1 Aclingac coo, najan acvitac coo aclhamoclhojo asoc apquillhanma quellhip.
2 Apquilyasamcoc quellhip asoc, coo najan sicyascamco, sicno coo quellhip.
3 Altamjo inyicje opamejitsic Dios Visqui ingac apyimtalhnamo quilhvo nac jay.
4 Quellhip apquiltomjac apquilmopvancaa amyaa, mellhanma apquiltemaclha apancaoc. Quellhip apquiltomja apquilaney poc, mepqui apquilmopvan eltamilquiscomoc poc.
5 Nasoc sat eltimjic apquilyascamco quellhip, apquilvanma inlhojo mepqui apquilyataycam quellhip.
6 Quip jelaylhojo quellhip, pac oltimnacsic apquiltemaclha apancaoc quellhip.
7 ¿Apquililtamjo ya quellhip elmeyvoc Dios, ayinyema apquilyinimquiscama apquilpayvam najan apquiltemaclha apquilmopvan amyaa?
8 ¿Apquililtamjo ya quellhip elmeyvoc Dios, eltimjic apquilpeyvescasquiclha amyaa?
9 ¿Co laa eltimjic quellhip, apquilyipconacpo inlhojo napato Dios? ¿Naso ya elyinimsic sat quellhip Dios, acno apquilyinimquiscama quellhip nipyesicsa enlhit?
10 Epquiniclhac sat ayalhnaclhojo apquilvalhoc quellhip, mepqui apmasma etnejic.
11 Cotyamoc sat apquilvalhoc quellhip, apquilvita inlhojo apmopvan apanco Dios.
12 Alhto inyicje apquilpayvam quellhip, malha lhopactic, malha mayicjescama yelpa.
13 ¡Elvanma siclho quellhip! ¡Elaylhojo coo sicpayvam! ¡Mongvacyejec sat acmasom!
14 Momyovalhcoyc ajanco, olngamcojoc sat acyimtalhnama, lhaja.
15 Ongvatingmojoc sat napato Dios, jeyajic sat lhaja, omatong sat maa.
16 Omyovalhcac sat coo napato Dios, copvanquejec mataa emyovacpoc apyinimquiscama.
17 Quip elaylhojo quellhip sicpayvam, elyasingvomoc sat sictomjaclha quilhvo.
18 Naso coo sicpeyvomo, pac opeyvescasiclha sictomjaclha quilhvo nac jay.
19 ¿Soc sat jesilhnana? Evanquic coo ovanmac, evanquic coo ongvitsapoc, vamlha.
20 Lhip Dios Visqui ingac, oyoclhojoc sat lhip, otnejic sat anit silmalhnaycam lhip.
21 Noyanmongsiclha nasa sictemaclha coo, imascos sat acyivey ayay evalhoc coo.
22 Jeyane sat lhip coo, ongvatingmojoc sat quilhvo. Ongvanic sat siclho, lhip sat jeyatingmojoc.
23 Jeltimnas sat lhip acvamlha moyascalhma coo, najan acvamlha sicsilhnanomalhca ajanco.
24 Apyilhanme ya lhquip, ¿so actomja yi? ¿Cotnaja ingmoc ya coo napato lhip?
25 Sicyitsomalhca yamit ava actiyam, najan paat acyamay ayimposcay alhcajayam. Seyamascam nac lhip, yoyam jetvacsic, ¿so actomja yi?
26 Seyinmelhaycam mataa lhip, aplhanma sicsilhnanomalhca ajanco nano, sictemaclha eyitcoc.
27 Lhip alhta aptetem cadena elhquipcoc, apquilaneyo siclhingam mataa coo. Lhip aptalhescama mataa moclhama siltoyam emancoc naysicsa siclhingam.
28 Actipilcalhquic coo sicyovoclhojo, malha alhpongja apac sictomja. Malha apava apjapac acnatovascama ascoc sictomja sicyovoclhojo — alhta aptomjac Job.
1 Ekweteyak ko'o
ahaqta'ák ahagko'
ekyókxoho xa aqsok nak,
seklege ahagko' nahan.
2 Ekya'ásegkók ko'óxa m'a
kélya'áseykegkoho nak kéxegke;
ekhawók ko'o kéxegke.
3 Émenyeyk eyke ko'o
apaqhetchesek ma'a Dios,
émenyeyk alpaqhetchesaxkohok
ma'a ekha nak Apyennaqte.
