Aptalhesquiscama Pablo yoyam elyipsitic Jesucristo apmolhama tingma Efeso
1 Coo nac Pablo, sictimem apóstol siyapajasomalhca ayinyema Jesucristo. Eycaso actomja apmayjayoclha Dios. 2 Actalhescasquic as vaycajac actemaclha aclhanma evalhoc ingilyalhinga apnaycam tingma Efeso, apquiltomja melyasquiyam Jesucristo najan apquiltomja Dios apquilyacyescama. Altamjoc coo yoyam ellhovac quellhip apcaycaoc najan actamilaycam apquilvalhoc ayinyema Dios Ingyapam najan Jesucristo Visqui ingac.
Singaycaoc ayinyema Cristo yoyam comoc ingilvalhoc
3 Pac ontimjic mataa ningayo Dios aptomja Jesucristo Visqui ingac Apyap. Ningillhocac nincoo aclhamoclhojo actemaclha singaycaoc ayinyema netin. Eycaso ayinyema ningilpasmeyquiclha Jesucristo. 4 Dios aptomja singilyacyescama yoyam ongiltimjic apquitquic ayinyema Cristo. Eycaso appenescamo ilhnic nat aclhanma apvalhoc amamyi apquilantipquiscama aclhamoclhojo asoc. Apquiltamjoc nic nat Dios yoyam ongiltimjic ningiltamila napato mepqui ningilsilhnanomalhca. 5 Apquiltamjoc nic nat Dios yoyam ongiltimjic apquitquic ayinyema Jesucristo. Eycaso appenescamo nic nat aclhanma apvalhoc naysicsa singasicjayo. Eycaso actomja ilhnic nat apmayjayoclha Dios. 6 Pac ontimjic mataa ningayo Dios ayinyema singaycaoc altamila. Aptomja singmescama nasa Apquitca aptomja apcasicjayo. 7 Avanjec anco singasicjayo Dios. Apyinyovquic Apquitca singyanmongam yoyam jingilvomsic tap. Apmascosquic mongilyascalhma ayinyema apquitsepma singilyanmongam. 8 Ingillhicmosquic nincoo Dios cotlaycaoc singaycaoc, malha acyeycajangvaycmo. Ingmasquic nincoo actemaclha ningyascamco najan actemaclha ningyasingvoyam. 9 Apquiltamjoc Dios yoyam ongilyasamcojo apmayjayoclha actemaclha acyilhomalhca. Eycaso appenescamo ilhnic nat aclhanma apvalhoc Dios. 10 Invaac sat ancoc acnim, comoc sat aplhanmaclha Dios. Etnesquisic sat Apvisqui Cristo yoyam etnejic malha apquimja apmamyi asoc acnaycaoc netin najan asoc acnaycaoc nalhpop.
11 Nincoo ningiltomja ninpasmeyquiclha Cristo. Ayinyemaclha Dios aptomja singilyacyescama siclhoc anco yoyam ongillhovac asoc singaycaoc. Eycaso appenescamo ilhnic nat aclhanma apvalhoc Dios. Aptimec mataa Dios actemaclha apquiltamjoclha etnejic. 12 Ningiljalhanmec nat nincoo yoyam evac Cristo singvomquiscama tap. Quilhvo eyca pac ontimjic ningilayo Dios aptomja apyimtalhnamo apanco. 13 Najan quellhip lha apquillinga alhta amyaa actomja nasoc anco. Apquillingac alhta quellhip tasic amyaa actomja singvomquiscama tap. Apquilyanmoncasquic alhta apquilvalhoc quellhip apquiltomja melyasquiyam Cristo. Yitnec quellhip quilcajascama ayinyema Espíritu Santo, actemaclha aplhanma actomja nasoc anco yoyam ongillhovac. 14 Ningillhocac nincoo amamyi Espíritu Santo yoyam monquinatsejec actomja nasoc anco, yoyam ongilvomsalhcac sat tap ningiltomja apquitquic. Pac ontimjic ningilayo Dios aptomja apyimtalhnamo.
