Apquilapajascama Jesús doce apquiltamsoycaoc
(Mt 10.5-15Mr 6.7-13)1 Apcansaclhec alhta Jesús doce apquiltamsoycaoc. Apquilmesquic alhta apquilmopvan. Apquilasinaquic alhta elantipsic somquic quilyicjamo najan eltamilquiscomoc acmasca apyimpeoc. 2 Apquilapajasquic alhta eliltimnacsic tasic amyaa Dios apquilnancascama. Apquilapajasquic alhta eltamilquiscomoc acmasca apyimpeoc. 3 Aptomjac alhta apquilanya:
—Noelsov nasa asoc nalhit amay. Noelsov nasa apqueleneycam, najan najapma, najan quilpasmongam, najan solyayem. Elsov lhama apanco aptalhnama, jave apcanit —alhta aptomjac. 4 Apquilvoclhec sat ancoc quellhip lhama tingma, elhnam sat maa acvocmo acnim apquilimpayclha sat. 5 Am sat ancoc elmacpoc tacja quellhip, elantiyip sat maa. Elilhpalhnes sat lhopactic apmancaoc. Cotnatsalhquejec sat apquiltomjaclha —alhta aptomjac.
6 Natamin alhta apquillhinga. Apquililtimnasa alhta tasic amyaa natingma lhalhma anco. Apquiltamilquiscacmec alhta acmasca apyimpeoc.
Apyasquiyam Herodes actemaclha aptamjaycam Jesús
(Mt 14.1-12Mr 6.14-29)7 Aplingangvocmec alhta amyaa apvisqui Herodes actemaclha aptamjaycam Jesús. Pilapcasquic alhta amyaa aplhenamap Juan yapasquiscama yingmin inyap.
—Aplhaticjangvocmec nipyesicsa apquilmasquingvaycmo —alhta intomjac amyaa. 8 Apvitacpec mocjam Elías profeta Dios aplingascama —alhta intomjac moc amyaa. Dios aplingascama profeta nano aptomja aplhaticjangviyam —alhta intomjac moc amyaa.
9 Aptomjac alhta apcanya Herodes:
—Ayanayquic alhta coyatemenalhca apyispoc Juan. ¿Soc lha enlhit siclinga mataa apvisay? —alhta aptomjac.
Apquiltamjoc alhta eta.
Aptoycaoc cinco mil enlhitaoc
(Mt 14.13-21Mr 6.30-44Jn 6.1-14)10 Apquilvoctac alhta apóstoles apquilapajasomap apnaclha Jesús. Apquililtimnasquic alhta aclhamoclhojo asoc apquiltamjaycam apquilinyectamlha. Natamin apnalaclhec alhta Jesús apquilvamlha apquiltamsoycaoc. Apquilmiyaclhec alhta yoclhilhma actomjaclha ningato tingma Betsaida. 11 Lhama alhta apquillinga enlhitaoc. Yejemoc alhta apquilyiplaclho. Apquilmacpec alhta tacja apquilvamlha. Apquiltimnasquic alhta Jesús amyaa Dios apquilnancascama. Apquiltamilquiscacmec alhta acmasca apyimpeoc.
12 Intalhnacmoc alhta apquilyoctamo doce apquiltamsoycaoc apnaclha Jesús, apquilpamejitsa:
—Ilapajas sat enlhitaoc. Elyacsic sat natingma najan nicja yoclhilhma. Elnatiyanvomoc sat maa. Eltovamcoc sat najan maa. Paj tingma as olhma —alhta apquiltomjac.
13 Aptomjac alhta apquilanya Jesús:
—Elmesaoc sat aptoycaoc quellhip —alhta aptomjac.
Apquilpamejitsa alhta eyca:
—Paj nincoo nintom. Apvamlha cinco quilpasmongam najan anit quilasma. ¿Pa ya ontingyangvoclhac quilpasmongam natingma, yoyam ongilmesamcoc aptoycaoc aplhamoclhojo enlhitaoc? —alhta apquiltamjoc.
14 Malha cinco mil enlhitaoc alhta apvocmoc. Aptomjac alhta Jesús apquilanya apquiltamsoycaoc:
—Elane sat elyayingvomoc apnaycam enlhit nalhpop. Cincuenta sat elane eltimjic apnaycam mataa —alhta aptomjac.
