Apquiltemaclha apquilmapsomcaa
1 Noncolov nasa apvalhoc apvita sat apquiltemaclha apquilmapsomcaa.
Noyasipquis nasa apvita sat apquilsilhnanomap apanco.
2 Yejemoc sat elmasquingvomoc.
Malha paat acyamay sat eltimjic.
Malha paat aljalhem sat eltimjic.
3 Itne sat apcayo Visqui ingac.
Iyiplovcasojo actemaclha actamila.
Ilha sat mataa apcaoclha acyiplomo aptamilcasomacpo apanco.
4 Ingyasicjojo mataa Visqui ingac.
Elhcac sat lhip asoc actemaclha aclhanma apvalhoc.
5 Itne sat mataa lhip apcanyomap ayinyema Visqui ingac.
Itne sat mataa apcayo.
Apyasamcoc Visqui ingac yoyam etnejic.
6 Etasquisic sat lhip aptemaclha appeyvomo, malha ayitsay'lhma sat cotnejic, malha ingyitsicso acnim sat cotnejic.
7 Ivanma sat lhip napato Visqui ingac, itne sat apcayo.
Noyasipquis nasa apvita sat enlhit aptemaclha apmapseve, aptomja apsilhnanoncama poc.
8 Ilvates aptemaclha aplom.
Ilvates aptemaclha acnatjesaycam.
Nolov nasa lhip, esilhnanacpoc sat.
9 Naso, elantipsacpoc sat apquilmapsomcaa.
Ellhovac sat yoclhilhma apquiltomja apquilayo Visqui ingac.
10 Acyavataclhojo sat mocjam elmasquingvomoc sat apquilmapsomcaa.
Mongvityejec sat apmaclha alhta.
11 Ellhocac sat yoclhilhma enlhit apquilinlhanyam.
Elinyojoc sat ayinyema actamilaycam apquilvalhoc.
12 Aptemaclha enlhit apmapsom yoyam ingyinmelham enlhit appeyvomo.
Apquilan'oc mataa naysicsa actanoncama apvalhoc.
13 Apcasmasquic Visqui ingac apvita aptemaclha.
Apyasamcoc Visqui ingac ayamquitvaa nelha aptiyascam.
14 Apliquic mataa sovo acvinatem enlhit apquilmapsomcaa.
Apquilmaclhec mataa yanca apancaoc.
Apquililtamjoc elajic enlhit mepqui asoc.
Apquililtamjoc elajic yoyam ematong aptomja aptamilcasomacpo apanco.
15 Cajiclhac sat sovo acvinatem pac aptomja apmaycam sovo acvinatem.
Colhic sat ayintasa yanca pac.
16 Intasic anco acyitna asoc ayitcoc enlhit appeyvomo.
Am colhno acyitna cascama apquilnatam enlhitaoc apquilmapsomcaa.
17 Emascoscomoc sat Visqui ingac apquilmapsomcaa.
Appasmec mataa enlhitaoc apquiltamila.
18 Aptamilcasquic mataa Visqui ingac apquiltomja apquiltamilcasomacpo apanco.
Comasquingvomejec sat mataa apquilmayclha.
19 Am colhejec alvennamcaa naysicsa apquillingaycamco acyimtalhnama.
Coytic sat aptoycaoc naysicsa mayic ataoc.
20 Elingamcojoc sat acyimtalhnama apquilmapsomcaa, malha paat acmeyasma sat eltimjic.
Elmasquingvomoc sat cotnaja ingmoc, malha etin acvonquepma sat eltimjic.
21 Apmaycaoc mataa aptomjac poc apquilmapsomcaa.
Am eyca elajac mataa apquilmaycaoc.
Am emyavac mataa enlhit appeyvomo, apquimlacmoc mataa poc.
22 Ellhocac sat yoclhilhma apquiltomja appasmom Visqui ingac.
Enatovasacpoc sat apquilmapsomcaa ayinyema Visqui ingac.
23 Visqui ingac aptomja apnalayclha enlhitaoc.
Aptamilcasquic mataa Visqui ingac aptomja apyisponcama aptemaclha.
