Actemaclha apquilatingmoctamo napatavo singyicpilquemo metnaja Jesucristo apmolhama
1 Yitnec mocjam moc asoc nipyesicsa quellhip, actemaclha apquilatingmoctamo. Apquilatingmacpec sat ancoc apcanit ingilyalhinga. ¿Soctomja apquiltingya nac singyicpilquemo metnaja Jesucristo apmolhama yoyam epeyvescasiclha quellhip? ¿Soctomja meltimnasa nac Jesucristo apmolhama yoyam elpeyvescasiclha? 2 Quellhip apquiltomja Dios apquilyacyescama. ¿Am ya elyasamcoc yoyam elyicpilcojoc sat quellhip enlhitaoc lhalhma anco? ¿Colapvanqueje ya quellhip elpeyvescasiclha asoc ayitcoc nipyesicsa quellhip? 3 ¿Am ya elyasamcoc quellhip yoyam ongiltimjic nincoo ningyicpilquemo ángeles Dios apquilasinancama? Incaymalhquic ongilyasamcojo mataa nincoo yoyam ongilpeyvescasiclha asoc ayitcoc ayinyema as nalhpop. 4 Yitnec quellhip apquilatingmomap nipyesicsa. ¿Soctomja apquililtimnasa nac quellhip metnaja Jesucristo apmolhama yoyam elpeyvescasiclha quellhip? 5 Eycaso actomja siclhanma yoyam elmancangvomoc sat quellhip. ¿Am ya elhnac lhama ingyalhing apmopvan epeyvescasiclha asoc nipyesicsa ingilyalhinga? 6 Apquilatingmacpec inyicje quellhip napatavo singyicpilquemo metnaja Jesucristo apmolhama.
7 Am coltamilo actemaclha apquilatingmomap nipyesicsa quellhip, actomja acmasom anco. ¿Colapvanqueje ya colhic acpejescaa mataa alhtoc quellhip? ¿Apquilmiyovqui ya quellhip yoyam colminyilhalhca asoc apancaoc? 8 Yitnec apquilpejescay mataa quellhip. Yitnec apquilminyilhma quellhip nipyesicsa ingilyalhinga.
9-10 ¿Am ya elyasamcoc quellhip yoyam melpalhavomejec sat Dios apquilnancascama apquiltomja melpeyvomo? Noelyinimsap nasa quellhip. Melpalhavomejec sat Dios apquilnancascama apquiltomja apquilanatama najan apquiltomja apquilayo quilaycmasquiscama acyitsomalhca Dios najan apquiltomja apnatovascama alyimjapma najan apquiltomja moc actemaclha apquilpatjetaycaoc najan apquiltomja apquilminyilhma najan apquiltomja apquilmasma asoc najan apquiltomja ayajem anmin najan apquiltomja apquilvinéycam Dios najan apquiltomja ticyovam inyap. 11 Eycaso apquiltemaclha quellhip nano. Quilhvo eyca almascosalhco melyascalhma quellhip, apquiltomja Dios apquilyacyescama. Innec altimesa apquilpeyvomo napato Dios. Eycaso ayinyema Jesucristo Visqui ingac najan ayinyema Espíritu apanco Dios.
Actemaclha acponquinomalhca ningyovoclhojo
12 Yitnec apquillhanma napocja ingilyalhinga: Evanquic ollanac aclhamoclhojo siltamjoclha ollana —alhta apquiltomjac. Actomjac coo silanya quellhip: Naso, ingvanqui inyicje. Cotnaja aclhamoclhojo asoc altamila yoyam comoc ingvalhoc. Apquiltomjac mataa poc: Evanquic coo aclhamoclhojo asoc mepqui selyascamalhma —alhta apquiltomjac. Actomjac coo silanya quellhip: Naso, ingvanqui inyicje. Mongvanquejec ongilyejiclhojo aclhamoclhojo asoc yoyam ongilyiplovcasojo. 13 Apquiltomjac mataa quellhip: Nintom actomja yoyam ongilyipcanmojo. Yitnec nincoo ingvocmo yoyam ontovamcoc nintom —alhta apquiltomjac. Actomjac coo silanya quellhip: Covac sat acnim yoyam etvacsic Dios actemaclha nintom najan ingvocmo. Yitnec nincoo ningyovoclhojo. Mongvanquejec eyca ongyiplovjo actemaclha ningilanatama. Yitnec nincoo ningyovoclhojo yoyam ongilanam Visqui ingac. Apquiltamjoc Visqui ingac etamilsic ningyovoclhojo nincoo. 14 Najan moc: Dios aptomja alhta aplhaticjasquiyam Visqui ingac. Jingillhaticjascomoc sat nincoo lha ayinyema apmopvan actamongvomlha nelha acnim.
