Singmasma Visqui ingac
1 Visqui ingac.
Actimec coo siyayo lhip aptomja semasma coo.
Apmiyovquic alhta lhip apquiltemaclha selinmelhaycam cotnaja ingmoc.
2 Dios Visqui ajac.
Apjalhnoc alhta lhip silmalhnancama.
Lhip alhta setamilquisquiyam.
3 Dios Visqui ajac.
Lhip alhta aptajescama sicvanmoncama naysicsa siyitsepma.
Ayitsepquic alhta coo.
Lhip ayinyema apyimnatescama enquenyic.
4 Quellhip apquilyiplovquiscama Visqui ingac.
Eltime apquilayo naysicsa apquilminaycmascama.
Eltime apquilayo apvisay apanco actamila.
5 Acyavataclhojo mataa onlingamcojo aplom Visqui ingac.
Ajolhec mataa singasicjayo cotningvoyam nelha.
Yitnec ningvinama alhtaa.
Coyiplovjoc mataa acpayjayclha ingvalhoc alhtoo ninlhaticjay.
6 Inquitamquic alhta evalhoc:
—Mosilhnanalhquejec sat mataa coo — alhta intomjac evalhoc.
7 Visqui ajac.
Aptasic mataa lhip aptomja seyimnatescama.
Eyinyovquic alhta siclho, yiplovcoc acyivey ayay evalhoc.
8 Ayevam alhta lhip Visqui ajac, sictomja siyanya lhip:
9 —¿Tasi ya ongvitsapoc coo ongvatoynalhcac sat coo?
¿So actomja yi?
Colhejec sat ayaco lhip ayinyema lhopactic.
Cotnaja aclingascama lhopactic lhip apvisay — alhta actomjac coo.
10 Visqui ajac.
Ingyeylhojo silmalhnancama, jepasim coo.
11 Apvitac alhta lhip acmayovsa evalhoc.
Yiplovcoc acyivey siyitsovascama.
Apmascosquic lhip acmayovsa evalhoc.
Aptimescasquic lhip siyitsovascama, malha fiesta intomjac.
12 Otnejic sat siyayo lhip Dios Visqui ajac, siclingascama lhip apvisay.
Otnejic sat siyayo lhip naysicsa sicminaycmascama.
Sictomja gracias lhip cotmongvoycamlha nelha.
Negmésso ekxeyenma egwáxok Wesse' egegkok
1 Wesse',
ekteméssessek ko'o
exchep apcheymákpoho,
hakte emallahanchessek
ko'o exchep aqsok ekmaso,
megyahayók hésmaksek
ma'a sélenmexma nak.
2 Dios Wesse' ahagkok,
élmaxnakkek axta
exchep séltamho hepasmok,
tén setaqmelchessekmo han;
3 xép Wesse',
ewagkassek axta teyp
keto' sétsapmakxa',
egkeyásekxeyk axta sekyennaqte,
emallahanchessek axta
m'a nétsapmakxa nak.
4 Kéxegke
megkólyenseyam nak
Wesse' egegkok,
¡kólmeneykmásses
negmeneykmasso!
¡kólpeykesho m'a apwesey
ekpagkanamaxche nak!
5 Hakte megkawegqók
chá'a aplo m'a,
megkamassegwomek
eyke m'a ektaqmeleykha nak
chá'a apwáxok henlano'.
Nenlekxagweyha
agkok chá'a axta'a,
keñe axto'ók chá'a
kapayhekxak egwáxok.
6 Tásek axta ko'o sekha,
keñe ektéma ewáxok se'e:
“Méko kawának ko'o hetegkesek.”
7 Wesse', xép nak
axta eyke ekhel'a
sexnésseyam ma'a
ektaqmelakxa nak,
eñama ektaqmeleykha
apwáxok sélányo,
xama axta mehepasma,
axta hey'assásegkok
sektáhakxa m'a seyeye.
8 Wesse',
ekwóneyha ko'o exchep;
élmaxnakkek ko'o exchep:
9 ¿Yaqsa kataksek
xép sétsapa enxoho,
sélsawa enxoho
m'a takhaxpop?
¡Yawanchek xép
kalpeykeshok ma'a
ektamheykekxa nak xapop,
tén han kaxének ma'a
ektémakxa nak xép
mehenyenyaweykha!
10 Wesse', heyeyxho ko'o,
kapyósho hélano';
Wesse', ¡hepásem!
11 Seknéweykha
aptemessásekxak
ma'a sélekxagweykha,
apmasséssek ko'o
sélapwayam,
etaxneyásekxeyk
sélnáxegkáseyncha'a m'a
apáwa apkeltaqmalma.
12 Dios Wesse' ahagkok,
¡cháxa keñamak peya
nak anneykmássesek
negmeneykmasso,
tén han agkések chá'a
ekxeyenma ewáxok,
mowanchek awanma' aqsa!
