Actemaclha apquilyamasma aptava
1 Inquilyimjapquic sat ancoc enlhit, etnejic aptava lhama quilvana. Am colcac apvalhoc nalhit acnim actemaclha anco quilvana. Aptalhosquic vaycajac actemaclha apyamasma aptava, apmesa as quilvana, apcapajasa yoyam cotajiclha. 2 Coyinyoc sat tingma as quilvana. Avanquic colyimjapoc mocjam poc enlhit. 3 Am sat ancoc colcac apvalhoc actemaclha anco as quilvana, etalhocsic sat vaycajac actemaclha apyamasma aptava, ingyapajacsic sat cotajiclha mocjam quilvana. Yitnec sat ancoc amyaa apquitsepma as segundo aptava, mepqui mocjam aptalhescama vaycajac apyamasma aptava. Cotnejic sat tampeyi as quilvana. 4 Copvanquejec emiclhac sat mocjam atava apmamyi, cotnejic sat macvennéycam Dios. Aptanovquic maa Dios. Noelvennam nasa quellhip yoclhilhma macmescama quellhip.
Moc singanamaclha mocjam
5 Enlhit quilhva alyimjapma mepasmejec siclho apquilimpocjay apnaymacoc nipyesicsa cotnaja ingmoc, mepasmejec siclho moc apquiltimesaycam. Elhic sat lhama año tingma pac acnaclha aptava, yoyam copayjiclhac sat apvalhoc.
6 Noeltingya nasa apquilmaycam enlhit 'ticlhiclhamaclha actic, acyitna inlhojo apmaycaoc nasa enlhit. Colhojoc sat ningajem as enlhit.
7 Apmacpec sat ancoc enlhit israelita, malha apminyilhomap yoyam eyinyovacpoc sat acyanmongam solyayem. Incaymalhquic ematong as enlhit apminyilhma. Elmascos sat acmasom, acyitna inlhojo nipyesicsa quellhip. ,
8 Apnec sat ancoc enlhit ningmasquem ayajem lepra, elyiplovcasojo sat apcanamaclha sacerdote levita. Elyiplovcasojo sat mataa siyanamaclha siclho coo, ayinyema Dios. 9 Coyitnam apatic quellhip siclhoc nat ningmasquem ayajem María, payjoc nalhit amay apquilantiyapma nat yoclhilhma Egipto.
10 Apquiltamjoc sat ancoc poc israelita elyamong siclho solyayem apnaclha lhip, notingya nasa lhip prenda asoc acyanmongam congne tingma pac. 11 Ilalh sat amyip, esantac sat apvitip asoc acyanmongam prenda. 12 Apsantac sat ancoc apcalomap enlhit mepqui apquilnatam, etnejic prenda acyanmongam apmaycaoc nasa, itajicsojo sat apcalomap actalhnam ingyalacpojo sat alhtaa. 13 Natamin actalhnama acnim ingyalacpojoc sat mocjam enlhit mepqui apquilnatam, yoyam etyinic. Copayjiclhac sat apvalhoc maa, ayinyema actamila anco apquiltemaclha quellhip napato Dios.
14 Noelyimtalhnes nasa apquilvalhoc enlhit apquiltimesaycam nipyesicsa quellhip, najan aptimesaycam israelita, najan aptimesaycam metnaja israelita appalhaviyam nipyesicsa quellhip. 15 Elmesaoc sat acyanmongam apquiltimesaycam amamyi actalhnama acnim. Mepqui apquilnatam as enlhit, najan mepqui asoc, yoyam etingya nintom. Apquilmiyovquic sat ancoc quellhip, elsilhnanacpoc sat apanco quellhip napato Dios.
16 Mematnejec sat mataa enlhit, apvitacpo inlhojo apquitca apsilhnanomap apanco. Mematnejec sat apquitca, apvitacpo inlhojo apyap apsilhnanomap apanco. Moclhama ematong sat ayinyema apsilhnanomap apanco.
17 Eltime sat mataa apquilpeyvomo napatavo metnaja israelitas, najan napatavo apquilyeyjeycam, noeltingya nasa prenda acyanmongam acmaycaoc nasa tampeyi. 18 Noncolvonquim nasa quellhip, apquiltomja nat apquilmomap yoclhilhma Egipto, apyinyovquiscama nat as yoclhilhma Dios. Elyiplovcasojo sat mataa siyanamaclha coo — nic nat aptomjac Moisés.
19 Apquilaycmec sat ancoc trigo acyilhna macpilhquetem naysicsa apquiltamjaycam amyip, noeltajojo nasa amyip elvoclha macpilhquetem. Etac sat maa metnaja israelita, etac sat lhaja apyeyjeycam, cotac sat lhaja tampeyi. Epasmoc sat quellhip Dios, apvita inlhojo apquiltemaclha quellhip.
