Carpa apponquinomap
(Ex 36.8-38)1 Illana sat lhama aplhancoc apponquinomap santuario, najan diez cortinas apava apjalhtamomap, apava lino torcido, apava morada, apava púrpura najan apava apyilhvasem. Eltalhos (elaycmas) netin apava anit mataa quilaycmasquiscama acma alhimpancoc. 2 Colhojoc sat moc alvinatem apava cortinas: acvamlha alvinatem mataa doce metros y medio najan acvamlha ancho dos metros. 3 Ilyipitquis mataa poc apava cortinas acvaycmo cinco cortina, cotniclhac sat lhama acyovoclhojo cortina. 4 Illana sat apatnaoc nicja cortina lhama grupo. Mocjam apatnaoc nicja última cortina moc grupo. 5 Illana sat cortina lhama grupo najan segundo grupo cincuenta apatnaoc, acpayjoclha moc. 6 Illana sat cincuenta asoc'jalhem ganchos de oro, coyipitsalhcac sat un grupo cortinas najan moc grupo cortinas, cotniclhac sat lhama acyovoclhojo santuario.
7 Illana sat once apava cortinas yataay apva, ellanacpoc sat carpa appaclhanma tacjalhit santuario. 8 Colhojoc sat mataa moc cortinas acvamlha alvinatem trece metros y medio, najan acvamlha ancho dos metros. 9 Ilyitnap sat cinco cortinas cotniclhac sat lhama acyivey, mocjam seis cortinas cotniclhac sat moc acyivey. Eltimjic sat doblar sexta cortina tacjalhit atong carpa apponquinomap. 10 Illana sat cincuenta apatnaoc nicja cortina primer grupo najan cincuenta apatnaoc nicja cortina segundo grupo. 11 Illana sat cincuenta asoc'jalhem ganchos de bronce, ingyitsiclha cortina apatnaoc, cotniclhac sat lhama acyovoclhojo santuario, carpa apponquinomap. 12 Alvinatem cortinas (yataay apva) am colhno nipquesic apva cortinas. Cotnejic sat apaclhanma cortina acvinatem payjoc tap carpa tingma. 13 Cotnejic sat appaclhanma acyeycajay santuario, lhama nicja najan moc nicja, acvamlha cuarenta y cinco centímetros lhama nicja najan cincuenta centímetros moc nicja.
14 Illana sat appaclhanma santuario apponquinomap nipquesic apyimpeoc alyilhvasem, najan moc appaclhanma netin asoyimpeoc alyilhyevay tacjalhit moc.
15 Illana sat yamit nicja acacia, collanalhcac sat paredes santuario apponquinomap. 16 Cotnejic sat moclhama tabla yamit acvamlha cuatro metros y medio, acvamlha ancho sesenta y cinco centímetros. 17 Coytic sat anit espigas moclhama tabla yamit, yoyam coyipitsalhcac mataa moc. Isavojo sat tablas actema nac jay, colhic sat allana santuario carpa apponquinomap. 18 Illana sat tablas yamit acvaycmo veinte payjoc nicja nipiyam. 19 Ininquin sat cuarenta bases de plata coning tablas yamit. Anit mataa bases coning yamit, acyitna inlhojo anit espigas amaoc.
20 Mocjam veinte tablas yamit payjoc nicja nilhqueyja 21 najan coning maa cuarenta bases de plata, moclhama tabla yamit mataa coning colhnam dos bases. 22 Mocjam seis tablas yamit payjoc nicja actalhningvamlha acnim 23 najan mocjam anit tablas yamit cotnejic acmasingvoyam (tajescamaclha). 24 Cotnejic sat lhama yamit nicja acyipitcay moc, colyipitsalhcac sat netin primer anillo. Sat ellanac lhip anit yamit nicja tablas, colhic allana anit esquinas acmasingvoyam. 25 Cotnejic sat acvamlha ocho tablas yamit nicja tacjalhit dieciséis bases de plata, moc acvisay dos bases payjoc lhama yamit nicja.
