Ana ekmeneykmasso
1 Axta entáhak élmaxnagko Ana s'e:
“Wesse' ahagkok,
epeykessásekxók agko'
ko'o exchep ewáxok,
hakte egkeyásekxeyk
makham axnagkok sekyennaqte.
Ewanchek alyamatchesha
m'a katnaha nak énámakkok
hakte xép apteme sepasmo.
¡Payhékxeyk ko'o ewáxok!
2 ¡Wesse' ahagkok,
méko ekhawo exchep
ma'a aptémakxa nak
appagkanamap!
¡Dios egagkok,
méko exchep ekhawo
ektémakxa nak segmasma!
¡Méko ekhawo exchep!
3 Méko sa'
keyxkohok ekpeywa
kapaqmeyesmakha,
méko sa'
kapaqmeyesmakha
kaxénaxchekxohok agko',
hakte Wesse' egegkok
apteme Dios
apya'áseykegkoho
ekyókxoho aqsok,
cha'a apkelyetsátéyak chá'a
aqsok apkelane nak énxet
tén han apkelyekpelchémo.
4 Cha'a apkelekkexchesso
chá'a yágke apagkok ma'a
kempakhakma yapmeyk
apkelyennaqte nak,
tén han apmésso
apkelyennaqte m'a
apkelyelqamákpoho nak;
5 énxet'ák
apkelyaqkáneykmoho
axta chá'a,
aptegyágkek kaxwók
apkeltamheykha
yaqwayam elwetak
ketsék aptéyak;
keñe m'a
élnápeykha
axta chá'a meyk,
massék kaxwók
élnapma meyk.
Keñe m'a kelán'a
megkate axta étchek,
siete aptáhak
ekwete étchek;
keñe m'a apxámokma
axta chá'a ekwete étchek,
méko kaxwók xama
enxoho étchek.
6 Hegmések chá'a
nétsapma Wesse' egegkok,
hegmések nahan
chá'a negyennaqte;
hegáphaksek chá'a
m'a apkelmaheykegkaxa
nak apkeletsapma,
hentekkessekxak
nahan chá'a m'a.
7 Wesse' egegkok
senteméssesso chá'a
meyke aqsok egagkok,
essenhan ekxákma
aqsok egagkok;
hempelápagkasek chá'a,
hegheyásekxak
nahan chá'a néten.
8 Yempásekxak
chá'a néten Dios
náxop ma'a meyke
nak aqsok apagkok,
etekkessekxak chá'a
kélchexakhamakxa
aqsok apák ma'a
ekha nak chá'a
eyeyméxchexa aqsok,
exnések chá'a
nepyeseksa énxet'ák
ekyawe nak kéláyo,
exnéssók chá'a
ekyetnamakxa nak
taháno eyeymáxkoho;
hakte Wesse' egegkok
apagkok ma'a
ekyennaqtéssamakxa nak xapop,
cháxa appekkenmakxa nak han
nélwanmeygkaxa xa néten nak.
9 Cha'a apkeláneykha
chá'a apkelmahágkaxa
enxoho m'a énxet'ák apagkok
melyenyaweykha nak,
elmassegwók eyke
aqsa chá'a ekyáqtésakxa
exma m'a élmasagcha'a
nak apkeltémakxa,
hakte méko kawagkasek
teyp ma'a ektémakxa
nak ekyennaqte.
10 Nápakha'a apketkók
sa' etnessásekxak
Wesse' egegkok ma'a
apkelenmexma nak,
néten sa' kañék
eyenyenták éxtegyawà
ekyennaqte nepyeseksa.
Elyekpelhok sa'
Wesse' egegkok
apyókxoho apheykha nak
keso nélwanmeygkaxa';
egkések sa' apmopwána
m'a wesse' apwányam
apkelyéseykha nak,
eyánchessesagkohok
sa' apmopwána.”
