Aptalhesquiscama Pablo apmaclha singilpilhtetomaclha yoyam elyipsitic Jesucristo apmolhama tingma Filipos
1 Coo nac Pablo najan Timoteo ningiltomja Jesucristo apquilancam. Ningiltalhescasquic as vaycajac actemaclha aclhanma ingvalhoc aplhamoclhojo Jesucristo apmolhama apnaycam tingma Filipos. Najan maa apquilimja apmamyi najan apquiltomja apquilancam. Ayinyemaclha aplhamoclhojo apquiltomja apquilpasmeyquiclha Cristo Jesús. 2 Altamjoc coo yoyam ellhovac quellhip apcaycaoc najan altamilaycam apquilvalhoc ayinyema Dios Ingyapam najan Jesucristo Visqui ingac.
Apquilmalhnesquiscama Pablo Jesucristo apmolhama
3 Inlhenquic mataa evalhoc quellhip. Yiplovcoc mataa sictimem gracias Dios Ingyapam. 4 Yiplovcoc mataa acpayjayclha evalhoc naysicsa silmalhnesquiscama quellhip. 5 Actimec coo gracias, ayinyemaclha apquiltomja quellhip coyeycajamalhca moc apquilvalhoc, ayenmo siclhoc anco acvocmo acnim nac jay. Elpasmec mataa quellhip naysicsa ningilpayescama tasic amyaa. 6 Acyasamcoc coo actomja nasoc anco: Visqui ingac aptomja apquenmo apquilvalhoc apquiltemaclha actamila. Epenacsojoc sat najan apquiltemaclha actamila acvocmo acnim apvoyctamlha Jesucristo. 7 Inpeyvoc anco actemaclha aclhanma evalhoc quellhip. Avanjec anco acliclama evalhoc quellhip. Elpasmec mataa quellhip naysicsa sicma singilpilhtetomaclha. Elpasmec najan mataa naysicsa sicmasma tasic amyaa napatavo singyicpilquemo. Ayinyemaclha noc moc coyeycajamalhca ingilvalhoc ayinyema singaycaoc Visqui ingac. 8 Naso, apyasamcoc najan Dios actemaclha alipvoyam evalhoc yoyam olviticlha quellhip. Avanjec anco acliclamo evalhoc quellhip. Jesucristo aptimescasac acliclamo apquilvalhoc quellhip. 9 Almalhnescasquic mataa quellhip yoyam coyangvomoc acliclamo apquilvalhoc ayinyema apquilyasingvoyam najan apquilyicpilcangviyam aclhamoclhojo nintemaclha. 10 Elyipcon sat mataa anit nintemaclha yoyam copeyvojo nintemaclha actamila. Eltamilsacpojo apanco quellhip yoyam melsilhnanacpejec acvocmo sat acnim apvoyctamlha Jesucristo. 11 Coyit apquilvalhoc actemaclha actamila ayinyema Jesucristo. Sat cotnejic malha acyilhna acnaclhamalhca. Colhic sat mataa ayaco Dios Ingyapam.
Apvamlha Cristo aclhanma evalhoc
12 Quellhip elyalhinga. Altamjoc coo elyasamcojo quellhip actomjaclha quilhvo nac jay. Avanjec anco acpayjayclha tasic amyaa, am colhno nanoc alhta. 13 Apquillingac alhta aplhamoclhojo singilpilhtetemo najan poc enlhitaoc sicma coo singilpilhtetomaclha ayinyema siclingascama apvisay Cristo. 14 Inyangvocmec melyasquiyam aplhamoclhojo elyalhinga apquilvita sicma singilpilhtetomaclha. Inmasquec actemaclha ayay apquilvalhoc. Apquilpayesquic mataa tasic amyaa mepqui apquilay.
15 Naso, apquillingasquic apvisay Cristo napocja elyalhinga ayinyema apquilyasipquiscama najan apquilatingmayclho. Poc eyca apquillingasquic apvisay Cristo ayinyema actamilaycam apquilvalhoc najan apquilasicjayo. 16 Apquilyasamcoc ingilyalhinga sicma singilpilhtetomaclha yoyam omyoc tasic amyaa napatavo singyicpilquemo. 17 Apquillingasquic napocja elyalhinga apvisay Cristo, eyca ayinyema apquiltingyaycaoc mataa asoc apancaoc ayinyema alquitamsama apquilvalhoc. Apquililtamjoc elyimtalhnecsic evalhoc naysicsa sicma singilpilhtetomaclha. Cotnejic ac lha. 18 Altamjoc coo yoyam ellingacsic mataa apvisay Cristo, molhenejec actemaclha coltamilaycam apquilvalhoc. Eycaso ayinyema acpayjayclha evalhoc.
