Aclhenomalhca actemaclha mepqui ningilsilhnanomalhca
1 Ningiltimesalhquic nincoo ningilpeyvomo napato Dios ayinyema mongyasquiyam. Yiplovcoc najan actamilaycam ingvalhoc napato Dios ayinyema Jesucristo Visqui ingac. 2 Ingvanquic ongilyoclhojo Dios yoyam ongillhovac singaycaoc. Eycaso ayinyema mongyasquiyam Jesucristo. Yitnec nincoo quilhvo Dios singaycaoc. Inpayjeclhec nincoo ingvalhoc, ayinyemaclha acyitna aljalhneycam ingvalhoc yoyam ongilpasmoc sat gloria aptemaclha apyimtalhnamo Dios. 3 Moc asoc najan: Inpayjeclhec najan ingvalhoc naysicsa ninlingaycamco acmasca. Ningyasamcoc nincoo: Naysicsa ninlingaycamco acmasca ongilyasingvomoc actemaclha ningilinlhanyam. 4 Naysicsa ningilinlhanyam actemaclha ningyiplovquiscama ongilyasingvomoc actemaclha ningiltamilcasomalhco inganco. Coyangvomoc sat aljalhneycam ingvalhoc. 5 Cotnaja alhto aljalhneycam ingvalhoc nincoo. Ingilmasquic nincoo Dios ningasicjayo ayinyema Espíritu Santo. Apnec ingilvalhoc Espíritu Santo aptomja singmescama Dios.
6 Invocmec alhta acnim yoyam jingilvomsic tap nincoo Dios. Apquitsepquic alhta Cristo singyanmongam ningiltomja mongilyascalhma. Ayinyemaclha mongvanquejec alhta ongilmiyovalhcojo inganco. 7 Paj lhama enlhit apquiltemo ematong acyanmongam poc yoyam emyovacpoc aptomja appeyvomo. Apquiltamjoc lhaja enlhit ematong acyanmongam aptimem poc apanco aptomja aptamila. 8 Ingillhicmosquic alhta Dios actemaclha singasicjayo. Apyinyovquic alhta Apquitca apvisay Cristo yoyam ematong singyanmongam naysicsa ningyiplovquiscama alhta mongilyascalhma. 9 Quilhvo eyca innec sintimesa ningilpeyvomo napato Dios ayinyema apquitsepma Cristo singyanmongam nincoo. Ningyasamcoc nincoo yoyam ongilmiyovalhcac sat ayinyema Cristo, acvaa sat acnim apyanmongsayclha Dios apquiltemaclha enlhitaoc. 10 Nincoo ningiltomja siclhoc anco ningilinmelhaycam Dios, malha metnaja apnaymacoc napato Dios. Ingilasicjaclhec alhta Dios naysicsa nintemaclha inganco ayinyema apmatnam Apquitca singyanmongam. Quilhvo eyca acyitna actamilaycam ingilvalhoc napato Dios aptomja singasicjayclho mocjam. Nasoc anco jingilmeyvoc sat yoyam ongileyoc sat lhama Cristo. 11 Moc asoc mocjam: Inpayjeclhec nincoo ingvalhoc ningiltomja ninpasmeyquiclha Dios Ingyapam ayinyema Jesucristo Visqui ingac. Ayinyemaclha Cristo aptomja singasicjascaseyquiclho Dios.
Adán najan Cristo
12 Eycaso actemaclha siclhoc anco: Lhama enlhit nic nat ayinyemayaclha siclhoc anco mongilyascalhma acpayjeyquiclho nipyesicsa enlhitaoc lhalhma anco. Yiplovcoc nic nat ningitsepma ayinyema mongilyascalhma. Inpayjeclhec najan ningitsepma nipyesicsa enlhitaoc lhalhma anco. Ayinyemaclha acyitna aplhamoclhojo enlhitaoc melyascalhma. 13 Acvoy amamyi ilhnic nat mongilyascalhma. Alhayi acvoy ilhnic nat singanamaclha Dios. Am nic nat colhenalhcac acvisay mongilyascalhma, ayinyemaclha am nic nat coyitnac mocjam singanamaclha najan singascamaclha. 14 Inpayjeclhec nic nat actemaclha ningitsepma nipyesicsa enlhitaoc apquilictingaycamco lhama Adán acvocmo apquilictingaycamco lhama Moisés. Apquitsepmec nic nat Adán ayinyema melyajayquiclho apcascama Dios. Apquilitsepmec nic nat najan aplhamoclhojo enlhitaoc mepqui lha apcascamaclha Dios. Adán aptomja apyitsomacpo enlhit yoyam evac sat apvisay Cristo.