15 Apquililyajaclhoc alhta aptomjaclha appayvam. Apquilanyacpec alhta elhnam. 16 Yejemoc alhta apma quilpasmongam Jesús najan anit quilasma. Apsicjaclho alhta netin apquilmalhnesquisa aptoycaoc. Apquilyapitsamquic alhta quilpasmongam apquilmesamco apquiltamsoycaoc. Apcanama alhta elmesamcoc enlhit. 17 Apquilyipcanacmoc alhta aptoycaoc aplhamoclhojo enlhitaoc. Apquilansaclhec alhta quilpasmongam napocjaa apquilaymomap. Apquillanamco alhta doce quillhatam aynapa.
Aplhanma Pedro, Jesús aptomja Cristo
(Mt 16.13-19Mr 8.27-29)18 Aplhapcoc alhta aptomja apquilmalhna Ingyapam Jesús. Apquillhalhmaa alhta apquiltamsoycaoc. Aptomjac alhta apquilanya Jesús:
—¿Jalhco lhcac apquiltomja enlhitaoc sellhena coo? —alhta aptomjac.
19 Apquilatingmavoc alhta apquiltamsoycaoc:
—Juan yapasquiscama yingmin inyap apcanyacpoc. Poc eyca apquiltomja Elías. Poc eyca apquiltomjac apquillhena profeta nano, Dios aplingascama aplhaticjangviyam —alhta apquiltomjac.
20 Yejemoc alhta apquilmalhna Jesús:
—¿Jalhco lhcac apquiltomja sellhena quellhip lha? —alhta aptomjac.
Apcatingmavoc alhta Pedro:
—Lhip nac Cristo apquinyema Dios —alhta aptomjac.
Jesús aplhanma amamyi, yoyam ematong
(Mt 16.20-28Mr 8.30—9.1)21 Apmiyovquic alhta Jesús ellhenic apvisay nipyesicsa enlhitaoc. 22 Aptomjac alhta apquilanya:
—Olngamcojoc sat acmasca sicvisay Sictiyam Sictomja Enlhit. Otanovalhcac sat nipyesicsa apquilyimtalhnamo najan nipyesicsa apquilimja apmamyi sacerdote najan nipyesicsa apquilyascamco apquiltemaclha. Omatong sat coo. Natqui acnim sat cotnejic olhaticjangvomoc sat mocjam nipyesicsa apquilmasquingvaycmo —alhta aptomjac.
23 Aptomjac alhta apquilanya aplhamoclhojo:
—Ningiltamjoc sat ancoc ongyiplovjo Jesús, incaymalhquic yoyam jingilvoncomoc ningmayjayoclha inganco. Ongilpatmiclhac sat ningilsoycam acyimtalhnama, acno sicsoycam asoc timyescama ajanco. 24 Ningiltamjoc sat ancoc ongilmiyovsalhcojo inganco, ongillhinganmoc sat. Ningyinyovquic sat ancoc nintemaclha inganco ayinyema Jesús najan ayinyema tasic amyaa, ongilmiyovalhcac sat. 25 Alhto inyicje ningmam ningmetsovjam asoc lhalhma anco acyanmongam ningilsilhnanomalhca inganco najan acyanmongam acmasca acna ningyimnatem. 26 Apmancaquic sat ancoc enlhit jelhenic coo najan elhenic sicpayvam, omancac sat coo lha olhenic apvisay as enlhit sicvactamo sat, sicvisay Sictiyam Sictomja Enlhit. Ovotac sat malha Visqui naysicsa gloria apcapongmatem apanco Tata najan gloria apquilapongmatem apancaoc ángeles Dios apquilasinancama apquilponquinomap. 27 Actomjac coo siyanya quellhip:
—Naso, cotalhcac sat Dios apquilnancascama yicpintama elmasquingvomoc napocja as enlhitaoc apcanaycam nac lha —alhta aptomjac Jesús.
Jesús aplhinganimcasomap
(Mt 17.1-8Mr 9.2-8)28 Ocho acnim alhta invocmoc natamin aplhanma appayvam Jesús. Apquinatvocmo alhta inquilhe acvinatem. Apnalaclhec alhta Pedro, najan Juan najan Jacobo. 29 Naysicsa apquilmalhnancama aplhinganimcasacpojo alhta Jesús. Moc actemaclha alhta intomjac napaat. Apquilyinmaclhec alhta aptalhnama, apquilmopeclhec anco. 30 Apquilvitacpec alhta apcanit enlhit apvisay Moisés najan Elías. Apquilpamejitsacpo alhta Jesús. 31 Yiplovcoc alhta apquilapongmatem. Apquilpamejitsacpec alhta actemaclha apquitsepma, yoyam cotnejic Jerusalén nac maa. 32 Tiyin alhta inquilnapac Pedro najan apquillhalhmaa. Yejemoc alhta apnalhaticja. Pilapcasquic alhta apquilvita apcapongmatem Jesús najan apcanit apquillhalhmaa. 33 Naysicsa yoyam eltajiclha Jesús apquillhalhmaa, appamejitsa eyca Pedro:
—Visqui, intasic onlhic as olhma. Ongilanamcoc sat apnatqui tingma. Lhama sat lhip, lhama sat Moisés, lhama sat Elías —alhta aptomjac.