11 Keñe axta aptaqhákxo apxagkok ma'a Elcaná, ekpayho nak Ramá. Aphákxeyk axta eyke m'a sakcha'a aptemessásencha'a m'a Wesse' egegkok, Elí axta eyke aptaqmelchesso, apteme axta apkelmaxnéssesso Dios énxet'ák apagkok.
Elí apketchek élmasagcha'a apkeltémakxa'
12 Asagkek axta apkeltémakxa m'a Elí apketchek, megkalxének axta apkelwáxok ma'a Wesse' egegkok, 13 tén han apkelánémakpexa axta chá'a etnahagkok apkelmaxnéssesso Dios énxet'ák apagkok, nápaqta'awók ma'a énxet'ák; apméssek axta agkok chá'a xama énxet aqsok apchaqhe, ewakxak axta chá'a apkelmaxnéssesso Dios énxet'ák apagkok apchásenneykha, yetlo apmeykha kelyetxaqxo apto, neyseksa ekhánamáxche ápetek axta chá'a 14 yetchesek kelyetxaqxo apto m'a kañe' weygke, apkelmaxnéssesso Dios énxet'ák apagkok axta han chá'a apagkok ma'a ekyókxoho apkelhaxyawasso nak. Cháxa apteméssessamakxa axta chá'a apyókxoho israelitas apkelweykekxa axta chá'a m'a Siló. 15 Amonye' kélwatno axta han chá'a pexmok ma'a kélwatnamakxa nak chá'a aqsok, ewakxak axta chá'a apkelmaxnéssesso Dios énxet'ák apagkok apchásenneykha, keñe etnehek yának ma'a yaqwayam nak egkések aqsok apchaqhe: “Hegkés ko'o ápetek yaqwayam ayaqxakkasek ma'a apkelmaxnéssesso Dios énxet'ák apagkok; hakte memhek sa' takha' m'a ápetek kélmakhetchesso nak, wetek sa' aqsa.” 16 Aptemék agkok apcháneya m'a énxet nak, kólwet sekxók xa pexmok nak, keñe sa' ekpenchásexko enxoho apwanchek emok ma'a apmakókxa enxoho emok, keñe axta etnehek chá'a yátegmowagkok ma'a kélásenneykha nak: “Ma', tásek hegkések se'e kaxwo' nak, sa' agkok hegkeyásak, eynnaqtések sa' émpehek eymentók.” 17 Asagko' agko' axta apkeláneyak melya'assáxma nápaqtók Wesse' egegkok xa wokma'ák nak, hakte aptawáseykha axta m'a aqsok kélmésso naqsa, ektáha axta chá'a apagkok ma'a Wesse' egegkok.
18 Keñe axta m'a sakcha'a Samuel, apxegkessama aqsa aptamheykha m'a aphakxa nak Wesse' egegkok, yetlo aptaxneykekxa m'a apáwa efod apkeláxñe nak. 19 Kasakxéshok axta han chá'a apchaqlamap apketkok egken, ektáha axta chá'a élánésso, yókxoho apyeyam ekmeyákxoho enxoho chá'a tegma appagkanamap nak, yetlo atáwa', peya enxoho kagkések chá'a aqsok eyaqhe ekmésso nak chá'a apyókxoho apyeyam. 20 Keñe axta Elí elmaxnéssesek chá'a aqsok éltaqmela m'a Elcaná yetlo aptáwa'. Axta etnehek chá'a s'e: “Wesse' egegkok sa' elmések étchek xa kelán'a nak, apyaqmageykekxa m'a ekmésso nak Wesse' egegkok.” Keñe axta kaltaqhohok chá'a m'a axanák. 21 Appasmomchek axta Wesse' egegkok ma'a Ana, tén axta ektamheykekxo chá'a lóso'. Weteyak axta Ana apqántánxo étchek apkelennay'a, tén han ánet ma'a kelwán'ák, apwánegyek axta aqsa nápaqtók Wesse' egegkok ma'a sakcha'a Samuel.
