Nélmaxnagko eñama ekmaso negha
1 Dios ahagkok,
hewagkas ko'o teyp,
hakte ketók ko'o
sekweyweykegkaxa;
2 ekweywegkek ko'o kañe'
yáma yelpa' ekmattawóneg,
méko sélteyagwánxa.
Ekwokmek ma'a éttawanyexa
agko' nak yegmen,
éñawássek yegmen ényé.
3 Wagqakmek eyespok
ekpayheykha ahátog;
chássek eyespok;
¡kelyampa'ak ahaqta'ák
séltémo ótak exegmak Dios!
4 Apxámok apagko' ma'a
setaqnagko nak chá'a
meykexho sektáhakxa',
apyeykhágweykmok ma'a
ekwánxa nak ekxámokma éwa';
apxámágkek apagko'
ma'a sélenmexma,
apmáheyo nak
chá'a hemasséssók
meykexho sektáhakxa,
apkeltémók han chá'a
almeyásekxak ma'a
aqsok megkatnaha
nak sélmenyexma.
5 Dios ahagkok,
apya'ásegkok xép
sektéma seyeyháxma ahagko';
mowanchek akpósek may'assáxma.
6 Wesse' Dios
ekha nak apyennaqte,
¡nágyoho aqsa elmegqeyk ma'a
apcháyo nak chá'a exchep
eñama ko'o sélsexnenagko!
Israel Dios apagkok,
¡nágyoho aqsa
kalyaqhapwomhok apkelwáxok
apketamsamo apagko'
nak chá'a exchep,
eñama ko'o sélsexnenagko!
7 Élmalláneykegkek
ko'o sektaqnómaxche',
eñama sekyetleykha exchep;
ekmegqaktegke';
8 ¡máxa mók nekha
séñama etnéssessók
ma'a élyáxeg'a
ahancha'awo' nak,
máxa mehey'ásegko
aptemék ma'a
énámakkok nak!
9 Magwéssók ko'o
sélmeyeykencha'a m'a
apxagkok nak xép;
epheweykekxeyk ko'o
sénmexeykha m'a
apxéneykha nak chá'a
ekmaso exchep.
10 Élekxagweyha agkok
chá'a yetlo mato sekto,
hésmaksek chá'a;
11 ektaxneykxeyk agkok
nahan chá'a m'a
apáwa senlapwayam nak,
hésmaksek chá'a
m'a apyókxoho nak.
12 Hexénmakha chá'a,
elanagkok chá'a
apkelmeneykmasso
hexének ma'a anmen át'ák nak.
13 Wesse', ekwóneyha
eyke ko'o exchep.
¡Dios ahagkok,
hepásem kaxwo'!
¡Heyátegmowák,
eñama ekyawe segásekhayo!
¡Hewagkas teyp, eñama
melwátésseyam sempasmo!
14 ¡Nágyoho ko'o
aweywagkok negyelpa'!
¡Hewagkas ko'o teyp
nepyeseksa m'a
setaqnagko nak chá'a,
tén han ma'a yegmen
ekmattawóneg nak!
15 ¡Nágyoho heswok
yegmen ényé!
¡Nágyoho heweykesagkok
ma'a yegmen ényé
ekyéhegwayam ekyennaqte nak,
tén han heyápekxa'!
16 Wesse',
heyátegmowák ko'o,
¡tásek xép apwáxok,
awanhek han segásekhayo!
hepásegwata ko'o, eñama
ekyawe apmopyósa henlano';
17 ¡ná etne aqsa mehelányo,
ko'o sektáha nak xép apkeláneykha!
¡Heyátegmowák sa' heykxa',
asagkek ko'o setnahakxa!
18 ¡Hépetchegwatámho,
hewagkas teyp
nepyeseksa sélenmexma!
19 Apya'ásegkok xép
seklegeykegkoho m'a
sektaqnómaxche',
tén han sekmegqakto,
tén han sélxéneykha ekmaso;
apya'ásegkok xép ma'a
sélenmexma nak.
20 Etwassáseykha
ko'o ewáxok ma'a
sektaqnómaxche';
¡eyélaqtéssegke', meyke
sekyennaqte etnéssessók!
Chaqhémok sektegyeykencha'a
yaqwayam hepeykessásekxak
ewáxok, tén han kapyósho hélano'.
21 Pánaqte segaqhamo chá'a
hénchahassásekxak sekto,
hem agkok han chá'a eyaqhak,
heyagkok chá'a m'a
aqsok égmenek
ekmáske amnáye nak.
22 ¡Yána katnekxak
aqsok ekmaso m'a
aptéyak nak,
yána katnekxak ekho
kelhanma m'a mésa apagkok!
