwokmo enxoho ántánxo ekhem ápetek ekmatñá kélaqhe segwetassamo nak sẽlásekheykekxoho, megkamaxcheyk sa' takha' m'a kéltósso ekmatñá nak, kataqnaweyxchek sa', keñe sa' ápetek kaxénaxchek ektáha ekmaso agko'. Énxet ektáhakxa enxoho apto m'a, kaphewakxak sa' mey'assáxma.
19 “Tamháxchek sa' agkok aqsok ekmanyása m'a ápetek nak, megkatawaxchék sa', kólwatnek sa' aqsa.
“Apwanchek etawagkok ápetek apyókxoho m'a megkalmanyása nak apyempe'ék.
20 “Aptókek sa' agkok kéltósso ekmatñá ápetek segwetassamo nak nélásekhamaxchekxoho m'a énxet ekmanyása nak apyempehek, ektáha nak apagkok ma'a Wesse' egegkok, kóltekkesek sa' nepyeseksa apnámakkok.
21 “Énxet appaknegweykmoho enxoho xama aqsok ekmanyása, —eñama nak énxet, essenhan aqsok nawhak, essenhan ma'a mók aqsok ekmanyása nak, keñe aptawa enxoho m'a kéltósso ekmatñá ápetek segwetassamo nak nélásekhamaxchekxoho, ektáha nak apagkok ma'a Wesse' egegkok, kóltekkesek sa' nepyeseksa apnámakkok.”
Ektémakxa nak chá'a élánamáxche m'a pexmok tén han éma
22 Aptáhak axta Wesse' egegkok apcháneya Moisés se'e:
23 “Eltennés sa' israelitas ektéma nak se'e: Nágkóltaw chá'a xama enxoho m'a weyke kennawo' pexmok agkok, essenhan nepkések apketkok pexmok apagkok, essenhan ma'a yát'ay pexmok apagkok. 24 Kélwanchek kóltéhek kélmeykha mók aqsok ma'a aqsok nawha'ák életsapma nak pexmok agkok, essenhan ma'a aqsok nawhak eklo nak élyepto, megkólwanchek eyke kóltók.
25 “Énxet apto nak ma'a pexmok agkok nak kélnaqtósso, kélseykentegkesso nak Wesse' egegkok, yaqwayam kóltéhek kélmésso naqsa aqsok ekwatnamáxche', kóltekkesek sa' nepyeseksa apnámakkok.
26 “Nágkóltaw chá'a kéxegke náta éma agkok, tén han aqsok nawha'ák éma agkok ma'a kélhámxa enxoho chá'a. 27 Énxet ektáha enxoho apto mók ektémakxa nak aqsok éma agkok, kóltekkesek sa' nepyeseksa apnámakkok.”
Apagkok nak chá'a m'a apkelmaxnéssesso Dios énxet'ák apagkok
28 Aptáhak axta Wesse' egegkok apcháneya Moisés se'e:
29 “Eltennés sa' israelitas, apsántegkessek sa' agkok chá'a Wesse' egegkok ma'a aptósso apchaqhe segwetassamo nak nélásekhamaxchekxoho, esakxak sa' chá'a m'a aphakxa nak Wesse' egegkok. 30 Apmék sa' chá'a elsakxak nápaqtók Wesse' egegkok ma'a aqsok apkelmésso naqsa élwatnamáxche nak, tén han ma'a pexmok agkenyek, tén han ma'a agkenyek agko' nak, yaqwayam enxoho ey'asha néten nápaqto' Wesse' egegkok. 31 Apkelmaxnéssesso Dios énxet'ák apagkok sa' ewatnek pexmok ma'a ekwatnamáxchexa nak aqsok, Aarón sa' eyke chá'a emekxak ma'a agkenyek nak, tén han ma'a aptawán'ák neptámen nak. 32 Apkelmaxnéssesso Dios énxet'ák apagkok sa' chá'a kólmeyásekxak eywok élya'assamakxa nak chá'a aqsok kéltósso kélmésso nak segwetassamo nak nélásekhamaxchekxoho, yaqwayam kóltéhek kélmésso. 33 Cháxa eywok élya'assamakxa nak, apkelmaxnéssesso Dios énxet'ák apagkok sa' chá'a emekxa', apmésso nak chá'a m'a pexmok, tén han éma agkok nak aqsok kéltósso ekmatñá segwetassamo nak nélásekhamaxchekxoho, 34 hakte cham'a aqsok ektekyawa segwetassamo nak nélásekhamaxchekxoho sélánésso nak chá'a ko'o m'a israelitas, ekmeykekxeyk ko'o sekteméssessama aqsok sélmésso naqsa ektaqmela, tén han eywok, yaqwayam chá'a hélmések, keñe sélméssama m'a Aarón apkelmaxnéssesso nak énxet'ák ahagkok, yetlo m'a aptawán'ák neptámen, yaqwayam nak chá'a elxawagkok meyke néxa, aqsok apkelmésso naqsa nak chá'a m'a israelitas.”
35 Aqsok kélmésso naqsa kélwatnésso nak chá'a Wesse' egegkok, cháxa yaqwayam nak chá'a elxawagkok ma'a Aarón, yetlo aptawán'ák neptámen, sekxók aptemessásegko enxoho chá'a Wesse' egegkok apkelmaxnéssesso énxet'ák apagkok. 36 Wesse' egegkok axta apkeltémo chá'a elmések israelitas, cham'a ekhem sekxók axta kéltemessásegko apkelmaxnéssesso Dios énxet'ák apagkok, yaqwayam elanagkok chá'a megkamassegwayam, ekweykekxoho m'a aptawán'ák nak, tén han ma'a apketchek.
37 Cháxa segánamakxa ektémakxa nak chá'a élánamáxche m'a élwatnamáxche nak chá'a aqsok, tén han ma'a kélmésso naqsa nak chá'a aqsok aktek ekyexna, tén han ma'a kélnaqtósso ektekyawa ekyánmaga nak magya'assáxma, tén han nensexnánémaxche, tén han aqsok kélmésso naqsa sẽlteméssesso nak chá'a nélmaxnéssesso Dios énxet'ák apagkok, tén han kélnaqtósso ektekyawa segwetassamo nak nélásekhamaxchekxoho. 38 Wesse' egegkok axta apmésso Moisés ma'a ekpayho nak egkexe Sinaí, apkeltémo axta chá'a elsanták apkelmésso naqsa aqsok israelitas ma'a yókxexma meykexa nak énxet Sinaí.
