Solyayem acninquinomalhca yoyam ellhovac ingilyipmaa
1 Am oltamjoc otalhosquisic mocjam actemaclha solyayem acninquinomalhca yoyam ellhovac ingilyipmaa. 2 Ayinyemaclha acyasamcoc coo actemaclha apquilmajayo mataa quellhip elninquinic solyayem. Actomjac alhta mataa silanya ingilyalhinga co Macedonia: “Apninquinquic mataa solyayem ingilyalhinga co Acaya ayenmo año alhta” —alhta actomjac silanya. Apquilvajanamquic co Macedonia actemaclha apquilvascapma quellhip. 3 Alapajasquic as ingilyalhinga nipyesicsa quellhip yoyam am cotnejec alhto actemaclha siyayo quellhip. Altamjoc coo yoyam elpenacsojo quellhip apnincanma solyayem. 4 Incacoc enquenyic melpenacsoy quellhip ningvoclho inlhojo nipyesicsa quellhip, sellhalhmaa napocja ingilyalhinga co Macedonia. Ongilmancac sat nincoo. Jave lhaja yoyam ongilmancac nincoo, quellhip eyca yoyam elmancac. 5 Eycaso ayinyema silapajascama apquilmamyi as ingilyalhinga. Altamjoc coo yoyam elyacsic tingma Corinto, yoyam elpenacsojo elansiclha solyayem acninquinomalhca. Ayinyemaclha apquillhenquic alhta quellhip yoyam elpenacsojo elansiclha. Altamjoc ongvajojo ovoclha nipyesicsa quellhip acpensalhco mayansayclha. Altamjoc yoyam colpayjiclha apquilvalhoc naysicsa apnincanma quellhip, malha macmescama Dios. Am oltamjoc elninquinic quellhip naysicsa acyimtalhnama apquilvalhoc.
6 Elyasamcojo quellhip: Ninginaclhec sat ancoc anit actic, anit sat najan cotnejic acyilhna. Avanjec sat ancoc ninginayclha actic, avanjec sat najan cotnejic acyilhna. 7 Moclhama quellhip incaymalhquic elninquinic acyiplomo acpayjayclha apquilvalhoc. Apcasicjavoc Dios ningiltomja ningnincanma acyiplomo acpayjayclha ingvalhoc. 8 Apvanquic Dios elmesic apcaycaoc quellhip actemaclha acyeycajangvaycmo. Coymalhquejec sat mataa quellhip lhama asoc. Coytic sat najan asoc quellhip yoyam elninquinic mataa, yoyam elpasmoc apnaymacoc. 9 Intomjac nic nat Dios appayvam actalhesomalhca:
Avanjec alhta apcamliyam Dios yoyam ellhovac asoc enlhit mepqui apquilnatam.
Comasquingvomejec sat aptemaclha actamila cotmongvoycamlha nelha
—nic nat intomjac.
10 Dios aptomja singmescama mataa actic yoyam onginiclha. Dios aptomja singmescama nintom yoyam ontovamcoc. Dios sat elmesic quellhip asoc ayaymomalhca yoyam ecnamcoc. Ingyictingsic sat apquinaycaoc yoyam elvitac quellhip cotlaycaoc acyilhna acvisay nintemaclha actamila. 11 Coytic sat quellhip aclhamoclhojo asoc altamila. Colpayjiclhac sat apquilvalhoc quellhip naysicsa apnincanma asoc yoyam elpasmoc poc. Coyiplovjoc sat apquiltimem gracias aplhamoclhojo naysicsa apquillhoy apcaycaoc ayinyema quellhip. 12 Apquilapajascasquic quellhip apcaycaoc yoyam casilhtojoc ayaymomalhca asoc ingilyipmaa tingma Jerusalén. Jave acvamlha yoyam casilhtojoc ayaymomalhca asoc. Eyca yoyam coyangvomoc acpayjayclha apquilvalhoc naysicsa apquiltimem gracias Dios Ingyapam. 13 Eltimjic sat apquilayo Dios ayinyema apquillhoy apcaycaoc apquilapajasquiscama quellhip. Cotalhcac sat actemaclha apquilyajayquiclho quellhip tasic amyaa ayinyema Cristo. Cotalhcac sat actemaclha apquilpasmeyquiclha quellhip ingilyipmaa najan poc Jesucristo apmolhama. 14 Ingilyipmaa sat elilmalhnesquisic quellhip. Eliltamjoc sat ingilyipmaa elvitac quellhip. Apquilvitac ingilyipmaa actemaclha apquillhoy Dios apcaycaoc. 15 Gracias actomjac coo Dios Ingyapam ayinyema singmescama cotlaycaoc singaycaoc, mongvanquejec ongilyipsitic.
