Apquiltemaclha apquilyamasma Visqui ingac
1 Aptomjac alhta Visqui ingac: Apyinyovquic sat ancoc aptava enlhit. Yiplovcoc alyimjapayclha poc enlhit. Covanquejec quilvana acyamasma cotajojoc mocjam coyipitquiclhojo atava siclho. Acvisay ningmancactama nintemaclha enlhit. Quellhip israelitas apquilyitsomacpo quilvana alanatama nipyesicsa enlhitaoc. Apquililtamjoc jelyipitquiclhojo mocjam coo — alhta aptomjac Visqui ingac.
2 Apquiltemaclha quellhip quilvana alanatama, acyitnamó lhama enlhit netin inquilhe lhalhma anco. Najan acyitnamolhama enlhit, malha enlhit árabe yoclhilhma actamopeycaoc apquiljalhanma nicja amay. Najan actomja acmanquescama apyovoclhojo enlhit, ayinyema actemaclha alanatama najan acmasom. Eycaso apquiltemaclha apancaoc quellhip.
3 Eycaso ayinyema melvitay quellhip yingmin acmamay, acvaa inlhojo mocjitma, najan apvaa inlhojo piyam. Am colhenac alhta quilvana alanatama actemaclha anco, am elmancac mocjam quellhip apquilyitsomacpo as quilvana alanatama.
4 Yitnec alhta apquilpayvam quellhip: Tata coo, semasma naysicsa sictiyascam.
5 Melvejec sat lhip cotningvoyam nelha, meyanmongsiclhejec sat lhip sictemaclha ajanco — apquiltomjac mataa quellhip, naysicsa apquilyangvisquiyam apquiltemaclha apquilmapsomcaa (apquiltemaclha acmasom) — alhta aptomjac Visqui ingac.
Quilvana alanatama apquilyitsomacpo israelitas najan co Judá
6 Aptomjac nic nat profeta: Naysicsa aptimem apvisqui Josías, aptomjac alhta Visqui ingac seyanya coo: ¿Apvita ya lhquip apquiltemaclha apancaoc israelitas? Apquilyitsomacpo quilvana alanatama acyitnamó lhama enlhit netin inquilhe lhalhma anco, najan coning yamit mayayoclha. 7 Aljalhne inyicje coo jelyavotac mocjam israelitas, malha quilvana alanatama actajayclha mocjam apnaclha atava. Apquilvitac alhta apnaymacoc co Judá, malha apquilyalhing apquiltomjac. 8 Acyamasmec coo as quilvana alanatama, apquilyitsomacpo israelitas, ayinyema apquiltemaclha apancaoc. Apquilvitac alhta co Judá, sictemaclha sicyamasma. Am alhta elacac co Judá, apquilyiplovcasquic apquiltemaclha apquilanatama selyamasma coo. 9 Apnatovasquic alhta yoclhilhma, ayinyema apquiltemaclha apquilayo quilaycmasquiscama allanomalhca mataymong najan yamit. 10 Am alhta elyavectac co Judá, am alhta elyanmoncasac apquilvalhoc, apquiltomja eyca selyinimquiscama — alhta aptomjac Visqui seyanya coo.
11 Aptomjac mocjam Visqui ingac seyanya: Asilhtec apquilsilhnanomap apanco israelitas, avanjec eyca apquilsilhnanomap apanco co Judá — alhta aptomjac. 12 Aptomjac mocjam seyanya: Ilngas sat lhip amyaa nac jay payjoc nilhqueyja:
Quip elaylhojo Visqui ingac appayvam: ¡Jelyota sat quellhip israelitas! Mepqui mocjam siclom coo, ongvasicjiclhojoc sat mocjam quellhip. Eycaso sicpayvam sicvisay Visqui sicyimtalhnamo.
13 Ellhen sat quellhip apquiltemaclha apancaoc apquilsilhnanomap. Quellhip alhta selyamasma coo sicvisay Dios Visqui apancaoc. Apquiltingyac alhta quellhip quilaycmasquiscama acyitsomalhca dios lhalhma anco najan coning yamit mayayoclha. Am alhta eljalhnoc quellhip sicpayvam — alhta aptomjac Visqui ingac, yoyam olngacsic coo.
