Sicyitquiscama actemaclha singilyimjapma
1 Quellhip elyalhinga. Apquilyasamcoc quellhip singanamaclha. Avanquic singanamaclha jingilanic yoyam ongilyejiclhojo acvamlha naysicsa ningileyvam mocjam. 2 Pac oyitsic siclho: Incaymalhquic quilvana coyipitcojo atava naysicsa acnaycam mocjam, covanquejec coyinyoc. Eycaso ayinyema singascamaclha. Apquitsepquic sat ancoc atava, comasquingvomoc sat aclhanma singanamaclha yoyam coyipitcojo. 3 Inmaclhec sat ancoc poc enlhit naysicsa apma mocjam atava, cotvacsic sat actemaclha singilyimjapma. Apquitsepquic sat ancoc atava, comasquingvomoc sat aclhanma singanamaclha, yoyam coyipitcojo. Avanquic colyimjapiclha mocjam. Cotvacsejec sat actemaclha singilyimjapma.
4 Quellhip elyalhinga. Acno najan apquiltemaclha quellhip. Malha apquilitsepmo lhama alhta quellhip Cristo. Inmasquec aclhanma singascamaclha najan singanamaclha yoyam ongilyejiclhojo. Aplhaticjangvocmec alhta Cristo nipyesicsa apquilmasquingvaycmo. Quellhip apquiltomja apquilyipitcayo, malha acno moc alyiptetaclha yoyam elanam sat Dios. 5 Ningilvajanamquic alhta nintemaclha nano. Singascamaclha actomja alhta aclhaticjascama asoc almasomcaa ingilvalhoc. Inyiplovcoc alhta ningitsepma acyanmongam ningyiplovquiscama acmasom. 6 Inmasquec aclhanma singanamaclha yoyam ongilyejiclhojo, malha ningmomalhca alhta. Ayinyemaclha ningiltomja malha ningitsepmo lhama Cristo. Ingvanquic ongilanam Dios naysicsa nintemaclha alhnancoc ayinyema Espíritu Santo. Jave yoyam ongilanam Dios naysicsa ningyiplovquiscama singanamaclha actalhesomalhca nano.
Yitnec evalhoc moyascalhma
7 Apquililtamjoc elyasamcojo quellhip: ¿Am ya cotamilo singanamaclha najan singascamaclha malha mongilyascalhma? Paj, cotnaja acmasom. Am sat ancoc coyitnac singascamaclha, movanquejec coo oyasamcojo acvisay moyascalhma. Pac oyitsic sictemaclha: Yitnec alhta actemaclha ayitsepma enquenyic. Am alhta oyasamcoc actemaclha ayitsepma enquenyic. Intomjac eyca singascamaclha: “Nocotsip nasa apnenyic” —intomjac. 8 Yejemoc alhta acyangvocmo actemaclha ayitsepma enquenyic. Elhicmosaclhec alhta moyascalhma. Moyascalhma actomja malha aclhaticjascama ayitsepma enquenyic. Mongilsilhnanalhquejec nincoo mepqui singascamaclha. Malha actiyanma intomjac moyascalhma mepqui singascamaclha. 9 Acnec alhta siclho mepqui singascamaclha. Natamin alhta acvaa singascamaclha najan singanamaclha. Yejemoc alhta aclhaticja moyascalhma evalhoc coo. Malha yoyam ongvitsapoc alhta intomjac. 10 Ayanayquic alhta coyimnaticsic enquenyic singascamaclha. Pilapcasquic alhta sicvita actomja acmascoscama sicyimnatem. 11 Incajoc alhta actemaclha evalhoc mongyascalhma. Eycaso ayinyema singascamaclha. Eyinimsam alhta moyascalhma. Malha yoyam ongvitsapoc alhta intomjac ayinyema singascamaclha.
12 Nasoc anco as amyaa. Actamila anco singanamaclha najan singascamaclha ayinyema Dios. Actomja ayalhnayo najan acpeyvomo najan altamila. 13 ¿Naso ya asoc actamila actomja acmascoscama sicyimnatem? Paj, cotnaja ayinyema asoc altamila. Moyascalhma eyca actomja acmascoscama sicyimnatem. Eycaso actomja yoyam cotalhcac actemaclha mongyascalhma actomja acmasom. Elhicmosaclhec alhta asoc actamila actemaclha moyascalhma yoyam comascocsic sicyimnatem. Elhicmosaclhec alhta singascamaclha actemaclha acmasom anco moyascalhma.
