Amyaa cinta ningilyipsatem
1 Invitac alhta sicvanmoncama moc asoc. Apvaac lhama enlhit apmaycam apmic cinta ningilyipsatem. 2 Actomjac alhta siyanya: ¿Co laa apyasa? — alhta actomjac coo. Apcatingmavoc alhta: Pac olyipsitic tingma Jerusalén apvamlha apvinatem tingma, najan apvamlha appayjem tingma — alhta aptomjac.
3 Acvitac alhta ángel siyinmaycamó lhama, aptomja apcanya poc ángel apquilhyam: 4 Ingyimpojo, ingyimjamaoc sat apyimnanic apmaycam apmic cinta ningilyipsatem, iltimnas sat Visqui ingac appayvam: Elhnam sat mocjam enlhitaoc tingma Jerusalén. Elhamiclhac sat enlhitaoc najan apnatoscama, mongvanquejec ongillana mataymong tingma apjalhtam. 5 Aptomjac mocjam Visqui ingac: Coo sicyitsomalhca apjalhtam talha acvanyam nipyava tingma Jerusalén. Cotalhcac sat apvalhoc tingma gloria mayayo ajanco — alhta aptomjac.
Apquilvomquiscama tap
6-7 Eycaso Visqui ingac appayvam: Ayilhpancasquic alhta quellhip lhalhma anco. Pac ongvanic quilhvo nac jay: ¡Elinyajaoc sat apnaycam nilhqueyja! ¡Elinyajaoc sat Babilonia apnaycamcaclha apquilmomap, elvomsap tap tingma Sión! Naso coo sicpayvam sicvisay Dios — alhta aptomjac.
8-9 Eyapajasquic alhta Visqui apyimtalhnamo olngacsic amyaa nipyesicsa enlhitaoc lhalhma anco: Quellhip apquilinmelhaycam enaymacoc judíos, colhojoc sat selticpaycam ejatic coo. Coo sat olnapoc as enlhitaoc, elmacpoc sat nipyesicsa apquiltimesaycam siclho — alhta aptomjac. Colhic sat ayaco Visqui apyimtalhnamo. Elyasingvomoc sat quellhip seyapajascama Visqui nipyesicsa quellhip.
10 Mocjam Visqui ingac appayvam: ¡Elitsovacsojo quellhip co Jerusalén, colpayjiclha apquilvalhoc! Olhic sat nipyesicsa quellhip — alhta aptomjac. 11 Cotnejic sat nalhit acnim, yoyam elyanmongsic apquilvalhoc enlhit appintalhnama. Etnejic sat appayvam: Otnejic sat enaymacoc as enlhitaoc. Olhic sat coo nipyesicsa quellhip — sat etnejic. Elyasingvomoc sat quellhip seyapajascama Visqui nipyesicsa quellhip. 12 Etnejic sat apquilmolhama co Juda as yoclhilhma acponquinomalhca. Jerusalén etnejic sat tingma malyacyescama Visqui ingac.
13 ¡Elvanma sat quellhip apyovoclhojo napato Dios Visqui ingac! Apquilhyacmec apmaclha acponquinomalhca, jingilyotac nincoo — nic nat aptomjac profeta.
Énxet apseykha kelyetsáteyak ekwenaqte
1 Ekwet'ak axta makham mók aqsok sélxekmósso. Ekwet'ak axta apyephagwa'a xama énxet apseykha xama kelyetsáteyak ekwenaqte. 2 Axta ektáhak sélmaxneyeyncha'a s'e: “¿Háxko apmahágkaxa'?” Tén axta aptáha seyátegmowágkokxo s'e: “Tegma apwányam Jerusalén peyk alyetsetagkok, yaqwayam enxoho ay'asagkohok apwánxa apwenaqte tén han ma'a appayhakxa nak.”
3 Tén axta sekwet'a apxega m'a Dios apchásenneykha ektáha axta sepaqhetchesso ko'o, aptekkek axta nahan apmonye' m'a pók Dios apchásenneykha apkelanyexakmo. 4 Aptáhak axta apcháneya s'e: “Yenye hana etnehek yának wokma'ák apseykha nak kelyetsáteyak ekwenaqte s'e: ‘Exnekxak sa' makham énxet ma'a Jerusalén, apxámok apagko' sa' makham etnehek énxet apheykha m'a kañe' tén han ma'a aqsok kélnaqtósso. Méko sa' katnehek kélhaxtegkesso meteymog ma'a nepyáwa'. 5 Axta eyke aptáhak Wesse' egegkok se'e: Ko'o sa' eyke atnehek meteymog kélhaxta ekho táxa, nepyáwa m'a Jerusalén, keñe sa' ma'a nepyeseksa nak tegma apwányam axekmósek seyeymáxkoho.’”
Elwagkasek sa' teyp énxet'ák apagkok ma'a Wesse' egegkok
6-7 Aptáhak axta Wesse' egegkok se'e: “Ko'o axta séxpánchesso kéxegke sélya'assama ekyókxoho yókxexma. Kaxwo', ektáhak séláneya s'e: ¡kólpekhésha kólántépok se'e apkelókxa nexcheyha nak! ¡Kólántép Babilonia, kélheykegkaxa nak kéxegke kélántekkessama, ektáha axta kélheykha m'a Sión! Ko'o sekxeyenma xa, sektáha nak Wesse'.” 8-9 Eyáphássek axta ko'o Wesse' egegkok ekha nak apyennaqte aswok se'e amya'a nak, atnehek wának énxet'ák ektáha axta apkelmenyexchesso ekyókxoho aqsok kélagkok kéxegke s'e: “Énxet apteméssesseykmoho exma ekmaso enxoho énxet'ák ahagkok, cháxa apteméssessekmoho exma ekmaso m'a aqsok sekmasmakxa ahagko' nak chá'a ko'o. Ko'o ahagko' sa' alnapaxchek xa pók aptémakxa nak chá'a énxet'ák, apkelásenneykha naqsa apagko' sa' nahan wának esawhaksohok aqsok apagkok.” Sa' etnehek exekmósek élseyéxma apagkok Wesse' egegkok ekha nak apyennaqte xa ektáha nak, keñe sa' kólya'ásegwók kéxegke aptáha seyáphasso ko'o m'a.
10 Aptáhak axta Wesse' egegkok se'e: “¡Kólmeneykmés yetlo ekpayheykekxa kélwáxok, kélheykha nak Jerusalén, hakte ekwa'akteyk ko'o yaqwayam axek kélnepyeseksa kéxegke!” 11 Temék sa' agkok xa, apxámok sa' pók aptémakxa énxet'ák elyo'ótak ma'a Wesse' egegkok. Sa' etnehek appeywa s'e: “Atnehek sa' nahan énxet'ák ahagkok xa énxet'ák nak. Keñe sa' axek chá'a ko'o kélnepyeseksa kéxegke.” Keñe sa' kólya'ásegwók kéxegke aptáha seyáphasso ko'o m'a Wesse' egegkok ekha nak apyennaqte. 12 Emekxak sa' makham Wesse' egegkok yaqwayam etnehek apagkok apagko' ma'a Judá, xapop ekpagkanamaxche. Exénekxak sa' makham Jerusalén apteme tegma apwányam apagkok apkelyéseykha.
13 ¡Kólwanmeyák sa' kélyókxoho nápaqtók Wesse' egegkok, hakte apwayak negyeseksa apkeñama m'a kañe' ekpagkanamaxchexa, aphamakxa nak chá'a!
