Israelitas apkelpakxenéyak yókxexma Guilgal
1 Apyókxoho apkelwesse'e amorreos ektáha axta apheykha m'a taxnegwánxa ekhem neyp nak Jordán, keñe han ma'a apkelwesse'e cananeos apheykencha'a nak ma'a keto' nak wátsam ekwányam Mediterráneo, apkelya'ásegwokmek axta ektáha Wesse' egegkok apyamasso yegmen ma'a wátsam Jordán nak, neyseksa apkeltámeyeykekxa axta m'a énxet'ák Israel, keñe axta éltamheyncha'a apkelwáxok. Axta elya'ásegkok yaqwánxa etnahágkok peya elenmexek ma'a énxet'ák nak Israel.
2 Cháxa ekhem nak, aptáhakxa axta apcháneya Wesse' egegkok ma'a Josué: “Elána sa' sawo meteymog keñe sa' elyenyekhássesek makham nekha apyempe'ék ma'a énxet'ák nak Israel.”
3 Apkelanak axta Josué sawo keñe apkelyenyekhássesa nekha apyempe'ék ma'a énxet'ák Israel. Axta payhók ma'a egkexe nak Aralot. 4 Apkelyenyekhássessek axta nekha apyempe'ék hakte apkeletsapwayak axta apyókxoho náxet ámay meykexa énxet ma'a ektáha axta apkelánteyapma m'a Egipto, aptamhéyak axta sẽlpextétamo. 5 Naqsók axta eykhe apyókxoho ekha kélyenyekheykha nekha apyempe'ék ma'a ektáha axta apkelánteyapma m'a Egipto, wánxa axta eyke aqsa m'a kaxwe apkektega nak ma'a náxet ámay meykexa énxet, méko axta makham kélyenyekheykha nekha apyempe'ék. 6 Weykmek axta cuarenta apyeyam apkelweynchámeykha énxet'ák Israel ma'a yókxexma meykexa nak énxet, apkeletsepmeyk axta han ma'a apyókxoho ektáha axta apkelánteyapma m'a Egipto, cham'a aptamhéyak axta sẽlpextétamo, hakte axta elyeheykekxohok Wesse' egegkok ma'a énxet'ák nak. Axta keñamak apteméssessama naqsók agko' meltémo elwetágwók ma'a yókxexma ényahamakxa nak weyke nagkeygmenek tén han yányawhéna' apyegmenek, ektémól'a kanyehek ma'a yegmen, apyapmeyk nanók axta apmáheyo egkések ma'a. 7 Axta keñamak apkelyenyekhássesa nekha apyempe'ék Josué apketchek nak xa énxet'ák nak, apkeltémo axta etnehek apkelyaqmagkasso m'a Wesse' egegkok, axta kólyenyekhássessók makham nekha apyempe'ék, hakte apkelxegamchek axta makham ámay. 8 Xama axta apsawhékpo kélyenyekhássesso nekha apyempe'ék ma'a apyókxoho nak, keñe axta apkellókasa apkelyampe apkelhákxo m'a apkelpakxeneykegkaxa nak, ekwokmoho apkeltaqmelákxo. 9 Keñe axta Wesse' egegkok aptáha apcháneya Josué: “Cháxa kélyenyekhássesso nak nekha apyempe'ék, sakhem sekmassésa ko'o kaxwók kélmegqakto m'a nepyeseksa nak énxet'ák Egipto, cham'a aqsok segmegqassamo nak.” Cháxa keñamak ektéma nak makham ekwesey Guilgal xa yókxexma nak.
10 Apkelpakxenwokmek axta énxet'ák Israel ma'a yókxexma Guilgal, taxnakmók axta apkelánegko m'a ekhem melwagqayam kéltéma nak Pascua, cham'a ekhem catorce, pelten nak. Axta payhók ma'a ekpayhegweykenxa nak xapop ma'a Jericó. 11 Cháxa ekhem nak aptókagkaxa axta pán meyke kempáseyak tén han hótáhap kélyexnáyam, wánxa agkok, mók ekhem axta eyke entáhak aptókagko m'a aptéyak eñama nak ektekkesso m'a xapop. 12 Keñe axta ekmassa apkelwet'a m'a aptéyak eñama nak néten. Axta keñamak énxet'ák Israel apteykegko m'a aqsok ekteyapma eñama nak ektekkesso m'a xapop, cham'a apyeyam nak, ekpayho nak ma'a yókxexma Canaán.
Josué tén han sẽlpextétamo apkemha apmonye' Wesse' egegkok apchásenneykha
13 Xama ekhem axta Josué apwokmo m'a ketók Jericó. Apwet'ak axta apkenmeyncha'a xama énxet ma'a apmonye', yetlo sókwenaqte apmeykha. Apyepetchegwokmók axta Josué keñe apkelmaxneyáncha'a:
—¿Néleñémeyo xamóya exchep, nénmexma enxeykel'a?
14 —Háwe ko'o xa xama nak —axta aptáhak apchátegmowágko m'a énxet—. Ekwa'ak ko'o sektáha sémha emonye' m'a sẽlpextétamo Wesse' egegkok nak apkelásenneykha.
Keñe axta Josué apháxahánto ekwokmoho aptekxeya nápat xapop, tén axta apkelmaxneyáncha'a:
—¿Yaqsa apkeltamho alának ko'o Wesse' egegkok, aptáha nak xépxa apkeláneykha?