15 ¿Am ya elyasamcoc quellhip actemaclha ningyovoclhojo actomja acyipitcay Cristo apyovoclhojo, malha alyiptetaclha apanco? ¿Invanqui ya ongilyipitcojo inganco quilvana alanatama ningiltomja Cristo alyiptetaclha? Paj, mongvanquejec ongyipitcojo. 16 Apquilyasamco inyicje quellhip. Apyipitcavoc sat ancoc enlhit quilvana alanatama, cotnejic sat malha lhama apyovoclhojo. Intomjac nic nat Dios appayvam actalhesomalhca: “Cotniclhac sat lhama apyovoclhojo enlhit najan quilvana” —nic nat intomjac. 17 Ningyipitcavoc sat ancoc Visqui ingac, ongiltimjic sat malha lhama ayinyema Espíritu apanco Cristo.
18 Elvatsaoc sat actemaclha apquilanatama quellhip. Jave aclhamoclhojo mongilyascalhma actomja actovascama ningilyovoclhojo. Ningiltomjac sat ancoc ningilanatama, ongiltovacsic sat ningilyovoclhojo. 19 ¿Am ya elyasamcoc quellhip apquilyovoclhojo aptomja Espíritu Santo tingma pac aptomja apponquinomap? Apnec apquilvalhoc quellhip Espíritu Santo Dios apmescama. Colapvanquejec quellhip ellanac apquiltamjoclha ellana. 20 Avanjec alhta apyanmonquiscama Dios acyanmongam quellhip. Elane sat comojoc apquilyovoclhojo apquiltimem apquilayo Dios.
Énxet'ák melya'ásseyam apkelye'eykekxa énxet'ák segyekpelchémo melya'áseyak nak Cristo
1 Yetneyk agkok kélxama kéxegke megkaleklo chá'a apwáxok aptáhakxa pók ¿Yaqsa ektáha kélmaxnegwokmo nak yaqwayam elánekxések amya'a m'a énxet segyekpelchémo metne nak mey'ásseyam Cristo? ¿Keñe megkólmaxneya yaqwayam elánekxések amya'a m'a Dios énxet'ák apagkok nak? 2 ¿Enxeykel'a kólya'áseykegkok kéxegke Dios énxet'ák apagkok apkelpagkanamap peya etnahagkok apyekpelchémo keso náxop? Peyk agkok kéxegke kóltéhek kélyekpelchémo keso náxop, ¿yaqsa ektáha megkólewagko nak kólyekpelkohok xa aqsok ketsék agko' nak? 3 ¿Yagkólya'áseykegkok nahan kéxegke peya kawomhok negko'o nélyekpelchémo m'a Dios apkelásenneykha nak? ¡Akke ekyágwánxa agkok negko'o negmowána antéhek negyekpelchémo aqsok keso negwánxa nak! 4 Yetneyk agkok chá'a kéxegke megkaleklo kélwáxok ektémakxa kélwete aqsok keso negwánxa nak, ¿yaqsa ektéma kéltegyeya nak chá'a segyekpelchémo énxet mékoho nak elanok ma'a énxet'ák apkeleñama nak kélaqneykekxexa'? 5 Ektemék ko'o séláneya kéxegke xa ektáha nak yaqwayam sa' kólmegqè'; ¿Méko enxeykel'a kélnepyeseksa kéxegke xama énxet apmopwána nak ékpelkohok ektáhakxa aqsok élánamáxche nepyeseksa apkelyáxeg'a? 6 Háwe ekwánxa agkok chá'a kéxegke kélenmexeykha kélmók, cham'a kélyáxeg'a nak chá'a, kólyo'ókxések nahan chá'a aqsok megkaleklo kélwáxok yaqwayam elánekxések ma'a énxet'ák segyekpelchémo metne nak melya'ásseyam Cristo.
7 Asagkek katnehek ekyetna enxoho kélátegmómaxche kélnepyeseksa kéxegke. Tásek neykhe kólenmaxaxkohok aqsa chá'a megkapayhawo enxoho kélteméssesakxa'. Tásek kólhok aqsa chá'a kólmenyexchesek aqsok kélagkok. 8 Makke kapayhémok chá'a kéltémakxa kéxegke, weykmók chá'a kélmenyexchesso aqsok apagkok ma'a kélyáxeg'a kélagko' nak.