24 Aptolhnac sat ancoc, meyaninejec sat.
Malha apmaycaoc apmic aptomjac Visqui ingac.
25 Sictemaclha alhta eyitcoc, sicvanyam actomja quilhvo nac jay.
Am otaac mataa etamopamcoc enlhit appeyvomo.
Am otaac mataa elanjingvomoc apquitquic.
26 Am emyavac mataa asoc, apquimlacmoc mataa poc.
Apquilpayesayclha apvalhoc poc apquiltomjac mataa apquitquic.
27 Ilvates actemaclha acmasom.
Iyiplovcasojo actemaclha actamila.
Comasquingvomejec sat yoclhilhma apmaclha.
28 Apquiltamjoc mataa Visqui nintemaclha acpeyvomo.
Meyinyovejec sat mataa apquiltomja apquilinlhanyacmo, elmiyovacpoc sat.
Enatovasacpoc sat apquilmapsomcaa, mepqui aptovana sat eltimjic.
29 Elmiclhac sat yoclhilhma enlhit apquilpeyvomo.
Elhnam sat maa cotmongvoycamlha nelha.
30 Singyascasingvoyam actamila intomjac appayvam enlhit appeyvomo.
Inpeyvoc mataa appayvam.
31 Eyca as enlhit acyitna apvalhoc apcanamaclha Dios.
Metlapmejec sat naysicsa aplhingam.
32 Apyilhacpoc mataa enlhit apmapsom yoyam ingyajic enlhit appeyvomo.
33 Emyoc sat Visqui ingac.
Memacpejec sat enlhit appeyvomo.
Mepqui apsilhnanomap sat etnejic naysicsa macyicpilquemo.
34 Itne sat mataa apcayo Visqui ingac.
Iyiplovcasojo aptemaclha Visqui ingac.
Emyovacpoc sat lhip, emiclhac sat yoclhilhma.
Etac sat lhip actemaclha apquilantipsomap enlhit apquilmapsomcaa.
35 Acvitac alhta aptemaclha enlhit apmapsom.
Malha yamit acyivey anco intomjac actemaclha apyimtalhnesomacpo apanco.
36 Paj alhta ongvitac mocjam, apvonquipqui, apmasquingvocmec alhta.
Ayitamquic alhta inyicje, am alhta otaclha.
37 Quip ilanojo enlhit appeyvomo, mepqui apsilhnanomap apanco.
Iyiplovquis sat lhip aptemaclha maa.
Elhamiclhac sat aptovana enlhit actamilaycam apvalhoc.
38 Esovjacpoc sat apnatovasomap enlhit apquilmapsomcaa.
Melhamiclhejec sat maa aptovana.
39 Visqui ingac aptomja apquilvomquiscama tap enlhit apquilpeyvomo.
Aptomja apmasma naysicsa apquillingaycamco acyimtalhnama.
40 Epasmoc sat mataa Visqui ingac, elvomsic sat tap.
Elinyajamcoc sat nipyesicsa apquilmapsomcaa, elvomsacpoc sat tap.
Ayinyemaclha apquiltimec mataa apquilayo Visqui ingac.
Magya'ásseyam Wesse' egegkok
1 Nágkallókas aqsa
apwáxok elanok ma'a
énxet'ák élmaso
nak apkeltémakxa,
nágkayásekkes aqsa
apwáxok apkeltémakxa m'a
énxet'ák apkeláneykegkoho
nak aqsok ekmaso,
2 hakte kaxwók
sa' emassegwók,
máxa sa' etnahagkok
ma'a pa'at élyamayél'a;
¡máxa sa' etnahagkok ma'a
aqsok kélcheneykekxal'a!
3 Ná ey'ássem Wesse' egegkok,
elána aqsok ektaqmela,
ná eyensem apyetleykha
neyseksa apha xapop apagkok.
4 Yásekhoho chá'a
Wesse' egegkok,
yetlo apchápeykha,
keñe sa' egkések chá'a
m'a ekmámenyého
agko' nak apwáxok.
5 Egkés Wesse' egegkok
ma'a aptémakxa nak;
ná ey'ássem ma'a,
keñe sa' epasmok.