14 Ningyasamcoc nincoo, Espíritu apanco Dios nic nat inquinyemac singanamaclha najan singascamaclha. Coo eyca acyitna sictemaclha ajanco, actomja semam alhta moyascalhma malha silpilhtetomalhca. 15 Am oyasamcoc coo sictemaclha ajanco. Am oyiplovcasac mataa asoc siltamjoclha oyiplovcasojo. Acyiplovcasquic mataa asoc acmasom sictanoncama coo. 16 Acyiplovcasquic sat ancoc asoc sictanoncama coo, oyasingvoclhojoc sat actemaclha singascamaclha actomja actamila anco. 17 Jave inyicje coo sictimem ajanco asoc acmasom. Eyca ayinyemaclha moyascalhma acna evalhoc coo. 18 Acyasamcoc coo, paj lhama sictemaclha ajanco actamila. Inlhenquic inyicje evalhoc yoyam oyiplovcasojo actemaclha actamila, am eyca oyiplovcasac mataa. 19 Am oyiplovcasac mataa asoc actamila siltamjoclha oyiplovcasojo. Acyiplovcasquic mataa asoc sictanoncama coo. 20 Jave inyicje sictimem ajanco asoc acmasom. Eyca ayinyemaclha moyascalhma acna evalhoc coo actomja seyanama otnejic acmasom.
21 Eycaso sictemaclha ajanco mataa: Altamjo inyicje mataa oyiplovsic actemaclha actamila, eyca acyiplovcasquic mataa acmasom. 22 Inpayjeclhec evalhoc coo acyitna singanamaclha ayinyema Dios. 23 Acyasamcoc actemaclha anit evalhaoc coo. Lhama evalhoc acyitna actemaclha moyascalhma. Moc evalhoc acyitna singanamaclha ayinyema Dios. Acyasamcoc coo actomja actamila anco singanamaclha. Eycaso actemaclha mongyascalhma actomja ayinmelhaycam singanamaclha Dios, actomja malha alnapomalhca. Coo sictomja malha sicmomalhca yoyam olyejiclhojo actemaclha molyascalhma acyitna evalhoc coo.
24 ¡Coo layi! ¿Soc sat jevomsic tap naysicsa sictemaclha ajanco actomja seyantamayclha ningitsepmaclha? 25 Pac ontimjic gracias Dios Ingyapam. Apvamlha Dios aptomja sevomquiscama tap ayinyema Jesucristo Visqui ingac. Acyiplovcasquic evalhoc singanamaclha Dios. Acyiplovcasquic coo sictemaclha ajanco actemaclha mongyascalhma actomja semam.
Kélyetcháseykekxoho ektémakxa nak ekha entáwa'
1 Élyáxeg, kélya'ásegkók kéxegke m'a ektémakxa nak segánamakxa, kélya'ásegkók nahan segánamakxa éltémo chá'a elyahakxohok énxet, wánxa m'a apyennákxa enxoho makham. 2 Xama kelán'a apha nak atáwa', cháneymáxcheyk katnehek ekyepetcheyo m'a atáwa', cham'a apyennákxa enxoho makham, eñama éltémo m'a segánamakxa; keñe m'a apketsapa enxoho atáwa', kamaskok ekyetna m'a éltémókxa axta katnehek ma'a segánamakxa, eyánémaxche axta keypetkohok ma'a atáwa'. 3 Kelánegwokmek agkok pók énxet neyseksa apha makham atáwa', tawásegkók atáwa' élánegwokmo pók énxet; apketsekkek agkok ma'a atáwa', kamaskok ekyetna m'a éltémókxa axta katnehek ma'a segánamakxa, awanchek nahan kamekxak pók énxet meyke ektawáseykegkoho atáwa' élánegwayam pók énxet.
4 Temék nahan kéxegkáxa xa élyáxeg'a, xama axta kélyepetcheykekxo Cristo, kéletsapmók axta nahan xamo' ekmassama élma m'a segánamakxa, yaqwayam enxoho kólyepetchekxak pók, cham'a apxátekhágweykmo axta natámen apketsapma. Cháxa keñamak negkegwagko nak negko'o kaxwók anlának nentamheykha ektaqmela nápaqtók Dios xa. 5 Hakte negko'o nentémakxa axta makham mólya'assáxma, temegkek axta chá'a segánamakxa sentekkessesso m'a aqsok ekmaso negmáheyo nak anlána', nétsapmakxa axta aqsa nahan chá'a hegya'aksek ma'a aqsok nenláneykegko axta chá'a. 6 Keñe kaxwók ekmassama sẽlma m'a segánamakxa, ektéma máxa néletsapma. Méko kaxwók hẽlya'ashaxma yaqwayam agyetláwha m'a Dios axnagkok nentémakxa eñama nak Espíritu, háwe m'a nentémakxa axta chá'a nano', nélyaheykekxoho axta chá'a m'a nanók eknaqtáxésamaxche nak segánamakxa.