Am alhta eyasamcoc Pedro actomjaclha appayvam. 34 Naysicsa appamejitquiscama alhta ayajapvaa lhama yipjopay. Apquilacac alhta ayajapvaa yipjopay Pedro najan apquillhalhmaa. 35 Intipquic alhta appayvam naysicsa yipjopay:
—Eycaso sictamongvoyam siyasicjayo, elaylhojo sat appayvam —alhta intomjac amyaa.
36 Natamin appayvam alhta apquilvita aptomja aplhapco Jesús. Am alhta eliltimnasac apnaymacoc actemaclha asoc apquilvitay alhta.
Jesús aptamilquisquiyam lhama apyimnanic
(Mt 17.14-21Mr 9.14-29)37 Moc acnim alhta apquilinyectamo inquilhe acvinatem. Apquilamyilhamquic alhta enlhit appintalhnama. 38 Yejemoc alhta apquilpalhamamcaa lhama enlhit:
—Visqui, ingyeylhojo siclho. Ityaningvomjo sictamongvoyam apvamlha pac lhama. 39 Acmongvactamo mataa somquic quilyicjamo. Inquiliclhamcasquic mataa. Inyinyovasam mataa, intipquic najan acyamopoy apvalhoc. Inquilinlhanacmec mataa. Incascasquic mataa apyimpejic. 40 Altimnasquic lha inyicje lhip apquiltamsoycaoc, yoyam elantipsic somquic quilyicjamo. Am eyca colapvancaac —alhta aptomjac enlhit.
41 Apcatingmavoc alhta Jesús:
—Enlhit apquilyasquiyam nac quellhip najan colyavameycaoc. ¿Jalhcocvam acnim olhojoc lhama mocjam quellhip? ¿Jalhcocvam acnim olngamcojo mocjam apquilyasquiyam quellhip? Elyantamenma apyimnanic jalip —alhta aptomjac.
42 Naysicsa aplhingayam alhta apyimnanic acmongvactamo somquic quilyicjamo. Inyinyovasam alhta nalhpop. Yejemoc alhta apquilyasalhma Jesús. Aptamilquiscacmec alhta apyimnanic. Apyantimcaseclhec alhta mocjam apyap. 43 Pilapcasquic alhta anco acvitalhco actemaclha Dios apmopvan apanco.
Anit aplhenayclha amamyi, yoyam ematong
(Mt 17.22-23Mr 9.30-32)Pilapcasquic alhta mocjam aplhamoclhojo apquilvita aptamjaycam Jesús. Aptomjac alhta apquilanya apquiltamsoycaoc:
44 —Elaylhojo anco. Colma apquilvalhoc coo sicpayvam. Coo sicvisay Sictiyam Sictomja Enlhit. Ingyanic sat omalhca nipyesicsa enlhitaoc.
45 Am alhta elyasamcoc apquiltamsoycaoc aplhanma. Am alhta epeyvasoc aplhanma. Am alhta colapvancaac elyasamcojo. Inquilnovquic alhta elmalhneclhojo.
¿Soc enlhit aptomja apyimtalhnamo apanco?
(Mt 18.1-5Mr 9.33-37)46 Yejemoc alhta apquilpamejitsacpo apquiltamsoycaoc:
—¿Soc sat etnejic ningyesicsa apquimja apmamyi? —alhta apquiltomjac.
47 Apyicpilcoc alhta Jesús alquitamsama apquilvalhoc. Yejemoc alhta apma lhama sicaa. Apnesa alhta napocja. 48 Aptomjac alhta apquilanya:
—Ningilmec sat ancoc tacja lhama sicaa acno aso apsoyam sicvisay, ningiltomja ningmam tacja Jesús. Ningmec sat ancoc tacja Jesús, ningiltomja ningmam tacja Ingyapam aptomja apcapajascama Jesús. Ninlhenalhquic ancoc mongyimtalhnamo, eyca as ontimjic ningyimtalhnamo —alhta aptomjac.
