Wesse' egegkok apkeláneykha
1 Kóleyxho sekpeywa, kéxegke,
kélheykha nak apkelókxa
neyáwa wátsam ekwányam,
kóltaqmelchesho kélháxenmo sekpeywa,
kélheykha nak makhawók agko':
Ewóneykha axta ko'o Wesse' egegkok
matyeykemxa axta makham keso náxop;
apxeyenmeyk axta sekwesey m'a
sekyetnamakxa axta makham kañe'
méme awáxok.
2 Sókwenaqte ekmahamta agko' axta
aptemessáseykekxak ahaxkok,
eyáhakkassegkek axta apmék
setaqmelchessama,
etnessáseykekxeyk axta yágke ahamtek
ekmahamta agko' naw'a
keñe seyaqxegkessama m'a kañe'
apxata nak chá'a yágke aktek apagkok.
3 Aptáhak axta seyáneya s'e: “Israel,
xép apteme séláneykha,
xép sa' kañék axekmósek
seyeymáxkoho m'a énxet'ák.”
4 Keñe axta ko'o ektéma
élchetamso ewáxok se'e:
“Chaqhémok sektamheykencha'a,
eksawhomakyek sekyennaqte
meyke sekwete xama aqsok.”
Naqso' eyke aptaqmelchessama
Wesse' egegkok ma'a
ekyókxoho aqsok sélane nak chá'a,
yetneyk ekyaqmageykekxa
sektamheykha m'a aphakxa nak
Dios ahagkok.
5 Ekxawáyak ko'o ekha séláyo
nápaqtók Dios Wesse' ahagkok,
hakte cha'a apteme sénnaqtésso m'a.
Aptáhak Wesse' egegkok se'e,
ektáha axta sélane
sekyetnamakxa kañe' méme awáxok
yaqwayam atnehek apkeláneykha,
yaqwayam enxoho wának
elchexyók makham ma'a énxet'ák Israel,
cham'a Jacob énxet'ák apagkok nak,
yaqwayam enxoho elyepetchegwaták
makham:
6 “Mopwanchek xép etnehek séláneykha
wánxa apkelánekxésso apheykha m'a
Jacob énxet'ák apagkok
tén han yaqwayam enaqlanták
makham ma'a énxet'ák Israel
apkeleymomap nak meletsapma;
atnéssesek sa' nahan ko'o exchep
élseyéxma apagkok ma'a
apyókxoho pók aptémakxa énxet'ák,
yaqwayam sa' eswok
nélwagkásamáxche teyp ahagkok ma'a
makhawók agko' nak keso náxop.”
7 Aptáhak Wesse' egegkok
apcháneya énxet
kélwanyémo kélagko' axta chá'a s'e,
cham'a Dios Aptaqmalma nak Israel,
segwagkassamo nak teyp,
aptaqnagkamo apagko' axta chá'a m'a
pók énxet'ák nak,
aptéma axta chá'a
apchásenneykha naqsa m'a
kelwesse'e apkello nak:
“Apwet'ak sa' agkok chá'a exchep ma'a
kelwesse'e apkelwányam nak
tén han ma'a pók kelwesse'e nak,
elchempekxak sa' chá'a néten
eltekxeyagkok aptapnák xóp
apmonye' exchep
hakte ko'o axta sélyéseykha exchep
sektáha nak Wesse'
Dios Sektaqmalma m'a Israel,
alánhok chá'a ko'o m'a
sekxeyenma nak alána'.”
Jerusalén apxénamáp kóllánekxa'
8 Aptáhak Wesse' egegkok se'e:
“Wokmek yaqwánxa axekmósek
seyásekhayo,
eyátegmowágkokxeyk nahan;
wokmek ekhem
nélwagkásamáxchexa teyp,
ekpasmeyk nahan.