Mólya'assáxma ekyetna nak ko'o
7 ¿Anxéneya sa' segánamakxa ekteme mólya'assáxma? ¡Ma', mantéhek sa'! Kaxtemék axta megkatne segánamakxa xa, may'asagkek axta ko'o m'a mólya'assáxma. May'asagkek ahagko' axta nahan ko'o étsapma nak egnények aqsok, megkatnama enxoho ekpeywa segánamakxa s'e: “Nágkatsep aqsa apnények aqsok.” 8 Meykha axta eyke mólya'assáxma xa éltémókxa nak antéhek segánamakxa, chásenneykekxeyk axta éltémókxa nak antéhek segánamakxa setekkessessama ko'o sekmáheyo alának ma'a ekyókxoho mók ektémakxa nak chá'a aqsok ekmaso. Hakte méko agkok segánamakxa, yawanchek kalának aqsok ma'a mólya'assáxma. 9 Ekhegkek axta aqsa ko'o m'a may'áseykegkaxa axta segánamakxa, cham'a meykexa axta segánamakxa; xama axta ekwaya m'a éltémókxa nak antéhek segánamakxa, xátekhassegkek axta m'a mólya'assáxma, 10 keñe ko'o sétsapma, keñe m'a éltémókxa nak antéhek segánamakxa, yaqwayam axta eykhe ko'o hegkések sekyennaqte, sey'assama m'a nétsapmakxa, 11 hakte meykha axta mólya'assáxma m'a éltémókxa nak antéhek segánamakxa, élyexancheseykha axta nahan, axta anhan seyaqhe ko'o xa éltémókxa nak antéhek segánamakxa.
12 Egwanchek negko'o anxének segánamakxa agko' nak ekteme ektaqmalma, tén han éltémókxa nak antéhek ekteme ektaqmalma, ekpéwomo, tén han meyke ektémakxa. 13 ¿Keya axta ko'o sey'asso nétsapmakxa xa ektaqmalma nak? ¡Ma', háwe'! Mólya'assáxma axta eyke keñamak ekmáheyo kaxekmósek ekteme ekmámnaqsoho mólya'assáxma, seyaqhama ko'o eyásenneykekxo m'a aqsok ektaqmela nak. Cháxa ektémakxa axta ekwetamaxko ekteme ekmaso agko' ma'a mólya'assáxma, eñama eyásenneykekxa m'a éltémókxa nak antéhek segánamakxa.
14 Negya'ásegkók negko'o segánamakxa ekteme eñama m'a Dios, ekyelqáxkók eyke ko'o, ekmeyásamáxkók ahagko' mólya'assáxma yaqwayam katnehek máxa eyásenneykha. 15 May'asagkek chá'a ko'o m'a aqsok sélanakxa enxoho chá'a, hakte malaneyk chá'a ko'o m'a aqsok sekmáheyo nak chá'a alána', wánxa aqsa chá'a alának ma'a aqsok sektaqnagkamakxa nak chá'a. 16 Élanak agkok ko'o m'a aqsok mamáheyo nak alána', eykpelchágwók chá'a ko'o ektáha ektaqmela m'a segánamakxa nak eñama sélane xa. 17 Háwe chá'a ko'o sélane xa, akke m'a mólya'assáxma ekyetnama nak ko'o. 18 Ekya'ásegkók ko'o megkeytnama aqsok ektaqmela xama enxoho, cham'a sektémakxa nak ko'o; émenyeyk eykhe chá'a ko'o alának aqsok ektaqmela, mowanchek eyke alána'. 19 Malaneyk chá'a ko'o aqsok ektaqmela sekmáheyo enxoho chá'a alána', wánxa chá'a m'a aqsok ekmaso mamáheyo nak eykhe chá'a alána'. 20 Élanak agkok chá'a ko'o m'a aqsok mamáheyo nak eykhe chá'a alána', háwe chá'a ko'o sélane xa, akke m'a mólya'assáxma ekyetna nak ko'o.
21 Eykpelkohok eykhe chá'a ko'o amáwhok alának ma'a aqsok éltaqmela, wánxa aqsa chá'a ko'o sekmowagko alának ma'a aqsok ekmaso nak. 22 Amenyeyk chá'a ko'o ewáxok ma'a Dios segánamakxa apagkok nak, 23 ekweteyak eyke chá'a ko'o ekyetnama ewáxok ma'a aqsok énmexma nak chá'a m'a ektémakxa nak ekpaqméteykha ewáxok: cham'a éltémókxa nak antéhek mólya'assáxma ekyetnama nak ko'o, semoma nak.
24 ¡Eyóse nak la'a ko'o! ¿Yaqsa sa' hemallahanchesek ko'o nétsapma ekmowána, ekyetnama nak sekyókxa? 25 Wánxa m'a Dios, sekméssama nak ko'o ekxeyenma ewáxok eñama Wesse' egegkok Jesucristo. Cháxa keñamak, ekya'áseykegkoho nak ko'o ewáxok eyéméxko alyahakxohok agko' ma'a apkeltémókxa nak antéhek Dios, sektémakxa ahagko' eyke ko'o keñamak séláneya chá'a m'a éltémókxa nak antéhek mólya'assáxma.
