Apquiltemaclha edomitas payjoc Seir
1 Aptomjac alhta Visqui ingac seyanya coo: 2 Lhip enlhit, ilngas sat lhip sicpayvam nipyesicsa co Seir. 3 Itne sat lhip elanic maa:
Eycaso appayvam ayinyema Visqui ingac: Quellhip co Seir, apquiltomjaclhec quellhip cotnaja ingmoc. Pac oyanmongsiclhac sat apquiltemaclha apancaoc quellhip edomitas. Cotniclhac sat yoclhilhma actamopeycaoc najan mepqui enlhit.
4 Enatovasacpoc sat tingma apancaoc, etniclhac sat yoclhilhma actamopeycaoc. Jelyicpilcangvomoc sat quellhip sicvisay Visqui apancaoc — alhta aptomjac.
5 Quellhip apquiltemaclha apquiltanoncama, najan apquilimpocjay nipyesicsa israelitas, ayinyema sicyanmongsayclha apquiltemaclha apancaoc israelitas apquilmapsomcaa. 6 Naso coo siclhanma mepqui sicyeycajascaoc sicvisay Visqui: Quellhip alhta apquilnapma israelitas, eticyoc sat quellhip lha, elminlhinacpoc sat maa. 7 Yoclhilhma Seir apquileyvomaclha edomitas cotniclhac sat yoclhilhma actamopeycaoc, mepqui enlhit apquileyvam. 8 Elvitacpoc sat apjapaoc ayinyema apquilimpocjay, lhalhma anco netin inquilhe najan alvata, najan payjoc vatsam, mengyascama apjapáoc. 9 Metyisamejec sat enlhit tingma apvanyam aptomja aptamopeycaoc. Jelyicpilcangvomoc sat quellhip sicvisay Visqui apancaoc — alhta aptomjac.
10 Yitnec alhta apquilpamejitsomap quellhip: Ontimjic inganco yoclhilhma Judá najan yoclhilhma Israel. Am alhta colhenac apquilvalhoc quellhip, actomja coo ajanco as yoclhilhma. 11 Naso coo siclhanma mepqui sicyeycajascaoc, oyanmongsiclhac sat apquiltemaclha apancaoc quellhip. Jelyicpilcangvomoc sat sicvisay Visqui apancaoc. 12 Aclingac alhta aclhamoclhojo apquilpayvam quellhip apquilinmelhaycam israelitas. Apquiltomjac alhta quellhip: Apquiltamopamquic apquilaoclha israelitas, noc, ¡ontimjic inganco as yoclhilhma! — alhta apquiltomjac quellhip. 13 Apquilantipcasquic alhta sicvisay selinmelhaycam coo, alhta intomjac siclingay.
14 Naso coo sicpayvam sicvisay Visqui apancaoc: Onatovacsic sat quellhip, elitsovacsojoc sat enlhitaoc, apquilvita inlhojo sictemaclha. 15 Apquilitsovasoc alhta quellhip apquilvita macnatovascama yoclhilhma israelitas. Ellingamcojoc sat quellhip edomitas co Seir acno moc. Jelyicpilcangvomoc sat sicvisay Visqui apancaoc — alhta aptomjac.
Egkexe Seír ekxénamaxche yaqwánxa kólteméssesek
1 Epaqhetchessek axta ko'o Wesse' egegkok. Aptáhak axta seyáneya s'e: 2 “Yenmexekxoho ekpayho nak egkexe Seír, eltennés sa' sektáhakxa ko'o sekxeyenma yaqwánxa atnéssesek ma'a. 3 Etne sa' yának se'e:
“Keso aptáhakxa exchek appeywa Wesse' egegkok se'e:
Ekxénchek ko'o exche'
sektáha sénmexma,
egkexe Seír,
añássesagkohok sa' ko'o exche',
yókxexma meykexa énxet sa'
atnéssásekxa'
tén han meyke xama aqsok.
4 Anaqtawássesha sa' ma'a
tegma apkelyawe agkok,
keñe sa' xe' katnekxak
yókxexma meykexa énxet.
Keñe sa' kay'ásegwók ko'o
sektáha Wesse'.
5 “Nanók élenmexma exche' m'a énxet'ák Israel, kempakhayak axta m'a sekxók apkelxaweykegko axta néxa kéllegassáseykegkoho eñama m'a apkeltémakxa melya'assáxma. 6 Naqsók eyke ko'o sekxéna sektáha nak Wesse' peya wának kamatñekxak xeye', kayaqmasha sa' ma'a nétsapma. Xeye' chá'a keñamak nétsapma, kayaqmasha sa' chá'a m'a nétsapma. 7 Yókxexma meykexa énxet sa' atnessásekxak xeye' egkexe Seír tén han meyke xama aqsok, magwohok sa' nahan kaxwók eyeykhágwók xama énxet enxoho m'a. 8 Wának sa' ko'o kasawhekxohok ekhéyak aphopák apkeletsapma axta neyseksa kempakhakma m'a egkexe agkok nak, tén han ma'a egkexe yámnetna'awo nak, tén han ma'a élyapwátegweykenxa nak chá'a xapop, tén han ma'a wátsam agkok nak. 9 Atnessásekxak sa' yókxexma meykexa énxet meyke néxa, méko sa' kaxek chá'a m'a tegma apkelyawe agkok nak. Keñe sa' kólya'ásegwók kéxegke, sektáha ko'o Wesse'.
10 “Temék chá'a exche' ekpaqméteykencha'a s'e: Ko'o sa' atnehek ahagkok ma'a Israel apchókxa, yetlo m'a ánet apchókxa agkok nak; ko'o sa' atnehek ahagkok, neyseksa apha eykhe Wesse' egegkok ma'a. 11 Naqsók eyke ko'o sekxéna sektáha nak Wesse' mamassegwayam peya atnéssesek ekhawo m'a ektémakxa nak chá'a eklo, eknathahéyak tén han ektaqnagko, ekteméssessamakxa nak chá'a m'a Israel. Eklegassásegkók sa' agkok ko'o exche', hey'ásegwók sa' ko'o m'a énxet'ák nak. 12 Keñe sa' kay'ásegwók, seklegaya ko'o ekyókxoho m'a ektémakxa nak chá'a élxéneykha ekmaso m'a egkexe élekhahéyak nak Israel, ko'o sektáha nak Wesse'. Axta katnehek chá'a exche' kalxének se'e: ¡Yókxexma meykexa énxet kaxwók xa; egwanchek kaxwók agmok! 13 Paqmetchek axta exche' sewañencha'a, kayhek axta ekpeywa sexéneyncha'a ko'o. Ekleg'ak axta nahan ko'o.
14 “Keso sektáhakxa nak ko'o sekpeywa s'e sektáha nak Wesse': Kalpayhekxak sa' apkelwáxok apyókxoho énxet apheykha nak keso náxop sekmasséssekmo sa' xeye'. 15 Payhekxeyk axta exche' awáxok kélmasséssekmo axta m'a apchókxa, apxaweykxa axta apagkok apagko' ma'a énxet'ák Israel, kaxhok sa' eyke nahan ektáhakxa exche' m'a: katnekxak sa' ekmaso m'a egkexe Seír, cham'a apchókxa Edom nak. Keñe sa' kólya'ásegwók ko'o sektáha Wesse'.”