Am anco jingilmelhac enlhit, sinpasmom sat etnejic
(Mr 9.38-40)49 Aptomjac alhta Juan:
—Visqui, ningvitac alhta enlhit apsoyam lhip apvisay. Apquilantipcasquic alhta somquic quilyicjamo. Ningasquic alhta, eyca ayinyemaclha cotnaja ninlhalhma —alhta aptomjac.
50 Apcatingmavoc alhta Jesús:
—Noelmiyov nasa enlhit elhenic sicvisay. Am ancoc jingilmelhac enlhit, sinpasmom sat etnejic —alhta aptomjac.
Colcac apvalhoc Jesús aptemaclha Jacobo najan Juan
51 Camquitvocmec alhta acnim, yoyam emyaclhac mocjam netin Jesús. Appeyvoc alhta apmiyaclho tingma Jerusalén. 52 Apquilapajasquic alhta soycam amyaa apmamyi. Yejemoc alhta apquillhinga. Apquilantalhningvocmec alhta tingma yoclhilhma Samaria. Apquililtamjoc alhta emacpoc tacja Jesús. 53 Eyca am alhta elmac tacja co Samaria. Ayinyemaclha appecjaso emyaclha tingma Jerusalén. 54 Lhama alhta apquilvita apquiltamsoycaoc Jacobo najan Juan. Apquiltomjac alhta apquilanya:
—Visqui, ¿apquiltamjo ya lhquip onganic conyemac netin talha, yoyam elmetic as enlhitaoc? Colhojoc sat aptemaclha ilhnic nat Elías —alhta apquiltomjac.
55 Am alhta colcac apvalhoc Jesús. Apquilanoc alhta apyimnatesa appayvam:
—Am elyasamcoc quellhip apquilvajanayclho actemaclha apquilvalhoc. 56 Coo sicvisay Sictiyam Sictomja Enlhit. Acvaac coo, yoyam olvomsic tap enlhitaoc. Am oltamjoc olnapoc —alhta aptomjac.
Aclhanma apquilvalhoc enlhit elyiplovjo Jesús
(Mt 8.19-22)57 Nalhit amay alhta aptomjac apcanya lhama enlhit:
—Visqui, pac oyiplovjoc mataa lhip apyasaclha —alhta aptomjac.
58 Apcatingmavoc alhta Jesús:
—Alhanaoc innac maling. Alhanaoc innac nata. Am coyitnac sictiyanmaclha sicvisay Sictiyam Sictomja Enlhit —alhta aptomjac.
59 Apquevam alhta Jesús poc enlhit:
—Jeyiplovjo —alhta aptomjac.
Apcatingmavoc alhta enlhit:
—Visqui, jeyojo siclho olhong. Ongvatongnic siclho tata apquitsepma. Oyiplovjoc sat jayqui —alhta aptomjac.
60 Aptomjac alhta apcanya Jesús:
—Ilane sat enlhit malha apjapaoc napato Dios Ingyapam elatongnic sat enlhit apquitsepma. Ilhing sat lhip. Iltimnas sat amyaa Dios apquilnancascama —alhta aptomjac.
61 Aptomjac alhta poc enlhit:
—Visqui, pac oyiplovjoc lhip. Jeyojo siclhoc olhong. Pac opayvesamcoc siclho enaymacoc tingma ajac —alhta aptomjac.
62 Apcatingmavoc alhta Jesús:
—Appaycacpec sat ancoc enlhit niptamin naysicsa apquilcacjam, apyitsomacpo enlhit aclhanma mataa apvalhoc asoc acyitna niptamin. Eyca as enlhit colhic sat actanongvoclho, copvanquejec elngacsic Dios apquilnancascama —alhta aptomjac.