26 Illana sat yamit acacia travesaños yamit alvinatem, colyipitsalhcac sat tablas yamit nicja santuario apponquinomap. 27 Cinco yamit alvinatem lhama nicja najan cinco yamit alvinatem moc nicja, payjoc actalhningvamlha acnim. 28 Yamit acvinatem travesaño central coyipitsalhcac sat payjoc mitad de pared. 29 Ilyipitquis sat chapa de oro acyovoclhojo tablas yamit nicja. Ilyipitquis sat argollos de oro, colhic alatquisa yamit alvinatem travesaños alyipitsomalhca chapa de oro. 30 Illana sat santuario carpa apponquinomap, acno sillhicmoscama. Iyitquis sat mataa maclhicmoscama lhip payjoc inquilhe acvinatem — nic nat aptomjac Dios.
31 Illana sat apava morada, najan apava púrpura, najan apava apyilhvasem, najan apava lino torcido. Italhos sat (ingyaycmas) netin apava anit quilaycmasquiscama acma alhimpancoc. 32 Itlhin sat asoc'jalhem ganchos de oro payjoc cuatro postes yamit acacia, alyipitsomalhca chapa de oro najan tacjalhit cuatro bases de plata. 33 Itlhin sat maa apava apjalhtamomap ganchos de oro. Ipquin sat maa tap apava apjalhtamomap coytic yamit aysicsic acyitnamaclha Dios appayvam. Etnejic sat apava cortina apjalhtam, lhama nicja aplhancoc santo apponquinomap najan moc nicja aplhancoc santísimo apponquinomap apanco. 34 Ipquin sat yamit actomja ayapma yamit aysicsic congne aplhancoc santísimo apponquinomap apanco. 35 Ipquin sat mesa tap apava apjalhtamomap, payjoc nilhqueyja, ipquin sat alapongmateyquiclha candelabro payjoc nicja nipiyam, ningatoc mesa.
36 Illana sat carpa apatong lhama cortina apava morada, apava púrpura, apava apyilhvasem, najan apava lino torcido, acma quilaycmasquiscama netin apava. 37 Illana sat apquilhnama cortina cinco postes yamit acacia alyipitsomalhca chapa de oro, acyiplomo asoc'jalhem ganchos de oro, acyitna avjac cinco bases de bronce ayimjaclha postes.
Kélpakxanma appagkanamap
(Ex 36.8-38)1 “Elána sa' diez apáwa napwe'ék apkeláxñe apkelyaqséyak kélpakxanma appagkanamap, cham'a apáwa apyápaqmate, hómáyok tén han ma'a apyexwase nak; yót sa' nahan chá'a eleykmássesha apqánet sélásenneykha ekha apxempenák ma'a nápakhaw'ék nak. 2 Sa' nahan chá'a exhok apkelwenaqte apyókxoho apáwa napwe'ék se'e: doce metros nepxet pók ma'a apwegqakxa nak, tén sa' ánet metros ma'a appayhakxa nak. 3 Épetchásekxa sa' pók apkelyetnaqte cinco apáwa napwe'ék, sa' etnéssesek nahan ma'a pók cinco nak, 4 enegkenchesák sa' nahan kélatcháseykekxexa nak chá'a apxát'ák apyápaqmate nápakhaw'ék ma'a apkemha apmonye' apyetno nak ma'a apáwa napwa'a. Tén sa' nahan ma'a apyetno nak napwo'o, elanaksek sa' nahan ma'a kélatcháseykekxexa nak chá'a apxát'ák. 5 Cincuenta élyagqaxe sa' chá'a elanaksek xama kélnaqtéteykekxexa apxát'ák ma'a apáwa napwa'a nak, cham'a apyetno nak apmonye', tén han ma'a apyetno nak axayo', yaqwayam sa' kataqmelek appayhémo pók aphéyak. 6 Elána sa' nahan cincuenta sawo élhaxe sawo ekyátekto ekmomnáwa, yaqwayam sa' kóltahanyéssak pók kólásekkásekxak ma'a apáwa napwe'ék nak, yaqwayam enxoho kasawhekxohok kélhaxtameykekxa apyókxoho m'a kélpakxanma appagkanamap nak.