Ektaqmelchessegkek ko'o exchep
yaqwayam sa' elánekxak makham
ekhémo mók
sélpaqhetchásamáxkoho m'a énxet'ák,
yaqwayam sa'
elánekxak makham ma'a apchókxa,
tén han etnehek apagkok ma'a xapop
kélsawhomo axta aqsok
ekhéyak ma'a kañe',
9 yaqwayam sa' etnehek elának
apkelmomap nak se'e:
‘Kólántép’,
yaqwayam sa'
etnehek elának apheykha nak
ekyáqtésakxaxma s'e:
‘Kólántép élsakókxaxma.’
Kólwetak sa' chá'a pa'at
ekyókxoho m'a nekhaw'ék ámay,
kaxek sa' chá'a ektéyak kélnaqtósso
ekyókxoho m'a egkexe
meykexa nak chá'a xama aqsok.
10 “Megkalnáphek sa' chá'a meyk
megkalnáphek sa' nahan chá'a ekhem,
kamaskok sa' nahan élpekhésa m'a
ekmexanmaxma mayáhat,
hakte élásekhayók ko'o m'a,
eknaqleykha nahan chá'a,
anaqlakxak sa' nahan ma'a
élánteyapmakxa nak yegmen.
11 Alának sa' ko'o xama ámay ma'a
neyseksa nak meteymog
élekhahéyak,
meyke élyapwátéyak sa'
atnéssesek.”
12 ¡Kólenmexho!
Makhawók apkeleñamak ma'a:
nápakha apkeleñamak ma'a nexcheyha,
keñe nahan nápakha m'a
taxnegwánxa ekhem nak,
keñe nahan nápakha m'a
yókxexma Asuán.
13 ¡Néten,
kalpáxamha kapayhekxak awáxok!
¡Xapop, kayánchesho agko'
ekpayheykekxa awáxok!
¡Meteymog élekhahéyak,
kólpáxamha ekyennaqte kólessawasha!
Hakte apkelpeykessásekxeyk makham
apkelwáxok Wesse' egegkok ma'a
énxet'ák apagkok,
apkelásekhákxók makham ma'a
apkellegeykegkoho nak ekyentaxno
apkelwáxok.
14 “Keñe m'a Sión ektáha s'e:
‘Eyamasmeyk ko'o m'a Wesse' egegkok,
massegkek ko'o
ekxeyenma apwáxok ma'a
Dios ahagkok.’
15 ¿Kalwagqámhoya chá'a étche
xama kelán'a, ektáha nak chá'a
étche agko'?
¿Kalwatéssamhoya nahan chá'a
eyásekhayo?
Kalwagqámak sa' eykhe chá'a m'a
mehelwagqámhek sa' eyke ko'o exche'.
16 Élqahassegkek ko'o exche'
awáxok emék,
yókxoho ekhem sekwete m'a
kélhaxta nak neyáwa'.
17 Yahamók apya'awa m'a
apkeláneykekxa nak,
kaxnók ma'a ektáha axta aptegkesso;
apkelántekkek kaxwók ma'a
ektáha axta apketsagkasso.
18 Kalyeheykha, kasawheykha exma
neyáwa',
kalano ektáhakxa apwakhegwa'akto
apyókxoho énxet,
tén han ektáhakxa
apkelye'eykekta exche'.
“Naqsók ko'o sekxéna,
sektáha nak Wesse'
peya elxohok aqsok étkók
élmomnáwa xa apyókxoho nak
yaqwayam sa' kawakhésaxchek xeye',
ektémól'a kélnáxegkáseykha m'a
xama kelán'a
ekmáheyól'a kalyamhápok.
19 Apchókxa ekmaso axta exche'
kéltemessáseykekxa,
kélmassésseykmek axta,
kélsawhomók axta aqsok
ekhéyak ma'a kañe';
ketsék sa' eyke kaxwók
katnehek ma'a xapop agkok
yaqwayam sa' exmakha m'a
énxet'ák agkok.
Makhawók eyke kaxwók
apkelmahágkok ma'a
ektáha axta apketsagkasso.
