Aptemaclha apcasicjayquiclha Dios
1 Aptomjac alhta Dios Apyimtalhnamo: Ayasicjavoc alhta apquilmolhama, apquilyitsomacpo sictamongvoyam apquitcoc. Acyinyovcasquic alhta yoclhilhma Egipto, sictomja siyevoycam.
2 Inyangvocmec alhta sictemaclha silasicjayo. Inyangvocmec alhta apquiltemaclha apancaoc enlhitaoc Israel. Apquilsantimcasquic alhta asoc macmescama quilaycmasquiscama almasomcaa. Apquilvatnec alhta asoc acmasis acyitnamaclha quilaycmasquiscama.
3 Alyascasingvocmec alhta apquilmolhama Efraín, malha sicaa yoyam colhong siclhoc anco. Am colyacmoc mataa ellhenic sicvisay, sictomja siltamilquiscama apyovoclhojo enlhitaoc.
4 Yitnec alhta silasicjayo, yitnec alhta siyimlaycmo, malha sicaa sicyipitquiscama emalhimpenic. Acjalhec alhta, malha yoyam eltovamcoc neme sicaa.
5 Am alhta colyacmoc jelyamoc coo. Colhic sat acnalaclho mocjam yoclhilhma Egipto. Apvisqui co Asiria etnejic sat apvisqui apancaoc.
6 Ellingamcojoc sat apquilimpocjay tingma apquilvanyam, eticyoc sat aptomja selinmelhaycam.
7 Apquiltemaclha mataa selyamasma coo. Apquilpalhamam inyicje apquilaneyo netin. Paj lhama, yoyam epasingvota.
8 ¿Evanqui ya otlhaoc quellhip co Efraín? ¿Evanqui ya otamopamcoc quellhip co Israel? ¿Evanqui ya onatovacsic quellhip, acno alhta tingma Adma najan tingma Zeboím? Avanjec alipvoyam evalhoc coo, ayinyema silasicjayo quellhip.
9 Omyoc sat siclom ajanco, momascocsejec sat apyovoclhojo apquilmolhama Efraín. Coo sicvisay Dios, jave enlhit coo. Mayayo nac coo sicma nipyesicsa quellhip, jave coo yoyam omascoscomoc quellhip.
10 Jelyiplaclhac sat sicvisay Dios Visqui apancaoc. Colhojoc sat sicpayvam, acno acpáyvam yamacmeyva. Jelyotac sat naysicsa apquilpilhyinamam elinyemac sat actalhningvamlha acnim.
11 Jelyotac sat naysicsa apquilpilhyinamam, acno nata navjac alinyema yoclhilhma Egipto. Elinyemac sat yoclhilhma Asiria, acno valhaay apquilinyema maa. Olhnecsic sat mocjam tingma apancaoc. Eycaso sicpayvam sicvisay Dios — nic nat aptomjac profeta.
Apquiltemaclha apancaoc acmasom
12 Aptomjac alhta Dios Apyimtalhnamo: Avanjec mataa apquiltemaclha apquilmopvancaa amyaa co Efraín. Avanjec mataa apquiltemaclha selyinimquiscama apquilmolhama Israel. Selyamasma alhta apquilmolhama Judá, apquilyiplayclha mataa quilaycmasquiscama acyitsomalhca dios.
Dios apkelásekhayo énxet'ák apagkok élyennaqte nak apkelwáxok
1 “Eyásekhayók axta chá'a ko'o
Israel aptémakxa axta sakcha'a;
Egipto axta apkeñamak
sekwóneykencha'a ko'o m'a,
hakte, hatte axta ko'o m'a.
2 Yágweykmók axta aqsa
seyamasma sekwóneykencha'a,
elmések axta chá'a
aqsok ektekyawa
aqsok kéláyókxa
élmowancha'a amya'a
énxet'ák ahagkok,
elwatnések axta han chá'a
aqsok ekmátsa nak
ekpaqneyam éten agkok
ma'a kéleykmássesso.
3 Eknaqleykha axta ko'o
m'a énxet'ák Efraín,
élmeykegkek axta apmék
séltáméssama apkelxega;
maxta eyke elya'áseykegkok
sektáha ko'o séláneykha chá'a.
4 Yetlo sélápeykha axta
eknaqleykenták sekhakxa,
tén han yetlo sélásekhayo;
axta ekteméssessók
séleynma m'a ektémól'a
ólqeynek sakcha'a keyetsék
megkalyamasmal'a neme;
waháxeheykha axta chá'a
alagkok aptéyak,
5 axta eyke emáheyók
hey'ótak ko'o.
Cháxa keñamak peya
eltaqhohok makham
ma'a Egipto,
Asiria sa' etnehek
wesse' apwányam apagkok.
6 Kempakhakma sa'
katyapok ma'a tegma
apkelyawe apagkok nak,
kasawhaksek sa' ma'a
tegma apkelyennaqte apagkok,
eñama m'a aqsok ekmaso
ekxeyenma nak chá'a
apkelwáxok elanagkok.
7 Apmenyeyk aqsa
heyenyók ko'o m'a
énxet'ák ahagkok,
elpáxamha eykhe
m'a netno nak,
méko eyke kapasmok.
8 “¡Mowanchek ko'o
eytnakhaksek xép Efraín!
¡Mowanchek ko'o
ayenyók xép Israel!
¿Ewanchek enxeykel'a
amasséssók ektéma
axta sekmassésseykmo m'a
tegma apwányam nak Admá?
¿Ewanchek enxeykel'a
atnéssesek xép
sekteméssessamakxa
axta m'a Seboím?
¡Megkeynnák ko'o ewáxok,
awanhek apmopyósa
sélányo exchep!
9 Matnehek sa' ma'a
ektáhakxa nak eklo ewáxok:
mamasséssemek sa'
ko'o kaxwók ma'a Efraín,
hakte Dios ko'o,
háwe énxet.
Sekpagkanamaxche ko'o,
sekha nak aphakxa exchep,
maxñekmok ko'o
yaqwayam amasséssak xép.”
10 Enaqlakxak sa'
Wesse' egegkok ma'a,
keñe sa' éxwéwha m'a
ektémól'a méwa.
Éxwéwha sa',
keñe sa' elyo'ótak yetlo
apkelaye m'a ektáha nak
énxet'ák apagkok,
apkeleñama m'a
ektaxnegwánxa ekhem.
11 “Máxa náta sa'
etnehek elchexyók
apkeleñama m'a Egipto,
yetlo apkelpexyennama,
máxa wáx'ay sa' etnehek
elchexyók apkeleñama
m'a Asiria,
wának sa' ko'o makham
elhaták ma'a apxanák axta.
Ko'o sekxeyenma xa,
sektáha nak Wesse'.
Dios énxet'ák apagkok élmasagcha'a apkeltémakxa
12 “Ewakhassegkek ko'o
apkelmopwancha'a amya'a
m'a énxet'ák Efraín,
ewakhassegkek ko'o
sélyexancháseykha
m'a énxet'ák Israel.
Apyamasmeyk Dios
ma'a Judá,
melwátesseykmok kaxwók
apkelyetleykha m'a
aqsok kéleykmássesso.
