Apquilvisay apnaycam tingma Jerusalén
(1~Cr 9.1-34)1 Apquilnaclhec alhta tingma Jerusalén apquilviscaa actomja apquilaoclha. Apquilmec alhta sicas, elyasamcojo israelita, yoyam elhic tingma Jerusalén. Moclhama diez familias apquilmolhama epalhavomoc sat mataa lhama familia apquilmolhama tingma Jerusalén, nueve familias apquilmolhama elhnam sat aldeas amyip. 2 Apquilmalhnescasquic alhta apnaymacoc, yoyam elhnam tingma Jerusalén.
3 Apnam alhta poc tingma apquilvanyam yoclhilhma Judá israelitas, najan sacerdotes, najan levitas, najan apquiltimesaycam tingma apponquinomap najan aptovana niptamin apquiltimesaycam nat apvisqui Salomón. Yitnec mataa tingma apancaoc nipyesicsa co Jerusalén. Eycaso alhta apquilvisay apquilviscaa apnaycam tingma Jerusalén.
4 Apquilmolhama Judá alhta: Ataías, apyap ninga Uzías, apyap ninga Zacarías, apyap ninga Amarías, apyap ninga Sefatías, apyap ninga Mahalaleel, apquilyeyjamcaa Fares. 5 Maasías, apyap ninga Baruc, apyap ninga Colhoze, apyap ninga Hazaías, apyap ninga Adías, apyap ninga Joiarib, apyap ninga Zacarías, apyap ninga Siloni. 6 Fares aptovana niptamin apnaycam tingma Jerusalén apyovoclhojo cuatrocientos sesenta y ocho, enlhit acma apquilmaycam alhta.
7 Apquilmolhama Benjamín alhta: Salú, apyap ninga Mesulam, apyap ninga Joed, apyap ninga Pedaías, apyap ninga Colaías, apyap ninga Maasías, apyap ninga Itiel, apyap ninga Jesaías. 8 Najan apquilyalhing Gabai najan Salai. Apyovoclhojo alhta: novecientos veintiocho. 9 Apvisqui alhta Joel, Zicri apquitca. Najan Judá, Senúa apquitca, yatapvisqui alhta tingma apvanyam.
10 Apquilmolhama alhta sacerdotes: Jedaías, apyap ninga Joiarib apquilyeyjamcaa Jaquin. 11 Najan Seraías, apyap ninga Hilcías, apyap ninga Mesulam, apyap ninga Sadoc, apyap ninga Meraiot, apyap ninga Ahitob, apvisqui nic nat tingma apponquinomap. 12 Najan apnaymacoc apquiltimesaycam tingma apponquinomap apyovoclhojo ochocientos veintidós. Najan Adaías, apyap ninga Jeroham, apyap ninga Pelalías, apyap ninga Amsi, apyap ninga Zacarías, apyap ninga Pasur, apyap ninga Malquías. 13 Apyovoclhojo apuilmolhama ilhnic nat doscientos cuarenta y dos. Najan Amasai, apyap ninga Azareel, apyap ninga Azaí, apyap ninga Mesilemot, apyap ninga Imer. 14 Apquilmolhama ilhnic nat enlhit acma apquilmaycam ciento veintiocho enlhit, apvisqui maa Zabdiel, Gedolim apquitca.
15 Apquilmolhama alhta levitas: Semaías, apyap ninga Hasub, apyap ninga Azricam, apyap ninga Hasabías, apyap ninga Buni. 16 Yatapquilviscaa Sabetai najan Jozabad nipyesicsa apquiltimesaycam maa, jave tingma apponquinomap. 17 Matanías, apyap ninga Micaía, apyap ninga Zabdi, apyap ninga Asaf, aptomja aplhinquiscama coro. Apquilminaycmasquic alhta naysicsa apquillmalhnancama actemaclha apquilayo Dios. Bacbuquías, aptiyam apmamyi apyalhing najan Abda, apyap ninga Samúa, apyap ninga Galal, apyap ninga Jedutún. 18 Apyovoclhojo alhta apquilmolhama doscientos ochenta y cuatro.
19 Apquiltamilquiscama tingma apatong: Acub, Talmón, najan apquilmolhama apyovoclhojo ciento setenta y dos.
20 Poc apnaymacoc israelita najan poc sacerdotes najan levitas apnam tingma apancaoc yoclhilhma Judá. 21 Apnam alhta payjoc Ofel apquiltimesaycam tingma apponquinomap, apquilimja apmamyi alhta Ziha najan Gispa.
22 Levitas apvisqui apancaoc tingma Jerusalén alhta Uzi, apyap ninga Bani, apyap ninga Hasabías, apyap ninga Matanías, apyap ninga Micaía, aptovana niptamin Asaf, apquillhinquiscama apquilminaycmascama tingma apponquinomap. 23 Eycaso alhta apcanama apvisqui rey, yavamlha eltimjic apquilminaycmascama. 24 Aplhalhma apvisqui rey alhta Petaías, apyap ninga Mesezabeel, apyeyjamcaa ilhnic nat Zera, apyap ninga Judá.