22 Apwányamók axta aptemék ma'a Elí, aplegayak axta ekyókxoho apteméssessamakxa chá'a apketchek ma'a israelitas, aplegayak axta han apkelpatheteykegko chá'a m'a kelán'ák éltamheykha axta chá'a m'a átog kélpakxanma apchaqneykekxexa axta chá'a énxet'ák. 23 Aptáhak axta apkeláneya s'e: “Apyókxoho énxet'ák chá'a ko'o héltennasha ekmaso kéllánéyak aqsok kéxegke. ¿Yaqsa ektéma kéltéma nak chá'a xa? 24 Étchek, háwe aqsok ektaqmela m'a aptáhakxa nak apkelxéneykha kéxegke m'a Wesse' egegkok énxet'ák apagkok. 25 Asagkek agkok chá'a apteméssesakxa pók xama énxet, apwanchek chá'a enókasha m'a Wesse' egegkok; apkelanak agkok chá'a mey'assáxma xama énxet nápaqtók Wesse' egegkok, ¿yaqsa sa' kamyók?” Axta eyke elyahákxak aptáhakxa apkeláneya m'a apyáp, hakte xeyenmék axta apwáxok Wesse' egegkok elnápekxak ma'a.
26 Apwánegyek axta m'a sakcha'a Samuel, leklamók axta apwáxok aptémakxa m'a Wesse' egegkok, tén han ma'a énxet'ák.
27 Apwokmek axta Dios appeywa aplegasso aphakxa Elí. Aptáhak axta apcháneya s'e: “Aptáhak Wesse' egegkok se'e: ‘Ekxekmowásamáxkók axta ko'o kélyapmeyk nanók kéxegke, apheykegkaxa axta Egipto, aptémakxa axta apkeláneykha m'a faraón. 28 Keñe m'a nepyeseksa nak apyókxoho énxet'ák Israel, sélyéseykencha'a ko'o kéxegke yaqwayam kóltéhek apkelmaxnéssesso énxet'ák ahagkok, yaqwayam enxoho hélwatnések chá'a aqsok ma'a sélwatnéssamakxa nak chá'a aqsok, keñe han elwatnek chá'a m'a aqsok ekmátsa nak ekpaqneyam éten agkok, tén han elántaxnekxak chá'a apáwa efod elmeyekxak sekhakxa'. Ekméssegkek axta han chá'a ko'o nekha apyapmeyk nanók ma'a aqsok kélmésso naqsa apkelseykekxa axta chá'a israelitas, sélwatnésso ko'o. 29 ¿Yaqsa eyke ektéma megkóltaqmelchessama nak chá'a m'a aqsok ektekyawa kélmésso naqsa, séltémo axta chá'a ko'o kalanaxche'? ¿Yaqsa ektéma kélmeyókassamo chá'a apmonye'e m'a kélketchek tén ko'o séltemessáseykekxoho chá'a axayo'? Apnaqmelassegkek apkeleykegko m'a éltaqmelakxa nak sélmésso naqsa ko'o m'a énxet'ák ahagkok Israel.’ 30 Cháxa keñamak sektáha nak ko'o sekpeywa, sektáha nak Israel Dios apagkok, éltennassegkek axta ko'o exchep, tén han apnámakkok etnehek chá'a séláneykha, akke kaxwók ko'o ektáhak se'e: Magwohók sa' ko'o kaxwók kóllának xa aqsok nak, atnéssesek sa' ko'o ekha kéláyo m'a énxet apteme nak chá'a seyáyo, keñe sa' atnéssesek mékoho m'a sewanyémo nak chá'a. Cháxa sektáhakxa ko'o sekpeywa xa, sektáha nak Wesse'. 31 Chágketwokmek kaxwók yaqwánxa amasséssók xeyep apketchek, tén han ma'a aptawán'ák neptámen axta apnámakkok, metnohók sa' chá'a apwányamo yetsapok ma'a aphawóxama. 