Copayjiclhac sat mataa evalhoc. 19 Naso, acyasamcoc coo. Aclingamcoc aclhamoclhojo as asoc yoyam omyovalhca coo. Ayinyemaclha quellhip apquiltomja selmalhnesquiscama. Epasmec mataa Espíritu apanco Jesucristo aptomja aptamilquisquiyam mataa evalhoc. 20 Inlhenquic mataa evalhoc yoyam momancayc mataa coo. Altamjoc yoyam colhic ayaco Cristo quilhvo acno nanoc alhta. Momyovalhcoyc coo ajanco. Tasic najan jelyamyiclha singilpilhtetomaclha, tasic najan jelajic. 21 Amamyi anco mataa aclhanma evalhoc Cristo naysicsa sictiyascam as nalhpop. Ayitsepquic sat ancoc coo, copayjiclhac sat evalhoc malha sicmetsovjam asoc. 22 Emeyjec sat ancoc mocjam coo, evanquic otnajam mocjam actemaclha actamila. Am oyasamcoc coo quilhvo yoyam colhenic evalhoc. 23 Yitnec anit asoc aclhanma evalhoc: Altamjo inyicje yoyam ongvitsapoc yoyam olhojoc sat lhama Cristo. Eycaso actomja actamila anco, am colhno moc aclhanma evalhoc. 24 Altamjo inyicje najan yoyam otyisam mocjam. Incaymalhqui inyicje otnajam mocjam nipyesicsa quellhip. 25 Eyascasingveclhoc evalhoc coo. Acyasamcoc quilhvo, yoyam otyisam sat mocjam nipyesicsa quellhip. Altamjoc mocjam opasmoc quellhip yoyam coyangvomoc acpayjayclha apquilvalhoc actemaclha melyasquiyam quellhip. 26 Acvoclhec sat ancoc mocjam nipyesicsa quellhip, coyangvomoc sat apquilayo quellhip Jesucristo Visqui ingac, coo ayinyema sicvoycta mocjam.
27 Ovoclhac sat lhaja nipyesicsa quellhip yoyam olviticlhac sat mocjam. Olhic sat lhaja mocjay yoyam olngac sat acvamlha apquilvisay. Elyasamcojo quellhip: Eltamilsacpojo apanco, elyiplovquis actemaclha singillhicmoscama tasic amyaa. Elyimnaticsojo sat apquilvalhoc. Elhnasojo sat moc apquilvalhoc. Elvascap sat quellhip elmeyvoc melyasquiyam ayinyema tasic amyaa, malha apquilnapomap sat eltimjic. 28 Noela nasa quellhip enlhit apquilinmelhaycam. Apquililtamjoc mataa elinmelham tasic amyaa. Cotnatsalhquejec sat apquiltemaclha yoyam elnatovasacpoc sat. Cotnatsalhquejec sat najan apquiltemaclha quellhip mepqui apquilay yoyam sat elvomsacpoc tap. Eycaso ayinyema Dios Ingyapam. 29 Elyasamcojo quellhip: Amamyi anco aclhanma apquilvalhoc quellhip Cristo. Incaymalhquic najan melyascomoc mataa quellhip. Incaymalhquic najan colhic ayasquisa apyimpeoc quellhip ayinyema apvisay Cristo. 30 Apquilvascapquic quellhip, acvascapquic coo lha ningilinmelhma apquiltomja singilinmelhaycam. Apquilvitac alhta quellhip sictemaclha silnapomalhca. Apquilvitac najan quilhvo quellhip, malha silnapomalhca apquiltomja selinmelhaycam.
Ekxeyenma egwáxok
1 Ko'o Pablo tén han Timoteo nenteme nak Jesucristo apkeláneykha, negáphássessek negko'o ekxeyenma egwáxok kélheykha nak tegma apwányam Filipos, kélteme nak Dios énxet'ák apagkok apkelpagkanamap, eñama kélyepetcheyo m'a Cristo Jesús, tén han ma'a apyókxoho apkelámha apmonye'e nak kélaqneykekxexa, tén han ma'a appasmeykha nak chá'a apkeltamheykha. 2 Dios Egyáp tén han Jesucristo Wesse' egegkok sa' etnehek apmésso naqsa kéxegke m'a ektémakxa nak ektaqmeleykha apwáxok henlano', tén han epekkenek meyke ektáhakxa kélwáxok kélnepyeseksa kéxegke.
