Apquillhoy poc apquilmolhama
1 Apcaneclhec nic nat tingma Silo apyovoclhojo apquilmolhama israelitas. Apquillanac nic nat maa Dios tingma pac apponquinomap. Apsovjoc nic nat apquilmam yoclhilhma. 2 Apquilaymacpec nic nat siete tribus apquilmolhama israelitas mepqui apquillhoy yoclhilhma.
3 Aptomjac nic nat Josué apquilanya: —¿Co sat acvam elimpocjac quellhip yoclhilhma eltimjic apancaoc quellhip? Dios Visqui apancaoc ningilyeyjamcaa aptomja singmasma as yoclhilhma. 4 Elyacyes sat tres enlhit moclhama tribu apquilmolhama. Olapajacsic sat yoclhilhma lhalhma anco. Jeltimnasquitac sat acvamlha yoclhilhma yoyam omlascoc sat mocjam. 5 Incaymalhquic as enlhitaoc elsavojo yoclhilhma, colhic ayilhpanquisa siete yoclhilhma, ellhovamcoc apquilaymomap. Payjoc nipiyam acyitna yoclhilhma apquilmolhama Judá. Payjoc nilhqueyja acyitna yoclhihma apquilmolhama José aptovana niptamin. 6 Apquilpenasquic sat ancoc apquilyipsatem acvaycmo siete mayilhpanquiscama yoclhilhma. Jelsantimquis sat vaycajac actalhesamalhca. Otnejic sat sicmaycam actemaclha sicas napato Dios Visqui ingac. 7 Mellhovamquejec sat yoclhilhma levitas, ayinyema apquilanyomap eltimesam apquiltemaclha sacerdotes napatavo Dios Visqui ingac. Apquillhocac alhta yoclhilhma tribu apquilmolhama Gad, najan apquilmolhama Rubén, najan media tribu apquilmolhama Manasés. Nicja vatsam Jordán payjoc actiyapmaclha acnim acyitna yoclhilhma apancaoc apmescama nic nat Moisés Dios apquilancam — nic nat aptomjac Josué.
8 Apquilpecjam nic nat ellhong apquilapajasomap yoyam eltiyaningvomjo yoclhilhma. Aptomjac nic nat Josué apquilanya: —Elsavojo sat yoclhilhma, elyipsitaoc sat acvamlha nacjovayc. Elvota sat apquilpenesa inlhojo, yoyam otnejic sicmaycam sicas napato Dios Visqui ingac, quip aso tingma Silo — nic nat aptomjac.
9 Apquillhinquic nic nat lhalhma anco. Apquilyipsatamquic nic nat tingma apquilvanyam apnatalhesa siete grupos. Apquilvoctac nic nat mocjam carpa tingma Silo apnaclha Josué. 10 Apmilasquic nic nat Josué yoclhilhma actemaclha apnaycam sicas napato Dios tingma Silo. Apquillhocac nic nat apquilmolhama israelitas.
Apquillhoy apquilmolhama Benjamín
11 (Primero) Apquillhocac nic nat yoclhilhma, ayinyema apquilmaycam sicas, moclhama clanes apquilvisay apquilmolhama Benjamín. Lhama nicja acyitna yoclhilhma apancaoc apquilmolhama, moc nicja yoclhilhma apancaoc apquilmolhama aptovana José. 12 Ayenmo vatsam Jordán payjoc nilhqueyja, acyascama tingma Jericó payjoc nilhqueyja, acyascama inquilhe alvinatem, payjoc actalhningvamlha acnim acvaycmo yoclhilhma actamopeycaoc, payjoc tingma Bet-avén. 13 Acyascama tap tingma Luz (ningiltimem Betel) payjoc nipiyam. Acyascama tap tingma Atarot-adar netin inquilhe, acvaycmo tingma Bet-horón de Abajo, payjoc nipiyam. 14 Acvaycmo nelha maa yingmin acvanyam Mediterráneo, payjoc nipiyam inquilhe ningato Bet-horón, acvaycmo Quiriat-baal, moc apvisay Quiriat-jearim, actomja yoclhilhma apancaoc apquilmolhama Judá. Acvisay nic nat nicja payjoc actalhningvamlha acnim.
15 Nicja nipiyam yoclhilhma ayenmo Quiriat-jearim, acyascama payjoc actalhningvamlha acnim, acvaycmo tingma Neftoa actiyapmaclha yingmin. 16 Acyascama tap acvaycmo inquilhe payjoc ningatoc alvata Ben-hinom, payjoc alvata Refaim nilhqueyja. Acyascama tap alvata Hinom, najan maa inquilhe Jebús nipiyam (Jerusalén), acvaycmo actiyapmaclha yingmin En-rogel. 17 Intajavoc mocjam payjoc nilhqueyja En-semes acvaycmo Geliot, apyitnama ningatoc Adumin, acvaycmo Peña de Bohán Ben-Rubén. 18 Acyascama tap nilhqueyja payjoc alvata Jordán, acvaycmo vatsam Jordán. 19 Acyascama tap nilhqueyja Bet-hogla, acvaycmo nelha acyitnamaclha yingmin nicja nilhqueyja Mar Muerto, actomjaclha nelha ayinyem yingmin vatsam Jordán. Acvisay nicja yoclhilhma nipiyam.