6 Yának sa' kataxchek ma'a
aptémakxa ekpéwomo nak xép,
máxa sa' ekhem éltátchessól'a
yetseksók ekhem
katnehek ma'a
aptémakxa eyáxñeyo.
7 Ewanmeyha sa'
aqsa nápaqto'
Wesse' egegkok,
eleyx aqsa epasmok
meyke appekhésamap.
Nágkalókas apwáxok
étak ma'a énxet'ák
ektaqmalma nak apheykha,
ekteyapma nak chá'a
aqsok ekmaso
yaqwayam elanagkok.
8 Nágyoho chá'a
kalwok apwáxok,
elwatés aplo;
ná elaw chá'a,
hakte kayánchessamhok
chá'a ekmaso aqsok xa.
9 Kólántekkesek sa'
apchókxa xa énxet'ák
élmasagcha'a nak apkeltémakxa,
keñe sa' ma'a énxet'ák
melya'ásseyam nak
Wesse' egegkok,
elmok etnehek apagkok.
10 Kaxwók sa'
emassegwók ma'a
énxet'ák élmasagcha'a
nak apkeltémakxa;
elchetmok sa' eykhe,
melwetekxeyk sa' eyke.
11 Sa' eyke
elxewekxak xapop
ma'a megkaleymáxkoho
nak apkelwáxok,
awanhók agko' sa'
katnehek meyke
ektáhakxa apheykha.
12 Elánekxak chá'a
aptamhágkaxa emáwhok
etnéssessamhok exma
ekmaso élmasagcha'a nak
apkeltémakxa m'a énxet
meyke nak apkeltémakxa,
megyeksek chá'a elano',
yetlo éllo apkelwáxok.
13 Yesmaksek eyke aqsa
chá'a Wesse' egegkok,
hakte apya'ásegkok
kaxwók sa' elmassegwók
ma'a élmasagcha'a
nak apkeltémakxa.
14 Elhaxyawaksek
chá'a sawo élwenaqte
apagkok ma'a énxet'ák
élmasagcha'a nak
apkeltémakxa,
eleykesek chá'a
axát'ák yágke apagkok
yaqwayam elnápok
ma'a énxet'ák
apkelmopyóseka nak,
tén han ma'a meyke
nak aqsok apagkok,
tén han ma'a ektaqmalma
nak apkeltémakxa.
15 Sawo élwenaqte
apagkok apagko' sa' eyke
kólyetxeykxak chá'a,
keñe sa' yágke apagkok
katnekxak nekha'a étkók.
16 Ántawók eykhe
katnehek aqsok
apagkok ma'a
énxet ektaqmalma
nak aptémakxa,
tásek eyke,
kaxnók ma'a ektémakxa nak
ekxámokma aqsok apagkok
ma'a énxet'ák
élmasagcha'a nak apkeltémakxa.
17 Emasséssesek
sa' apkelyennaqte
Wesse' egegkok ma'a énxet'ák
élmaso nak apkeltémakxa,
epasmok sa' eyke chá'a m'a
éltaqmalma nak apkeltémakxa.
18 Eltaqmelcheshok chá'a
Wesse' egegkok ma'a
ektaqmalma nak apkeltémakxa,
megkamassegwomek sa'
chá'a m'a xapop apagkok
apkelxaweykekxa nak.
19 Wa'ak sa' agkok
ekmaso apheykha,
ektepa enxoho
meyk segaqhe,
mellegagkók sa',
hakte yetneyk sa' chá'a
katnehek aptéyak.
20 Máxa pa'at apák
sa' etnahagkok elmétek
ma'a élmasagcha'a
nak apkeltémakxa;
máxa éten sa' etnehek
elmassegwók ma'a
apkelenmexma nak
Wesse' egegkok.
21 Yának chá'a
kólmássesha aqsok
ma'a élmasagcha'a
nak apkeltémakxa,
keñe meyaqmagkásekxeyk chá'a,
apyósek eyke elanok pók ma'a
énxet ektaqmalma nak aptémakxa,
memyewek nahan aqsok apagkok.
22 Elxewekxak
sa' xapop ma'a
ektaqmalma nak
chá'a apkelxéneykha
Wesse' egegkok,
keñe sa' ma'a ekmaso
nak chá'a apkelxéneykha,
kólmasséssók sa'.
