Kalpayhekxa chá'a kélwáxok eñama kélyepetcheyo Wesse' egegkok
1 Élyáxeg sélásekhayo sekmámenyého ahagko' nak alwetekxa'; kéxegke, kélteme nak sélásekhayo, tén han kélpeykáseykekxa nak chá'a ewáxok, tén han kélteme nak sekxawe naqsa ko'o, kólteme sa' chá'a kélyennaqtéssamo kélteme megkólya'ásseyam Wesse' egegkok xa ektáha nak.
2 Éltamhók ko'o kaxhok mók élxeyenma awáxok Evodia tén han Síntique m'a Wesse' egegkok. 3 Keñe exchep apteme nak chá'a sekxegexma ahagko' sektamheykha, éltamhók ko'o epasmok xép xa ẽlyáxeg'a kelán'ák nak, hakte kelwasqapmeyk axta sepasmoma ko'o ektémakxa séltenneykha tásek amya'a xa, yetlo m'a Clemente, tén han ma'a pók énxet'ák ektáha axta apkeltamheykha xamo' ko'o. Naqtáxésamaxcheyk nahan apkelwesey m'a weykcha'áhak eknaqtáxésamaxchexa nak apkelwesey m'a ekmámnaqsoho nak élyennaqte apnénya'ák.
4 Kalpayhekxa chá'a kélwáxok eñama kélyepetcheyo m'a Wesse' egegkok. Peyk atnehek makham alána': ¡Kalpayhekxa kélwáxok! 5 Éltamhók ko'o elya'asagkohok kéxegke apyókxoho énxet kélteme ektaqmeleykha kélwáxok. Chágketwokmek apweyktamxa Wesse' egegkok.
6 Nágkeytnakhaksoho aqsa chá'a kélwáxok xama aqsok, kóltennés chá'a Dios ekyókxoho xa, cham'a kéltáha enxoho chá'a nempeywa nélmaxnagko; kólmaxna chá'a, kólmés nahan chá'a ekxeyenma kélwáxok. 7 Keñe sa' Dios egkések chá'a kéxegke m'a meyke ektáhakxa egwáxok apagkok nak, ekteme nak ekyawe agko', megkaxnémo nak ma'a ekweykenxal'a apya'áseyak énxet; kalánésha sa' kélwáxok kéxegke xa meyke ektáhakxa egwáxok eñama nak Dios, tén han ma'a ektémakxa nak élchetámeykha kélwáxok, eñama kélyepetcheykekxa m'a Cristo Jesús.
Kaxén kélwáxok ma'a aqsok éltaqmela nak
8 Élyáxeg, amonye' sélwátésso, kaxén chá'a kélwáxok ma'a ekyókxoho aqsok ekmámnaqsoho nak, tén han ma'a aqsok ekpayhawo nak antéhek negáyo, tén han ma'a aqsok élpéwomo nak, tén han ma'a aqsok éláxñeyo nak, tén han ma'a aqsok ekleklamókxa nak kélwáxok, tén han ma'a aqsok éltaqmela nak chá'a élxénamaxche'. Kaxén chá'a kélwáxok ma'a ekyókxoho mók ektémakxa nak chá'a ektaqmalma nentémakxa, tén han ma'a ekpayhawo nak chá'a kataqmelek élxénamaxche'.
9 Kóllána sa' chá'a m'a sélxekmóssama axta kéxegke, tén han ma'a sektémakxa axta sekmésso sekpeywa, cham'a kéllegaya axta chá'a sekxeyenma, tén han ma'a kélweteya axta chá'a séláneya. Kólteme sa' chá'a xa ektáha nak, keñe sa' exek chá'a kélwáxok kéxegke m'a Dios, apteme nak éñamakxa meyke ektáhakxa egwáxok.
Pablo apmésso ekxeyenma apwáxok eñama m'a apxawe axta kélpasmo
10 Awanhek ko'o ekpayheykekxa ewáxok sekyepetcheyo Wesse' egegkok ekxénweykmo makham ko'o kélwáxok kéxegke; maxeyenmak megkaxénweykmo kélwáxok ko'o, megkólwanchek axta eyke kélmáheyo hélpasmok. 11 Axta eyke axeyenmak ko'o xa, ñémekxa ekyetnama axta eyeyméxchexa aqsok, hakte éltámeyak ko'o ektaqmelcháseykha ewáxok ma'a aqsok ekyetnakxa enxoho ko'o. 12 Ekya'ásegkók ko'o ektémakxa negha nenteme meyke aqsok egagkok, tén han ma'a ektémakxa nak negha ekxámokma aqsok egagkok. Éltámeyak nahan sekyeykhe m'a ektémakxal'a chá'a negha, megkeyxek ma'a ekyetna enxoho ekxámokma sekto essenhan ma'a seyaqha enxoho meyk, megkeyxek nahan ma'a seyeykhágwokmoho enxoho aqsok, essenhan ma'a méko agko' enxoho aqsok ahagkok. 13 Ewanchek ko'o ayeykhak ma'a ekyókxoho aqsok, Cristo keñamak ko'o sénnaqtésso. 14 Tásek axta eyke kéltémakxa kéxegke sélpasmoma m'a ektémakxa axta ekyentaxnamo sekha ko'o.
