1 Altamjoc coo yoyam elyasamcojo quellhip actemaclha sicvascapma, malha silnapomalhca acyanmongam quellhip. Acvascapquic najan acyanmongam enlhitaoc apnaycam tingma Laodicea. Najan acyanmongam aplhamoclhojo enlhitaoc apquiltomja mejelvitay mocjam. 2 Altamjoc coo mataa yoyam colyimnac acliclamo apquilvalhoc. Yoyam eltimjic lhama apquilpasmeyquiclha. Yoyam najan elyasingvomoc actemaclha cotlaycaoc asoc altamila, acvisay asoc acyilhomalhca ayinyema Dios. Eycaso apvisay Cristo. 3 Yitnec apnaclha Cristo aclhamoclhojo actemaclha ningyascamco najan actemaclha ningyasingvoyam, malha asoc acmamnave acposomalhca. 4 Eycaso sictalhesquiscama quellhip yoyam melsilhnanacpejec ayinyema apquilyinimquiscama poc. 5 Am olhnac coo nipyesicsa quellhip. Acvamlha sicvanmoncama acna nipyesicsa quellhip. Inpayjeclhec evalhoc sicvita quellhip apquiltomja coyeycajamalhca moc apquilvalhoc najan aptemaclha apquilyimnatescama apquilvalhoc naysicsa melyasquiyam Jesucristo.
6 Eycaso sicpayvam silanya quellhip: Apquilyanmoncasquic alhta apquilvalhoc quellhip yoyam eltimjic apvisqui Jesucristo. Ellhnasojo sat quellhip aptemaclha Jesucristo. 7 Elinlhanmojo actemaclha apquilpasmeyquiclha Cristo malha yamit inquipmenaoc alyascama congne lhopactic. Elyimnaticsojo apquilvalhoc naysicsa melyasquiyam, malha tingma apvojac, actemaclha apquilyasingvoyam alhta quellhip. Eltime sat mataa gracias Dios Ingyapam.
Nintemaclha alhnancoc ayinyema Cristo
8 Elavojo sat quellhip. Apquililtamjoc mataa enlhitaoc yoyam elsilhnana quellhip najan yoyam elyinimsic. Am elyiplovcasac mataa actemaclha amyaa ayinyema Cristo. Apquilyiplovcasquic mataa amyaa ayinyema enlhitaoc. Apquillhenquic mataa actemaclha asoc acnaycaoc lhalhma anco as nalhpop.
9 Innoc aptemaclha Cristo Dios. Ingillhicmosquic Cristo aptemaclha Dios. 10 Apquiltimec sat ancoc quellhip apquilpasmeyquiclha Cristo, coymalhquejec sat lhama asoc. Ayinyemaclha Cristo aptomja Apvisqui tacjalhit alyimtalhnamo najan almovancaa. 11 Apquiltimec quellhip apquilpasmeyquiclha Cristo, malha acyitna asoc monquinatquiscama quellhip. Jave asoc monquinatquiscama apyimpeoc ayinyema enlhit eyca actemaclha apquilvomsomap tap naysicsa melyascalhma najan apquiltemaclha nano. Eyca as asoc monquinatquiscama ayinyema Cristo. 12 Innec alhta acyapascasamco yingmin quellhip. Malha apquilatongnomap lhama Cristo apquiltomja quellhip. Malha najan apnalhaticjangviyam lhama Cristo apquiltomja quellhip. Ayinyemaclha am alhta elyascacmoc quellhip Dios apmopvan aptomja aplhaticjasquiyam Visqui ingac nipyesicsa apquilmasquingvaycmo. 13 Quellhip apquiltomja nano malha apquilitsepma napato Dios, ayinyema melyascalhma quellhip najan actemaclha mepqui aclhanma apquilvalhoc Dios. Am alhta coyitnac quellhip asoc monquinatquiscama apyimpeoc. Quilhvo eyca apmasquic Dios acyimnatem apnenyaoc quellhip ayinyema apquilpasmeyquiclha Cristo. Apmascosquic aclhamoclhojo melyascalhma quellhip. 14 Yitnec alhta acnatalhesomalhca vaycajac actemaclha apquilsilhnanomap quellhip. Incaymalhquic alhta eticyoc quellhip acyanmongam apquilsilhnanomap. Apyaptec alhta as vaycajac Cristo apyipitsa netin asoc timyescama. 15 Apyimnatem apanco nac Cristo, malha apquilmam aptomjac alyimtalhnamo najan almovancaa. Apquilvatescasquic alhta Cristo altemaclha ancaoc ayinyema apquitsepma netin asoc timyescama. Malha apnalayclha alhta almomalhca alyimtalhnamo najan almovancaa napatavo enlhitaoc. Innec alhta ayaco Visqui ingac apyimnatem.