20 Keñe sa' ma'a étchek
élxeyenma axta apkelxegáneykmo,
sa' etnehek yának se'e:
‘Ketsék agko' se'e apchókxa nak,
manxohók negko'o;
hentegyesha sa' yókxexma
yaqwayam aghakha.’
21 Keñe sa' xeye' katnehek awáxok se'e:
‘¿Yaqsa axta setasso ko'o xa
étchek nak?
Méko axta ko'o étchek,
mowanchek nahan óta';
élyentameykekxeyk axta ko'o
megkatnahakxa seyókxa,
ektaqmópeykegkek axta,
¿Yaqsa séktegkessesso ko'o xa?
Exakkók axta ko'o ektaqmópeykegkok,
¿háxko eyke apkeleñamakxa xa?’”
22 Aptáhak Wesse' egegkok se'e:
“Ay'ássesek sa' ko'o néten émek
ma'a pók aptémakxa nak chá'a énxet'ák;
apekkenchessek sa' xama aqsok
magkenatchesso
yaqwayam sa' elqeynenták
enaqlantagkasek ma'a
étchek apkelennay'a nak,
tén han ma'a kelwán'ák nak.
23 Sa' katnehek ekteme yapmeyk ma'a
kelwesse'e apkelwányam nak
keñe sa' ektaqmelchesso chá'a m'a
kelwesse'e kelwán'ák nak.
Eltekxeyagkok sa' chá'a aptapnák xóp
amonye' exche',
ekwokmoho apkeltekxeya nápaqta'a xóp
ekweykekxoho m'a
kelwesse'e kelwán'ák nak,
awanhók agko' sa' katnehek apcháyo.
Keñe sa' kay'asagkohok ko'o
sekteme Wesse',
kay'asagkohok sa' nahan
memegqáyhek chá'a m'a
ektáha nak ko'o mehey'ásseyam.”
24 ¿Kélwancheya kólyementók
aqsok apkelma axta neyseksa
kempakhakma m'a
xama énxet apyennaqte?
¿Apwancheya nahan xama énxet
apmomap
exyánegkesek ma'a wesse' aplo nak?
25 Apxénchek Wesse' egegkok
kélwanchek kólyementók:
“Kólyementemekxak sa'
apkelma axta m'a
énxet apyennaqte nak,
kólyementemekxak sa' aqsok
ekxámokma axta apkelma m'a
wesse' aplo nak.
Ko'o sa' alátegmoweyxchek chá'a m'a
apmáheyo nak chá'a elátegmoweykpok;
ko'o ahagko' sa' nahan
alwagkasek teyp ma'a
étchek nak xeye'.
26 Wának sa' ko'o etawagkokxak
aphápetek apancha'awók ma'a
apsawhéssamo axta aqsok kélagkok,
wának sa' kalnápekxak ma'a
éma apagkok apagko' nak
ektémól'a énagkok ma'a vino.
Keñe sa' elya'asagkohok
apyókxoho énxet
ektáha ko'o sekwagkasso teyp,
ko'o sektáha nak Wesse';
elya'asagkohok sa'
sektáha sekmallahanchesso
aqsok ekyentaxno,
ko'o sektáha nak
Jacob Wesse' apagkok
ekha sekyennaqte.”
Apcasinancama Visqui ingac
1 Quip elaylhojo quellhip apnaycam yoclhilhma acyayem lhop najan lhalhma anco mocjay. Elyacyesquic coo Visqui ingac motyaycamlha coo, selyacyescama coo naysicsa sicyitnama avalhoc meme coo (sictimesomalhca avalhoc).
2 Etamilcasquic coo Visqui ingac, emcasquic coo appayvam, yoyam olyatam colhojoc sat sovo acma ajamtic. Sicyitsomalhca yanca ajamtic acyitna aplhancoc apanco.