32 Étak sa' ektaqmalma yaqwánxa atnéssesek ko'o Israel, yetlo ekyentaxnamo apwáxok, tén han apnathe, metnohók sa' chá'a apwányamo yetsapok ma'a aphawóxama. 33 Aleymok sa' eyke ko'o nápakha apnámakkok ma'a keto' nak ekwatnamáxchexa nak chá'a aqsok ahagkok, yaqwayam sa' enathak chá'a, tén han keyntexhok agko' chá'a apwáxok, keñe sa' ma'a pók aptawán'ák neptámen nak, esawhakpohok etekyók. 34 Kaxhok sa' mók apkeletsapma xama ekhem xa apqánet apketchek nak: cham'a Hofní tén han Finees, sa' katnehek ekxekmósso yaqwánxa katnehek xa. 35 Tén sa' ko'o atnéssesek xama apkelmaxnéssesso énxet'ák ahagkok ma'a énxet megkólésso nak aqsok, tén han apkelane nak chá'a m'a sekmámenyého, tén han apteme nak chá'a m'a sektáhakxa, wának sa' megkayetyapwágwomek apha aptawán'ák neptámen, wának sa' han etneykha chá'a m'a aphakxa nak wesse' apwányam sélyéseykha. 36 Keñe sa' ma'a ektáhakxa enxoho meletsapma m'a apnámakkok, elmeyenták sa' chá'a eltekxekwaták aptapnák apmonye' elmaxnak selyaqye aktek élmope, essenhan ma'a pán nápakha, elmaxneyha aptamheykha nepyeseksa m'a apkelmaxnéssesso nak énxet'ák ahagkok, yaqwayam étak apto.’”
Acminaycmascama Ana
1 Intomjac nic nat almalhnancama Ana:
Dios Apyimtalhnamo. Payjeclhec evalhoc coo. Lhip aptomja seyimnatescama. Evanquic ongvinmelham cotnaja ingmoc, ayinyema lhip sepasmom. Payjeclhec evalhoc coo.
2 Santo mayayo nac lhip Dios Apyimtalhnamo, mepqui poc. Singmasma nac lhip Dios, mepqui poc. Lhip apvamlha pac lhama, mepqui poc.
3 Quellhip, noelyimtalhnesacpojo apanco. Noeltimesquis nasa apanco apquilyimtalhnamo. Apyasamcoc Dios aclhamoclhojo asoc. Apqyasamcoc Dios apquiltemaclha apancaoc quellhip.
4 Aptovasquic mataa Dios apquilmaycam apancaoc enlhit apquilyimtalhnamo. Aptomja apyimnatescama melyimnatem.
5 Apquiltomjaclhec apquiltimesaycam enlhit acma apquilnatam, coytic aptoycaoc. Mayic siclho alnapma enlhitaoc, yiplovcoc acyivey aptoycaoc. Quilvana cotay ayitca, cotimsic sat ayitquic acvaycmo siete. Quilvana nalava siclho, cotniclhac cotay ayitca.
6 Dios Apyimtalhnamo aptomja apquilnapma. Aptomja najan apyimnatescama ingnenyaoc. Apcanama ongitsapoc, najan apcanama cotajojoc mocjam ningvanmoncama.
7 Dios singiltimesquiscama mepqui ningilnatam, najan singiltimesquiscama acma ningilnatam. Aptomja singiltimquiscama coning, najan aptomja singmiyasquiclha netin.
8 Aptomja apmiyasquiclha netin enlhit mepqui asoc, najan enlhit aplingaycamco acyimtalhnama. Colhic sat acnesa nipyesicsa apquilyimtalhnamo. Colhic sat ayaco ayinyema Dios. Aptomja apquilantipquiscama nic nat aclhamoclhojo asoc, aptomja najan apmasma aclhamoclhojo asoc.