9-10 ¿Yagkólya'áseykegkok kéxegke énxet megkapayhémo nak chá'a aptémakxa peya mexkayek ma'a aptémakxa nak Wesse' apwányam Dios? Nágkólteme aqsa megkólaqhémo kéltáhakxa, hakte melxewekxeyk sa' aptémakxa nak Wesse' apwányam Dios ma'a énxet apkeláneykegkoho nak chá'a ekmeyámáxchexa nak antéhek negmeykha m'a mansexta, tén han ma'a apkelpeykessamo nak kéleykmássesso, tén han ma'a apnaqtawáseykegkoho nak chá'a apnaqteyegka'a apkelane mók, tén han ma'a apho kelwán'ák nak, tén han ma'a apmeykekxa nak chá'a apkenna xamo', tén han ma'a apkelmenyexmo nak, tén han ma'a apkelmeyókásamákpoho nak aqsok apagkok, tén han ma'a anmen át'ák nak, tén han ma'a aptekkessáseykha nak aqsa apwesey pók, tén han ma'a apmopwána nak elyexanchesha pók yaqwayam exkak selyaqye. 11 Cháxa apkeltémakxa axta kélnápakha kéxegke xa; kélteméssessegkek eyke kaxwók kéxegke kéláxñeyo, kélteméssessegkek kaxwók kélpagkanamaxche tén han kélpéwomo eñama m'a Wesse' egegkok Jesucristo apwesey tén han eñama m'a Espíritu apkeñama nak Dios egagkok.
Ekpagkanamaxche negyókxa
12 Katnohok chá'a amya'a s'e: “Ewanchek ko'o alának sekmakókxa enxoho alána'.” Naqsók xa. Háwe eyke ekyókxoho aqsok ekpayhawo anlána'. Naqso', ewanchek ko'o alának sekmakókxa enxoho alána', akke keyméxchek ko'o wohok kalának ewáxok alának xama aqsok enxoho. 13 Katnohok nahan chá'a amya'a s'e: “Nento ekyetneykemxa egwokmo', egwokmo' ekyetnamakxa m'a nento.” Naqsók xa, Dios sa' eyke emasséssók xa ánet aqsok nak. Háwe eyke yaqwayam agmések negyókxa m'a ekmeyámáxchexa nak antéhek negmeykha mansexta, wánxa m'a Wesse' egegkok. Wesse' egegkok nahan apagkok ma'a negyókxa'. 14 Sa' etnehek nahan negko'óxa hennaqxétekhássók Dios eñama apmopwána m'a ektémakxa axta apxátekhásseykmo m'a Wesse' egegkok.
15 ¿Enxeykel'a kólya'áseykegkok kéxegke kélyókxa ekteme eñama Cristo apyókxa? ¿Amoya sa' ko'óxa nekha nak Cristo apyókxa, eypetchessók ma'a kelán'a ekyaqmagkáseyak nak pók énxet ekma chá'a ekyánmaga ekpathetéyak? Ma', matnehek sa' ko'o xa. 16 ¿Yagkólya'áseykegkok kéxegke xama énxet apyepetche nak kelán'a ekyaqmagkáseyak pók énxet ekma chá'a ekyánmaga ekpathetéyak, ektamheykekxoho chá'a xama m'a ánet nak? Hakte temék eknaqtáxésamaxche weykcha'áhak se'e: “Xama sa' katnekxak xa ánet nak.” 17 Keñe m'a xama énxet apyepetcheykekxa enxoho m'a Wesse' egegkok, xama etnéssásekxak épetchesek ma'a espíritu apagkok.
18 ¡Kólyetnakhés ma'a ekmeyámáxchexa nak antéhek negmeykha mansexta! Ekyókxoho mók ektémakxa nak mey'assáxma apkelane énxet megkatwássesha apyókxa; keñe m'a apkelane nak ma'a ekmeyámáxchexa nak antéhek negmeykha mansexta, apkelánésso apagko' etnehek mólya'assáxma m'a apyókxa'. 19 ¿Yagkólya'áseykegkok nahan kéxegke kélyókxa ekteme Espíritu Santo tegma appagkanamap apagkok, apmésso axta m'a Dios, tén han aphama kélwáxok kéxegke m'a Espíritu Santo nak? Háwe kélagkok kélagko' kéxegke xa kélyókxa nak, 20 hakte apkelmomchek axta kéxegke Dios ekha ekyánmaga. Ékeso éñamakxa eyéméxko nak kéxegke kólteméssesek apcheymákpoho Dios kólmaha xa kélyókxa nak.