23 ¡Yána katnahagkok
meyke apaqta'ák,
tén han kalpexyennamok
apyay'ák meyke néxa!
24 Eyenyenta aplo
nepyeseksa m'a;
¡káhapwaták sa' ma'a
aplo ekyennaqte nak!
25 Meyke xama aqsok
sa' katnekxak ma'a
apheykegkaxa nak,
méko sa' kaxek ma'a
apkelpakxeneykegkaxa nak;
26 hakte apkelenmexeykha
chá'a m'a apkellegassáseykegkoho
nak xép apkelwáxok,
apkelasméssegkek han
chá'a apkelweteya m'a
apkellegeykegkoho nak ekmáske,
apkelyensáséyak nak xép.
27 Exnésho ekmaso
apkellegassáseykegkoho
ektémakxa ekmaso apkeltémakxa;
¡nágyoho elwetak
megkólyaqmagkáseykekxa apkeltémakxa!
28 ¡Emassés apkelwesey
m'a weykcha'áhak
eknaqtáxésamaxchexa
nak apkelwesey m'a
élyennaqte nak apnegya'ák!
¡Ná enaqtáxéssesák
apkelwesey m'a
ekheykegkaxa nak
apkelwesey m'a
énxet'ák apkelpéwomo!
29 Ko'o eyke,
hexneyásekxa néten
Dios ahagkok,
sektáha nak sekháxamáxche',
tén han ekyentaxno ewáxok,
hewagkas teyp.
30 Anneykmaksek sa'
ko'o negmeneykmasso
axének Dios apwesey;
alpeykeshok sa'
yetlo sekmésso ewáxok,
31 kayágwomhok sa'
ekleklamo apwáxok
Wesse' egegkok,
megkaxók sa' ma'a
sekmésa enxoho
xama weyke
kennawók seyaqhe,
essenhan weyke yágkelwána
yetlo kepet'ák nak,
tén han aphék.
32 Kalpayhekxak
sa' apkelwáxok
apkellegeykegkoho
nak ekmaso apheykha
apkelwet'a enxoho xa,
kalyennákxohok sa'
apkelwáxok apkelchetamso
nak chá'a Dios;
33 yeyxhok chá'a
apkelmaxneyéyak
Wesse' egegkok ma'a
apkelmopyóseka nak,
meltaqheksók chá'a
énxet'ák apagkok
apkelmomap nak.
34 ¡Néten, xapop,
wátsam ekwányam,
kóltemésses apcheymákpoho
Wesse' egegkok,
tén han ma'a ekyókxoho
ektáha nak chá'a
élweynchámeykha m'a!
35-36 Hakte ewagkasek
sa' teyp Dios ma'a Sión,
enaqxátehásegkokxak
sa' ma'a tegma
apkelyawe nak Judá.
Apkeláneykha apketchek
sa' elxewekxak ma'a
tegma apwányam;
sa' exmakha m'a,
apagkok sa' etnehek;
¡sa' exmakha chá'a
apchásekhayo nak
chá'a apwesey!
Actemaclha ayay ingvalhoc
1 Dios Visqui ingac.
Jevomquis tap coo.
Acvayvamquic coo yingmin.
2 Acvayvamquic coo yelpa acmam emancoc (mepqui siyinmaycam).
Congnoc anco yingmin ayinyem.
Actomja seyinyovascama yoyam jeyajic.
3 Asquejec eyispoc ayinyema sicpalhamaycam yoyam jepasmoc.
Inmasquec sicvitay olhma ayinyema acyivey siljalhanma lhip yoyam jepasmoc.
4 Aplhamoc mataa seltanoncama, mongmovan ongilyipsitic.
Aplhamoc mataa seltovascama enlhitaoc selinmelhaycam yoyam jelajic.
Ayanyalhquic coo otajicsojo asoc mepqui sicminyilhma coo.
5 Dios Visqui ajac.
Apyasamcoc lhip sictemaclha ajanco.
Pac olhenic sicsilhnanomalhca ajanco.
6 Apmopvan innac lhip Dios Visqui ingac.
Nongyane nasa elvatsamcoc enaymacoc melyasquiyam, apquilvita inlhojo sictemaclha ajanco.
Lhip Visqui apancaoc Israel apquilmolhama.
Nongyane nasa elmancangvomoc apquilquitamsama lhip.
7 Invennalhquic evalhoc coo ayinyema lhip apvisay.
Inmancaquic evalhoc coo.
8 Malha motnaja sicmolhama coo nipyesicsa elyalhinga (meme ayitquic).
9 Eyamposquic coo sicvascapma omyoc lhip tingma pac.
Aclingamcoc coo sevenneycam ayinyema enlhitaoc apquilantipquiscama lhip apvisay. ,
10 Acvinec mataa coo. Paj otavac coo.
Aclingamcoc sevenneycam apquilmapsomcaa.
