Ningmasquem ayajem apvisqui Ezequías
(2~Cr 32.24-26Is 38.1-8)1 Nalhit acnim nic nat intomjac. Ningmasquem nic nat ayaja Ezequías. Aptiyaningvocmec nic nat profeta Isaías, Amoz apquitca.
Aptomjac nic nat apcanya: —Lhip Ezequías, ingyeylhojo Visqui ingac appayvam: Iltimnas sat lhip apquilmolhama actomjaclha nelha lhip appayvam. Metamalvomejec sat lhip, ingyitsapoc sat lhip — lhac aptomjac Dios — nic nat aptomjac Isaías.
2 Appaycacpec nic nat apanco apyitnamaclha Ezequías, elanojoc tingma napocja. Aptomjac nic nat apquilmalhnancama: 3 Lhip Dios Visqui ingac, altamjoc lhip colvoncamejec sictimesaycam lhip ayinyema actamilaycam evalhoc, lhip apyisponcama — nic nat aptomjac. Avanjec nic nat apvinama Ezequías.
4 Naysicsa aptiyapma profeta apvisqui tingma pac, aplinga ilhnic nat Dios appayvam: 5 Lhip Isaías, iltimnasquiclha sat apvisqui Ezequías coo sicpayvam: Eycaso Dios appayvam, lhip apyeyjamcaa David apvisqui apanco. Acjalhnoc lhip appayvam selmalhnaycam, acvitac coo apate ayingmenic. Pac otamilquiscomoc sat lhip. Etingyac sat mocjam lhip tingma apponquinomap acvaycmo tres acnim. 6 Pac ovinaticsic sat lhip aptiyascam acvaycmo quince años. Emyovacpoc sat lhip napatavo cotnaja ingmoc co Asiria, silantipquisa inlhojo tingma Jerusalén, elmiyovacpoc sat apyovoclhojo tingma. Otamilsic sat mataa as tingma, ayinyema mayayo apvisay apanco David, najan colhic seyaco coo lha — lhac aptomjac Dios — nic nat aptomjac Isaías.
7 Apcapajasquic nic nat Isaías, colhic allana panatem higo acyilhna. Apquiltilhnamquic nic nat as panatem apyimpejic acmasca. Aptamilaclhec nic nat mocjam apvisqui.
8 Aptomjac nic nat Ezequías apcanya profeta Isaías: —¿Co laa actema oyasamcojo jetamilquiscomoc Dios, omyaclhac sat tingma apponquinomap, acvaycmo inlhojo tres acnim? ¿Yitne ya asoc monquinatquiscama? — nic nat aptomjac.
9 Apcatingmavoc nic nat profeta: —Etac sat lhip asoc monquinatquiscama ayinyema Dios: Quip ilanojo pisquisca. ¿Apquiltamjo ya lhquip covoncac sat pisquisca? ¿Apquiltamjo ya lhquip cotajojoc mocjam pisquisca? — nic nat aptomjac.
10 Apcatingmavoc nic nat Ezequías: —Altamjo inyicje cotajojoc mocjam pisquisca — nic nat aptomjac.
11 Appamejitcasquic nic nat profeta Dios Visqui ingac. Aptimescasquic nic nat Dios, yoyam cotajojoc mocjam pisquisca, acvisay nic nat reloj apanco apvisqui Acaz.
Apquilsoycam amyaa apnaclha apvisqui Ezequías
(2~Cr 32.27-31Is 39.1-8)12 Nalhit acnim nic nat intomjac. Aplingac nic nat apvisqui co Babilonia, apvisay Merodac-Baladán, apyap nic nat apvisay Baladán, actemaclha amyaa aptamalviyam mocjam apvisqui Ezequías. Apcapajasquic nic nat apquilsoycam amyaa najan carta vaycajac najan apmescama nasa, elhcac sat Ezequías. 13 Apmec nic nat tacja Ezequías. Apquillhicmosquic nic nat acyitnamaclha solyayem, plata najan oro, najan asoc acmasis, najan ayingmenic acmasis, najan acnaycamcaclha apquilmaycam najan moc asoc acnaycaoc maa. Apsovjoc nic nat apquillhicmoscama asoc, mepqui ayaymomalhca lhama. 14 Aptiyaningvocmec nic nat profeta Isaías, aptomja apcanya: —¿Soc amyaa yi? ¿Co laa apquilinyemaclha maycaa? — nic nat aptomjac profeta.
Apcatingmavoc nic nat Ezequías: —Apquilinyemac alhta mocjay, yoclhilhma Babilonia — nic nat aptomjac.
15 Aptomjac nic nat profeta apcanya: —¿Apquilvita ya lhip apquilnatam congne apvisqui tingma pac? — nic nat aptomjac.
Apcatingmavoc nic nat Ezequías: —Apquilvitac alhta acyovoclhojo silnatam. Acsovjoc coo sillhicmoscama asoc, mepqui ayaymomalhca lhama — nic nat aptomjac.