3 Aptomjac alhta seyanya: Lhip nac siyasinancama Israel, lhip sat etasquisic gloria mayayoclha ajanco — alhta aptomjac.
4 Inlhenquic alhta evalhoc: Alhto inyicje sictamjaycam coo. Acvascapqui inyicje, alhto eyca sicvascapma — alhta intomjac evalhoc. Jepasmoc sat nasoc anco Visqui ingac, olhcac sat acyanmongam ayinyema Dios Visqui ingac.
5 Epamejitcasquic Dios Visqui ajac, aptomja selyacyescama naysicsa motyaycamlha mocjam coo, sicyitnama avalhoc meme coo, yoyam otnejic sictimesaycam coo. Yoyam ongvansiclhac sat israelitas, apquilvisay Jacob aptovana niptamin, onaliclhac sat apnaclha Dios.
6 Aptomjac alhta seyanya: Lhip aptomja siyasinancama, jave acvamlha yoyam ingyansiclhac apyovoclhojo israelitas najan apnalayquinta apquilaymomap israelitas. Otnesquisic sat lhip, etnejic apquitsasquiscama olhma nipyesicsa enlhitaoc lhalhma anco, yoyam elvomsacpoc sat tap apyovoclhojo enlhitaoc acvaycmo nelha lhopactic (nalhpop) — alhta aptomjac seyanya. ,
7 Aptomjac alhta appayvam Visqui ingac, apquilvomquiscama tap israelitas, apquilanyacpo enlhitaoc malvenéycam, apquiltimesaycam apquilmomap apnaclha apvisqui apmapsom: —Elvitac sat apquilviscaa metnaja israelitas apquiltemaclha quellhip apquilvomsomap tap, ingyaniclhac sat netin, eljalhic sat apnaclha lhip. Ayinyema coo, sicvisay Dios Visqui apancaoc israelitas, sictomja silyacyescama alhta lhip, ayinyema siclhanma mepqui sicyeycajascaoc — alhta aptomjac Visqui ingac.
Apquillanomap mocjam Jerusalén
8 Aptomjac alhta appayvam Visqui ingac: —Ongvaylhojoc sat selmalhnaycam quellhip, acvaa inlhojo acnim siyasicjayquiclha quellhip. Olpasmoc sat quellhip, acvaa inlhojo acnim apquilvomsomap tap quellhip. Ollanac sat pacto ningmiyovmalhca nipyesicsa enlhitaoc lhalhma anco, ayinyema quellhip apquilmiyovmap. Ellhnam sat mocjam quellhip apquilaoclha nano, elmilascoc sat yoclhilhma, ellhovamcoc sat apnaymacoc. 9 Otnejic sat ongvanic apquilmomap: am eltomjac quellhip apquilmomap, eltajiclha. Najan apquilanyacpo apquileyvam yatescamalhma: Elmiyama jilip, elvitacpoc quellhip — sat otnejic ongvanic. Elvitac sat quellhip aptoycaoc nalhit amay. Elvitac sat aptoycaoc apnatoscama nipquesic netin inquilhe actamopeycaoc.
10 Cotnejic sat mepqui mayic quellhip najan mepqui apquilyamay. Cajejec sat acnim najan acmajat quellhip, ayinyema sicmasma coo najan sicnalayclha quellhip actiyapmaclha yingmin, yoyam elyinamcoc.
11 Ollanac sat amay acyitnamaclha inquilhe, opeyveclhac sat amay apquillhingam.
12 Quip elanojo enlhit ajancaoc apquililhyam mocjay: apquilinyema nilhqueyja, poc apquilinyema actalhningvamlha acnim, poc najan nipiyam yoclhilhma Egipto.
13 ¡Elitsovacsojo quellhip apnaycam netin! ¡Elitsovacsojo quellhip apnaycam nalhpop! ¡Najan quellhip apnaycam netin inquilhe! Aptamilquiscacmec Visqui ingac apquilvalhoc enlhit apancaoc. Apquilasicjaclhec enlhit apquillingaycamco acmasom.