9 Aptomja sintamilquiscama, ningiltomja inlhojo ningilpeyvomo. Am emyavac apquilmapsomcaa, apquilitsepmec mataa naysicsa yatescamalhma. Metnaja apquilyimnatem enlhit apquilyimtalhnesomacpo apanco.
10 Aptovasquic mataa Dios cotnaja ingmoc. Enatovasacpoc sat ayinyema ayilhtingyavoyam netin. Aptomja apyicpilquemo apyovoclhojo enlhitaoc as nalhpop. Aptomja apyimnatescama apvisqui rey malyacyescama. Colhic mataa ayaco najan apmopvan — nic nat intomjac almalhnancama Ana.
11 Aptajaclhec nic nat Elcana tingma pac Ramá. Apnec nic nat Samuel apquitcoc apnaclha sacerdote Elí. Aptimec nic nat apquilancam Dios.
Apquiltemaclha Elí apquitquic
12 Apquilsilhnanacpec nic nat apanco Elí apquitquic, apquiltimem nic nat sacerdotes. Am nic nat colhenac apquilvalhoc apvisay Dios Apyimtalhnamo. 13 Apquilyitnocjasquic nic nat apquilanyomap ellana napatavo enlhitaoc. Naysicsa apquiljanma vaynca enlhit aptoscama apmatnam macmescama Dios. Apvoctac nic nat mataa sacerdote apquilancam, acyitna apmaycam alyalhalhama. Am nic nat comocjetac apjapitic. 14 Apticlhiquic nic nat alyalhalhama apvalhoc vaynca. Apliquic nic nat acyivey apjapitic, yoyam esaclhesic sacerdote. Eycaso apquiltemaclha ilhnic nat mataa napato moclhama enlhit apsayquinta macmescama Dios tingma Silo. 15 Pilapcasquic nic nat apvita enlhit apsayquinta macmescama Dios. Apvoctac nic nat sacerdote apquilancam, yicpintama yoyam colvatnalhca aptipilhmoc. Aptomjac nic nat mataa apcanya: Jimques sat angvitic apjapitic. Am lhac coyacmoc sacerdote apjapitic mocjetic — nic nat aptomjac apquilancam. 16 Apmiyovquic sat ancoc aptomja aptoscama apmatnam. Apcanayquic sat ancoc colhic alvatna aptipilhmoc siclho. Natamin sat esaclhesic apnaclha sacerdote. Aptomjac nic nat apquilancam apcatingmavo: ¡Nomyov nasa! Quilhvoc osaclhesic apjapitic. Olnatamoc sat quilhvo — nic nat aptomjac. 17 Avanjec nic nat apquilsilhnanomap apanco apcanit apquitquic napato Dios. Apquilvennam nic nat asoc macmescama Dios apquilsayquinta enlhit.
18 Apquiltimesam nic nat Samuel apquitcoc napato Dios. Aptalhneclhec nic nat mataa apava apvinatem aptemaclha sacerdote. 19 Apvitac nic nat mataa moc año acvactama inquin najan apyap. Apquillanac nic nat asoc macmescama Dios moclhama año. Aplhocac nic nat Samuel aptalhnama netin, inquin nic nat alanay. 20 Yiplovcoc nic nat aptomjaclha Elí, yoyam elmalhnesquisic Elcana najan aptava. Aptomjac nic nat apcanya: Epasmoc sat Dios. Cotac sat mocjam ayitquic as aptava. Ayinyema mepqui acmasma siclho ayitca apvisay Samuel. Apquiltajaclhec nic nat mocjam. 21 Appasmec nic nat mataa Ana Dios Apyimtalhnamo. Intomjaclhec nic nat inlovso. Intiyacmec nic nat ayitca najan moc ayitquic. Tres nic nat apquilinava, anit nic nat quilvanaa. Apvanamyic nic nat Samuel aptimesaycam napato Dios.