7 “Elána sa' nahan once apyepetcháseykekxa mók apchótma yát'ay apwa' yaqwayam sa' kóltéhek kélpakxanma, kélapma m'a kélpakxanma appagkanamap nak. 8 Trece metros nepxet pók sa' nahan chá'a etnehek apwegqakxa apyókxoho m'a yát'ay apwa' nak kélótma, tén sa' ánet metros chá'a m'a appayhakxa nak. 9 Épetchásekxa sa' nahan pók apkelyetnaqte m'a cinco yát'ay apwa' apchótma nak xama nápakha, tén sa' seis ma'a pók nápakha nak, keñe sa' eyaqsásekxak ma'a ektáhakxa nak seis yát'ay apwa' apchótma ekpayho nak nentaxnamakxa m'a kélpakxanma. 10 Keñe sa' natámen elának cincuenta élyagqaxe nápakhaw'ék kélápeykekxexa nak chá'a m'a apkemha apmonye' apyetno nak ma'a yát'ay apwa' kélótma, tén sa' cincuenta élyagqaxe nápakhaw'ék nahan ma'a pók nápakha nak. 11 Elána sa' nahan cincuenta sawo élhaxe sawo ekyexwase, elatches sa' ma'a élyagqaxe nak, yaqwayam sa' etnekxak xama apyepetcheykekxa pók apyókxoho m'a kélpakxanma nak. 12 Kólmakhésha sa' napwa'a apkeymomap nak yát'ay apwa' kélótma m'a apyetseksek nak kélpakxanma appagkanamap, hakte aphóxek sa' etnehek. 13 Sa' kasawhekxohok kélpakxanma appagkanamap ma'a apkeymomap nak apwenaqte, cham'a yaqwayam nak chá'a kólmakhésha ánet nápakhaw'ék ma'a: cuarenta y cinco centímetros ma'a xama nápakha, tén han cuarenta y cinco centímetros ma'a pók nápakha nak.
14 “Elána sa' makham kélpakxanma nepkések apkennawók apyempehek kélyexwássesso nak ekyexwase, yaqwayam kólpakxenek ma'a kélpakxanma appagkanamap, tén sa' nahan ma'a aqsok émpe'ék élexyawáyól'a, yaqwayam sa' kólpekkenekxak ma'a néten nak.
15 “Elána sa' nahan yántéseksa'ák yámet apkeñama nak wantep, yaqwayam sa' elánchesagkok nápakhaw'ék ma'a kélpakxanma appagkanamap, elpékesho sa' nahan apnegkenma. 16 Cuatro metros náxet mók sa' nahan chá'a katnehek ekwegqakxa xama m'a yántéseksek nak, tén sesenta y cinco centímetros ma'a ekpayhakxa, 17 ánet élyagqaxe sa' nahan chá'a kaxek ma'a, yaqwayam sa' kataqmelek chá'a ekyepetcheykekxa mók ektaxno m'a yántéseksek nak. Etnésses sa' ekyókxoho yántéseksa'ák apagkok nak kélpakxanma appagkanamap xa ektáha nak. 18 Apkelanak sa' agkok xa, elána sa' veinte yántéseksa'ák élpehewayam ma'a ekpayho nak nepyeyam, 19 enegkenchesák sa' nahan cuarenta awhók élyennaqtéssamakxa sawo ekmope ekmomnáwa m'a kóneg nak. Ánet awhók ekyennaqtéssamakxa sa' nahan chá'a keytek kóneg xama yántéseksek, yaqwayam sa' kalántexek chá'a m'a ánet élyagqaxe nak.
20 “Tén sa' nahan ma'a pók nápakha nak kélpakxanma appagkanamap, ekpayho nak nexcheyha, elanaksek veinte yántéseksa'ák, 21 ekyetlómo m'a cuarenta awhók élyennaqtéssamakxa nak sawo ekmope ekmomnáwa, yaqwayam sa' kaxek chá'a ánet ekyennaqtéssamakxa awhak kóneg xama yántéseksek. 22 Keñe sa' ma'a ekpayho nak ekteyapmakxa ekhem, elanaksek sa' seis yántéseksa'ák, 23 tén sa' ánet yántéseksek makham yaqwayam kólánchesek ma'a máséyak nak, ekpayho nak han ma'a ekteyapmakxa ekhem. 24 Tásek sa' nahan kaxhok mók ekhéyak xa yántéseksa'ák nak tén han keypetchekxak mók éleñama m'a néten nak ekweykmoho m'a émha amonye' nak sawo ekyaqye. Sa' nahan etnéssesek ma'a ánet yántéseksek yaqwayam nak kalaqnek ma'a ánet máséyak nak. 25 Keñe sa' kaxek chá'a ocho yántéseksa'ák ekyetlómo agkok agko' chá'a xama dieciséis awhók élyennaqtéssamakxa m'a sawo ekmope élmomnáwa, ánet ekyennaqtéssamakxa chá'a awhak kóneg xama yántéseksek.