15 Xama axta sekteyapma ko'o m'a Macedonia, sekxók axta seyeynamo seklegasso m'a tásek amya'a, kéxegke axta aqsa wánxa kéleñama nak apchaqneykekxexa Filipos, séláphássessama ko'o aqsok kéláncheseykekxa sélméssama ko'o. 16 Weykmók axta nahan ko'o sélaphassáseykekxoho makham aqsok yaqwayam hélpasmok ko'o eyeyméxchexa aqsok ma'a sekhamakxa axta m'a Tesalónica. 17 Háwe eyke ko'o ekxeyenma ewáxok ma'a nenxawe naqsa nak aqsok, kéxegke eyke émenyeyk ko'o kólyánchesagkohok kéltémakxa ektaqmela nápaqtók Dios. 18 Ekxawáyak eyke ko'o kaxwók ekyókxoho m'a eyeyméxchexa aqsok, eyeykhágweykmók nahan. Eyeykhágweykmók ko'o kaxwók ma'a aqsok séláphássesso axta kéxegke, apsáyam axta m'a Epafrodito. Máxa axta entemék aqsok kélmésso naqsal'a Dios ekmátsa ekpaqneyam ma'a aqsok séláphássesso axta, ektémól'a aqsok ekmatñà apmomól'a takha' Dios yetlo ekleklamo apwáxok. 19 Dios ahagkok sa' elmések kéxegke ekyókxoho aqsok eyeyméxchexa nak, ekhawo m'a ektémakxa nak ekyetno ekxámokma aqsok éltaqmela m'a eñama Cristo Jesús. 20 ¡Apcheymákpoho sa' chá'a kólteméssesek ma'a Dios Egyáp! Katnahagkok sa'.
Néxa ekxeyenma apwáxok Pablo
21 Kóltennés sa' seyáphássesa ko'o ekxeyenma ewáxok apkelánamákpoho m'a énxet'ák apkelpagkanamap nak eñama m'a Jesucristo. Apcháphássessek nahan ekxeyenma apkelwáxok kéxegke m'a ẽlyáxeg'a apheykha nak sekhakxa ko'o. 22 Apkeláphássessek nahan élxeyenma apkelwáxok kéxegke apyókxoho m'a énxet'ák apkelpagkanamap nak, cha'a ekyágwánxa agkok apcháphássesa élxeyenma apkelwáxok ma'a apkeltamheykha nak chá'a m'a wesse' apwányam romano apxagkok.
23 Wesse' egegkok Jesucristo sa' epekkenek kélnepyeseksa kéxegke m'a ektémakxa nak segmésso naqsa eñama ektaqmeleykha apwáxok henlano'.
Acpayjayclha ingvalhoc ayinyema Visqui ingac
1 Quellhip elyalhinga. Pac olhenic mocjam lhama asoc: Avanjec siltemo olviticlhac quellhip. Quellhip apquiltomja appayesayclha evalhoc coo najan apquiltimesquiscama yoyam colhic seyaco napato Dios. Elyimnaticsojo apquilvalhoc apquiltimem melyasquiyam Visqui ingac.
2 Lhiya Evodia najan lhiya Síntique: Colhnasojo mataa moc avalhoc, malha ingyalhing ayinyema Visqui ingac. 3 Lhip ingyalhing sictamjaycamo lhama. Actomjac coo siyanya lhip: Ipasim sat mataa as quilvanaa. Avanjec alhta mataa altamjaycam yoyam jelpasmoc naysicsa siltimnaycam tasic amyaa. Apnoc alhta ingyalhing Clemente najan poc siltamjaycamo lhama. Yitnec apquilvisay acnatalhesomalhca vaycajac acyitna apquilvisay enlhitaoc acyimnatem apnenyaoc.
4 Colpayjiclha mataa apquilvalhoc ayinyema Visqui ingac. Pac otnejic ongvanic mocjam: Colpayjiclha apquilvalhoc quellhip. 5 Altamjoc coo ellhenacpoc quellhip apquiltemaclha apquilimlaycmojo. Apcamquitvoctac Visqui ingac.