Tingma apancaoc yoclhilhma
25 Apnam alhta napocja apquilmolhama tribu Judá payjoc Quiriat-arba, Dibón, Jecabseel, 26 Josué, Molada, Bet-pelet, 27 Hazar-sual, Beerseba, 28 Siclag, Mecona, 29 En-rimón, Zora, Jarmut, 30 Zanoa, Adulam, Laquis najan Azeca, apnam natingma amyip. Apquiltomjayclho alhta apquilyimnatem ayenmo Beerseba acvaycmo alvata Hinom. 31 Apquilnaclhec alhta apquilmolhama Benjamín payjoc Geba, Micmas, Aía, Betel, najan tingma nipyava maa. 32 Najan payjoc Anatot, Nob, Ananías, 33 Hazor, Ramá, Gitaim, 34 Hadid, Seboim, Nebalat, 35 Lod, Ono, najan alvata Artesanos. 36 Apquillhocac alhta amyipayc napocja levitas yoclhilhma apquileyvomaclha Judá najan Benjamín.
Énxet'ák apheykha nak Jerusalén
(1 Cr 9.1-34)1 Apkelhakmek axta Jerusalén ma'a apkelámha apmonye'e nak chá'a nepyeseksa énxet'ák; keñe axta m'a nápakha apkeleymomap axta aptawásegko chá'a xama aqsok, yaqwayam enxoho elhók chá'a Jerusalén xama nepyeseksa m'a diez énxet'ák, cham'a tegma apwányam appagkanamap nak, keñe sa' ma'a pók apkeleymomap nak nueve, elhók chá'a mók apheykegkaxa nak chá'a énxet. 2 Tén axta énxet'ák apkeltamho kataqmelhok chá'a apheykha apyókxoho, apmáheyo apagko' nak chá'a elhók ma'a Jerusalén.
3 Keso apkelámha apmonye'e apkelhayam axta m'a Jerusalén. Apkelhakmek axta israelitas ma'a tegma apkelyawe nak Judá, apkelmaxnéssesso Dios énxet'ák apagkok, levitas, tén han apkeltamheykha nak chá'a tegma appagkanamap, tén han ma'a Salomón apkeláneykha aptawán'ák neptámen axta, apagkok apagko' axta chá'a xama apheykegkaxa tén han xapop apagkok.
4 Keso nápakha axta Judá énxet'ák apagkok, tén han Benjamín, apkelhayam ma'a Jerusalén, Judá axta énxet'ák apagkok: Ataías, Ozías axta apketche, cham'a Ozías, Zacarías axta apketche, Amarías axta apketche, cham'a Amarías, Sefatías axta apketche, Mahalalel axta apketche, Fares axta aptáwen neptámen; 5 Tén han Maaseías, Baruc axta apketche, cham'a Baruc, Colhozé axta apketche, Hazaías axta apketche, cham'a Hazaías, Adías axta apketche, Joiarib axta apketche, cham'a Joiarib, Zacarías axta apketche, Siloní axta apketche. 6 Cuatrocientos sesenta y ocho axta apyókxoho Fares aptawán'ák neptámen apkelhayam ma'a Jerusalén, apyókxoho axta m'a kempakhakma yapmeyk.
7 Keñe axta Benjamín énxet'ák apagkok se'e: Salú, Mesulam axta apketche, cham'a Mesulam, Joed axta apketche, Pedaías axta apketche, cham'a Pedaías, Colaías axta apketche, Maaseías axta apketche, cham'a Maaseías, Itiel axta apketche, Isaías axta apketche; 8 tén han ma'a apkelyáxeg'a, cham'a Gabai, tén han Salai. Novecientos veintiocho axta apyókxoho. 9 Joel axta eyke apkemha apmonye' apagkok, Zicrí axta apketche; tén han Judá, Senuá axta apketche, apteme axta pók apkemha apmonye' m'a tegma apwányam, aptétéyak axta m'a Joel.
10 Keñe axta apkelmaxnéssesso Dios énxet'ák apagkok se'e: Jedaías, Joiarib axta apketche, Jaquín, 11 tén han Seraías, Hilquías axta apketche, cham'a Hilquías, Mesulam axta apketche, Sadoc axta apketche, cham'a Sadoc, Meraiot axta apketche, Ahitub axta apketche, apkemha apmonye' apagko' axta m'a Dios nak tegma appagkanamap apagkok. 12 Tén han ma'a apkelxegexma'a nak apkeltamheykha axta chá'a m'a tegma appagkanamap, ochocientos veintidós axta apyókxoho; tén han Adaías, Jeroham axta apketche, cham'a Jeroham, Pelalías axta apketche, Amsí axta apketche, cham'a Amsí, Zacarías axta apketche, Pashur axta apketche, cham'a Pashur, Malquías axta apketche. 13 Doscientos cuarenta y dos axta apyókxoho apnámakkok, tén han apkelámha apmonye'e nak chá'a nepyeseksa apnámakkok; tén han ma'a Amasai, Azarel axta apketche, cham'a Azarel, Ahzai axta apketche, Mesilemot axta apketche, cham'a Mesilemmot, Imer axta apketche. 14 Ciento veintiocho axta apyókxoho apnámakkok, aptamhéyak axta kempakhakma yapmeyk, Zabdel axta eyke apkemha apmonye' apagkok, Guedolim axta apketche.