23 Wesse' egegkok eyke
apkeláneseyak chá'a
ektémakxa apxega énxet,
emyók chá'a m'a
ekleklamókxa nak apwáxok;
24 apyaqnenchek agkok chá'a,
yempekxak chá'a néten,
hakte Wesse' egegkok
apméyak ma'a apmek.
25 Étkok axta ko'o,
sekwányamók eyke
kaxwók ektáhak,
makke ateyk makham
meyke ekpasmo m'a énxet
meyke nak aptémakxa,
mateyk nahan elmaxneyha
aqsok énxet'ák ma'a apketchek.
26 Yókxoho ekhem chá'a
apmopyósa elanok pók,
tén han apmassáseykha
chá'a aqsok apagkok;
Dios han apkelmésso
m'a apketchek,
eñama ektaqmeleykha
apwáxok apkelányo.
27 Étnakhés nentémakxa ekmaso,
elána' aqsok ektaqmela,
tén sa' kaxek chá'a aphamakxa.
28 Hakte yásekhohok
chá'a Wesse' egegkok
ma'a nentémakxa
ekpéwomo nak,
meyenyewek han
chá'a m'a ektáha nak
meyenseyam apyetleykha;
emasséssamhok eyke
chá'a m'a élmasagcha'a
nak apkeltémakxa,
meyke aptawán'ák neptámen
chá'a etnéssesek.
29 Énxet'ák meyke
apkeltémakxa sa'
elxawagkok ma'a xapop,
exmakha sa' chá'a
meyke néxa m'a.
30 Yetlo apkelya'áseyak chá'a
elpaqmétek ma'a énxet'ák
éltaqmalma nak apkeltémakxa;
yetlo ekmámnaqso' han chá'a
etnehek apkelpeywa m'a.
31 Enegkenek han
chá'a apkelwáxok ma'a
segánamakxa apagkok
nak Dios apagkok;
¡megkasógwomek
chá'a apkelxega!
32 Elanha chá'a
énxet ekmaso nak
aptémakxa m'a énxet
ektaqmalma nak aptémakxa,
yaqwayam yaqhek;
33 megyohok eyke emok
ma'a Wesse' egegkok,
megyohok han
exénakpok apsexnánémap.
34 Nágkólya'ássem
kéxegke Wesse' egegkok,
kólyahakxoho nahan,
hakte sa' etnéssesek
ekha kéláyo kéxegke m'a,
tén han egkések yaqwayam
kóltéhek kélagkok apchókxa.
¡Kéxegke kélagko' sa' han
kólwetagkohok kólmasséssók
ma'a élmasagcha'a
nak apkeltémakxa!
35 Ekwet'ak ko'o énxet
ekmaso nak aptémakxa
eyeymáxkoho agko' apwáxok,
apsawheykekxoho yókxexma
ektémól'a yámet ekyawe
ekxámokmal'a áwa';
36 keñe sekmeyákxo
makham ma'a,
ekmassa sekwet'a,
étamchek axta eykhe,
axta eyke óteyákxa'.
37 Elano énxet
meyke nak aptémakxa,
tén han eyáxñeyo
nak aptémakxa:
yetneyk aptawán'ák
neptámen ma'a énxet
meyke nak ektáhakxa apha.
38 Kólmasséssók sa' eyke
m'a apkenmexeykekxa
nak Wesse' egegkok
segánamakxa apagkok;
kólmasséssók sa' apyókxoho
aptawán'ák neptámen ma'a
élmasagcha'a nak apkeltémakxa.
39 Wesse' egegkok
keñamak apkelwayam
teyp ma'a énxet'ák
éltaqmalma nak apkeltémakxa,
chá'a apkelyexánegweykekxexa
chá'a ekwa'a enxoho
ekmaso apheykha.
40 Epasmok chá'a
Wesse' egegkok
elmallahanchesek.
Elegketchesek chá'a m'a
élmasagcha'a nak apkeltémakxa,
tén han elwagkasek chá'a teyp,
hakte apkelye'eykekxeyk chá'a
aptegyeykencha'a élmasma m'a.