6 Nocollhenam nasa apquilvalhoc asoc. Eliltimnas sat Dios Ingyapam actemaclha allhanma apquilvalhoc naysicsa apquililmalhnancama. Elilmalhna sat asoc, eltime sat gracias asoc apquillhoy. 7 Dios Ingyapam sat elmesic altamilaycam apquilvalhoc, am colhno ayinyema enlhit apquillhanma. Coltamilic sat apquiltemaclha quellhip ayinyema altamilaycam apquilvalhoc apquiltomja apquilpasmeyquiclha Cristo Jesús.
Colquitam apquilvalhoc actomja asoc altamila
8 Quellhip elyalhinga. Actomjaclha nelha siclhanma aso. Colquitam sat mataa apquilvalhoc actomja nasoc anco najan actemaclha yoyam colhic ayaco. Actomja acpeyvomo najan actomja ayalhnayo najan actomja ningasicjayo najan actomja actamila anco. Colquitam sat mataa apquilvalhoc nintemaclha actamila najan nintemaclha ningayo.
9 Elvajanaoc sat quellhip actemaclha sillhicmoscama mataa. Najan actemaclha apquillingay najan actemaclha apquilvitay sictemaclha coo. Dios Ingyapam sat epasmoc quellhip yoyam etnesquisic altamilaycam apquilvalhoc.
Filipenses apquilapajasquiscama apcaycaoc Pablo
10 Avanjec alhta acpayjayclha evalhoc selapajasquiscama asoc selmescama quellhip. Apquililtamjo inyicje mataa quellhip jelapajasquisic selmescama. Am eyca colapvancaac. 11 Actalhescasquic quellhip as vaycajac. Jave siltamjo inlhojo yoyam jelapajasquisic mocjam asoc. Nocollhen nasa apquilvalhoc coymalhcac asoc coo. Acyasingvocmec coo actemaclha mataa acpayjayclha evalhoc. 12 Evanquic coo otnejic mepqui asoc ajac. Evanquic najan coytic cotlaycaoc asoc ajancaoc. Evanquic coo moclhama nintemaclha. Evanquic coo oyipcanmojo, evanquic najan mepqui sictom. Evanquic coo coytic lhama asoc, evanquic najan coytic cotlaycaoc asoc. 13 Evanquic coo aclhamoclhojo asoc ayinyema Cristo aptomja seyimnatescama. 14 Naso, actamila anco actemaclha aclhanma apquilvalhoc quellhip naysicsa sicmaclha acyimtalhnaclha.
15 Quellhip co Filipos. Apquilyasamcoc quellhip actemaclha sillhicmoscama tasic amyaa siclhoc anco. Actemaclha siyimpayclha alhta mocjam yoclhilhma Macedonia. Am alhta jelapajascasac asoc poc Jesucristo apmolhama. Elapajascasquic alhta asoc apquilvamlha quellhip, malha acyanmongam sillhicmoscama tasic amyaa. 16 Naysicsa sicma alhta tingma Tesalónica elapajascasquic alhta mataa quellhip asoc selmescama. , 17 Am inyicje colhenac evalhoc yoyam jelmesic mataa asoc. Inlhenquic evalhoc apquiltemaclha actamila quellhip. Actomja malha acyilhna altamila apquilmescama quellhip Dios. Inquilyipsatalhquic maa netin apquiltemaclha quellhip, intalhosalhquic najan. 18 Am coyitnac lhama asoc ayaymomalhca quilhvo. Yitnec coo aclhamoclhojo asoc malha acyeycajangvaycmo. Yitnec coo asoc sesantimquiscama alhta ingyalhing Epafrodito, selapajasquiscama alhta quellhip. Asoc selmescama alhta actomja malha apquilaycaoc acmasis napato Dios Ingyapam. Apyispaquic Dios actemaclha apquilaycaoc quellhip. 19 Apyasamcoc Dios asoc ayaymomalhca quellhip. Eyeycajascomjoc sat asoc apcaycaoc Dios ayinyema acnaycamcolha apquilnatam altamila anco Cristo Jesús. 20 Sas, tasic anco. Innec ayaco mataa Dios Ingyapam cotmongvoycamlha nelha. Amén.
Aclhanma apvalhoc Pablo
21 Inlhenquic evalhoc aplhamoclhojo Jesucristo apmolhama. Inquillhenquic apquilvalhoc quellhip elyalhinga sicnaycamo lhama. 22 Inquillhenquic apquilvalhoc aplhamoclhojo Jesucristo apmolhama apnaycam tingma Roma najan lha apnaycam tingma pac apvisqui co Roma.
23 Altamjoc coo mataa yoyam epasmoc quellhip Jesucristo Visqui ingac. Amén.