14 Aptomjac mocjam Visqui ingac: ¡Quellhip eyitquic, jelyota sat coo sictomja silyacyescama quellhip! Moclhama tingma apvanyam najan moclhama clan apquilmolhama olyacyecsic sat lhama najan apcanit, onaliclhac sat tingma Jerusalén. 15 Olyacyecsic sat apquilviscaa sicyisponcama coo, eltimjic sat apquilviscaa nipyesicsa quellhip apquiltomja apquilyascamco najan apquilyicpilquemo. 16 Ellhamiclhac sat quellhip yoclhilhma apquileyvomaclha quellhip, colhenalhquejec sat maa aclhinganyam pacto yamit aysicsic acyitnamaclha Dios appayvam. Collanalhquejec sat moc yamit aysicsic. Eycaso sicpayvam Visqui apancaoc quellhip. 17 Tingma Jerusalén etniclhac sat Visqui ingac aptajanem apanco. Elyavotac sat aplhamoclhojo enlhitaoc, jeltimjic sat selayo. Melyiplovcasejec sat mataa aclhanmaclha apquilvalhoc apancaoc.
18 Elpasmiclhac sat israelitas najan co Judá, yoyam elyinyoc sat nilhqueyja, elvotac sat mocjam apquilaoclha, apquillhoy nat apquilyeyjamcaa quellhip — alhta aptomjac Visqui ingac.
Apquiltemaclha apquilayo quilaycmasquiscama
19 Aptomjac alhta mocjam Visqui ingac: Quellhip israelitas, altamjoc alhta inyicje colhic ayaco quellhip, elhnam sat quellhip lhama yoclhilhma actamila anco, am colhno moc yoclhilhma as nalhpop. Jeltimjic sat jelanic: Tata coo — sat eltimjic. Mejelyinyovejec sat mataa quellhip.
20 Apquilyitsomacpo quellhip quilvana acyamasma atava, acmayclha poc enlhit. Quellhip apquiltomja selyamasma coo. Eycaso sicpayvam Visqui apancaoc — alhta aptomjac.
21 Inlingalhquic apquiliclhangveycam netin inquilhe. Apquilyapcalhquic israelitas, apquililmalhnamcaa Visqui ingac yoyam epasingvota. Apquilyinyovquic alhta amay acpeyvomo, alvoncaycmo sicvisay Dios Visqui apancaoc.
22 Jelyota sat quellhip selyamasma siclho, ellaniclha sat apquilvalhoc, olmecsic sat quellhip actamilaycam apquilvalhoc — alhta aptomjac Visqui ingac.
Aclhanma apquilvalhoc co Judá.
Lhip Visqui ingac, jingilanojo nincoo ningiltajemo mocjam, ayinyema lhip aptomja Dios Visqui ingac.
23 Paj jingilpasmac mataa quilaycmasquiscama naysicsa ningilpalhamaycam netin inquilhe. Apvamlha lhip Dios Visqui ingac aptomja singvomquiscama tap.
24 Insovjoc quilaycmasquiscama Baal ninatoscama najan inquitquic apquilinava najan quilvanaa ayitcoc. Ningillhocac nat ninatoscama singilmescama ningilyeyjamcaa.
25 Avanjec nincoo ningmancactama napato Lhip, mepqui singayo nincoo, invenalhquic ingvalhoc nincoo. Mongilyascalhma nincoo najan ningilyeyjamcaa nanoc nat napato lhip Dios Visqui ingac, mepqui mataa ningilyajayquiclho lhip — sat eltimjic quellhip — nic nat aptomjac profeta.
Énxet'ák Israel apyamasma apkelyetleykha Wesse' egegkok
1 Aptáhak Wesse' egegkok se'e:
“Yenyókek agkok aptáwa'
xama énxet,
keñe ektepa enxoho
aphakxa xa kelán'a nak,
kamekxak pók énxet,
yawanchek kay'ókxak makham ma'a
apmonye' atáwa' axta.
¡Ekmanyása agko' sa'
katnéssesek apchókxa
ektáha enxoho xa ektáha nak!
Keñe exche' Israel,
kelánéseykegkek nentémakxa
ekmaso mansexta apxámokma
apagko' ma'a élásekhayókxa nak.
¡Keñe kaxwo' ekmako makham ko'o hey'óta'!
Ko'o sekxeyenma xa,
sektáha nak Wesse'.
2 “Kanmexekxoho hana egkexe
éláxñeyo nak,
kataqmelchesho sa' élányo:
¿háxko megkalánegweykenxa
exche' ektémakxa megkamasexta?
Kaxek chá'a exche'
nekha ámay kaleyxek
élásekhayókxa,
aptamheykegkól'a árabe m'a
yókxexma meykexa nak énxet.
Kenyetséssegkek apchókxa
ektémakxa megkamasexta,
tén han ektémakxa ekmaso.