14 Apquiltomjac apquilpayvam co Jerusalén: Singyamasma Dios Visqui ingac, melhanma ningilvisay — apquiltomjac maa.
15 Aptomjac Visqui ingac apquilanya: ¿Avanqui ya quilvana colvoncamoc ayitca comascoc ayasicjayo? Inquilvoncacmec sat ancoc inquin, coo eyca jelvoncamejec sat mataa quellhip.
16 Actalhosquic coo emeoc tacja quellhip apquilvisay. Acvitac coo mataa tingma apjalhtam apnaycam quellhip.
17 Apquilpecjasquic enlhitaoc yoyam ellaniclhac sat tingma Jerusalén, elinyajamcoc sat apquiltomja apnatovascama siclho.
18 ¡Elinmelhojo nipyava quellhip! ¡Apquililhyacmec maa apcanayclha as tingma!
Actomjac coo siyanya mepqui sicyeycajascaoc: Apquilyitsomacpo as enlhitaoc mataymong ayitcoc acmamnave, acno alnatanma alyinmom quilvana ayitcoc acponquinomalhca.
19 Tingma alhta aptovasomap najan apyinyovmap, mepqui enlhit. Elhamiclhac sat enlhitaoc elhnam as tingma. Melvitacpejec sat mataa enlhit apnatovascama siclho as tingma. 20 Tingma apyitsomacpo quilvana mepqui ayitquic. Quilhvoc sat elhamiclhac maa, eltimjic apquilpayvam: Apmojosacpec tingma, apquitcoc as tingma, jingiltingyasquis yoyam onlhic — sat eltimjic.
21 Cotnejic sat aclhanma apquilvalhoc: Motay eyitquic coo, ¿co laa apquilinyema as eyitquic? Sicmomalhca alhta coo, najan sictanovmalhca. ¿Co laa ayinyema apquilvanimquiscama? Sicyinyovmalhca alhta coo, ¿co laa apquilinyema as eyitquic? — sat cotnejic apquilvalhoc tingma Jerusalén.
22 Aptomjac appayvam Visqui ingac: Ongvapajacsic sat colhic altimnasa enlhitaoc lhalhma anco, elvitac sat asoc monquinatquiscama coo. Elcaynentac sat apquitquic apquilinava najan quilvanaa, najan elpatmentac sat maa.
23 Apquilviscaa metnaja israelitas eltamilsic sat apquitquic quellhip, malha apquiltimesaycam sat eltimjic. Eljalhic sat, acticlhicvocmo payjaclha napataa nalhpop napatavo quellhip. Elyamilam sat lhopactic apmancoc quellhip. Elyicpilcangvomoc sat quellhip, sicvisay Visqui apancaoc quellhip. Melyinimsacpejec sat mataa aquiltomja mejelyasquiyam — alhta aptomjac.
24 Apquiltomjac apquilpayvam quellhip: ¿Naso ya colnatamalhcac apquilnatam enlhitaoc apquilimpocjay alhta? ¿Apvanqui ya enlhit apmomap ingyinyejic napato apvisqui apmapsom? — apquiltomjac quellhip.
25 Eycaso appayvam ayinyema Visqui ingac: Elnatamacpoc sat apquilnatam enlhit apquilimpocjay alhta. Elyinyovsic sat apquilmomap napato apvisqui apmapsom. Olnapalhcac sat coo lha, olvomsic sat tap quellhip apquitquic.
26 Elnatovasacpoc sat apanco cotnaja ingmoc, eticyoc sat apancavo maa, malha anmin alnapma. Elyasamcojoc sat apyovoclhojo enlhitaoc as nalhpop, sicvisay Visqui sicyimtalhnamo, silvomquiscama tap quellhip, sicyinyovquiscama actemaclha apquilmomap quellhip — alhta aptomjac — nic nat aptomjac profeta.