Jesús apkeláphasso apkeltáméséyak eltennaha m'a aptémakxa nak Wesse' apwányam Dios
(Mt 10.5-15Mc 6.7-13)1 Apcháncheseykekxeyk axta Jesús doce apkeltáméséyak, apkelmeyáseykegkek axta apkelmopwancha'a yaqwayam elántekkesek ekyókxoho mók ektémakxa nak chá'a kelyekhama', tén han emasseksek ma'a negháxamáxche'. 2 Apkeláphássegkek axta yaqwayam eltennaha m'a aptémakxa nak Wesse' apwányam Dios, tén han eltaqmelchessók ma'a élháxamáxche. 3 Axta aptemék apkelanagkama s'e:
—Nágkólsow aqsa xama aqsok enxoho yaqwayam kólmaha ámay: cham'a kéltasqapeykha nak, nahápa kélagkok, kélto, selyaqye, tén han kélántaxno yaqwayam enxoho kólyaqmagkasek pók. 4 Tegma kélwánxa enxoho chá'a, kólhakha sa' chá'a m'a ekwokmoho kélxegákxo makham. 5 Sa' agkok chá'a kólmáxchek takha' nátegma kélwánxa enxoho chá'a, kólántép sa' chá'a m'a, kólpalches sa' nahan chá'a kélmagkok xapop ánek, yaqwayam sa' melchenatchesek peya ellegássesagkohok Dios xa énxet'ák nak.
6 Apkelxegamchek axta xa énxet'ák nak, apkelmaheykegkek axta ekyókxoho nátegma, apkeltenneykencha'a chá'a m'a amya'a ektaqmela, tén han apkeltaqmelchesseykmo chá'a élháxamáxche'.
Herodes mey'áseyak aptémakxa
(Mt 14.1-12Mc 6.14-29)7 Aplegayak axta amya'a Herodes ekxénamaxko ekyókxoho m'a ektémakxa axta; axta ey'áseykegkok yaqweykenxa etnehek élchetamso apwáxok, hakte nápakha énxet axta chá'a apkelxeyenmak apxátekhágweykmo m'a Juan, 8 nápakha axta nahan chá'a apkelxeyenmak apweykto makham ma'a Dios appeywa aplegasso Elías, nápakha axta nahan chá'a apkelxeyenmak xama m'a nano' Dios appeywa apkellegasso axta. 9 Keñe axta Herodes aptéma appeywa s'e:
—Ko'o ahagko' axta séltémo kólyaqténchesek apyespok ma'a Juan. ¿Yaqsa eyke kexaha énxet ma'a, seklegaya nak chá'a ko'o exénakpok elának aqsok ekxámokma agko'?
Axta keñamak Herodes apkelenxáneykmo étak ma'a Jesús.
Jesús apkelmeyáseyak aptéyak énxet apxámokma
(Mt 14.13-21Mc 6.30-44Jn 6.1-14)10 Xama axta apkelweykekxo makham ma'a Jesús apkelápháseykha, apkeltennáseykha axta Jesús ma'a ektémakxa axta aqsok apkelánéyak. Apnaqlamchek axta apxakcha'awók Jesús xa, apkelya'assegkek axta m'a nátegma ekwesey axta Betsaida. 11 Xama axta apkellegaya amya'a m'a énxet'ák, apkemheykegkek axta; apkelmomchek axta nahan takha' m'a Jesús, apkeltennáseykha axta m'a aptémakxa nak Wesse' apwányam Dios, apkeltaqmelchesseykmek axta anhan ma'a élháxamáxche.
12 Xama axta nahan ektaxneykmo, apya'eykekxeyk axta aphakxa Jesús ma'a doce apkeltáméséyak. Axta aptemék apkenagkama s'e:
—Eláphés sa' énxet'ák, yaqwayam sa' ellókassekxak apkelyampe, tén han etegyagkok aptéyak ma'a nátegma, tén han ma'a yókxexma eyágketexa nak, hakte méko aqsok se'e yókxexma nak.
13 Axta aptemék apkelanagkama Jesús se'e:
—Kólmésák kéxegke aptéyak.
Axta aptemék apkelátegmoweykegkokxo s'e:
—Cinco pan akke aqsa negko'o apyetna tén han ánet kelasma, apkeltamhók enxeykel'a exchep antegyássekxak negko'o aptéyak apyókxoho xa énxet'ák nak.
14 Hakte cinco mil axta apyókxoho m'a apkelennay'a. Axta eyke aptemék apkelanagkama apkeltáméséyak Jesús se'e:
—Kólána sa' elyaqyesagkok apheykha. Cincuenta sa' chá'a etnehek apyókxoho.