Eltingya sat asoc acnaycaoc netin
16 Noelane nasa eltimjic apquilpayvam poc, yoyam elacsic actemaclha nintom najan actemaclha ningyam najan actemaclha nipyesicsa caya najan aptemaclha piltin apjalhnancoc najan actemaclha nintamilquiscama acnim ningnayclha. 17 Jave nasoc anco asoc allhenomalhca yoyam colvac sat. Apvamlha pac Cristo aptomja nasoc anco. 18 Innec alhta ayaco Visqui ingac apyimnatem. Apquilposquic mataa actemaclha apquilyimtalhnesomacpo apanco as enlhitaoc. Eyca apquilyiplovcasquic mataa apquiltemaclha apancaoc. Apquiltamjoc mataa as enlhitaoc yoyam elpayicsojo quellhip ángeles. Apquilanayquic mataa colvitac apquilvanmoncama asoc mongvitay nincoo. Inquilquitamquic mataa apquilvalhoc apquiltemaclha apancaoc naysicsa alajamalhco apquilvalhoc as enlhitaoc. 19 Am elyiplovcasac as enlhitaoc apquilpasmeyquiclha Cristo, aptomja apquimja apmamyi. Aptomja apvanimquiscama apyovoclhojo. Apquilyimnatescasquic mataa apjajac najan alyiptetaclha. Coyimnac sat apyovoclhojo actemaclha apmayjayoclha Dios.
20 Quellhip apquiltomja malha apquilitsepma lhama Cristo. Colapvanquejec mocjam elyiplovsic quellhip quilyicjamo almasomcaa lhalhma anco. ¿Soctomja apquilyiplovsa nac quellhip apcanamaclha ayinyema enlhit lhalhma anco? 21 Apquiltomjac mataa apquilpayvam: “Nopatningvomjo nasa lhama asoc. Notov nasa moc asoc. Nolic nasa moc asoc” —apquiltomjac mataa. 22 Eycaso apcascamaclha najan apcanamaclha ayinyema enlhit apanco. Inmalhquic mataa as nintom, natamin intovcalhquic mataa. Inyiplovcoc najan acmasquem acvisay nintom. 23 Apquillhenquic mataa as enlhitaoc actemaclha apquilyascamco apanco. Apquilposquic mataa actemaclha apquilyimtalhnesomacpo apanco. Ayinyema apancaoc yoyam elpayicsojo ángeles. Ayinyema apquilasquiscama apanco apyimpeoc. Alhtoc apquilyiplovcasac mataa as asoc. Colapvanquejec eltamacsic mataa apquilmayjayoclha apanco actemaclha ayitsepma apnenyaoc.
1 Hakte éltémok ko'o kólya'ásegwomhok sélenxáneykmo ko'o sektamheykha ekyentaxno agko' yaqwayam apasmok kéxegke, kélheykha nak Laodicea, tén han ma'a apyókxoho énxet mehéteya nak makham ko'o sekyókxoho. 2 Ekwasqápeykxók ko'o yaqwayam enxoho elxawagkok ekmáyheykegkoho apkelwáxok xa énxet'ák nak, tén han megyexpánchesakpek eñama apkelásekhamakpoho, tén han kaxek ekyawe agko' apkelya'ásegwayam, ekmésso nak yaqwayam elya'ásegwók ma'a aqsok ekpowásamáxkoho apmáheyo axta elának ma'a Dios, cham'a Cristo apagko' nak; 3 hakte yetnók ekyókxoho negya'ásegwayam nak ma'a tén han ma'a negyekpelchémo nak. 4 Éltennássek ko'o kéxegke xa, yaqwayam enxoho megkalyexanchesha kéxegke m'a amya'a megkamámnaqsoho senlekweykmoho nak. 5 Maxmak eykhe ko'o sekyókxoho kélnepyeseksa kéxegke, xeyenmeyk eyke chá'a ewáxok, payheykekxeyk nahan ko'o ewáxok sekweteya kéltaqmelchessama kéltamheykha kéxegke, tén han kéllenxáneykmoho kélyennaqtéssamo kélteme megkólya'ásseyam ma'a Cristo.
Axnagkok nentémakxa eñama nak Cristo
6 Cháxa keñamak, kélmoma nak takha' kéxegke Jesucristo yaqwayam kóltéhek Wesse' kélagkok, kéméxcheyk chá'a kóltamhagkok ma'a aptamheykegkaxal'a chá'a m'a Cristo énxet'ák apagkok, 7 yetlo kélyepetcheyo kélagko' ma'a Cristo, tén han kóltéhek kélásenneykekxa eñama m'a megkólya'ásseyam nak, ekhawo ektémakxa axta kélxekmósso kéxegke, kólmések nahan chá'a ekxeyenma kélwáxok ma'a Dios.
8 Kóllanagkoho chá'a kéltáhakxa: nágkólho aqsa chá'a elmok ma'a apmáheyo nak chá'a elyexanchesha yetlo apchásenneykekxa m'a ektémakxa nak chá'a élchetámeykha apkelwáxok megkamámnaqsoho, hakte megkañamak Cristo xa, wánxa apkeltémakxa nak chá'a énxet, tén han ekmowána m'a aqsok éláneykencha'a nak keso náxop.