Negmésso ekxeyenma egwáxok Dios
3 Agkéshok chá'a ko'o ekxeyenma ewáxok Dios ahagkok, ekxéna enxoho chá'a ewáxok kéxegke; 4 élmaxnakkek agkok nahan chá'a, almaxnéssesek chá'a kéxegke kélyókxoho yetlo ekpayheykekxa ewáxok; 5 hakte nélpasmomáxkók axta nenláneya nentamheykha eñama nak tásek amya'a, eyeynamo m'a sekxók axta nenlegaya, ekweykmoho s'e negwánxa nak. 6 Naqsók ko'o ektemessessók Dios apcheynamo axta apkelane aptamheykha ektaqmela kélnepyeseksa kéxegke, peya esawhegwomok apkelane ekweykmoho m'a ekhem apkexyekmo sa makham ma'a Jesucristo. 7 Payhawók agko' ko'o katnehek ekxeyenma ewáxok kélyókxoho kéxegke xa ektáha nak, hakte xéneykha agko' ko'o ewáxok kéxegke, hakte élpasmomchek axta ko'o kéxegke sélane m'a ektaqmeleykha egwáxok sexekmósso axta ko'o m'a Dios, megkeyxek ma'a sekha enxoho sẽlpextétamakxa, essenhan sélyentama enxoho nápaqta'awók ma'a kelwesse'e ekha nak kéláyo, yaqwayam enxoho amyók tén han axének ektáha naqsók kéllegasso m'a amya'a ektaqmela. 8 Hakte apya'ásegkók Dios sélwetayo ahagko' ko'o kélyókxoho kéxegke, eñama setekkessesso ewáxok ekyawe agko' sélásekhayo m'a Cristo Jesús. 9 Almaxnéssesek chá'a ko'o kéxegke wának kayágwomhok agko' kélásekhamaxkoho, tén han egkések Dios kélya'ásegwayam tén han kélyekpelchémo aqsok, 10 yaqwayam enxoho kólewának chá'a kélyéseykha m'a aqsok ektaqmela nak. Keñe sa' kóltéhek chá'a eyáxñeyo kéltémakxa, tén han kólewának kólxog meyke kélpelápegwayam ekweykmoho m'a ekhem apkexyekmo sa' makham ma'a Cristo; 11 hakte kólsakxak sa' kéxegke ekxámokma agko' kéltamheykha ektaqmela eñama apmésso m'a Jesucristo, yaqwayam enxoho kóltéhek kéláyo Dios, tén han kólteméssesek apcheymákpoho.
Mowanchek ko'o axek meyke Cristo
12 Élyáxeg, émenyeyk ko'o kólya'ásegwomhok kéxegke setnamakxa axta ko'o, ekwaya nahan naqsók yaqwayam kapasmok ma'a ektémakxa nak kéltenneykha tásek amya'a. 13 Hakte apkelya'áseykegkók axta ko'o sekhama sẽlpextétamakxa m'a énxet'ák apkeltaqmelchesso axta wesse' apwányam apxagkok apyawe tén han ma'a apyókxoho énxet'ák, eñama sekyetleykha m'a Cristo. 14 Xama axta apkelweteya sélhésseykmo ko'o sẽlpextétamakxa, apyókxoho ẽlyáxeg axta nahan apmáyheykegkohok ellegaksek ma'a amya'a eñama nak Dios, meyke apkelaye, yetlo ekyágweykmoho agko' apteme melya'ásseyam ma'a Wesse' egegkok.
15 Naqsók eyke nahan apkeltenneykencha'a chá'a nápakha énxet'ák amya'a eñama nak Cristo eñama chá'a apnathe, tén han apkelenmexamap, nápakha énxet akke nahan chá'a apkeltenneykha yetlo éltaqmalma élchetamso apkelwáxok. 16 Nápakha énxet akke nahan chá'a apkeltenneykha amya'a eñama nak Cristo eñama seyásekhayo, hakte apkelya'áseykegkók ektáha ko'o sexnésso Dios se'e, yaqwayam enxoho amyók ma'a amya'a eñama nak Dios; 17 nápakha énxet akke nahan chá'a apkeltenneykha yaqwayam katnehek ekpasmo wánxa apxakcha'awo', háwe nahan ekmámnaqsoho m'a apkeltémakxa nak, apmenyeyk aqsa heyánchessesagkohok ko'o ekyentaxno sekha, keso sekha nak kaxwók ko'o sẽlpextétamakxa. 18 Méko eyke katnehek, megkeyxek eyke ektáha enxoho meyke kélyexamaxkoho essenhan kélyexamaxkoho, kéltenneykha eyke chá'a m'a amya'a eñama nak Cristo; cháxa ekpeykeseykekxo nak chá'a ko'o ewáxok xa.