20 Noelsavojo nasa olivo acyilhna netin yamit, elayim sat nicja. Elvitac sat metnaja israelitas, elvitac sat lhaja apquilyeyjeycam, colvitac sat lhaja lhintampaa. 21 Noelsavojo nasa uva acyilhna netin avjac, elayim sat nicja. Elvitac sat metnaja israelitas, elvitac sat lhaja apquilyeyjeycam, colvitac sat lhaja lhintampaa. 22 Coyitnam apatic quellhip, apquiltomja nat apquilmomap yoclhilhma Egipto. Eycaso sicpayvam siyanamaclha quellhip, yoyam elyiplovcasojo.
Segánamakxa ekxeyenma nak negyamasma entáwa'
1 “Apmeyk agkok xama kelán'a énxet yaqwayam etnehek aptáwa', keñe ekmassa enxoho ekleya apwáxok eñama apwetasso xama aqsok ekmaso agko' élane, egkések sa' xama weykcha'áhak aptáxésso ekxeyenma nak negyamasma entáwa', keñe sa' yáphaksek katyapok ma'a apxagkok. 2 Awanchek sa' nahan kamekxak pók énxet natámen ekteyapma m'a apxagkok nak; 3 aptaqnawágwokmek sa' agkok nahan ma'a kaxwe ekmeykekxa nak, apmésa enxoho nahan ma'a xama weykcha'áhak ekxeyenma nak negyamasma entáwa', apcháphasa enxoho katyapok ma'a apxagkok nak, essenhan apketsapa enxoho xa kaxwe atáwa' nak, 4 keñe sa' ma'a apkemha apmonye' atáwa' axta, mopwanchek sa' emekxak makham, hakte ekmanyása agko' émpehek kaxwók entáhak ma'a; katnehek sa' xama aqsok ekmanyása agko' élánamáxche nápaqtók ma'a Wesse' egegkok, megkeymexchek kéxegke kóltawasha m'a apchókxa apméssamakxa nak Dios Wesse' kélagkok yaqwayam kóltéhek kélagkok kélagko'.
Segánamakxa mók ektémakxa nak chá'a
5 “Kaxwe élyamhopma sa' agkok xama énxet, mopwanchek sa' emhagkok ma'a émpakháxchexa enxoho, megyánékpek sa' nahan elánegwók aqsa chá'a mók aptamheykha ekweykmoho xama apyeyam; exek sa' aqsa chá'a apxagkok ekyókxoho xa xama apyeyam nak, yaqwayam sa' kapayhekxak awáxok ma'a aptáwa'.
6 “Nágkólmaxna chá'a kélmók ekyaqmageykekxa aqsok kélmassáseykha m'a aqsok aktek ektekxekxo kélyeykesso nak chá'a kélmek, essenhan ma'a meteymog kéltekxekxo nak chá'a aqsok, hakte máxa sa' katnehek kélmaxneya enxoho kéxegke ekmésso nak chá'a apto kélmók kéltáha enxoho xa ektáha nak.
7 “Kélwetágkok sa' agkok appósakxa xama appeywomo xamo' israelitas yaqwayam etnéssesek apchásenneykha naqsa essenhan yaqwayam eyenyekxak ekha ekyánmaga, yáneykpok sa' ematñekxa', yaqwayam sa' kólmasséssók aqsok ekmaso ekteyapma kélnepyeseksa kéxegke.
8 “Tekkek sa' agkok negmasse ektepelchamáxche nak egyempehek, kóllána sa' meyke kéláyam xama enxoho m'a aptáhakxa enxoho apmésso appeywa m'a apkelmaxnéssesso nak Dios énxet'ák apagkok levitas. Kéméxcheyk chá'a kóllának ekyókxoho ekhawo sektémakxa axta chá'a ko'o sélanagkama séltémókxa etnahagkok ma'a énxet'ák nak. 9 Kaxénwakxoho sa' kélwáxok apteméssessamakxa axta Dios Wesse' kélagkok María m'a ámay, cham'a natámen axta kélánteyapma kéxegke m'a Egipto.