11 Ayalalhquic ajanco apava appasyam.
Inyiplovcoc selasmescama coo.
12 Intipsalhquic sicvisay lhalhma anco.
Najan maa nipyesicsa anmin ató.
13 Lhip Dios Visqui ajac.
Ingyeylhojo silmalhnancama. Jepasim coo.
Jeyatingmam lhip aptomja seyasicjayo.
Jemyov coo, lhip aptomja sepasmom.
14 Nongyane nasa ovayvamcoc.
Jemyov coo napatavo seltanoncama.
Jemyov coo naysicsa sicvayveycaoc.
15 Jemyov coo seyinyovasa yingmin ayinyem.
Jemyov coo acyitnamaclha malhic.
16 Jeyatingmam Visqui ajac.
Aptasi nac lhip, aptomja seyasicjayo.
Jelanojo yoyam jepasmoc quilhvo nac jay.
17 Coo sicvisay silancam lhip.
Nojeyinyov nasa coo.
Avanjec ayay evalhoc.
Jepasingvota quilhvo nac jay.
18 Imyama sicnaclha coo. Jevomquis tap coo.
Jemyov sat coo napatavo cotnaja ingmoc (selinmelhaycam).
19 Apyasamcoc lhip apquiltemaclha sevennéycam najan semanquescama.
Apyasamcoc lhip apquiltemaclha selinmelhaycam yoyam olngamcojo.
20 Invennalhquic evalhoc coo.
Asquejec evalhoc coo ayinyema seltanoncama.
Mepqui lhama enlhit aptamilquisquiyam evalhoc.
Mepqui lhama enlhit seyapeycam.
Alhto inyicje sicsovjam - paj.
21 Elmesquic alhta sictom ayincajay panatem veneno.
Elmesquic alhta sicyam ayincajay uva ayingmenic acmasca.
22 Elsilhnanacpoc sat apanco naysicsa aptoycaoc apquilpasmeyquiclha.
Malha trampa quiljanma sat cotnejic, yoyam enatovasacpoc.
23 Ingyane sat eltimjic mepqui apataoc.
Ingyane sat eltimjic mepqui apyavaoc (melyimnatem).
24 Ingyane sat ellingamcojo lhip aplom.
Ingyane sat ellingamcojo apyanmongsayclha lhip apquiltemaclha apancaoc.
25 Ingyane sat cotniclha yoclhilhma actamopeycaoc tingma apancaoc.
Mepqui enlhit sat cotnejic apquilmaclha siclho (aplhanaoc).
26 Apquilya'masquic mataa aptomja apquillingaycamco apyanmongsayclha Dios.
Apquilasmasquic mataa apquillingaycamco acmasca, lhip apyimsascama.
27 Iyanmongsiclha sat lhip apquiltemaclha apquilsilhnanomap apanco.
Nongyasicjiclhojo nasa mocjam apquilmapsomcaa.
28 Imascos sat apquilvisay acnatalhesamalhca vaycajac pac Dios.
Cotalhquejec sat mataa apquilvisay alpalhquemalhca apquilpeyvomo.
29 Coo eyca mepqui sicyimnatem.
Asquejec mataa eyimpejic.
Dios Visqui ajac.
Jepasingvota coo. Jemyov coo.
30 Omnaycmacsic sat naysicsa siyayo apvisay Visqui ingac.
Omnaycmacsic sat naysicsa siyayo apyimtalhnamo.
31 Eycaso apyisponcama Visqui ingac.
Am eyispac mataa vayqui inquinavo acma inquipitaoc najan apjeoc.
32 Colpayjiclha sat apquilvalhoc, apquilvita inlhojo acjalhemalhca apquilvalhoc.
Covascapoc sat apquilvalhoc apquiltingyey aptemaclha Dios.
33 Apjalhnoc mataa Visqui ingac apquilpayvam apquillingaycamco mepqui asoc.
Am evennam mataa apnaymacoc apquillingaycamco apquilmomap.
34 Eltime sat apquilayo Visqui ingac quellhip apnaycam netin.
Najan apyovoclhojo apquileyvam nalhpop.
Najan acyovoclhojo asoc aleyvam yingmin acvanyam (acyitnamaclha yingmin).
35-36 Dios Visqui ingac elvomsic sat tap apnaycam tingma Sión.
Ellaniclha sat mocjam tingma apancaoc Judá apquilmolhama.
Elhnam sat as tingma Dios apquilancam apquitquic.
Elhnam sat maa apquiltomja apquilasicjayo apvisay Dios Visqui ingac.