15 Keñe axta levitas se'e: Semaías, Hasub axta apketche, cham'a Hasub, Azricam axta apketche, cham'a Azricam, Hasabías axta apketche, Binuy axta apketche; 16 Sabtai tén han Jozabad, aptamhéyak axta apkelámha apmonye'e apagkok ma'a levitas, apxegkesso axta chá'a apkeltamheykha m'a yókxexma nak Dios tegma appagkanamap apagkok; 17 Matanías, Micaías axta apketche, cham'a Micaías, Zabdí axta apketche, Asaf axta apketche, cham'a Asaf apkemha apmonye' axta chá'a apkelmeneykmasso, apkelmeneykmassamo axta chá'a m'a nélpeykessamo nak, tén han ma'a negmésso nak ekxeyenma egwáxok Dios, cham'a neyseksa ektamhomaxche chá'a nempeywa nélmaxnagko; tén han Bacbuquías, apteme axta pók apnámakkok tén han Abdá, Samúa axta apketche, cham'a Samúa, Galal axta apketche, Jedutún axta apketche. 18 Doscientos ochenta y cuatro axta apyókxoho levitas apkelheykekxa m'a tegma apwányam appagkanamap nak.
19 Keñe axta apkeltaqmelchesso átog se'e: Acub, Talmón, tén han apnámakkok nak, apkelhaxneykha axta chá'a m'a atña'ák nak, ciento setenta y dos axta apyókxoho.
20 Keñe axta m'a apyókxoho énxet'ák nak Israel, tén han ma'a apkeleymomap nak apkelmaxnéssesso Dios énxet'ák apagkok, tén han levitas apkelhakmo chá'a m'a mók yókxexma nak Judá, apagkok apagko' axta chá'a xapop apagkok; 21 Keñe axta apkelheykmo Ofel ma'a apkeltamheykha nak chá'a tegma appagkanamap, apteme axta apkelámha apmonye'e m'a Sihá tén han Guispá.
22 Uzí axta apteme apkemha apmonye' levitas ma'a Jerusalén, Baní axta apketche, cham'a Baní, Hasabías axta apketche, Matanías axta apketche, cham'a Matanías, Micaías axta apketche, Asaf axta aptawán'ák neptámen, apxegkesso axta chá'a negmeneykmasso m'a Dios tegma appagkanamap apagkok, 23 hakte wesse' apwányam axta apmésso chá'a apkeltémókxa etnahagkok elanagkok apkeltamheykha yókxoho ekhem ma'a apkelmeneykmasso nak.
24 Petahías axta eyke apteme chá'a apkeltennáseykekxa wesse' apwányam ekyókxoho yaqwánxa enxoho elanagkok chá'a m'a énxet'ák, Mesezabel axta apketche, Zérah axta aptáwen neptámen, Judá axta apketche.
Apheykegkaxa nak chá'a énxet'ák mók yókxexma nak chá'a Jerusalén
25 Nápakha Judá énxet'ák apagkok axta han apkelheykmok ma'a Quiriat-arbá, Dibón, Jecabseel, 26 Josué, Moladá, Bet-pélet, 27 Hasar-sual, Beerseba, 28 Siclag, Meconá, 29 En-rimón, Sorá, Jarmut, 30 Zanóah, Adulam, Laquis, tén han Azecá, yetlo m'a tegma apketkók aphéyak nak nepyáwa', tén han yókxexma apagkok. Apkelheykmek axta m'a Beerseba, ekweykekxoho m'a ekyapwátegweykenxa nak xapop Hinom. 31 Keñe axta Benjamín énxet'ák apagkok apkelheykmo m'a Gueba, Micmás, Aías, Betel, yetlo m'a tegma apketkók aphéyak nak nepyáwa', 32 tén han ma'a Anatot, Nob, Ananías, 33 Hasor, Ramá, Guitaim, 34 Hadid, Seboím, Nebalat, 35 Lod, Onó, tén han ma'a ekyapwátegweykenxa xapop, kéltéma nak apmopwancha'a nak chá'a Apkeláneyak Aqsok. 36 Nápakha levitas axta han kélmeyáseykegkok xapop ma'a yókxexma nak Judá, tén han ma'a Benjamín.
