Dios aptomja apyimtalhnamo
1 Netin actomja sinlhicmoscama actemaclha apyimtalhnamo Dios.
Apyov'a apquiltomja sinlhicmoscama actemaclha apquilantipquiscama nic nat Dios.
2 Inlingalhquic mataa as amyaa acyovoclhojo acnim cotmongvoycamlha nelha.
Inlingalhquic mataa as amyaa acyovoclhojo alhtaa cotmongvoycamlha nelha.
3 Colhejec mataa acyascacmo as amyaa sinlhicmoscama netin.
Apquilyasamcoc mataa aplhamoclhojo enlhitaoc.
4 Inlingalhquic lhalhma anco as amyaa.
Inlingalhquic appayvam actomjaclha nelha lhop.
Appiquinquic nic nat Dios acyitnamaclha acnim.
5 Intipquic mataa acnim, malha quilvana acponquinomalhca actiyapma tingma ac.
Inquitsovasoc mataa, malha quilvana acyimnatem acyiplayclha amay ac.
6 Lhama nicja actomja actiyapmaclha mataa acnim.
Moc nicja actomja actalhningvayclhilha mataa acnim.
Covanquejec mataa lhama asoc coyilhanmoc naysicsa acmelhanma acnim.
7 Actamila anco singanamaclha Dios appayvam.
Actomja acpayesayclha ingvalhoc.
Mepqui apyeycajascama alhanma Dios.
Aptomja apyascasingvoyam enlhit meyascamco.
8 Inpeyvoc anco singanamaclha Dios appayvam.
Actomja acpayesayclha ingvalhoc.
Mepqui lhama asoc acyipitcay singanamaclha.
Sintimesquiscama yoyam ongvitac nintemaclha actamila.
9 Intasic anco actemaclha ningayo Visqui ingac.
Cotningvomejec sat nelha.
Inpeyvoc anco actemaclha apyicpilquemo Visqui.
Nasoc anco mataa apyicpilquemo.
10 Acmam anco ingvalhoc Dios appayvam, am colhnoc oro asoc alyinmom, najan asoc ayitcoc oro alyinmom.
Atsic anco, am colhnoc yovjan, am colhnoc yamyovjene apyingmenic.
11 Coo sictomja silancam lhip.
Lhip appayvam actomja seyascasingvoyam.
Ningvitac mataa acyanmongam ningiltomja ningyiplovquiscama.
12 ¿Ningyasamco ya acvamlha ningilsilhnanomalhca inganco?
Lhip Dios Visqui ingac, isavojo emascocsic actemaclha sicsilhnanomalhca ajanco.
13 Coo sictomja silancam lhip. Nongyane nasa olyejiclhojo apquiltomja apquilyimtalhnesomap apanco.
Otnejic sat sicpeyvomo najan mepqui sicsilhnanomalhca ajanco.
14 Ilyejiclhojo sat lhip actomjaclha sicpayvam najan actemaclha aclhanma evalhoc lhip.
Visqui ingac, cayjec anco siyinmamcaclha lhip setnimquiscama.
Lhip aptomja semasma coo.
Aqsok apkelane Dios senxekmósso apcheymákpoho
1 Néten senxekmósso negko'o
Dios apcheymákpoho,
yaphope ekyápaqmate
séltennasso m'a
aqsok apkelane nak.
2 Kaltennasha chá'a
mók ma'a ekhem;
kaxénekxohok chá'a
axta'a kaltennasha
m'a mók axta'a.
3 Manlegyek eykhe
m'a élpeywa nak,
manlegyek eykhe m'a
ektáhakxa enxoho,
4 kasawhekxohok
eyke ekyókxoho
nélwanmeygkaxa
m'a élpeywa,
ekweykmoho m'a néxa
xóp nak nélwanmeygkaxa.
Cha'a appekkenchessamakxa
Dios ekyetnamakxa ekhem ma'a,
5 cha'a ekteyapmakxa chá'a
katnehek ma'a ektémól'a
kaxwe élyamhopma
etyapok ma'a apteyenmakxa',
ekpayheykekxohol'a
apwáxok yenyehekxak makham,
aptémól'a m'a
apkelteyásamákpohol'a chá'a.
6 Katyapok chá'a ekhem
xama nekha yaphope,
kayeyhekxak chá'a
kataxnegwakxak ma'a
mók nekha nak,
méko han xama enxoho
awanchek keyxánegkesek
ma'a ekmexanma.
7 Péwók han ma'a
Wesse' egegkok nak
nélxekmowásamáxche apagkok,
hakte hegmeyásekxohok chá'a
axnagkok negyennaqte.
Mogwanchek agya'ássók
ma'a apkeltémókxa nak
antéhek Wesse' egegkok,
hakte kagkéshok chá'a
apmopwána aqsok ma'a
énxet meyke nak apya'áseyak.
8 Kelpéwók ma'a
apchánamakxa nak
antéhek Wesse' egegkok,
hakte hegméshok chá'a
ekpayheykekxa egwáxok.
Cháxña'awók agko'
ma'a apkeltémókxa nak
antéhek Wesse' egegkok,
hegya'assásegwók chá'a.
9 Tásek ma'a negáyo
nak Wesse' egegkok,
megkamassegwomek han.
Ekmámnaqsoho agko'
nahan ma'a apchánamakxa
nak antéhek Wesse' egegkok,
kelpéwók ma'a ekyókxoho nak,
10 ¡kélmenyeyk agko' han,
yeykhágweykmók ma'a
ektémakxa nak
kélmámenyého sawo
ekyátekto ekmomnáwa
ektaqmalma!
¡atsók agko' han,
yeykhágweykmók ma'a
ektémakxa nak ekmátsa
yányawhéna' apyegmenek!
11 Ko'o han senókáseykha,
sektáha nak xép apkeláneykha,
awanchek han hempasmok
nélyahákxoho enxoho.
12 ¿Yaqsa awanchek
kay'ásegwakxohok
aqsok megqakhémo?
¡Wesse', ná eyaqmagkásekxa
aqsok magwaqhémo
neyseksa may'áseyak!
13 Heyenyókas
eyeymáxkoho ewáxok
ko'o sektáha nak
xép apkeláneykha;
nágyoho hemok
ma'a ektémakxa nak
eyeymáxkoho egwáxok.
Keñe sa' ko'o
atnehek énxet meyke
ekmaso aptémakxa;
kamaskok sa' sekteme
ekyawe may'assáxma.
14 Oh Wesse',
apteme nak sekyexanmo,
tén han sewagkasso teyp,
ema sa' yetlo
ektaqmeleykha
apwáxok sekpeywa
tén han élchetámeykha ewáxok.