Apquilmalhnesquiscama Pablo ingilyalhinga yoyam ellhovac apquilyascamco ayinyema Dios
15 Aclingac coo actemaclha melyasquiyam quellhip Visqui ingac Jesús. Najan actemaclha apquilasicjayo quellhip aplhamoclhojo apquiltomja Dios apquilyacyescama. 16 Alinlhanacmec coo silmalhnesquiscama quellhip naysicsa sictimem gracias Dios Ingyapam. 17 Dios aptomja Jesucristo Visqui ingac Apyap najan aptomja Ingyapam apyimtalhnamo. Almalhnescasquic coo mataa yoyam ellhovac quellhip actemaclha ningyascamco najan actemaclha singyascasingvoyam ayinyema Espíritu apanco Dios. Coyangvomoc sat apquilyasingvoyam quellhip aptemaclha Dios. 18 Altamjoc coo yoyam eyascasingvomoc Dios apquilvalhoc quellhip. Natamin elyicpilcangvomoc sat quellhip asoc yoyam colvac sat actemaclha aljalhneycam apquilvalhoc. Elyicpilcangvomoc sat quellhip cotlaycaoc singaycaoc altamila acnaycaoc netin. Elmesic sat Dios apquiltomja apquilyacyescama. 19 Elyicpilcangvomoc sat quellhip singmescama Dios ningmovan, malha acyeycajangvaycmo tap ningiltomja mongyasquiyam. Apvitascasquic alhta Dios actemaclha apmopvan 20 naysicsa aplhaticjasquiyam Jesús nipyesicsa apquilmasquingvaycmo. Apnescaclhec alhta netin napocja actamilaclha. 21 Quilhvoc aptomja Apvisqui apyimtalhnamo tacjaplhit apquilviscaa najan apquilyimtalhnamo najan apquilmopvancaa. Aptomja Apvisqui as ningvamlha nac jay najan cotmongvoycamlha nelha. 22 Apquilmec nic nat Dios aplhamoclhojo, yoyam elilyejiclhojo actemaclha apcanamaclha Cristo aptomja Apvisqui. Aptimesacpec Cristo apquimja apmamyi nipyesicsa apmolhama. 23 Aplhamoclhojo apmolhama apquiltomja malha apyovoclhojo Cristo. Apquillhocac mataa apmolhama cotlaycaoc asoc, inyeycajangvocmoc asoc apancaoc. Epenacsojoc sat Cristo aclhamoclhojo asoc.
Ekxeyenma egwáxok
1 Ko'o Pablo, sekteme nak Jesucristo apchápháseykha eñama apkeltémo atnehek ma'a Dios. Eyáphássessek ko'o ekxeyenma ewáxok ma'a énxet'ák apheykha nak Éfeso aptamhéyak nak Dios énxet'ák apagkok, tén han melya'ásseyam apkelyepetcheykekxa m'a Cristo Jesús. 2 Dios Egyáp tén han Jesucristo Wesse' egegkok sa' epekkenek kélnepyeseksa kéxegke m'a ektémakxa nak apmésso naqsa ektaqmeleykha apwáxok apkelányo, tén han ma'a meyke ektáhakxa egwáxok apagkok nak.
Nélteméssesso apcheymákpoho Dios eñama m'a aptamheykha segwagkassamo nak teyp
3 Apcheymákpoho sa' chá'a kólteméssesek Dios, Jesucristo Wesse' egegkok nak Apyáp, hakte empasmomchek axta chá'a negko'o Dios sẽlméssama m'a mók ektémakxa nak chá'a aqsok éltaqmela éleñama nak néten, eñama negyepetcheyo m'a Cristo. 4 Ẽlyéseykha axta negko'o Dios ma'a amonye' axta élánamáxche keso náxop, eñama m'a Cristo, yaqwayam enxoho antamhagkok Dios énxet'ák apagkok, tén han meyke ekmaso nentémakxa nápaqto'. Segásekhayo axta nahan keñamak Dios 5 sẽlpagkanma negko'o yaqwayam antamhagkok máxa apketchek eñama m'a Jesucristo, ekhawo m'a ektémakxa axta apmopmenyého elána' tén han ekleklamókxa apwáxok. 6 Cháxa aptémakxa axta xa, yaqwayam enxoho ólteméssesek chá'a apcheymákpoho Dios, eñama ekyawe ektaqmeleykha apwáxok senlányo, sempasmoma nak chá'a negko'o, eñama apchásenneykekxa m'a Apketche apchásekhayo nak. 7-8 Cristo apyegkenma éma apagkok negko'o keñamak segmasséssessama m'a ektémakxa axta ekho nélmomaxche', tén han megkólyaqmagkáseykekxa m'a nentémakxa mólya'assáxma. Enxekmóssegkek axta negko'o ekwánxa ekyawe segásekhayo Dios, segméssama meyke apmeyágweykekxa ekyókxoho m'a negya'ásegwayam tén han negyekpelchémo, 9 ẽlya'assásegweykmek axta anhan ma'a aqsok ekpowásamáxkoho apmopmenyého axta elána'. Ektaqmeleykha apwáxok axta nahan keñamak apmáheyo elának xa aqsok ekxeyenma axta apwáxok elána', eñama m'a Cristo, 10 apkeláneyak axta yaqwayam enxoho katnehek ma'a appekkenmakxa axta yaqweykenxa katnehek. Keso apmáheyo axta elának Dios se'e: apmenyeyk axta yánchásekxak ekyókxoho aqsok ekhéyak nak néten tén han keso náxop, yaqwayam etnéssesek apkemha apmonye' agkok ma'a Cristo.