22 Apvanacmec nic nat Elí. Aplingac nic nat amyaa acmasom, apquillhenamap apquitquic najan apquiltemaclha apancaoc. Apquilyitnamolhama nic nat quilvanaa altimesaycam carpa apponquinomap. 23 Aptomjac nic nat Elí apquilanya: Aclingac coo amyaa acmasom, apquillhenamap quellhip lhalhma anco. ¿So actomja yi? 24 Elvatsaoc quellhip. Naso, acmasom anco singlingay coo. 25 Yitnec sat ancoc amyaa apquilinmelhaycam mataa poc. Etnejic sat appeyvescasquiclha Dios. Yitnec sat ancoc amyaa, enlhit apvennéycam Dios. Mepqui apmasma sat cotnejic — nic nat aptomjac Elí. Am nic nat eljalhnoc apquilyap appayvam. Inlhenquic nic nat apvalhoc Dios elnapoc sat apcanit.
26 Apvanamyic nic nat Samuel apquitcoc. Apyispaquic nic nat Dios. Apquilyispaquic nic nat enlhitaoc aptemaclha Samuel.
27 Apvaac nic nat profeta Dios aplingascama apnaclha Elí. Aptomjac nic nat apcanya: Eycaso appayvam ayinyema Dios: Yoclhilhma Egipto alhta apnam lhip apquilyeyjamcaa, apquiltimesaycam apvisqui faraón. Acpasmec alhta enlhitaoc Israel. 28 Alyacyesquic alhta enlhitaoc sacerdotes. Ellanac mataa selmescama coo asoc acmatnam, najan moc asoc selmescama coo. Elantalhniclhac mataa apava apvinatem sacerdote, seltimesaycam sicnaclha coo. Apvanquic mataa eltasomoc, acyitna inlhojo selmescama aptoscama apmatnam. , 29 ¿So actomja yi asoc selmescama coo? ¿So actomja yi apmasma lhip apquitquic najato coo? Apnamilay lhip apquitquic, ayinyema asoc selmescama enlhitaoc Israel. 30 Alyacyesquic alhta eltimjic sacerdotes lhip apquilmolhama, ongvanic lhip quilhvo nac jay: Colhic sat ayaco enlhit aptomja seyayo. Colhic sat acvenná enlhit aptomja sevennéycam coo. Coo sicvisay Dios Visqui apancaoc Israel, siclhanma sicpayvam. 31 Otvacsic sat nalhit acnim actemaclha lhip apmopvan, najan apquilyeyjamcaa apquilmopvan. Metacpejec sat apvanyam nipyesicsa lhip apquilmolhama. 32 Elyasipsic sat quellhip, apquilvita inlhojo apnaymacoc israelitas sictemaclha siyamliyam. Metacpejec sat apvanyam nipyesicsa lhip apquilmolhama. 33 Lhama sat omyoc apmolhama lhip, setnesaycam ningilmalhnancamaclha. Colngamcojoc sat lhip apvalhoc, apvita inlhojo lhip. Eticyoc sat apquilmolhama lhip najan aptovana. 34 Eticyoc sat apcanit apquitquic Ofni najan Finees lhama acnim. Cotnatsalhquejec sat moc asoc yoyam covac sat. 35 Otingyac sat lhama sacerdote appeyvomo, mepqui apyinimquiscama, aptomja apyiplovquiscama siyanamaclha coo. Etnejic sat aptimesaycam apvisqui silyacyescama coo. Eltimjic sat sacerdotes aptovana cotmongvoycamlha nelha. 36 Apcaymacpec sat ancoc lhama apmolhama lhip mepqui apmatnam. Eyoclhojoc sat apnaclha maa, etingya solyayem ayitcoc, tasic najan pan apquitcoc, ayinyema mayic ayajem. Etingyac sat aptimesaycam sacerdotes, yoyam coytic mataa aptom — alhta aptomjac Dios — nic nat aptomjac profeta Dios aplingascama.