4 Kéláhakkassegkek kéxegke
kélmowána amya'a m'a
aqsok ekmámnaqsoho nak;
kéxegke kélteme
pánaqte yapmeyk
megkalmopwána nak
eltaqmelchessók élháxamáxche'.
5 ¡Kélwanmakkek agkok kéxegke,
máxa kóltéhek ma'a énxet'ák
ekha nak apkelya'áseyak!
6 Kóltaqmelchesho sa' kélháxenmo,
hakte peyk axének ko'o setnamakxa nak.
7 ¿Kamyóya chá'a Dios
ma'a kélmowána amya'a
nak kéxegke?
¿Kapasmoya chá'a m'a
kélpeywa ekmowána amya'a nak?
8 Kélpasmeykekxeyk kéxegke m'a,
máxa kélmasma kélmáheyok
kóltéhek ma'a ektémakxa nak.
9 ¿Háxko sa' eyke kóltéhek
ma'a apkelanawo sa'
kéltémakxa m'a Dios?
¿Kélwancheya kólyexanchesha,
kélteméssessamól'a m'a énxet xamo' nak?
10 Kélyexáxkok sa' agkok han
kélpasmeykxo kéxegke m'a,
elpaqhetchesek sa'
ekyennaqte agko' kéxegke m'a.
11 Kalyegwakkashok
agko' sa' kéxegke m'a
aptémakxa nak apteme
apwányam apagko' ma'a Dios,
kóleyk sa'.
12 Máxa xapop ánek ma'a
kéltémakxa nak chá'a kélpeywa;
mékoho tamheykekxa',
máxa yelpa' kélhaxtegkessól'a
nepyáwa tegma m'a
kélxeyenma nak chá'a.
13 ¡Kólwanma kaxwo',
peyk ko'o apaqmétek,
hetnehek sa' setnahakxa agkok!
14 Mamyágwakxeyk sa' sekyennaqte,
magweygwakxeyk sa' sétsapma.
15 Heyaqhek sa' eykhe,
malwátessemek sa' eyke
sektémakxa nak chá'a sekpeywa,
yaqwayam altennaksek
nápaqtók sekteme
meyke sektémakxa'.
16 Sa' kexa hewagkasek
teyp xa magweygweykekxa
nak séltennasso nápaqto',
hakte metaxnegwomek sa'
xama énxet ekmaso
aptémakxa m'a aphakxa nak.
17 Kóltaqmelchesho sa' kélháxenmo,
peya nak apékessásekxak kéxegke.
18 Altennaksek sa' sektáha
meyke sektémakxa,
ekya'ásegkók ekpayhawo
yaqwánxa atnehek.
19 Yetneyk sa'
agkok xama énxet
yaqwayam hexének,
awanmak sa' aqsa,
keñe sa' watsapok.
20 Oh Dios,
hegkés sa' ko'o ánet
aqsok sélmaxneya nak,
tén sa' meyxánegkesek xép:
21 Elwatés
señassáseykegkoho,
ná hégwakkasha chá'a
apagko' kaxwo'.
22 Hepaqhetches sa',
keñe sa' ko'o wátegmowagkok;
essenhan ko'o apaqmétek emonye',
keñe exchep heyátegmowágkok.
23 Héltennés ko'o
ektémakxa may'assáxma,
tén han aqsok
ekmaso sélane.
¿Yaqsa aqsok
ekmaso ko'o sélane?
24 ¿Yaqsa ektéma
séxánegkessama nak xép?
¿Yaqsa ektéma
setnéssessama nak
máxa sénmexma?
25 Ekhawók ko'o m'a aqsok
áwa' eksól'a éxchahayam,
¿yaqsa ektáha peya
nak hemasséssók?
Ekhawo ko'o pa'at
apák élyamayél'a,
¿yaqsa ektéma
seyaqmáseykencha'a nak?
26 Askohok agko'
appeywa segkésso
sexéncháseykekxoho sektémakxa;
eñassáseykegkók eñama
may'assáxma sélane axta
sektémakxa wokma'ák.
27 Enaqtehetchessegkek
emagkok cadenas,
apkeláneykha ekyókxoho
ektémakxa sekweynchámeykha,
apkeláneykha chá'a m'a
sekmahágkaxa enxoho.
28 Taqmelcháseykegkók
ekmasagko sekyókxa,
ektémól'a aqsok ektepelchamáxche',
aptémól'a apáwa askok ektól'a.