20 Vatsam Jordán actomja nicja yoclhilhma actiyapmaclha acnim. Eycaso ilhnic nat nicja yoclhilhma apquillhoy nic nat clanes apquilmolhama Benjamín.
21 Apquillhocac nic nat tingma apquilvanyam clanes apquilmolhama Benjamín: apvisay Jericó, najan Bet-hogla, najan Emec-casis, 22 najan Bet-arabá, najan Zemaraim, najan Betel, 23 najan Avim, najan Pará, najan Ofra, 24 najan Quefar-haamoni, najan Ofni, najan Geba. Apyovoclhojo doce tingma apquilvanyam najan tingma nipyava maa. 25 Mocjam tingma Gabaón, najan Ramá, najan Beerot, 26 najan Mizpa, najan Cafira, najan Mozah, 27 najan Requem, najan Irpeel, najan Tarala, 28 najan Zela, najan Elef, najan Jebús (Jerusalén), najan Gabaa, najan Quiriat. Apyovoclhojo catorce tingma apquilvanyam najan tingma nipyava maa. Eycaso apquillhoy nic nat clanes apquilmolhama tribu Benjamín.
Pók énxet'ák Israel xapop apagkok
1 Apyókxoho israelitas axta apchaqnákxak ma'a yókxexma Siló, yaqwayam epekkenek xama kélpakxanma apchaqneykekxexa chá'a énxet'ák. Hakte sawhomaxcheyk axta ekmomaxche m'a xapop, 2 yetneyk axta eyke makham siete pók aptémakxa énxet'ák Israel melxaweykegko makham xapop apagkok.
3 Keñe axta Josué aptáha apkeláneya m'a énxet'ák Israel: “¿Yaqsa kélhaxna megkólpekhésa nak kólmok ma'a xapop kélagkok apmésso axta Wesse' egegkok, Dios apagkok axta m'a kélyapmeyk nano'? 4 Kólyésha sa' apqántánxo énxet ma'a nepyeseksa nak pók aptémakxa énxet'ák, yaqwayam sa' ko'o aláphaksek elweynchamha m'a ekyókxoho yókxexma nak, yaqwayam sa' hesantagkasek ko'o amya'a yaqwánxa katnehek kélexpánchesso. 5 Yexpánchesek sa' siete yókxexma xa énxet'ák nak, nepyeyam sa' kaphewakxak ma'a Judá xapop apagkok, keñe sa' José aptawán'ák neptámen xapop apagkok ma'a ekpayho nak nexcheyha. 6 Appenchásegkek sa' agkok apkexpánchesso siete yókxexma, tén sa' héltennássetak makham ektáhakxa apkelányo m'a xapop nak, keñe sa' ko'o atwaksek xama aqsok nápaqtók ma'a Dios Wesse' egegkok yaqwayam ay'asagkoho' ekpehewayam chá'a xapop kélagkok. 7 Melxawagkehek sa' xapop apagkok levitas, hakte apkelmaxnéssesso Dios énxet'ák apagkok sa' aqsa etnahágkok, yetneyk eyke xapop apagkok ma'a Gad nak énxet'ák apagkok tén han Rubén, keñe han ma'a nápakha nak Manasés énxet'ák apagkok, cham'a teyp nak wátsam Jordán, ekpayho nak yókxexma ekteyapmakxa ekhem, apmésso axta m'a Moisés, Wesse' egegkok axta apchásenneykha.”
8 Appenchásegkek axta aptamhágkaxa yaqwayam elxog ma'a ektáha axta apkelánémap elanok ektémakxa m'a yókxexma, keñe axta Josué aptáha apkeláneya s'e: “Kólmohok sa' ma'a ekyókxoho yókxexma, kólexpánches sa', tén sa' kólchexyók makham kélpenchesa enxoho, keñe sa' ko'o atwássesek xama aqsok se'e yókxexma nak Siló, nápaqtók Wesse' egegkok yaqwayam sa' ay'asagkohok ekpehewayam chá'a xapop kélagkok.”
9 Apkelxegkek axta xa énxet'ák nak, apsawhékxók axta apkelányo m'a yókxexma nak, apnaqtáxésagkek axta han siete yókxexma yetlo tegma apkelyawe chá'a xama yókxexma. Keñe axta apkeltaqháwo apkelmeyákxo m'a apkelpakxeneykegkaxa nak yókxexma Siló, cham'a aphakxa axta Josué. 10 Aptawássek axta xama aqsok Josué yókxexma Siló, nápaqtók Wesse' egegkok, yaqwayam ey'asagkohok ekpehewayam chá'a xapop apagkok, apkexpánchessek axta xapop nepyeseksa m'a israelitas.