9 Hakte ekyókxoho aptémakxa nak Dios, sawhomáxkók ekwetamaxche m'a Cristo. 10 Sawhomáxkók kéxegkáxa kélxawáya m'a aptémakxa nak Dios eñama kélyepetcheykekxa m'a Cristo, hakte Cristo apteme apkemha apmonye' neyseksa m'a ekyókxoho aqsok ekha nak élmowancha'a, tén han ma'a ekha nak kélyaheykekxoho. 11 Cha'a keñamak nahan kélyepetcheykekxa, kélyenyekhassáseykegko chá'a nekha kélyempe'ék kéxegke m'a, háwe eyke m'a kélyenyekhamól'a nekha egyempehek, énxet apkelanél'a, akke m'a kélyenyekhamól'a nekha egyempehek, apkelanél'a m'a Dios, eñama apyepetcháseykekxa kéxegke m'a Cristo tén han apyenyókassama m'a kéltémakxa nak chá'a megkólya'assáxma. 12 Kélátawañamáxchek axta kéxegke xamo' Cristo, cham'a kélyaqpassáseykegko axta yegmen, kélnaqxétekhásseykmek axta nahan xamo' kéxegke m'a, hakte axta kólya'ásseykmok kéxegke m'a Dios apmopwána, cham'a Dios apxátekhásseykmo axta m'a Cristo. 13 Máxa kéletsapma axta kéltemék kéxegke m'a nano' axta eñama megkólya'assáxma, tén han eñama megkólyenyókasso m'a kéltémakxa axta megkólya'assáxma; apkelmeyáseykegkek eyke kaxwók kéxegke Dios ekyennaqte kélnények xamo' Cristo, cham'a Dios apteme nak meyaqmagkáseykekxa ekyókxoho mólya'assáxma. 14 Apmasséssegkek axta Dios ekyókxoho m'a ektémakxa axta eknaqtáxésamaxche negméyak, negánémaxche axta chá'a anlána'. Apyaqxaqxegkek axta néten aqsok ektegyésso apmasséssama. 15 Apmasséssesegkek axta Dios élmowancha'a m'a aqsok ekha nak élmowancha'a, tén han ma'a ekha nak kélyaheykekxoho, Cristo axta nahan keñamak apkelmegqassama apnaqleykekxo nápaqta'awók apxámokma énxet'ák, apteméssessama máxa élmomaxche apkeleykáseykekxo, apxekmóssamo apteme apmallanma.
16 Nágkólho aqsa kólxénmakha ekmaso kéxegke eñama m'a kéltéyak nak chá'a tén han ma'a kélyenéyak nak chá'a, essenhan ma'a ekhem kélessawássessamókxal'a chá'a, pelten aphaxnagkok, essenhan ma'a ekhem sábado. 17 Naqta'a eyke aqsa peya nak kalwak egmonye' xa ekyókxoho nak, Cristo eyke apteme apmámnaqsoho. 18 Nágkólho aqsa émentók aqsok kélxawe naqsa kéxegke m'a énxet'ák aptamhéyak nak chá'a máxa megkaleymáxkoho agko' apkelwáxok, apkelpeykessamo nak chá'a m'a Dios apkelásenneykha, apkelxeyenmól'a chá'a ekyetno m'a aqsok kélxekmóssamo, cham'a meleyssól'a eleykpoho' eñama ekteme élchetamso apkelwáxok ma'a ektémakxal'a élchetamso apwáxok énxet. 19 Mépetcheykekxak apteme nak apqátek xa énxet'ák nak, apwánegkessesso nak chá'a ekyókxoho apyókxa, apmésa enxoho chá'a ekyennaqte, apkeltekxekkásekxo enxoho chá'a mók ma'a ekheykegkaxa nak chá'a, ekhawo m'a ektémakxa nak apkeláneykekxa m'a Dios.
20 Kéletsapmók axta kéxegke xamo' Cristo, massegkek kaxwók élma kéxegke m'a aqsok ekha nak élmowancha'a éláneykencha'a nak keso náxop. ¿Yaqsa eyke ektéma kéltéma nak makham máxa kéleñamakxa keso náxop, kélyaheykekxoho makham ma'a ektéma nak chá'a amya'a 21 agánéxchek se'e: “Ná epaknegwomho aqsa xa, ná etaw aqsa xa, ná ema aqsa?” 22 Kamassegwók chá'a natámen kélmeykha xa ekyókxoho kéltémókxa nak antéhek, hakte negánémaxchexa antéhek aqsa xa, tén han énxet apkelxekmósso. 23 Máxa eyke nahan katnehek ekha enxoho ekya'áseykegkoho xa aqsok nak, hakte kaltamhok chá'a antéhek máxa ektaqmela enxoho nentémakxa, tén han meyke eyeymáxkoho egwáxok, kaltamhok nahan chá'a anlegássesagkohok negyókxa, aqsok mékoho eyke xa, megkamowána nak kamagkok ma'a aqsok ekyespagkamakxa nak negyókxa.
