Apquiltemaclha cotnaja ingmoc
1 Lhip Dios Visqui ajac.
Ingyeylhojo silmalhnancama.
2 Intipsalhquic mataa sicvisay nipyesicsa apquilmapsomcaa, sellhena sicmasom.
Apquiltemaclha apquilmopvancaa amyaa.
3 Elyavectac mataa naysicsa acyivey seltanoncama.
epjescacmec mataa mepqui acvisay.
4 Eltovasquic (enatovasquic) mataa naysicsa silasicjayo coo.
Almalhnescasquic mataa coo.
5 Aclingamcoc mataa acmasom acyanmongam sictemaclha actamila (sictamila).
Aclingamcoc mataa setanoncama acyanmongam silasicjayo.
6 Ingyane sat eyicpilcacpoc apnaclha apmapsom.
Ingyanyacpoc sat apsilhnanomap apanco apnaclha apyicpilquemo.
7 Etvasacpoc sat apsilhnanomap apanco.
Cotvasalhcac sat apquilmalhnancama.
8 Yavatoc sat cotnejic aptiyascam (ingyane sat ingyitsapoc).
Poc aptamjaycamo lhama etnejic apya'monquiscama.
9 Eltamjacpoc sat apquilyeyjeycam apquitquic.
Aptava cotniclhac sat tampeyi.
10 Elanjingvomoc sat apquitquic aptingyeycaoc nintom.
Mepqui apquilmaclha sat cotnejic.
11 Poc apyimtalhnamo esavojoc sat apquilnatam (ayinyema apmaycaoc nasa).
Metnaja apnaymacoc elminyilhic sat actomja apanco (apnatoscama).
12 Mepqui lhama enlhit, yoyam ingyimliclhojo (ingyasicjojo).
Mepqui lhama enlhit, yoyam ingyimliclhojo apquilyeyjeycam.
13 Enatovasacpoc sat apyovoclhojo aptovana.
Colhenalhquejec sat apvisay apanco.
14 Colhic sat acyanmongseclho acmasom aptemaclha apyeyjamcaa (apyap ningá).
Comascosalhquejec sat mataa actemaclha anco inquin ningá.
15 Colvoncamejec sat mataa Visqui ingac apquiltemaclha apancaoc.
Comascoc sat apquilvisay apancaoc as nalhpop.
16 Am alhta colhenac apvalhoc ingyimlimojo poc apquillingaycamco acmasom.
Apquilinmelham mataa poc.
Apya'masquic mataa poc yoyam ingyajic.
17 Aptemaclha apanco etvacsic poc.
Elngamcojoc sat aptovasomap apanco.
Aptemaclha apanco mepqui appayesayclha apvalhoc poc.
Elhic sat mepqui acpayjayclha apvalhoc.
18 Malha apava apcalomap intomjac aptemaclha apanco acmasom (apmapsom).
Yitnec apvalhoc aptemaclha acmasom.
Copvanquejec mataa mepqui acmasom.
19 Comasquejec sat mataa aptemaclha apmapsom.
Malha apcalomap sat cotnejic najan malha apyapmam.
20 Visqui ingac eyanmongsiclhac sat apquiltemaclha apancaoc selinmelhaycam.
Visqui ingac eyanmongsiclhac sat apquiltemaclha apquilantipquiscama sicvisay.
21 Lhip Visqui ingac.
Ingyane sat colhic ayaco lhip apvisay.
Jemyov coo.
Jevomquis tap coo, ayinyema lhip aptemaclha seyasicjayo.
22 Mepqui sicyimnatem coo, malha acyimsem intomjac evalhoc.
23 Ovonquepoc sat coo malha pisquisca.
Sictomja malha sova seyimposcay alhcajayam.
24 Mepqui alyimnatem eyavaoc ayinyema silmalhnancama (momajay otoc).
Mepqui sicyimnatem coo, ayinyema sicyamjoncama.
25 Avanjec mataa selasmescama enlhitaoc.
Apquilyeyesam mataa apcatic selvita.
26 Dios Visqui ajac. Jepasim coo.
Jevomquis tap acyiplomo lhip seyasicjayo.
27 Elyasingvomoc sat enaymacoc nasoc anco, lhip Visqui ingac ayinyema aptomjaclha.
28 Eltimescasquic mataa sicmasom enlhit.
Lhip sat jetnesquisic sicpeyvomo.
Enatovasquic mataa enlhit. Ilmanques sat lhip.
Coo eyca copayjiclhac mataa evalhoc, sictomja silancam lhip.
29 Elmancangvomoc sat cotnaja ingmoc.
Malha apcalomap cotnejic apquilmancactama.
30 Olngacsic sat siyayo Visqui ingac nipyesicsa enaymacoc.
31 Visqui ingac aptomja apmasma (appeyvescasquiclha) yoyam elpasmoc.
Aptomja apquilvomquiscama tap napatavo apquilinmelhaycam.
Néltémo hempasmok segyekpelchémo meyke nak ekhémo
1 Oh Dios,
ná ewanma aqsa
chá'a sélmaxneya
enxoho chá'a,
2 asagkek chá'a ko'o
sexéneykha m'a énxet'ák
apkelmopwancha'a nak amya'a,
tén han élmasagcha'a
nak apkeltémakxa,
wanchek amya'a m'a
aptémakxa nak chá'a
ko'o sexéneykha.