15 Aptamheykegkek axta nahan ma'a apkeltémókxa axta etnahagkok, apkeltémok axta chá'a exnakha apyókxoho énxet. 16 Tén axta Jesús apkelmoma m'a cinco pan nak, tén han ma'a ánet kelasma, apsekheykekxók axta néten, keñe apméssama ekxeyenma apwáxok Dios, apkelyeptégkek axta pan, tén axta apkelmeyáseykegko m'a apkeltáméséyak yaqwayam enxoho emlaskok nepyeseksa m'a énxet'ák. 17 Apteykegkek axta nahan énxet'ák ekwokmoho apkelyaqkáneykmo, doce axta anhan weykmok kélxatméyak apkelmeykekxa m'a apkeleymomap axta nápakha'a.
Pedro apxeyenma Jesús apteme Mesías
(Mt 16.13-19Mc 8.27-29)18 Xama ekhem axta aptemék apxakkók nempeywa nélmaxnagko m'a Jesús, apkeltáméséyak axta nahan apkelxegexma'a, axta aptemék apkelmaxneyeykencha'a s'e:
—¿Háxko aptémakxa chá'a ko'o sexeyenma m'a énxet'ák?
19 Axta aptemék apkelátegmoweykegko s'e:
—Nápakha énxet chá'a apxeyenmak xép apteme Juan el Bautista, nápakha nahan chá'a apkelxeyenmak apteme Elías, nápakha nahan chá'a apkelxeyenmak xeyep apteme xama m'a Dios appeywa apkellegasso nanók axta, apxátekhágweykmo makham.
20 —Kéxegke nahan, ¿háxko kéltémakxa chá'a sélxeyenma ko'o? —axta aptemék apkelmaxneyeykencha'a.
Keñe axta Pedro aptéma apchátegmoweykegko s'e:
—Xép apteme Mesías apkeñama Dios.
Jesús apxeyenma yaqwayam yetsapok
(Mt 16.20-28Mc 8.30—9.1)21 Apkeltémók axta eyke meltennaksek xama énxet enxoho Jesús apkeltáméséyak xa. 22 Tén axta aptéma apkelanagkama s'e:
—Megkatnehek sa' ko'o mañeykegkoho ekyentaxno agko', ko'o sektáha nak Apketche énxet, hetaqnók sa' ma'a apkelámha apmonye'e nak, tén han ma'a apkelámha apmonye'e nak apkelmaxnéssesso Dios énxet'ák apagkok, tén han ma'a apkelxekmósso nak apnámakkok ektémakxa segánamakxa. Heyaqhek sa', ántánxo ekhem sa' eyke katnehek hélxátekhassók makham.
23 Tén axta aptéma apkelanagkama apyókxoho énxet'ák se'e:
—Kélmakók agkok kóltéhek kélxama kéxegke séltáméseyak, kólwátésák ma'a kélmáheyókxa kélagko' nak chá'a kóltéhek, kólpátem aqsok ektegyésso kélagkok yókxoho ekhem, keñe sa' hélyetlógma. 24 Hakte kéxegke ektáhakxa enxoho kélmasma ektémakxa nak kélyennaqte, kólmassegwók sa'; keñe sa' kéxegke ektáhakxa enxoho kéletsapma eñama ko'o, kólwetágwók sa' kélyennaqte. 25 ¿Kapasmoya énxet apwete nak ekyókxoho aqsok keso náxop apketsapa enxoho essenhan aptawáseykpo apagko' enxoho? 26 Hakte apmegqakkek agkok ko'o sélano kélxama kéxegke, tén han ma'a sekpeywa, emegqeyk sa' han elanok ma'a apteme nak Apketche énxet, cham'a apwa'akto sa' yetlo apcheymákpoho, tén han apcheymákpoho m'a Apyáp, tén han yetlo m'a apkelásenneykha apkelpagkanamap nak. 27 Naqsók ko'o sektáha séláneya kéxegke nápakha apheyncha'a nak se'e, meletsepek sa' mét'a enxoho makham kawak ma'a aptémakxa nak Wesse' apwányam Dios.