16 Aptomjac nic nat Isaías apcanya Ezequías: —Ingyeylhojo sat lhip Dios appayvam: 17 Incovac sat acnim, yoyam elsavojoc sat apquilpatmaoclha co Babilonia acyovoclhojo apquilnatam, apquilansayclha ilhnic nat apquilyeyjamcaa nano. Mepqui ayaymomalhca lhama sat cotnejic. 18 Elmacpoc sat napocja aptovana lhip, colhic sat acnalaclho yoclhilhma Babilonia, eltimesacpoc sat yamquilvanaa, yoyam eltimesam apvisqui co Babilonia — nic nat aptomjac.
19 Inlhenquic nic nat apvalhoc Ezequías, cotnejic sat mepqui apquilnapomacpilha naysicsa aptiyascam mengyitsepmaclha mocjam.
Apcatingmavoc nic nat: —Actamila Dios appayvam seltimnascama lhac lhip —nic nat aptomjac Ezequías.
Apquitsepma apvisqui Ezequías
(2~Cr 32.32-33)20 Yitnec nic nat mocjam amyaa actalhesomalhca aptemaclha apvisqui Ezequías, najan aptemaclha apquillanay nic nat acyitnamaclha yingmin, najan maa yingmin atamnic acvaycmo apvalhoc tingma apvanyam. Acvisay vaycajac crónicas apquilviscaa co Judá. 21 Apquitsepquic nic nat apvisqui Ezequías. Aptimesacpec nic nat apquitca Manasés, etnejic apvisqui apya'monquiscama apyap ninga.
Ezequías apháxamap tén han aptaqmelwayam
(2 Cr 32.24-26Isa 38.1-8)1 Cháxa eyaqhémókxa axta han apháxamákpo ekyentaxno agko' Ezequías xa ekhem nak, tén axta apye'eykekxo m'a Dios appeywa aplegasso Isaías, Amós apketche. Aptáhak axta apcháneya s'e:
—Aptáhak Wesse' egegkok se'e: ‘Elpaqhetchásekxoho sa' ma'a ekheykha nak apxagkok, hakte yetsapok sa'; metaqmelwome'.’
2 Appeynchákpek axta appayhékxoho nápakha tegma m'a Ezequías, tén axta aptáha apkelmaxneya Wesse' egegkok se'e: 3 “Wesse' ahagkok, éltamhók ko'o exchep kaxénwakxohok apwáxok ektémakxa nak mayenseyam sekyetleykha tén han sekteméssesso naqsók agko', séláneya m'a ekleklamókxa nak xép apwáxok.” Tén axta apkelekxagweyncha'a ekwányam agko'.
4 Amonye' apteyapma axta Isaías ma'a neyseksa eyáxñe nak ma'a tegma apyawe, keñe appaqhetchesa Wesse' egegkok ma'a Isaías, aptáhak axta apcháneya: 5 “Etaqhoho eltennássekxa makham Ezequías, apkemha apmonye' nak énxet'ák ahagkok: ‘Aptáhak Wesse' egegkok se'e, cham'a Dios apagkok nak ma'a apyáp nano' David: Ekleg'ak ko'o exchep apkelmaxnagko, ekwet'ak nahan ma'a apaqtégmenek. Eynnaqtéssók sa' makham, wokmek sa' agkok ántánxo ekhem, keñe sa' emyekxak makham ma'a Wesse' egegkok tegma appagkanamap apagkok. 6 Agkeyásekxak sa' ko'o makham xép quince apyeyam apweynchámeykha. Awagkasek sa' ko'o exchep teyp tén han Jerusalén, neyseksa apmáheyo emok ma'a wesse' apwányam Asiria. Amyók sa' ko'o s'e tegma apwányam nak, eñama seyásekhayo m'a David sekteme axta séláneykha, keñe han sekmeyámáxkoho ahagko' ko'óxa.’”
7 Apkeltamhók axta Isaías kóllanaksek higo ekyexna élyamaye, kéltekxekkessek axta, keñe kéltexnassásegko ekyetnakxa aplegeykegkoho m'a wesse' apwányam, tén axta aptaqmelwokmo. 8 Keñe axta Ezequías apkelmaxneyáncha'a m'a Isaías:
—¿Yaqsa sa' aqsok magkenatchesso awanchek ko'o hey'ássesagkohok Wesse' egegkok peya hetaqmelchessók, tén han ekwokmo enxoho ántánxo ekhem amyekxak makham ma'a Wesse' egegkok tegma appagkanamap apagkok?