3 Cháxa keñamak
megkamámeya nak ma'a
apmopsamágexal'a,
tén han ma'a élyapweykxal'a.
Hawók xe' megkamegqakto m'a
kelán'a ekyaqmagkáseyak pók énxet
ekma nak chá'a ekyánmaga ekpathetéyak;
¡kéméxcheyk kamegqágwók!
4 Kaxwók ektáha axta
makham seyáneya s'e:
‘Táta ahagkok,
séntameykha axta chá'a
sektémakxa étkok,
5 ¿melwátessemeya sa' aplo?
¿Megkatnégwomeya sa' néxa aplo?’
Temegkek eykhe ekpeywa xa ektáha nak,
keláneykxeyk eyke aqsa
ekyókxoho aqsok ekmaso
ekmakókxa enxoho kalána'.”
Wesse' egegkok apkelpaqhetchesso énxet'ák Israel tén han Judá apkeltémo elyaqmagkasek apkelwáxok
6 Axta aptemék ko'o seyenagkama Wesse' egegkok, aptémakxa axta wesse' apwányam Josías: “¿Apweteyaya ektémakxa m'a Israel, cham'a sénmexeykekxo nak ko'o? Xegamche keñe élánegweykmo ektémakxa megkamasexta m'a néten egkexe nak, tén han ma'a ekyókxoho kóneg yenta'a élyentaxno nak pessesse agkok. 7 Énagkamchek axta ko'o hey'ótak makham natámen élane xa ekyókxoho aqsok nak, neyke hey'ékekta'. Wetayak axta han yáxeg Judá xa, cham'a seyenseykmo nak ko'o sétleykha; 8 wetayak axta han ko'o ektémakxa sektaqnagkama m'a Israel, cham'a sénmexeykekxo nak ko'o, tén han sekyamasma eñama setwáseykegkoho élánegwayam chá'a pók énxet megkatnaha atáwa'. Keñe m'a Judá, yáxeg nak ma'a Israel, seyenseykmo nak ko'o sétleykha, axta kayeyk, xegamchek axta nahan ma'a, tén axta éláneya nahan ma'a ektémakxa megkamasexta. 9 Yahamók agko' axta nahan élane, kenyetséssegkek axta m'a apchókxa. Eyenseykmek axta ko'o sétleykha élpeykessamo m'a meteymog kéleykmassáseykha, tén han ma'a yenta'a nak. 10 Axta nahan ko'o hey'ékekták Judá, yetlo segkéssamo agko' awáxok, cham'a seyenseykmo nak ko'o sétleykha, natámen élane xa ekyókxoho aqsok nak, élyexancháseykha axta aqsa chá'a. Ko'o sekxeyenma xa, sektáha nak Wesse'.”
11 Aptáhak axta ko'o seyáneya Wesse' egegkok se'e: “Asextók ektémakxa ekmaso m'a Israel sénmexeykekxo nak ko'o, kaxnók ma'a Judá seyenseykmo nak ko'o sétleykha. 12 Exeg sa', emhók sa' ma'a ekpayho nak nexcheyha, eñes sa' se'e amya'a nak:
“Aptáhak Wesse' egegkok se'e:
¡Hey'óta' ko'o, Israel
sénmexeykekxo nak!
Ataqmelcheshok sa' ko'o
amok takha exche',
mawenaqtésók sa' nahan seklo,
hakte ko'o sekteme
ektaqmeleykha ewáxok.
Ekméssek ko'o sekpeywa,
sektáha nak Wesse' kélagkok.
13 Eyke kay'ásegwakxoho aqsa m'a
ektémakxa ekmaso,
tén han énmexeykekxo m'a
Dios Wesse' agkok;
ekweynchámeykencha'a chá'a
ektegyeykencha'a énxet
apkeleñama mók nekha
yaqwayam kagkések ekyókxa,
m'a kóneg nak yenta'a
élyentaxno pessesse agkok,
tén han megkalyeheykekxo m'a
séltémókxa nak katnehek.
Ko'o sekxeyenma xa,
sektáha nak Wesse'.”