15 Eycaso sicyitquiscama: Avanjec anco amyaa aplhenamap Cristo, am colhno amyaa aplhenamap Adán. Avanjec nic nat apsilhnanomap Adán aptomja appayesayclha mongilyascalhma nipyesicsa enlhitaoc lhalhma anco. Apquilitsepmec nic nat aplhamoclhojo enlhitaoc. Avanjec anco singmescama nasa Dios ayinyema Jesucristo yoyam ellhovac sat aplhamoclhojo enlhitaoc apquiltomja melyasquiyam. 16 Moc actemaclha Dios singaycaoc, moc actemaclha ilhnic nat apsilhnanomap enlhit. Lhama enlhit nic nat apsilhnanomap ayinyema apnatovasomap aplhamoclhojo enlhitaoc. Singmescama nincoo Dios Cristo yoyam emascocsic aclhamoclhojo actemaclha mongilyascalhma. Colhic sat sintimesa ningilpeyvomo napato Dios. 17 Lhama enlhit nic nat ayinyemayaclha siclho ningitsepma actomja acmovan. Colhic sat ningmovan nincoo ayinyema lhama enlhit apvisay Jesucristo. Ayinyemaclha ningillhocac nincoo Dios singaycaoc aptomja singiltimesquiscama ningilpeyvomo actemaclha singmescama nasa.
18 Elnatovasacpoc sat aplhamoclhojo enlhitaoc ayinyema lhama enlhit apsilhnanomap. Colhic sat altimesa apquilpeyvomo napato Dios aplhamoclhojo enlhitaoc, ellhovac sat acyimnatem apnenyaoc. Ayinyemaclha lhama enlhit Jesucristo aptomja apsovjomo apyiplovquiscama actemaclha acpeyvomo. 19 Lhama enlhit nic nat melyajayquiclho ayinyemayaclha apquilsilhnanomap actemaclha melyascalhma aplhamoclhojo enlhitaoc. Colhic sat altimesa apquilpeyvomo napato Dios aplhamoclhojo enlhitaoc ayinyema apquilyajayquiclho alhta lhama enlhit apvisay Jesucristo.
20 Invaac nic nat singanamaclha yoyam coyangvomoc acvitomalhca actemaclha mongilyascalhma. Avanjec anco actemaclha singmescama nasa Dios, am colhno aclhamocma actemaclha mongilyascalhma. 21 Acmovan innac mongilyascalhma. Avanquic mataa colnapoc aplhamoclhojo enlhitaoc apquilyiplovquiscama actemaclha mongilyascalhma. Acmovan najan innac Dios singasicjayo. Actomja singiltimesquiscama ningilpeyvomo napato Dios. Actomja singmescama acyimnatem ingnenyaoc cotmongvoycamlha nelha ayinyema Jesucristo Visqui ingac.
Kélmassésso ektémakxa nélsexnánémaxche'
1 Yetneyk kaxwók negko'o meyke ektáhakxa egwáxok xamo' Dios eñama Wesse' egegkok Jesucristo, hakte enteméssessek negko'o kaxwók ekpéwomo nentémakxa Dios eñama magya'ásseyam. 2 Hakte Cristo keñamak negkegwagko kaxwók negko'o agyo'ókxak Dios eñama m'a magya'ásseyam nak, yaqwayam enxoho keytek negko'o m'a ektémakxa nak ektaqmeleykha apwáxok henlano', tén han magyensemek nélwasqápeykekxoho, tén han kapayhekxohok agko' egwáxok neyseksók nélhaxneykha hegwatámhok negko'óxa m'a ektémakxa nak Dios apcheymákpoho. 3 Háwe eyke ekwánxa agkok xa, peykáseykekxeyk agko' nahan egwáxok ma'a nenlegeykegkoho nak; hakte negya'ásegkók negko'o nenlegeykegkoho segméssama chá'a nélwasqápeykekxoho yaqwayam ólenmaxaxkoho', 4 cháxa yaqwayam nahan hegmések negko'o ektaqmalma negmallane xa nélwasqápeykekxoho nak, negmallanchek agkok xa kayágwomhok agko' nélhaxneykha. 5 Mehegmések nahan ekyaqhapweykmoho egwáxok xa nélhaxneykha nak, hakte awanhek negko'o appekkenma egwáxok Dios ma'a segásekhayo eñama m'a Espíritu Santo segméssama axta.
6 Apketsepmeyk axta Cristo m'a ekhem yaqweykenxa axta katnehek, eñama apkeltémakxa m'a énxet'ák melya'assáxma, cham'a magmowagko axta negko'o ólwagkasaxkohok egagko' teyp. 7 Askehek yaqwayam yohok emátog xama énxet apyaqmagkasso m'a pók yaqwayam nak emátog. Askehek nahan yaqwayam yohok emátog xama énxet yaqwayam etnehek apyaqmagkasso yaqwayam emátog ma'a énxet ekpéwomo nak aptémakxa; yetneyk kexaha eykhe xama énxet apmáheyo yetsapok yaqwayam etnehek apyaqmagkasso apmatñà m'a xama énxet ektaqmalma nak aptémakxa. 8 Enxekmóssegkek axta eyke negko'o ektémakxa segásekhayo Dios, cham'a nentémakxa axta makham mólya'assáxma, apketsepmeyk axta Cristo yaqwayam hempasmok. 9 Keñe kaxwo', senteméssessama negko'o ekpéwomo nentémakxa m'a Dios eñama m'a apketsapma axta Cristo, kayágwomhok sa' aqsa nélmeyámáxche negko'o m'a ektemegwánxa sa' néxa sẽllegassáseykegkoho, eñama m'a Cristo. 10 Hakte Dios, cham'a nentémakxa axta makham nénmexma, ẽlásekhássásamákpekxók axta apagko', eñama m'a apketsapma axta Apketche, sa' eyke ekyágwánxa agkok yaqwayam ólwagkasaxchek teyp apxátekhágweykmo nak makham, keso sẽlásekhássáseykpekxoho nak kaxwo' ma'a Dios. 11 Háwe ekwánxa agkok xa, payheykekxeyk agko' eyke nahan negko'o egwáxok xamo' Dios eñama m'a Wesse' egegkok Jesucristo, hakte Cristo keñamak sẽlásekhássásamákpekxoho kaxwók negko'o m'a Dios.