3 Kallágwaták chá'a
apkelpaqmeyesma sekhakxa,
¡hektámenták chá'a
meykexho sektáhakxa!
4 Alásekhohok eykhe
chá'a ko'o m'a,
hektámenták aqsa chá'a;
almaxnéssesagkok
eyke chá'a ko'o.
5 Ekmaso chá'a
apyaqmagkáseykekxak
sekteméssessamakxa ektaqmela,
alásekhohok eykhe chá'a,
hetaqnók aqsa chá'a.
6 Etnésses xama
énxet ekmaso aptémakxa
apkelyekpelchémo chá'a,
elsexnáneyekxohok
sa' chá'a apagko'
ma'a apkelánekxésso
nak chá'a amya'a;
7 elxénakpok sa' chá'a
apsexnánémap ma'a
kélyekpelchémokxa nak chá'a;
magya'assáxma sa'
kóltemessásekxak ma'a
apkelmaxneyéyak nak.
8 ¡Yaqwatakxoho
agko' sa' elweynchamha,
pók énxet sa' elmekxak
ma'a aqsok apagkok nak!
9 ¡Apkelyéheykha sa'
etnehek ma'a apketchek,
tampe' sa' katnehek
ma'a aptáwa'!
10 ¡Elweynchamha
sa' aqsa m'a apketchek,
elmaxneyha sa' chá'a
aptéyak ma'a énxet'ák!
¡Kólántekkesek sa'
ma'a apxanák
apmopsagcha'a nak!
11 Elsakxak sa'
ekyókxoho aqsok
apagkok ma'a
apmássáseykha
nak chá'a
selyaqye apagkok.
Elyementamok sa'
apwete nak chá'a
eñama aptamheykha
m'a énxet'ák
melweteya nak.
12 Méko sa'
kapyóshok kalano',
tén han ma'a apketchek
apkelyéheykha nak.
13 Esawhakpohok
sa' eletsapok ma'a
aptawán'ák neptámen,
kamassegwomhok
agko' sa' apwesey.
14 Kaxénwakxohok sa'
apwáxok Wesse' egegkok
aptémakxa ekmaso axta apyáp,
memasséssesek sa' aqsa han
chá'a megkay'assáxma m'a egken;
15 kaxének sa'
nahan chá'a apwáxok
Wesse' egegkok
aptémakxa m'a,
emasséssesek sa'
apxénamap keso náxop.
16 Axta ey'áseykegkok
ektémakxa apmopyósa
anlanok egmók;
apkelyetleykha axta
chá'a m'a meyke
nak aqsok apagkok,
tén han ma'a
apkelyelqamákpoho nak,
tén han ma'a
ekyentaxnamo nak apheykha,
ekwokmoho apkelnapma.
17 ¡Tásek kólának
katnégwomhok exma ekmaso,
hakte apmenyeyk katnehek
xa ektáha nak,
nágkólana kataqmelek
apha hakte mopmenye'!
18 Kápok sa' ekmaso
apha ektémól'a
negaqlamaxche',
kalántexek sa'
apexchakkok
tén han apwáxok,
ektémól'a vino essenhan
pexmok égmenek;
19 ¡kápok sa' ektémól'a
antaxnekxak nentaxno,
kayaqhápok sa'
ektémól'a nentétamáxche
kayaqhápok nenxet!
20 ¡Sa' etnéssesek
Wesse' egegkok
eyaqmagkásekxak
setnéssessamakxa
m'a sélenmexma,
tén han sexéneykha
nak chá'a ekmaso!
21 Xép eyke Wesse',
hetaqmelches eñama
apmasma apwesey.
¡Hewagkas teyp,
eñama m'a segásekhayo nak!
22 Méko agko' ko'o
aqsok ahagkok,
yentexek han sekha,
legeykegkók ewáxok,
23 taqmelcháseykegkók
ko'o sekmáheyo amassegwók,
ektémól'a pessesse,
¡éttelegwáseykegkek
éxchahayam aptémól'a sawa'!
24 Kelyawheykha etapnák
eñama mato sekto;
ekyamhagkamchek
eñama meyke sekto.
25 ¡Ellektegmaha chá'a
hélanok énxet'ák!
¡Elyeykesha chá'a
apqatkok hey'ássók
sét'a enxoho!
26 Wesse',
Dios ahagkok,
hepásem ko'o;
¡hewagkas teyp
eñama segásekhayo!
27 Elya'ásegwók sa'
apteme exchep xa ektáha nak
sewagkasso teyp Wesse'.
28 Eltamhok sa' eykhe
chá'a hetnégwomhok
exma ekmaso,
méko katnehek,
hakte etaqmelchessegkek
chá'a exchep.
Elmegqágwakxak sa'
ma'a apyókxoho nak,
keñe sa' ko'o sektáha
nak xép apkeláneykha
kapayhekxak ewáxok.
29 ¡Elmegqáwhok apagko'
sa' ma'a sélenmexma nak.
¡Kápok sa' apkelmegqakto,
aptémól'a kélaqlamaxche'!
30 Malwátéssemek sa'
chá'a ko'o apaqmétek
agkések ekxeyenma
ewáxok Wesse' egegkok;
¡alpeykeshok sa' chá'a
nepyeseksa apxámokma
apagko' énxet'ák!
31 Hakte apmasmeyk ma'a
meyke nak aqsok apagkok,
apwagkassegkek teyp
nepyeseksa m'a
apmáheyo nak yaqhek.