14 Aptáhak Wesse' egegkok se'e: “Kólchexyem makham, énxet'ák sénmexeykekxa nak ko'o, ko'o sekteme Wesse' kélagkok. Amok sa' chá'a ko'o kélxama xama tegma apwányam, keñe sa' apqánet chá'a m'a ektáha nak chá'a apnámakkok apagko', anaqlakxak sa' ma'a Sión. 15 Atnéssesek sa' ko'o apkeltaqmelchesso kélókxa m'a ekleklamo nak ko'o ewáxok, sa' eltaqmelchesek chá'a kéxegke m'a yetlo apmopwancha'a aqsok, tén han apkelya'áseykegkoho. 16 Kélxámakxeyk sa' agkok kéxegke m'a apchókxa, apxámákxo enxoho m'a kélketchek, méko sa' kaxének kaxwók ma'a yántéseksek ekhémo mók nélpaqhetchásamáxkoho nak Wesse' egegkok, méko sa' kaxének kaxwók awáxok ma'a, tén han kaxénwakxohok chá'a awáxok, megkóllánekxeyk sa' han axnagkok, hakte kamaskok sa' kólámenyého'. Ekméssek ko'o sekpeywa, sektáha nak Wesse' kélagkok. 17 Wesse' egegkok aptaháno ektaqmalma sa' kólteméssesek ekwesey m'a Jerusalén; apyókxoho pók aptémakxa énxet'ák sa' yaqnekxak ma'a, yaqwayam hélpeykesho'; kamaskok sa' elyetlakxohok ma'a ektémakxa nak élmámenyého apkelwáxok elanagkok aqsok ekmaso eñama élyennaqte, yaqwayam sa' etnehek ko'o seyáyo, kamaskok sa' etnahagkok élyennaqte apkelwáxok elanagkok ma'a aqsok ekmaso nak.
18 “Wokmek sa' agkok xa ekhem nak, keypetchekxak sa' Judá m'a Israel, kataqhohok sa' makham xamo' ma'a apchókxa ekpayho nak nexcheyha, cham'a xapop sekpekkencháseykekxa axta ko'o m'a kélyapmeyk nano' axta kéxegke.
Énxet'ák Israel apkelpeykessamo kéleykmássesso
19 “Énxet'ák Israel,
ekxeyenmeyk axta ko'o
kéxegke atnehek
étchek ahancha'awo',
tén han agkések ma'a xapop,
étsapmo nak kélnények kóllano',
apchókxa ektaqmalma agko' nak,
megkaxnawo nak ma'a
mók apkelókxa nak keso náxop.
Énagkamchek axta ko'o
kéxegke héltéhek kélyáp,
tén han mehélyenyewek
chá'a xama enxoho.
20 Kéltemék kéxegke sélyenseykmo
sélyetleykha m'a,
ektémól'a kelán'a
ektawáseykegkoho atáwa'
élánegwayam la'a chá'a pók
énxet megkatnahakxa atáwa'.
Ko'o sekxeyenma xa,
sektáha nak Wesse'.
21 “Legáxcheyk élpayheykha
kélatña'ák ma'a néten egkexe
ekyamáyekxa nak exma:
¡israelitas ma'a
apkellekxagweyncha'a nak,
apkeltamho nak kalepyóshok kóllano'!
Apkelyetnakhágweykmek
apkelyetlo ámay ekpéwomo,
megkalxeyenmak apkelwáxok ko'o,
sektáha nak Dios Wesse' apagkok.
22 Hélyo'óta makham ko'o,
énxet'ák sénmexeykekxa nak chá'a,
amasséssesek sa' ko'o m'a
ektémakxa nak chá'a sélenmexeykha.”
Israelitas apkelátegmoweykegkokxa Wesse' egegkok
“Keso negheyncha'a negko'o s'e,
negya'aweykteyk xép,
hakte xép apteme
Dios Wesse' egagkok.
23 Kaqhok negko'o
ólmeyekxak chá'a m'a
néten egkexe nak,
essenhan ólpáxamágwakxak
chá'a m'a néten meteymog
élwenaqte nak;
wánxa aqsa egwanchek
negko'o agwetak
nélwagkásamáxche teyp,
negko'o nentáha nak
énxet'ák Israel ma'a
Dios Wesse' egegkok nak.
24 Kéleykmássesso segmegqassamo
nélpeykessamo
ensawhessók ma'a aqsok
apkelwete axta ẽlyapmeyk nano' ma'a
nentémakxa axta egketkók: cham'a
nepkések, weyke, tén han egketchek
apkelennay'a tén han kelwán'ák.
25 Ólháxahagkok hana nélmegqakto,
yetlo nélyeykhásamáxkoho
egagko' nélmegqágweykekxa',
hakte nentémakxa sakcha'a axta
negko'o negeynamo nenlánéyak
mólya'assáxma nenmexeykekxo m'a
Dios Wesse' egagkok,
tén han mólyeheykekxa,
ekwokmoho s'e kaxwo nak,
weykekxók axta nahan ma'a
ẽlyapmeyk nanók axta.”