10 “Kélmassáseyha sa' agkok chá'a xama aqsok kélagkok kélmók, nágkóltaxnegwom chá'a m'a kañe' apxagkok nak kóllekwók xama aptaxno, ekyaqmageykekxa m'a aqsok kélmassáseykha. 11 Kólchenegwom sa' aqsa chá'a m'a yókxexma nak, kólleyx sa' aqsa chá'a elekwakxések ma'a apáwa yaqwayam nak chá'a egkések ekyaqmageykekxa m'a aqsok kélmassáseykha. 12 Énxet meyke aqsok apagkok sa' agkok ma'a kélmók, nágkólmallahanchásekxa chá'a axta'a kélmeykha m'a apchaqlamap apmésso nak ekyaqmageykekxa m'a aqsok kélmassáseykha; 13 kólmeyásekxak sa' chá'a m'a amonye' ektaxnól'a ekhem, yaqwayam sa' yaqlakpok chá'a m'a apchaqlamap nak apmako enxoho etyenek. Keñe sa' egkések ekxeyenma apwáxok kéxegke m'a, keñe sa' kéxegke tásek katnehek kéllane aqsok nápaqtók ma'a Dios Wesse' kélagkok.
14 “Nágkólnaqtawasagkoho chá'a m'a énxet'ák meyke agko' nak chá'a aqsok apagkok, kólyánmagkas chá'a heykxe m'a ekyánmaga apkeltamheykha, cham'a xama kélókxa xamo' nak kéxegke essenhan ma'a énxet apkeñama nak mók apkelókxa apheykha nak chá'a pók xam'a m'a tegma apkelyawe kélagkok. 15 Kólyánmagkas chá'a apkeltamheykha yókxoho ekhem, amonye' enxoho chá'a yaqwayam kayaqtések, hakte énxet meyke aqsok apagkok ma'a, apmenyeyk chá'a xa selyaqye nak yaqwayam enxoho emha chá'a. Ewónmakha katnehek Wesse' egegkok eltennaksek kélteméssesakxa kéxegke megkólmésa enxoho chá'a ekyánmaga apkeltamheykha, keñe sa' kéxegke kalpehemmok kéllánéyak megkólya'assáxma.
16 “Metekyewekxeyk sa' chá'a apyapmeyk eñama apkelsexnenagko chá'a apkelánéyak aqsok ekmaso m'a apketchek, metekyewekxeyk sa' nahan chá'a kélketchek eñama apkelsexnenagko chá'a apkelánéyak aqsok ekmaso m'a apyapmeyk nak, xama xama sa' chá'a yetsapok eñama aptémakxa apagkok apagko' mey'assáxma.
17 “Nágkóltemésses chá'a xama enxoho megkapayhawo nak chá'a anteméssesek ma'a énxet'ák apkeleñama nak mók apkelókxa tén han ma'a élyéheykha nak, nágkólyementem nahan chá'a élnaqta ekyaqmageykekxa aqsok kélmassáseykha m'a xentampe'e nak. 18 Nágkalwagqamák kéxegkáxa kélteme axta kélásenneykha naqsa m'a kélheykencha'a axta Egipto, tén han apkelántekkessama axta Dios Wesse' kélagkok ma'a; cháxa keñamak séltamho nak ko'o kóllának ekyókxoho xa.
19 “Kéleykmók sa' agkok kéxegke xama kéltete kélyaqtónma hótáhap apaktek kélyekhámeykxo enxoho aqsok kélnakxo kélcheneykekxa m'a namyep kélagkok, nágkóltaqhoho aqsa kólwakxa'; kólnegkenekxa sa' aqsa chá'a yaqwayam elmok ma'a énxet'ák apkeleñama nak mók apkelókxa apheykha nak kélnepyeseksa kéxegke, essenhan ma'a élyeheykha nak, essenhan ma'a xentampe'e nak, yaqwayam sa' etaqmelchessesek chá'a Dios Wesse' kélagkok ma'a ekyókxoho aqsok kéllanakxa enxoho chá'a kéxegke.
20 “Kélnakxeyk sa' agkok ekyexna m'a olivo yámet kélcheneykekxa, nágkólchetámekxoho chá'a éleymomáxche enxoho m'a aktegák nak; kóltaqmelchesses sa' chá'a énxet'ák apkeleñama nak mók apkelókxa, tén han élyeheykha tén han xentampe'e m'a éleymomáxche nak ekyexna.
21 “Kélnakxeyk sa' agkok nahan ma'a anmen yámet kélcheneykekxa, nágkólchetámekxoho chá'a kéxegke xama enxoho éleymomáxche m'a xama awhak; kóltaqmelchesses sa' chá'a énxet'ák apkeleñama nak mók apkelókxa, tén han élyeheykha tén han xentampe'e m'a éleymomáxche nak. 22 Kaxén kéxegkáxa kélwáxok kélteme axta kélásenneykha naqsa m'a kélheykegkaxa axta Egipto; cháxa keñamak séltamho nak kóllának ekyókxoho xa.
