Aptémakxa ekmaso énxet
1 Kapaqhetchesek chá'a
kañók agko' apwáxok
mey'assáxma m'a
énxet ekmaso nak aptémakxa.
Megkaxének chá'a apwáxok
yeyk ma'a Dios.
2 Yának chá'a kapayhawok
kataqmelek apxénamap,
mey'asagkehek chá'a
kataxchek ma'a
aptémakxa ekmaso.
3 Asagkók chá'a
katnehek appeywa,
apmopwána amya'a han,
massegkek apya'áseyak exma,
apkelwátessegkek apkelane
aqsok ektaqmela.
4 Apyetneyk agkok chá'a
néten apyetnamakxa,
kaxének chá'a apwáxok
elának aqsok ekmaso,
yennaqtegkek aptémakxa ekmaso,
mopmenyeyk elwataksek
apkelane aqsok ekmaso.
5 Wesse',
weykmók eyke exchep
segásekhayo m'a néten,
weykmók ektémakxa
mehenyenyaweykha m'a
yaphope ekyápaqmate nak.
6 Máxa eyke meteymog
élyawe élekhahéyak la'a m'a
aptémakxa ekpéwomo;
máxa eyke wátsam
ekwányam ekmattawóneg la'a
m'a apchánamakxa nak antéhek.
Wesse', xép apkeláneykha énxet'ák,
tén han aqsok nawha'ák.
7 Oh Dios,
¡tásók agko' nak la'a exchep
ektémakxa segásekhayo!
¡Apkelyexánegweykekxeyk
chá'a exchep aphakxa m'a énxet'ák,
cham'a kóneg apxempenák nak!
8 Etawagkok chá'a
aptéyak éltaqmela,
ekhéyak nak ekxámokma
m'a apxagkok;
elagkok chá'a exchep
yegmen ekmátsa
eñama nak ma'a wátsam
apagkok ektaqmalma,
9 hakte xép apteme
ekteyapmakxa negyennaqte,
élseyéxma apagkok
keñamak negmowána agwetak
negko'o m'a élseyéxma nak.
10 Egkés chá'a
apchásekhayo,
tén han aptémakxa
ekpéwomo m'a
ektáha nak chá'a
apyekpelchémo exchep,
cham'a énxet'ák
meyke nak apkeltémakxa.
11 Nágyoho hetnessásekxak
kóneg ma'a apkeleymákpoho nak,
nágyoho heyaqmaksek
énxet'ák élmasagcha'a
nak apkeltémakxa.
12 ¡Kóllano ektáhakxa
appalleyam ma'a
énxet'ák élmasagcha'a
nak apkeltémakxa!
¡Appallakme',
menaqxétekhagkokxeyk chá'a!
Enlhit aptemaclha najan Dios aptemaclha
1 Aptemaclha enlhit apmapsom ayinyema apvalhoc acmasom.
Mepqui ayay apvalhoc napato Dios Visqui ingac.
2 Ayajamalhco apvalhoc apanco.
Apposquic mataa aptemaclha apsilhnanomap apanco.
Apcanayquic mataa cotamalhca apvalhoc apanco.
3 Acmasom mataa appayvam.
Aptomja apmopvan amyaa.
Apquilvatasquic mataa aptemaclha actamila.
4 Yitnec alquitamsama apvalhoc acmasom apyitnama aptajanma.
Apyiplovcasquic mataa actemaclha acmasom mepqui ayay apvalhoc.
5 Dios Visqui ingac.
Cotningvoyam nelha lhip apcasicjayo (acvaycmo netin).
6 Lhip aptemaclha appeyvomo, cotningvomeje nelha.
Lhip singyicpilquemo, cotningvomeje nelha.
Lhip aptamilquiscama enlhitaoc as nalhpop najan asoc navjac.
7 Lhip aptemaclha singasicjayo.
Sas anco, am colhno lhalhma anco.
Lhip aptomja singyilhanmeycam, malha coning aplhimpancoc.
8 Cotlaycaoc mataa nintom ayinyema lhip tingma pac, mepqui ninsovjomo.
Singmescama ningyam yingmin actamila ayinyema vatsam.
9 Apnaclha lhip ningvita actiyapmaclha yingmin acyimnatescama ingnenyic.
Apnaclha lhip ningvita singatsiscama olhma.
10 Ilimlimojo sat lhip ingnaymacoc apquilyiplovquiscama lhip aptemaclha.
Ilasicjojo sat lhip ingnaymacoc acyitna actamilaycam apquilvalhoc.
11 Nongyane nasa jesilhnana enlhit ayajamalhco apquilvalhoc.
Nongyane nasa jelya'macsic enlhit apquilmapsomcaa.
12 Quip elanojo apquilpilapiyam enlhit apquilmapsomcaa.
Quip elanojo, colapvanquejec elimpiclha mocjam.