Benjamín énxet'ák xapop apagkok
11 Penchásexcheyk axta ektawásamáxche xama aqsok, keñe Benjamín énxet'ák apagkok eyaqhawo apxaka m'a xapop ekyetnama axta teyp Judá, halep axta m'a José énxet'ák xapop apagkok. 12 Cháxa xapop nak, axta cheynamók néxa m'a teyp nak wátsam Jordán ekpayho nak nexcheyha, axta maheykegkok ma'a teyp Jericó ekpayho nak nexcheyha, xegamchek axta ekmeheykegko m'a yókxexma ekxámokmakxa nak meteymog élwenaqte ekpayho nak ektaxnegwánxa ekhem, keñe axta ekmeyeykento ekyephagweykto m'a yókxexma meykexa énxet nak Bet-avén. 13 Cha'a ekxegeykekxexa axta makham ekmeyeykekxo m'a tegma apwányam Luz (cham'a Betel) ekpayho nak nepyeyam, tén axta ekweyweykento ekweykekxoho m'a Atarot-adar, apyetnama nak egkexe, teyp nak ma'a Bet-horón Kóneg ekpayho nak nepyeyam; 14 keñe axta ekmeyeykento néxa xapop ma'a ekpayho nak wátsam ekwányam Mediterráneo, cham'a nekha nak ma'a egkexe ekpayho nak nepyeyam, ekyetnama nak ekpayho Bet-horón, ekweykekxoho m'a Quiriat-baal, ekwesey nak han Quiriat-jearim, apagkok nak ma'a Judá énxet'ák apagkok. Cháxa néxa xapop ekpayho nak ektaxnegwánxa ekhem.
15 Keñe axta néxa xapop ekpayho nak nepyeyam, eyeynamo m'a Quiriat-jearim ekmeheykegko m'a ekpayho nak ektaxnegwánxa ekhem, ekweykekxoho m'a ekyetnamakxa nak yegmen ma'a Neftóah, 16 keñe axta ekweyweykento ekweykekxoho m'a awhak egkexe émha nak ma'a ekpayho nak ekyapwátegweykenxa xapop ma'a Ben-hinom, teyp nak ekyapwátegweykenxa xapop Refaim, ekpayho nak nexcheyha. Keñe ekweyweykento m'a ekyapwátegweykenxa nak xapop ma'a Hinom, yeykhayak axta m'a ekmeyeykekxexa nak néten xapop ma'a Jebús ekpayho nak nepyeyam, xegamchek axta ekweykekxoho m'a ekyetnamakxa nak yegmen En-roguel, 17 keñe axta ekmeyeykekxo m'a nexcheyha, yephagweykekxeyk axta m'a En-semes, yeykhayak axta makham ma'a, ekweykekxoho m'a Guelilot, ekyetnama nak ma'a ekpayho nak ekmeyeykekxexa néten xapop ma'a Adumim, keñe ekweyweykento ekweykekxoho m'a meteymog nak Bohan Ben-rubén; 18 yeykhayak axta m'a teyp nak ekmeyeykekxexa néten xapop ekpayho nak nexcheyha, nekha nak ma'a ekyapwátegweykenxa xapop Jordán, weyweykenteyk axta ekweykekxoho m'a Jordán, 19 yeykhayak axta m'a Bet-hoglá ekpayho nak nexcheyha, axta temégweykmok néxa m'a Wátsam Étsapma ekpayho nak nexcheyha, ektaxnegweykekxexa axta chá'a yegmen eñama m'a wátsam Jordán. Cháxa néxa xapop axta ekpayho nak nepyeyam.
20 Wátsam Jordán axta néxa xapop ma'a ekpayho nak ekteyapmakxa ekhem. Cháxa néxa xapop kélmeyáseyak axta m'a Benjamín énxet'ák apagkok apnámakkok.
21 Keso tegma apkelyawe élpehewayam axta apkelxawéyak ma'a Benjamín énxet'ák apagkok apnámakkok nak: Jericó, Bet-hoglá, Émec-quesís, 22 Bet-arabá, Semaraim, Betel, 23 Avim, Pará, Ofrá, 24 Quefar-haamoní, Ofní tén han Gueba, doce tegma apkelyawe yetlo tegma apketkók aphéyak nak nepyáwa'. 25 Axta han ma'a Gabaón, Ramá, Beerot, 26 Mispá, Quefirá, Mosá, 27 Réquem, Irpeel, Taralá, 28 Selá, Élef, Jebús (cham'a Jerusalén), Guibeá tén han Quiriat, catorce tegma apkelyawe yetlo tegma apketkók aphéyak nak nepyáwa'. Cháxa xapop élpehewayam axta apkelxawéyak ma'a Benjamín énxet'ák apagkok apnámakkok.