9 Apchátegmowágkek axta Isaías:
—Keso aqsok magkenatchesso yaqwayam sa' egkések Wesse' egegkok, elának ma'a aqsok apkeltennasso axta elána': ¿Apmenyéya kaxog ekhem pessesse agkok ekweykmoho diez kélchánteykegkaxa néten, essenhan kataqhohok natámen?
10 Apchátegmowágkek axta Ezequías:
—Yeskohok kaxog ma'a ekhem pessesse agkok. Askehek eyke kataqhegwók.
11 Keñe axta Dios appeywa aplegasso Isaías apwóneyncha'a Wesse' egegkok, keñe axta Wesse' egegkok aptaqhéssekmo pessesse ekweykekxoho diez kélchánteykegkaxa néten, cham'a ekxega axta Ahaz tektek apagkok élyetsáteyak ekhem.
Ezequías apkelma takha' kélápháseykha apkeleñama Babilonia
(2 Cr 32.27-31Isa 39.1-8)12 Aplegayak axta amya'a wesse' apwányam Babilonia Merodac-baladán, Baladán axta apketche, apháxamákpo Ezequías xa ekhem nak. Apcháphássessegkek axta weykcha'áhak tén han xama aqsok apmésso naqsa, axta eyke apsókasso m'a énxet'ák ektáha axta chá'a apkelápháseykha. 13 Apkelmeyk axta han takha' m'a Ezequías, apkelxekmóssek axta m'a aqsok élmomnáwa apagkok, sawo élmope élmomnáwa tén han ma'a sawo ekyátekto élmomnáwa, tén han ma'a sokmátsa, tén han pexmok égmenek ektaqmalma, tén han ma'a apxátamakxa nak chá'a apkelmeykha apkenchesso kempakhakma, tén han ma'a ekyókxoho aqsok ekhéyak axta m'a kañe' apxátamakxa axta chá'a aqsok apagkok. Méko axta xama aqsok enxoho mexekmósakxa m'a kañe' nak tegma apyawe apagkok, apwokmók axta apxekmósso m'a ekyókxoho aptémakxa nak chá'a wesse' apwányam. 14 Tén axta m'a Dios appeywa aplegasso Isaías apya'aweykxo m'a wesse' apwányam Ezequías. Aptáhak axta apkelmaxneyáncha'a s'e:
—¿Háxko apkeleñamakxa m'a énxet'ák nak? ¿Háxko aptáhakxa apcháneya?
Aptáhak axta Ezequías apchátegmowágkokxo s'e:
—Apkeleñamak ma'a apkelókxa makhawo' nak; cham'a Babilonia.
15 Apkelmaxneyáha axta makham Isaías:
—¿Yaqsa apkelwet'a m'a kañe' tegma apyawe apagkok nak?
Apchátegmowágkokxeyk axta Ezequías:
—Apkelwet'ak ekyókxoho aqsok ekhéyak nak ma'a kañe'. Méko maxekmósakxa enxoho m'a sekxátamakxa nak chá'a aqsok ahagkok.
16 Tén axta Isaías aptáha apcháneya Ezequías se'e:
—Yeyxho sa' Wesse' egegkok appeywa: 17 ‘Kammok sa' ekhem yaqwánxa kólsakxak Babilonia m'a ekyókxoho aqsok ekhéyak nak kañe' tegma apyawe apagkok, tén han ekyókxoho aqsok apcháncháseykekxa axta m'a apyapmeyk nano', ekweykmoho s'e negwánxa nak. Méko sa' xama aqsok keytnekxak se'e. 18 Kawomhok sa' kélnaqleykekxa Babilonia nápakha m'a aptawán'ák neptámen apancha'awo' nak, yágkelwán'ák sa' kóltamhagkok, keñe sa' kólteméssesagkok apkeltamheykha m'a kañe' nak wesse' apwányam apxagkok apyawe.’
19 Aptáhak axta Ezequías apchátegmowágkokxo Isaías se'e:
—Tásók agko' nak la'a Wesse' egegkok appeywa seseykentegkesso exchek. Hakte xeyenmeyk axta apwáxok keytek meyke ektáhakxa egwáxok tén han ektaqmalma negha neyseksók apha makham ma'a.
Ezequías apketsapma
(2 Cr 32.32-33)20 Ektémakxa axta apweynchámeykha Ezequías, tén han megyésseykekxa axta chá'a apkelane aqsok, tén han ektémakxa axta apkeláneya kélyátamakxa yegmen, tén han ma'a yegmen atamnek yaqwayam ey'ásekxak yegmen ma'a tegma apwányam, hágkek eknaqtáxésamaxche m'a weykcha'áhak apagkok axta apkelwesse'e apkelwányam nak Judá. 21 Xama axta apketsapma Ezequías, apyaqmagkassek axta apteme wesse' apwányam ma'a apketche Manasés.