Aqsok kélánchessáseykekxa ẽlyáxeg'a
1 Megkeyméxchek alenxanmohok sektáxéssesso kéxegke yaqwayam altennaksek ma'a kélánchessáseykekxa nak aqsok ẽlyáxeg apteme nak melya'ásseyam, 2 hakte ekya'ásegkók ko'o kaxwók ekyetnama kélmámenyého kóllának kéxegke xa. Wánxa chá'a ko'o atnehek alának yetlo eyaqheykha ewáxok énxet'ák apheykha nak Macedonia, axta kéleynamók kéxegke kélpenchessamo yaqwayam kólpasmok kélnámakkok ma'a pók apyeyam axta, kéxegke kélheykha nak Acaya. Apyókxoho énxet Macedonia axta nahan apmáyheykegkohok ewhánhok kéxegke m'a aqsok ektaqmela kélmáheyo axta kóllána'. 3 Éláphássessek eyke ko'o kéxegke s'e ẽlyáxeg'a nak, yaqwayam enxoho megkatnehek eyaqhémo m'a sektémakxa nak chá'a sekxeyenma ektaqmela kéxegke, sekxéna enxoho chá'a xa aqsok nak, yaqwayam enxoho kóltéhek chá'a ekmámnaqsoho kélláneykekxa kéltáhakxa, 4 hélyetlók kexaha katnehek ko'o nápakha énxet'ák apkeleñama nak Macedonia, keñe elwetágwak kéxegke megkólláneykxo kéltáhakxa. Ólmegqeyk negko'o ektáha enxoho xa, hakte awanhek negko'o negáyo kéxegke; awanhók agko' eyke katnehek kélmegqakto kéxegke. 5 Cháxa keñamak ekxéna nak ko'o ewáxok eyéméxko sekxók ko'o wának etnehek meyk'a apmonye'e kéxegke xa ẽlyáxeg'a nak, keñe anhan epasmok yaqwayam kólpenaksek kéxegke kéláncheseykekxa m'a aqsok kélxeyenma axta kólánchesekxa'. Keñe sa' kataxchek kéxegke megkólmeyágweykekxa kélnegkenma m'a aqsok kéláncheseykekxa nak, háwe neyseksa kélmeyágweykekxa'.
6 Kaxénwakxoho sa' kélwáxok se'e: Énxet ektáhakxa enxoho apkeneykekxa ántawók aqsok, ántawók nahan katnehek apnakxo ekyexna; keñe m'a ektáhakxa enxoho apkeneykekxa ekxámokma aqsok, xámók katnehek apnakxo ekyexna. 7 Xama xama chá'a kéméxcheyk egkések aqsok ma'a ekxénakxa enxoho apwáxok egkések, meyke ekyetnakhayo apwáxok tén han meyke kélyáteyeykegkoho, hakte yásekhohok chá'a Dios ma'a énxet apmésso nak chá'a aqsok yetlo ekpayheykekxa apwáxok. 8 Apwanchek egkések kéxegke Dios ekxámokma ekyókxoho m'a mók ektémakxa nak chá'a aqsok segmésso naqsa, yaqwayam enxoho keytek chá'a kéxegke m'a ekyókxoho aqsok eyeyméxchexa nak, kayeykhágwomhok nahan chá'a, yaqwayam enxoho kólpasmok ma'a ekyókxoho ektémakxa nak nentamheykha ektaqmela. 9 Temék eknaqtáxésamaxche weykcha'áhak se'e:
“Apkelmeyáseykegkek
ekxámokma agko' aqsok ma'a
meyke nak aqsok apagkok,
megkamassegwomek nahan
chá'a m'a aptémakxa nak
memyágweykekxa aqsok.”
10 Dios, apkelméssamól'a chá'a aqsok aktek yaqwayam kólchenekxa', tén han ma'a nento yaqwayam nak chá'a katawaxche', sa' elmésagkok kéxegke ekyókxoho eyeyméxchexa nak chá'a yaqwayam kólchenekxak ma'a, yektegkessesek sa' nahan, exámásseshok apagko' sa' nahan kélnakxo m'a aqsok ekyexna kélcheneykekxa, eñama megkólmeyágweykekxa aqsok kélagkok. 11 Keñe sa' kaxek kéxegke ekyókxoho mók ektémakxa nak chá'a aqsok kélagkok, kélwanchek sa' nahan chá'a kólmések yetlo meyke kélmeyágweykekxa'. Keñe sa' ma'a aqsok kéláncheseykekxa nak kéláphasso kéxegke, peya nak hẽlásenneykxak negko'o yaqwayam ansakxa', katnehek sa' apkelmésso élxeyenma apkelwáxok Dios ma'a ẽlyáxeg'a. 12 Hakte, háwe ekwánxa agkok negko'o peya ansakxések ẽlyáxeg'a m'a aqsok eyéméxchexa nak, cham'a peya nak ansakxések negko'o aqsok kélánchessáseykekxa nak kéxegke, yaqwayam nahan kañék apkelmésso élxeyenma apkelwáxok Dios ma'a. 13 Elteméssessek sa' nahan apcheymákpoho Dios ma'a énxet'ák nak, hakte cháxa kélpasmo nak, sa' kañék apkelwete kélyaheykekxoho kéxegke m'a amya'a ektaqmela kélxekmóssama nak chá'a kélyetlo, cham'a amya'a ektaqmela eñama nak Cristo. Apcháyo sa' nahan etnahagkok Dios xa énxet'ák nak, eñama m'a megkólmeyágweykekxa nak kélánchessáseykekxa aqsok kéxegke m'a, tén han ma'a apyókxoho énxet'ák nak. 14 Elmaxnéssesek sa' nahan chá'a kéxegke yetlo apkelásekhayo, eñama apxekmósso ekyawe agko' apkelásekhayo kéxegkáxa m'a Dios. 15 Negméssek negko'o ekxeyenma egwáxok Dios, hakte egméssek negko'o aqsok segmésso naqsa ekyawe agko' magmowána nak anxének ektémakxa'.
