1 Elvitacpoc sat nipyesicsa quellhip profetas acvitay apquilvanmoncama, najan actemaclha asoc monquinatquiscama. 2 Eltimjic sat elanic: Noc, ontimjic sat ningayo quilaycmasquiscama mongyicpilquemo mocjam, actomja acyitsomalhca dios — sat eltimjic elanic. 3 Noelyejiclhojo nasa quellhip. Apquiltamjoc Dios elyipconic quellhip, eyasamcojo actemaclha apquilvalhoc quellhip najan apquilyiplovquiscama. 4 Eltime sat apquilayo apvamlha pac lhama Dios Apyimtalhnamo. Elsavojo apquilyiplovquiscama singanamaclha Dios, ellaylhojo appayvam, eltime apquilayo quellhip, noelyinyov nasa quellhip. 5 Etvasacpoc sat as profeta acvitay apvanmoncama, aptomja apquinmelhaycam Dios apyinyovquiscama nat yoclhilhma Egipto. Ematong sat as profeta aplhinganimquiscama quellhip apquilyamasma amay pac Dios Apyimtalhnamo. Elantipquis sat quellhip aptomja apmapsom nipyesicsa quellhip.
6 Elsilhnanacpoc sat quellhip ayinyema apquilsilhnanoncama apquilmolhama: apyalhing, najan apquitca, najan aptava, najan ingmoc. Elanyacpoc sat quellhip eltimjic apquilayo quilaycmasquiscama melyicpilquemo quellhip, najan melyicpilquemo apquilyeyjamcaa quellhip. 7 Quilaycmasquiscama apancaoc actomja apquilaoclha ningato najan mocjay, apquileyvam nipyava quellhip lhalhma anco. 8 Noelyiplovcasojo nasa apquiltemaclha apquilayo quilaycmasquiscama, noelpasmiclha nasa quellhip, elninquin sat ayalhnaclhojo aptemaclha apsilhnanoncama. 9 Elaa sat quellhip, ematong sat apsilhnanoncama, lhip sat apmamyi yoyam ingyajic, acyiplomo apyovoclhojo apquillhalhmaa. 10 Ingyaa sat lhip acvaycmo apquitsepma apsilhnanoncama, aptomja apmapsom napato Dios, apyinyovquiscama nat yoclhilhma Egipto aptimesaycam nat lhip. 11 Elyasingvomoc sat apyovoclhojo enlhitaoc Israel, elangvomoc sat elsilhnanacpoc apanco napato Dios.
12 Apquilvitacpec sat ancoc enlhit apquilsilhnanoncama melyajayquiclho Dios apnaycam tingma apquilvanyam 13 Elanic sat eltimjic apquilayo quellhip quilaycmasquiscama apancaoc, melyicpilquemo quellhip. 14 Elyasingvom sat actomja nasoc anco amyaa. Nasoc sat ancoc amyaa apquiltemaclha apnaymacoc apquilayo asoc actanovmalhca, 15 eticyoc sat enlhit apnaycam tingma apvanyam, najan apnatoscama yoyam coticyo, najan acyovoclhojo asoc. 16 Elicjecsic sat apquilnatam acyivey olhma centro tingma, elvitic sat talha apyovoclhojo tingma najan asoc apancaoc cotnaja ingmoc. Cotnejic sat ofrenda malvatnama talha macmescama Dios. Esovjacpoc sat aptovasomap tingma, melhejec sat mataa enlhit maa, mepqui apquillanayclha mataa as tingma.
17 Noeltime nasa apancaoc nicja apquilnatam, yoyam cosovjalhca talha. Comascoc sat aplom pac Dios, ingyasicjiclhojoc sat mocjam. Ellhamiclhac sat quellhip, acno aplhanma siclho Dios napatavo apquilyeyjamcaa quellhip. 18 Apquilyajaclhoc sat ancoc quellhip, apquilsovjoc sat ancoc apquilyiplovquiscama singanamaclha, siltimnascama quilhvo, apquiltomja inlhojo apquilpeyvomo napato Dios, elmiyovacpoc sat quellhip.
1 “Aptekkek sa' agkok kélnepyeseksa kéxegke xama apkeltemessásamap Dios appeywa aplegasso essenhan apxeyenma nak chá'a apwete ektémakxa apwanmagko, keñe eltennaksek chá'a aqsok magkenatchesso nak agweta' essenhan ma'a sempelakkasso nak agweta', 2 temék agkok ma'a aqsok apkeltennasso nak, keñe etnehek elának se'e: ‘¡Nók, ólyetlakxak pók kéláyókxa, megkólweteya nak kéxegke; ólpeykeshok sa'!’, 3 nágkólyahakxa aqsa. Hakte apmenyeyk elyepkeynek kéxegke m'a Dios Wesse' kélagkok yaqwayam ey'asagkoho naqsók kexa kélásekhayo ekweykmoho kañók agko' kélwáxok tén han ekweykmoho m'a élchetámeykegkaxa nak kélwáxok. 4 Kólyetlow chá'a m'a Dios Wesse' kélagkok, kólteme chá'a wánxa kélyeheykekxoho m'a; kóllána chá'a m'a apkeltémókxa nak chá'a antéhek, kóleyxho chá'a m'a appeywa, kólpeykesho nahan chá'a; kólyepetchaha nahan chá'a m'a. 5 Yánékpok sa' eyke ematñekxak xa apkeltemessásamap nak chá'a Dios appeywa aplegasso tén han ma'a apxeyenma nak chá'a apwete ektémakxa apwanmagko eñama apkeltémo kólenmexekxak ma'a Dios Wesse' kélagkok, ektáha axta apkelmallahanchesso ektémakxa ekyentaxno kélásenneykha naqsa m'a kañe' Egipto, tén han eñama apkeltémo elyetnakhássók kéxegke m'a ámay apkeltémókxa nak chá'a kólyetlók ma'a Dios Wesse' kélagkok. Keñe sa' kólmasséssók kéxegke aqsok ekmaso ekteyapma kélnepyeseksa.