15 Apchátegmowágkek axta m'a apkemha apmonye' sẽlpextétamo apkeñama nak Wesse' egegkok:
—Elhexyawés apkelatchesso apmagkok, ekpagkanamaxche s'e yókxexma apwa'akxa nak.
Apkelyahákxók axta m'a Josué.
Apquillanay asoc monquinatquiscama apyimpeoc enlhitaoc
1 Apquillingac nic nat amyaa apquilviscaa enlhitaoc amorreos apquileyvam nicja vatsam acpayjo actalhningvamlha acnim. Apquillingac nic nat amyaa apquilviscaa cananeos apquileyvam nicja yingmin acvanyam. Apquillingac nic nat actemaclha Dios apyamascama yingmin vatsam Jordán napatavo enlhitaoc Israel. Apquiljalhtipilhquitquic nic nat aplhamoclhojo. Intiyacmec nic nat apquilvalhoc apquillinga amyaa. Inmasquec nic nat apquilyimnaa.
2 Aptomjac nic nat Dios apcanya Josué: —Ilana sat lhip mataymong ajamtic malha sovo. Ilana sat mocjam asoc monquinatquiscama apyimpeoc enlhitaoc Israel — nic nat aptomjac.
3 Apquillanac nic nat Josué mataymong ajamtic malha sovo. Apquillanac nic nat asoc monquinatquiscama apyimpeoc enlhitaoc acpayjo inquilhe Aralot. 4 Eycaso ayinyema ilhnic nat apquillanay Josué asoc monquinatquiscama apyimpeoc enlhitaoc: Apquilyinyovquic nic nat enlhitaoc yoclhilhma Egipto aplhamoclhojo apquilsoycam apquilmaycam. Apquilitsepquic nic nat nalhit amay yoclhilhma actamopeycaoc. 5 Innec nic nat allana asoc monquinatquiscama apyimpeoc aplhamoclhojo enlhitaoc apquilyamasma ilhnic nat yoclhilhma Egipto. Am nic nat coyitnac asoc monquinatquiscama apyimpeoc apquiltomja appaliyam nalhit amay yoclhilhma actamopeycaoc. Apquilyinyovquic nic nat yoclhilhma Egipto. 6 Apquileyvec nic nat enlhitaoc Israel cuarenta años yoclhilhma actamopeycaoc. Yoclhilhma Egipto ilhnic nat apquilinyemac. Apquilsovquic nic nat apquilmaycam aplhamoclhojo enlhit. Apquilitsepquic nic nat ayinyema melilyajayquiclho Dios appayvam, aplhanma actomja nasoc anco yoyam melvityejec sat yoclhilhma. Aplhenquic nic nat actomja nasoc anco Dios napatavo ningilyeyjamcaa, ongillhocac sat yoclhilhma acyitnamaclha leche najan apquimjaclha yovjan. 7 Apquilvanamyic nic nat apquilyeyjeycam. Apquillanac nic nat Josué asoc monquinatquiscama apyimpeoc. Ayinyemaclha am nic nat ellanac siclho asoc monquinatquiscama nalhit amay. 8 Apquilpenasquic nic nat apquillanay asoc monquinatquiscama apyimpeoc aplhamoclhojo enlhit. Apnam nic nat enlhitaoc apquicjingvoycamlha acvocmo apquiltamalvoyam.
9 Aptomjac nic nat Dios apcanya Josué: —Inmasquec quilhvo nac jay actemaclha apquillingaycamco quellhip apnatovascama co Egipto — nic nat aptomjac. Apquiltimec nic nat acvisay as amyip Gilgal acvocmo as ningvamlha nac jay.
10 Apnam amyip Gilgal enlhitaoc Israel acpayjo tingma Jericó. Invocmec nic nat catorce acnim as piltin. Actalhnam nic nat apquillanac fiesta pascua actemaclha ningilvoyam tap. 11 Moc acnim nic nat intomjac natamin fiesta pascua. Aptovcamquic nic nat acyilhna ayinyema as yoclhilhma najan motajap apactic macyilhnayam. Aptovcamquic nic nat pan mepqui apquimpascaoc. 12 Aptovcamquic nic nat siclho acyilhna ayinyema as yoclhilhma. Moc acnim nic nat acmasca apquilvitay aptoycaoc maná. Am nic nat elvitac mocjam aptoycaoc maná enlhitaoc Israel. Aptovcamquic nic nat as mocjitma acyilhna ayinyema as yoclhilhma acvisay Canaán.
Apvitay ningaat Josué
13 Ningatoc nic nat tingma Jericó apquicjingvamlha enlhitaoc najan Josué. Apquilyajavoc nic nat Josué. Apvitac nic nat enlhit apmaycam sovo acvinatem. Apyocmec nic nat Josué. Aptomjac nic nat apcanya: —¿Ingmoc ya lhquip, inlhojo eyca cotnaja ingmoc? — nic nat aptomjac.
14 Apcatingmavoc nic nat: —Jave coo. Coo nac sictomja apvisqui nipyesicsa enlhit apancaoc Dios. Quilhvoc lhac acvaac — nic nat aptomjac.
Yejemoc nic nat apquilpolintamo nalhpop Josué. Apquilpayasoc nic nat. Aptomjac nic nat apcanya: —¿Soc amyaa yi? Coo nac sictomja silancam lhip — nic nat aptomjac.
15 Apcatingmavoc nic nat apvisqui: —Iljalhyovas sat tiyayipeoc pac. Acponquinomalhca as apquinmamcaclha lhip — nic nat aptomjac.
Apquilyajaclhoc nic nat Josué.