Jesús élyenmeykekxa apyókxa
(Mt 17.1-8Mc 9.2-8)28 Ocho ekhem axta temék ekyeykhe xa apkelpaqhetchásamákpoho axta, apkenátweykmek axta néten egkexe Jesús apmáheyo etnehek nempeywa nélmaxnagko, yetlo apxegexma m'a Pedro, Santiago tén han ma'a Juan. 29 Yaqmagkassegkek axta nahan ektémakxa nápat neyseksa apteme nempeywa nélmaxnagko, apmope apagko' axta nahan aptamheykekxak ma'a aptaxno, tén han apkelyenma; 30 apkelyephagwayak axta anhan apqánet énxet apkelpaqhetchásamákpoho m'a Jesús. Moisés axta m'a tén han Elías; 31 wakhayak axta nahan élseyéxma eyeymáxkoho; apkelxeyenmeyk axta yaqweykenxa katnehek apketsapma m'a Jesús tén han ekmáheyo kapayhohok katnehek ma'a Jerusalén. 32 Apyenmeykha apagko' axta eyke m'a Pedro tén han ma'a apkelxegexma'a, axta eyke enaqteyenmak, apkelweteyak axta Jesús élseyéxma apagkok, tén han apqánet énxet apkelpaqhetchásamápoho axta m'a. 33 Xama axta apyenyeykekxo Jesús ma'a apqánet énxet nak, axta aptemék apkenagkama Pedro s'e:
—Sẽlxekmósso, ¡ektaqmelakxoho agko' nak la'a nélwa'a negko'óxa s'e! Anlának sa' negko'o apqántánxo tegma apketkók: xama sa' apagkok xép, keñe sa' nahan ma'a Moisés, keñe sa' nahan xama m'a Elías.
Axta eyke ey'áseykegkok aqsok apxeyenma m'a Pedro. 34 Cháhapwayak axta nahan xama yaphope neyseksa appaqmeyesma, xama axta apkelweteya apchaqneykencha'a kañe' yaphope, apkeláyak axta. 35 Keñe axta ekteyapma kélpeywa m'a neyseksa yaphope. Axta entemék se'e: “Keso hatte ko'o s'e, apteme axta sélyéseykha, kóleyxho sa' appeywa.”
36 Xama axta eklegamaxko xa kélpeywa nak, apxakkók axta aptamheykekxak ma'a Jesús. Appóssegkek axta eyke aqsa apkeltáméséyak xa aqsok nak, axta eltennáseykha xama énxet ma'a ektémakxa axta aqsok apkelwete.
Jesús aptaqmelchesseyam wokma'ák ekha axta apwáxok espíritu ekmaso
(Mt 17.14-21Mc 9.14-29)37 Mók ekhem axta entemék, apkelánteyepmeyk axta apkeleñama m'a néten egkexe, apkelanyexeykegkek axta nahan énxet apxámokma m'a Jesús. 38 Keñe axta xama énxet aptéma apyennaqtéssamo appeywa nepyeseksa énxet se'e:
—Sẽlxekmósso, elano hana hatte, hakte wánxa ko'o xama hatte s'e; 39 kamok chá'a espíritu ekmaso, keñe kapeykessesha chá'a apátog, keytlawhok nahan chá'a ektemessáseykekxa', tén han ektekkessesso ekyaqmope apwáxok. Katwasagkohok chá'a, yámenyeyk nahan kayenyekxa'. 40 Éltamhók xeykhe ko'o etekkesek apkeltáméséyak xa espíritu ekmaso nak, mopwancha'ak xeyke.
41 Axta aptemék apchátegmoweykegko Jesús se'e:
—¡Énxet apkelya'ásseyam, tén han élmasagcha'a kéltémakxa! ¿Háxko sa' ekwánxa ekhem kammok sekha ko'o kélnepyeseksa kéxegke tén han alenmaxaxkohok kéltémakxa? Éntemegma apketche s'e.
42 Xama axta apyepetchegweykmoho Jesús ma'a wokma'ák nak, yaqnegkessegkek axta náxop ma'a kelyekhama', temessáseykekxeyk axta makham; appaqhetchessegkek axta eyke Jesús ma'a espíritu ekmaso, aptaqmelchesseykmek axta nahan ma'a wokma'ák nak, tén axta apmeyáseykekxo m'a apyáp. 43 Kelpelakkassegkek axta nahan apkelweteya apyókxoho énxet ektémakxa ekyawe agko' apmopwána m'a Dios.
Jesús apxéneykekxoho makham yaqwayam yetsapok
(Mt 17.22-23Mc 9.30-32)Axta aptemék apkelanagkama apkeltáméséyak Jesús neyseksa ekpelakkasso apkelwete apyókxoho énxet'ák ektáhakxa aqsok apkelane s'e:
44 —Kóltaqmelchesho sa' kélháxenmo s'e. Nágkalwagqamák nahan: Kólmések sa' énxet'ák ma'a ektáha nak Apketche énxet.
45 Axta eyke elya'áseykegkok apkeltáméséyak ma'a aptémakxa axta apkelanagkama, hakte axta elxaweyk makham yaqwayam elya'asagkoho'; apkeláyak axta nahan yának eltennásekxohok ma'a Jesús.