6 “Apyexákpók sa' agkok nahan yának elpeykeshok pók kéláyókxa méteya nak xép tén han melweteya axta m'a apyapmeyk nano', cham'a apyáxeg apagko' nak essenhan ma'a apketche apkenna nak, tén han ma'a kelwána nak, essenhan ma'a aptáwa' apchásekhayo nak, essenhan ma'a pók meyenyaweykha apagko' nak chá'a, 7 cham'a aqsok apcháyókxa nak chá'a m'a énxet'ák, apheykha nak chá'a keto' tén han ma'a makhawo nak, apwakhaya nak kélheykegkaxa ekweykekxoho m'a makhawo nak mók nekha nak xapop, 8 nágyoho aqsa etnéssesek ma'a ekxénakxa enxoho apwáxok etnéssesek, ná elyahakxa nahan; nágkapyósho nahan elano', nágkaqha nahan apwáxok elano', ná ekpós nahan; 9 yaqha sa' chá'a. Xeyep sa' nahan etnehek apmonye' apyenha meteymog, keñe sa' axayók etnahagkok ma'a apyókxoho énxet'ák nak. 10 Elyetna sa' meteymog ekwokmoho apketsapa, eñama apmopmenyého ényókasek ma'a Dios Wesse' apagkok, ektáha axta aptekkesso m'a Egipto, aptémakxa axta kélásenneykha naqsa. 11 Elya'ásegwók sa' apyókxoho énxet'ák Israel xa, keñe sa' yeygkok chá'a elanagkokxak aqsok ekmaso ektéma nak xa.
12 “Legáxcheyk sa' agkok nahan amya'a pók xam'a tegma apkelyawe apméssamakxa nak Dios Wesse' apagkok yaqwayam exek, apkelántepa 13 énxet, melyeheykekxa nak Dios, apkelyetnakhásseyam nak apnámakkok apheykha nak ma'a kañe' nak tegma apwányam, apkelyáteyeykegkoho nak yának elpeykeshok ma'a pók kéláyókxa melya'ásegko nak, 14 kéméxcheyk kéxegke kóltaqmelcheshok sekxók kóltegyaha amya'a. Naqsók sa' agkok entáhak ma'a amya'a eklegamaxche tén han élánéxko kélnepyeseksa kéxegke m'a aqsok ektaqnómaxkoho nak, 15 kólnápekxa sa' énxet'ák apheykha nak xa tegma apwányam nak ekweykekxoho m'a ekyókxoho aqsok apnaqtósso, sókwenaqte sa' chá'a kólyetxa', kólsawhohok sa' kólmasséssók ekyókxoho aqsok ekhéyak nak ma'a kañe'. 16 Kólánchásekxak sa' ekyókxoho aqsok apagkok élmomnáwa m'a neyseksa nak apheykegkaxa chá'a énxet elweynchamha, keñe sa' kólwatnek ma'a tegma apwányam tén han ma'a ekyókxoho aqsok kélyementaméyak nak ma'a kélenmexma, kólmasséssók sa' ekyókxoho kólteméssesek kélmésso naqsa aqsok ekwatnamáxche m'a Dios Wesse' kélagkok. Meyke néxa apxámokma tegma aphopák sa' etnehek xa tegma apwányam nak, megkólxátekhásekxók sa' chá'a.
17 “Nágkólmekxa aqsa kéxegke xama enxoho m'a aqsok élxénamaxche nak kólmasséssók, keñe sa' meltaqnaweygkehek chá'a kéxegke m'a Wesse' kélagkok; kélyósekak sa' chá'a elano', exámásekxak sa' nahan, ekhawo m'a apkeltennassama axta etnéssesek ma'a kélyapmeyk nanók axta kéxegke, 18 kélyahákxoho enxoho chá'a m'a Dios Wesse' kélagkok tén han kéllana enxoho chá'a ekyókxoho m'a apkeltémókxa nak chá'a antéhek séltennasa exchek ko'o kéxegke s'e sakhem nak, tén han kéllana enxoho chá'a nápaqtók ma'a aqsok ekpéwomo nak.