11 Nanók axta negko'o sẽlyéseykha m'a Dios, yaqwayam enxoho antamhagkok énxet'ák apagkok, eñama negyepetcheykekxa m'a Cristo, ekhawo ektémakxa axta apmopmenyého apagko' elának ma'a Dios, apkelane nak chá'a ekyókxoho aqsok ekxénakxa enxoho chá'a apwáxok elána'. 12 Apmenyeyk axta nahan negko'o antamhagkok egmonye'e nélhaxneykha m'a Cristo, yaqwayam enxoho ólteméssesek eyeymáxkoho m'a apmopwána ekyawe agko' nak. 13 Cristo nahan keñamak, cham'a kéllegaya axta kéxegke amya'a ekmámnaqsoho, amya'a ektaqmela yaqwayam nak kalwagkasek teyp, tén han kélmoma axta megkólya'ásseyam, kélqahásamáxko kéxegke yaqwayam kóltamhagkok Dios énxet'ák apagkok yetlo m'a Espíritu Santo apkeltennassama axta egkések. 14 Cháxa Espíritu apteme magkenatchesso negko'o eyámnaqsoho peya anxawak ma'a aqsok sẽlpagkanchesso, apmáheyo nak hegmések ma'a Dios, apsawhawo apagko' sa' segmasséssesso m'a nenteme nak nélmomaxche', tén han senteméssesa sa' énxet'ák apagkok apagko', yaqwayam sa' ólteméssesek negyókxoho eyeymáxkoho m'a apmopwána ekyawe agko' nak.
Nélmaxnéssesso apyókxoho melya'ásseyam nak
15 Ekya'ásegkók ko'o ekyetnama kéxegke megkólya'ásseyam Wesse' egegkok Jesús, tén han kélásekhayo m'a apyókxoho Dios énxet'ák apagkok, 16 cháxa keñamak malwátésseykmo nak ko'o sekmésso ekxeyenma ewáxok ma'a Dios, kéxegke éñamakxa, kaxének chá'a ewáxok ma'a sektáha enxoho nempeywa nélmaxnagko. 17 Élmaxnakkek ko'o Dios, Jesucristo Wesse' egegkok nak Apyáp apcheymákpoho, séltamho egkések kéxegke Espíritu, yaqwayam sa' elmésagkok kélya'ásegwayam tén han exekmósek kéxegke, yaqwayam sa' kólyekpelchágwomhok ekmámnaqsoho agko' ma'a Dios. 18 Élmaxnakkek ko'o Dios séltamho etnéssesek yáxña'akxoho agko' ekya'áseykegkoho kélwáxok, yaqwayam sa' kólya'ásegwók kéxegke yaqsa m'a kélhaxneykencha'a nak, apkelwóneykencha'a axta Dios apkeltémo kólleyxmakha, tén han kólya'ásegwók ekwánxa ektaqmela agko' ma'a aqsok appagkanchessama nak Dios yaqwayam elmésagkok ma'a ektáha nak énxet'ák apagkok, 19 tén han yaqwayam kólya'ásegwomhok ekwánxa ekyawe meyke néxa m'a ektémakxa nak apmopwána, sempasmoma nak chá'a negko'o, nenteme nak magya'ásseyam. Cháxa apmopwána senxekmóssama axta negko'o Dios xa yetlo ekyawe agko' ekyennaqte, 20 cham'a apxátekhásseykmo axta Cristo, tén han aphésseykekxo axta ekpayhókxa nak apkelya'assamakxa m'a néten, 21 apteméssessama meyke ekhémo neyseksa m'a ekyókxoho aqsok ekha nak élmowancha'a, tén han ma'a ekha nak kélyaheykekxoho, tén han ma'a aqsok éláneykencha'a nak keso náxop, tén han ma'a aqsok kelwesse'e nak, tén han apteméssessama megkaxnémo m'a ekyókxoho aqsok ekheykegko nak, keso ekheykegko nak se'e kaxwo' nak tén han ma'a egmonye' sa'. 22 Apnegkenchessegkek axta ekyókxoho aqsok kóneg apmagkok ma'a Cristo, Apméssegkek axta nahan Cristo yaqwayam etnehek apkemha apmonye' nepyeseksa m'a apyókxoho énxet'ák apagkok. 23 Hakte Dios énxet'ák apagkok ekteme Cristo apyókxa, élxawáya nak chá'a ekyókxoho eñama apkelmésso m'a Cristo, hakte Cristo chá'a apteme apsawhomo apwagkasso néxa m'a ekyókxoho aqsok.