26 “Elána sa' cinco éltegyésso élwenaqte yámet apkeñama nak wantep yaqwayam sa' kóltegyések xama nápakha kélyepetchessamakxa yántéseksa'ák ma'a kélpakxanma appagkanamap, 27 keñe sa' cinco nahan ma'a pók nápakha nak, keñe sa' makham mók cinco éltegyésso yaqwayam kólyepetchesek yántéseksa'ák ma'a teyp nak kélpakxanma appagkanamap, cham'a ekpayho nak ektaxnegwánxa ekhem. 28 Tásek sa' nahan kamallahanwomhok chá'a pók napwa'a m'a ektegyésso ekyetno nak neyseksa, naxta'a nak ma'a yántéseksa'ák. 29 Elyepetches sa' nahan émpe'ék sawo ekyátekto ekmomnáwa m'a yántéseksa'ák nak, elanés sa' nahan sawo élyaqye agkok sawo ekyátekto ekmomnáwa m'a, yaqwayam sa' kasawhekxohok sawo ekyátekto ekmomnáwa émpe'ék apkelatchesa enxoho m'a yámet élwenaqte nak. 30 Elána sa' kélpakxanma appagkanamap aphémo apagko' ma'a kélxekmósa axta m'a egkexe nak.
31 “Elána sa' apáwa kélapma apyápaqmate, hómáyok, apyexwase tén han ma'a apáwa apkeláxñe apkelyaqséyak nak, eleykmássesha sa' nahan chá'a apchótma apqánet sélásenneykha ekha apxempenák ma'a apáwa nak. 32 Elatchesák sa' cuatro yámet kéláncháséyak nak ma'a sawo élhaxe sawo ekyátekto ekmomnáwa nak, cham'a yaqwayam nak kasawheyásekxohok émpe'ék ma'a sawo ekyátekto ekmomnáwa, néten nak ma'a cuatro élyennaqtéssamakxa awhók nak sawo ekmope ekmomnáwa. 33 Elmakhésha sa' apáwa kélapma nak ma'a kóneg nak sawo élhaxe, epekken sa' yántéseksek ekhémo mók nélpaqhetchásamáxkoho m'a teyp nak kélapma. Sa' kañék apkexpánchessesso kéxegke kañe' Ekpagkanamaxche nak ma'a apáwa nak, tén han ma'a Ekpagkanamaxchexa agko' nak. 34 Epekkenches sa' nahan átog ma'a yántéseksek ekhémo mók nélpaqhetchásamáxkoho nak, cham'a kañe' Ekpagkanamaxchexa agko' nak. 35 Tén sa' ma'a mésa nak epekkenek ma'a halep nak apáwa apkexyawe kélapma ekpayho nak ma'a nexcheyha kañe' kélpakxanma appagkanamap, tén sa' ma'a cháléwasso ekyawe nak epekkenek ma'a ekpayho nak nepyeyam, amonye' nak ma'a mésa.
36 “Elanés sa' nahan xama apáwa napwa'a apyápaqmate, hómáyok, apyexwase tén han ma'a apáwa apkeláxñe apkelyaqséyak nak chá'a m'a nentaxnamakxa nak kélpakxanma appagkanamap, kéleykmassáseykha nak chá'a m'a nápakhaw'ék. 37 Elanés sa' nahan apáwa napwe'ék ma'a cinco élámha yámet apkeñama nak wantep eksawheykekxoho nak ma'a sawo ekyátekto ekmomnáwa, élyetlómo m'a sawo élhaxe apagkok sawo ekyátekto ekmomnáwa, elpeykásekxak sa' nahan elméxenchásekxak ma'a cinco awhók ekyennaqtéssamakxa sawo ekyexwase nak, yaqwayam enxoho kólmaha kólatchesek ma'a yámet élámha nak.
