Singyicpilquemo Dios
1 Gracias lhip Dios Visqui ingac.
Gracias ningiltomjac nincoo.
Ninlingasquic nincoo lhip aptamjaycam simpilapquiscama.
2 Aptomjac nic nat Visqui ingac:
—Otingyac sat lhama acnim.
Olyicpilcojoc sat enlhitaoc naysicsa sictemaclha sicpeyvomo sicvisay Dios.
3 Coyovjam sat as nalhpop najan apyovoclhojo enlhitaoc.
Coo eyca oyimnaticsojoc as nalhpop ayinyema sicmovan— nic nat aptomjac.
4 Actomjac coo silanya apquilyasquiyam najan apquilmapsomcaa:
—Noelyimtalhnesacpojo apanco naysicsa ayajamalhco apquilvalhoc.
5 Noeltimesap apanco apquilyimnatem.
Noellhamasap nasa quellhip — nic nat aptomjac.
6 Am conyemac mataa singilpasmom actiyapmaclha acnim.
Am conyemac mataa actalhningvamlha acnim.
Najan piyam yoclhilhma actamopeycaoc.
7 Dios apvamlha pac lhama singyicpilquemo:
Colhic sat ayaco napocja enlhit, elvennacpoc sat poc.
8 Apmaycam Visqui ingac ingjaycoc aclaneyo ayingmenic.
Acvisay uva ayingmenic ayincajay panatem acyimnatem.
Ingyanic sat elyinamcoc apyovoclhojo apquilmapsomcaa as nalhpop.
Elsavojoc sat apyinaycaoc.
Coyamasalhcac sat mataa ingjaycoc (singajem).
9 Olngacsic sat mataa apvisay Visqui apancaoc Israel apquilmolhama.
Otnejic sat siyayo naysicsa sicminaycmascama.
10 Enatovacsic sat apquilmapsomcaa naysicsa apquilyimtalhnesomacpo apanco.
Eyimnaticsic sat apvita inlhojo enlhitaoc apquilpeyvomo.
Dios apteme segyekpelchémo
1 Oh Dios,
negméssek negko'o exchep
ekxeyenma egwáxok,
negméssek ekxeyenma egwáxok;
negwóneyha apwesey,
negmeneykmássessek han
ma'a aqsok éltaqmela apkelane.
2 Aptáhak Wesse' egegkok se'e:
“Élyesáha sa' agkok
ko'o xama ekhem,
alyekpelkohok sa' yetlo
ekpéwomo sektémakxa.
3 Yawheyha sa' agkok xapop,
yetlo m'a apyókxoho
énxet apheykha nak kañe',
eynnaqtések sa' eyke
ko'o m'a awhak nak.”
4 Ektáhak ko'o séláneya m'a
apkelásennamap nak chá'a:
“Nágkólxénmakha kéltémakxa”
keñe sektáha séláneya m'a
élmasagcha'a nak apkeltémakxa:
“nágkóleyxkoho;
5 nágkólxénmakha kélyennaqte,
nágkólteme megkeyxnegwayam
kélpaqmeyesma kélpaqmeta enxoho.”
6 Hakte megkañamak
nélyekpelchamáxkoho m'a
ekteyapmakxa nak ekhem
tén han ma'a taxnegwánxa ekhem,
tén han ma'a
meykexa nak énxet,
tén han ma'a élámhakxa nak
meteymog élwenaqte,
7 Dios akke apteme
segyekpelchémo:
mékoho chá'a
etnessásekxa nápakha,
keñe chá'a pók
elya'ásekxak néten.
8 Apmeykha
Wesse' egegkok ma'a
apyeta nak aplo,
vino kélencheheykekxa
nak ma'a aqsok
égmenek kéltahakkasso.
Apyegkenchek sa'
agkok ma'a vino,
émaksohok sa' énagkok
ma'a apyókxoho
élmasagcha'a nak apkeltémakxa
apheykha nak keso náxop.
9 Keñe sa' chá'a
ko'o axének ma'a
Jacob nak Dios apagkok,
anneykmássesek sa'
han chá'a alpeykesho';
10 hakte emasséssessók sa'
ektémakxa nak apkeleymákpoho m'a
élmasagcha'a nak apkeltémakxa,
eyánchessessamhok sa'
eyke apmopwána m'a énxet
ektaqmalma nak aptémakxa.
