Mepqui ayajamalhco ingvalhoc
1 Mepqui ayajamalhco ingvalhoc
Quellhip apquiltimesaycam Visqui ingac.
Eltime sat apquilayo apvisay apanco.
2 Mayayo apvisay Visqui ingac quilhvo nac jay najan cotmongvoycamlha nelha.
3 Mayayo apvisay Visqui ingac actiyapmaclha acnim acvaycmo actalhningvamlha acnim.
4 Apyimtalhnamo apanco Visqui ingac nipyesicsa enlhitaoc.
Gloria mayayo netin maa.
5 Mepqui poc apyitsomacpo Dios Visqui ingac, apmaclha netin maa.
6 Apquilanoc mataa esovjam asoc maa netin najan as nalhpop.
7 Aptomja aptamilquisquiyam melyimnatem, najan apcamliyam enlhit mepqui asoc.
8 Apnescaclhec mocjam aptamalviyam apnaclha ningayo, yoyam elhojoc lhama apnaymacoc.
9 Apmascosquic actomjaclha cotay ayitco quilvana.
Cotniclhac sat mocjam nalava.
Copayjiclhac sat avalhoc congne tingma ac.
Innec ayaco Visqui ingac.
Ektaqmeleykha nempeywa anxének Wesse' egegkok eñama ektaqmalma apwáxok
1 ¡Aleluya!
¡Kólpeykesho chá'a
apwesey Wesse' egegkok!
kéxegke apkeláneykha nak.
2 ¡Tásek sa' chá'a
katnehek ekxénamaxche
Wesse' egegkok apwesey,
kaxwo' nak, tén han
megkatnégwayam néxa!
3 ¡Kólpeykeshok sa'
chá'a Wesse' egegkok
apwesey eyeynamo m'a
teyapmakxa ekhem,
ekweykekxoho m'a
taxnegwánxa ekhem!
4 Wesse' egegkok
apteme néten agko'
nepyeseksa m'a
apyókxoho énxet'ák;
¡yetnegkek apcheymákpoho
m'a teyp yaphope nak!
5 Méko ekhawo m'a
Dios, Wesse' egegkok,
aptéma nak
Wesse' apwányam
ma'a aphakxa nak néten;
6 yaháxek eyke chá'a
yenmexentámhok
elanok yaphope,
tén han náxop.
7 Yempásekxak chá'a
Wesse' egegkok
náxop ma'a meyke
nak aqsok apagkok,
etekkesek chá'a
aphamakxa ekmaso
m'a ekhakxa nak chá'a
eyéméxchexa aqsok,
8 exnéssekxak ma'a
nepyeseksa nak
énxet ekha kéláyo,
cham'a nepyeseksa
nak énxet'ák apagkok
ekha kéláyo.
9 Epeykessásekxak
chá'a awáxok kelán'a
megkate nak étchek
egkések étche,
tén han egkések chá'a
axagkok agkok agko'.
¡Aleluya!