Kayágkok sa' aqsa nahan ekpayheykekxa ewáxok, 19 hakte ekya'ásegkók ko'o ekyókxoho peya katnehek sewagkasso teyp xa, eñama sélmaxnéssesso chá'a kéxegke, tén han sepasmo m'a Jesucristo Espíritu apagkok. 20 Émenyeyk ahagko' ko'o malanyek xama enxoho m'a aqsok yaqwayam nak hemegqaksek, megkeyxek ma'a sekyenna enxoho makham essenhan sétsapa enxoho, kataxchek sa' chá'a ektémakxa apteme apwányam apagko' Cristo, ko'o éñamakxa, nápaqta'awók ma'a énxet'ák. 21 Hakte ekweynchámeykha agkok ko'o makham, cháxa sekmáheyo ko'o atnehek makham apkeláneykha m'a Cristo, keñe m'a sétsapa enxoho, cháxa yaqwayam ko'o kataqmelek setnahakxa. 22 Kelenxanmegkók agkok ko'o makham ekweynchámeykha s'e sekyókxa nak, kaxámagkok agko' ekteyapma m'a sektamheykha, keñe may'asagkehek sélyeságkaxa. 23 Askehek ko'o alyésha xa ánet aqsok nak: xama nekha ko'o xeyenmak ewáxok émenyeyk watsapok yaqwayam axhok xamo' ma'a Cristo, hakte tásek sa' ko'o katnehek setnahakxa ektáha enxoho xa ektáha nak; 24 xama nekha nahan xeyenmak ko'o ewáxok ekpayhawo alenxanmagkohok makham sekweynchámeykha, kéxegke éñamakxa. 25 Ekya'ásegkók eyke ko'o peya axek makham kélnepyeseksa kéxegke yaqwayam enxoho apasmok kólyánchesagkohok kélteme megkólya'ásseyam ma'a Dios, tén han kayágwomhok agko' élpayheykekxa kélwáxok eñama megkólya'ásseyam. 26 Keñe sa' axek ko'o makham kélnepyeseksa kéxegke, keñe sa' kayágwomhok agko' élpayheykekxa kélwáxok neyseksa kélyepetcheyo Cristo Jesús.
27 Wánxa eyke aqsa ko'o séltémo kóltéhek se'e: kóllenxánem kóltéhek kélweynchámeykha m'a ektémakxa nak ekpeywa m'a amya'a eñama nak Cristo. Émenyeyk ko'o axkágwaták amya'a ektémakxa kéllenxáneykmoho kéxegke kélyennaqtéssamo megkólya'ásseyam tén han meyke kélexpánchesamaxche, kéllenxáneykmo kélyókxoho kólwetak megkólya'ásseyam ma'a amya'a eñama nak Cristo, megkeyxek ma'a sekya'aweykxo enxoho atyánegwakxohok kéxegke essenhan ma'a matyánegwákxoho enxoho, 28 meyke agko' kélhayo elyegwakkasek kéxegke m'a kélenmexma nak. Cháxa peya sa' katnehek yáxña'akxoho agko' megkólchenatchesso peya elmahagkok ma'a kélmassésseykenxa nak, keñe sa' kéxegke kólwagkasaxchek teyp. Dios keñamak xa. 29 Cristo keñamak kélxawáya kéxegke yaqwayam kóltéhek megkólya'ásseyam, háwe eyke ekwánxa agkok yaqwayam kóltéhek megkólya'ásseyam ma'a, yaqwayam kóllegagkohok xamo' nahan. 30 Hawók negko'o mók ektémakxa nak nélwasqápeykekxoho, ko'o tén han kéxegke. Kélweteyak axta kéxegke ektémakxa sekwasqápeykekxoho ko'o m'a nanók axta. Kéllegágweykxeyk eyke makham amya'a ektémakxa sélenxáneykmoho ko'o sekwasqápeykekxoho.