¿Yaqsa ektáhakxa ekyawe agko' kéláyo?
(Mt 18.1-5Mc 9.33-37)46 Apkelpaqmeyesmeyk axta nahan Jesús apkeltáméséyak apkelxeyenma yaqsa ektáhakxa ekyawe agko' kéláyo m'a nepyeseksa. 47 Xama axta apyekpelchama Jesús ektémakxa élchetamso apkelwáxok ma'a apkeltáméséyak, apmomchek axta xama sakcha'a, apkenegkáseykha axta apkenmeykegkaxa, 48 tén axta aptéma apkelanagkama s'e:
—Kélxama ektáhakxa enxoho kélmà takha' s'e sakcha'a nak yetlo kélxeyenma sekwesey, hemok nahan ko'óxa takha'; keñe nahan énxet ektáhakxa enxoho semà takha' ko'o, emok nahan takha' m'a aptáha axta seyáphasso ko'o. Ékeso éñamakxa énxet meyke kéláyo nak kélnepyeseksa kéxegke, cháxa apteme ekyawe kéláyo xa.
Segwéhenayo ektáha nak mehenmexeykha negko'o
(Mc 9.38-40)49 Axta aptemék apkenagkama Juan se'e:
—Sẽlxekmósso, negweteyak axta negko'o xama énxet apkelántekkessama kelyekhama' yetlo apxeyenma apwesey exchep; axta eyke negko'o óghayo', hakte háwe axta nenxegexma.
50 Axta aptemék apchátegmoweykegko Jesús se'e:
—Nágkólnókasha aqsa, hakte hegwéhenhok chá'a negko'o m'a mehenmexeykha nak.
Jesús appaqhetchesso Santiago tén han Juan
51 Xama axta eyágketweykmo ekhem yaqweykenxa emyekxak néten ma'a Jesús, apxegamchek axta apmeyeykekxo Jerusalén yetlo megyeye. 52 Apkeláphassegkek axta amonye'e m'a apkelápháseykha, cham'a apkelmaheykegko axta xama apheykegkaxa énxet ma'a Samaria yaqwayam enxoho etegyaha yaqwánxa exnók; 53 axta eyke emáheyók emok takha' m'a énxet'ák Samaria, hakte apkelya'áseykegkók axta apmeyeykekxo Jesús ma'a Jerusalén. 54 Xama axta apkelweteya apkeltáméséyak xa, cham'a Santiago tén han Juan, axta aptemék apkenagkama s'e:
—Wesse', ¿apmenyéya agának negko'o kaweywenták táxa eñama néten yaqwayam sa' kasawhohok xa énxet'ák nak?
55 Appeynchamakpók axta eyke m'a Jesús, keñe axta apkelpaqhetchessama ekyennaqte. 56 Tén axta apkelmeyeykekxo makham mók apheykegkaxa énxet.
Énxet'ák apmáheyo nak étlawha Jesús
(Mt 8.19-22)57 Neyseksa apkelxega axta ámay, aptéma apkenagkama Jesús xama énxet se'e:
—Wesse', émenyeyk eykhe ko'o eytlawha exchep ma'a apmahágkaxa enxoho chá'a. 58 Axta aptemék apchátegmoweykegko Jesús se'e:
—Yetneyk máxek axanák ma'a yammáleg, yetneyk nahan axanák ma'a náta; méko eyke apteyáyam ma'a aptáha nak Apketche énxet.
59 Axta aptemék nahan Jesús apkenagkama m'a pók énxet nak:
—Hétlógma exchep.
Tén axta aptéma apchátegmoweykegko s'e:
—Wesse', heyho sekxók wátawañegwakxak táta aphápak.
60 Axta aptemék apchátegmoweykegkokxo Jesús se'e:
—Yoho elátawanyek apkeletsapma m'a apkeletsapma nak; exeg xép, eltennaha m'a aptémakxa nak Wesse' apwányam Dios.
61 Keñe axta nahan pók énxet aptéma apkenagkama Jesús se'e:
—Wesse', ekmakók ko'o exchep eytlawha, heyho sa' sekxók alpeykessekxak ma'a ekheykha nak exagkok.
62 Axta aptemék apchátegmoweykegko Jesús se'e:
—Énxet appeyncheyam nak xapop, apkelpeynchamakpoho nak chá'a neptámen, mopwanchek etxek ma'a aptémakxa nak Wesse' apwányam Dios.