Adán tén han Cristo
12 Xama énxet axta keñamak ektaxnama mólya'assáxma keso náxop, sáyekmók axta anhan nétsapma ektaxnama xa mólya'assáxma nak, keñe axta ekweykekxoho apyókxoho énxet ma'a nétsapma, hakte apyókxoho énxet axta apkeláneykegkok melya'assáxma. 13 Nanók axta ekteyapma mólya'assáxma keso náxop, megkatyapmakxa axta makham ma'a segánamakxa; megkólyetsetagkek eykhe chá'a nentémakxa mólya'assáxma méko enxoho m'a segánamakxa. 14 Yetnegkek axta eyke nétsapma nepyeseksa m'a énxet'ák apkeláneyak axta chá'a melya'assáxma, eyeynamókxa m'a aphamakxa axta Adán ekweykmoho m'a aphamakxa axta Moisés, háwe axta eykhe eñama melyaheykekxa segánamakxa apkeláneyak melya'assáxma xa énxet'ák nak, ekhawo aptémakxa axta m'a Adán melyaheykekxoho, aptéma axta apyetchesamakpoho m'a apxénamakpo axta ewa'.
15 Mogwanchek eyke aghéshok ektémakxa axta aqsok ekmaso apkelane Adán ma'a aqsok segmésso naqsa nak negko'o m'a Dios. Hakte xama énxet apkelane mey'assáxma axta keñamak apkeletsapma chá'a apxámokma énxet; kaxnók ma'a aqsok segmésso naqsa axta Dios meyke ekyánmaga eñama m'a xama énxet apwesey nak Jesucristo, méko kaxho', kapasmohok nahan apxámokma apagko' énxet. 16 Megkólwanchek kólhéshok aqsok segmésso naqsa nak Dios ma'a apkelane nak chá'a mey'assáxma xama énxet, hakte xama énxet mey'assáxma axta keñamak ekwaya yaqwayam hẽllegássesagkohok chá'a negko'o, keñe m'a aqsok segmésso naqsa nak Dios, katnéssesek chá'a ekpéwomo apkeltémakxa énxet'ák neyseksók eykhe ekxámokma apkeláneyak melya'assáxma. 17 Yetnegkek axta nétsapma eñama apkelane mey'assáxma xama énxet, sa' eyke ekyágwánxa agkok keytek axnagkok élyennaqte apnénya'ák megkatnégwayam néxa m'a énxet'ák apxeyenma nak chá'a Dios apteme ekpéwomo apkeltémakxa, eñama ekyawe ektaqmeleykha apwáxok apkelányo tén han apmésso naqsa meyke ekyánmaga, eñama m'a xama énxet apwesey nak Jesucristo.
18 Cham'a ektémakxa axta chá'a apkelane mey'assáxma Adán élsexnenagkama axta chá'a m'a apyókxoho énxet'ák, cháxa ektémakxa nahan aqsok ekpéwomo apkelane nak ma'a Cristo, ektemessáseykegko nak chá'a ekpéwomo apkeltémakxa m'a apyókxoho énxet, yaqwayam enxoho elwetak élyennaqte apnénya'ák. 19 Hakte cham'a ektémakxa axta melyaheykekxa xama énxet apxámók axta énxet kélteméssesso melya'assáxma; hawók nahan ma'a ektémakxa nak apkelyaheykekxoho xama énxet, apxámok sa' nahan katnehek kélteméssesso ekpéwomo apkeltémakxa.
20 Wayak axta segánamakxa yaqwayam enxoho kayánchesagkohok mólya'assáxma; xama axta ekyeykegko m'a mólya'assáxma, yágweykmók axta aqsa anhan apxekmósso ektémakxa ektaqmeleykha apwáxok senlányo m'a Dios. 21 Cham'a ektémakxa nak ekyetno mólya'assáxma eksáyekmoho m'a nétsapma, temék nahan ekyetnama m'a ektémakxa nak ektaqmeleykha apwáxok senlányo m'a Dios, senteméssessama chá'a ekpéwomo nentémakxa tén han segméssama chá'a ekyennaqte egnények megkatnégwayam néxa eñama m'a Wesse' egegkok Jesucristo.
