Dios apwóneykha m'a Josué
1 Natámen apketsapma axta Moisés, apteme axta Wesse' egegkok apchásenneykha, keñe appaqhetchesa Wesse' egegkok ma'a Josué, apketche nak Nun, apteme axta appasmeykha aptamheykha m'a Moisés. Axta aptáhak apcháneya s'e:
2 “Apketsekkek kaxwók séláneykha Moisés. Xeyep sa' kaxwók etámeyekxak ma'a wátsam Jordán, yetlo m'a apyókxoho énxet'ák nak Israel, yaqwayam kólmahagkok ma'a yókxexma yaqwánxa nak agkések kéxegke. 3 Ko'o sa' agkések ekyókxoho xapop, cham'a yaqwánxa sa' kólhamok kéxegke, ekhawo séltennassamakxa axta m'a Moisés. 4 Agkések sa' kéxegke xapop kélagkok eyeynókxa nak ma'a yókxexma meykexa énxet, ektemegwánxa nak néxa yókxexma élekhahéyak ma'a Líbano, ekweykmoho wátsam ekwányam Éufrates, tén han ma'a ekyókxoho xapop apheykegkaxa nak énxet'ák Hititas, néxa m'a wátsam ekwányam nak Mediterráneo. 5 Méko sa' kaxhok ekwánxa nak xép apyennaqte neyseksók apha makham se'e náxop, hakte ko'o sa' atnehek sekxegexma ekhawo sekteméssessamakxa axta m'a Moisés, meyke sekyenyaweykha, mayenseykmok han xama ekhem enxoho. 6 Ewasqap tén han énnaqtésho apwáxok, hakte xeyep sa' emlaskok xa xapop nak, yaqwayam elmésagkok ma'a aphawóxama, hakte axta ko'o sekpagkanchesso yaqwayam agkések ma'a kélyapmeyk nanók axta kéxegke. 7 Wánxa aqsa séltamho keytek ekwányam agko' apwasqápeykekxoho tén han énnaqtéshok apwáxok, esawhoho sa' elának ma'a ekyókxoho segánamakxa séláneykha Moisés axta apmésso. Elyahakxoho sa' ekyókxoho meyke apcháyam xama, yaqwayam kataqmelhok chá'a ekteyapma m'a ekyókxoho aqsok apkelanakxa enxoho. 8 Ná eyensem apkelyetsete ektémakxa nak ekpeywa m'a weykcha'áhak segánamakxa nak antéhek Dios, keñe sa' kalchetamha chá'a apwáxok ekhem tén han axta'a, yaqwayam enxoho elának ma'a éltamhókxa enxoho elána'. Hakte cháxa ekyókxoho ektáhakxa enxoho aqsok apkelane, tásek sa' katnehek chá'a ekteyapma. 9 Ko'o neykhe sektáha sekmésso yaqwayam ewasqápekxoho tén han énnaqtéshok apwáxok. Nágye aqsa hakte ko'o sektáha xeyep Wesse' apagkok, keñe han Dios apagkok. Atnehek sa' sekxegexma apmakókxa enxoho chá'a emhagkok.”
Josué apkeláneykekxa aptáhakxa yaqwayam emok xapop
10 Aptáhak axta Josué apkelpaqhetchesa m'a apkelámha apmonye'e apagkok nak énxet'ák: 11 “Kólmohók sa' ma'a ekyókxoho apkelpakxeneykegkaxa nak énxet'ák, keñe sa' kólának yánchásekxak aptéyak ma'a apyókxoho nak, hakte ántánxo ekhem kaxwók kéméxche', tén sa' óltámeyekxak ma'a wátsam Jordán, yaqwayam agmok ma'a xapop egagkok apmako nak hegmések Dios Wesse' egegkok.”
12 Apkelpaqhetchessek axta han Josué m'a énxet'ák apagkok nak Rubén, Gad énxet'ák apagkok, keñe han ma'a nápakha énxet'ák nak Manasés. Aptáhak axta apkeláneya s'e:
13 —Kaxénwakxoho sa' kélwáxok aptémakxa axta appeywa m'a Moisés, apteme axta Wesse' egegkok apchásenneykha, aptéma axta apkelánagkama s'e: “Wesse' egegkok, Dios kélagkok nak kéxegke, sa' egkések xa xapop nak, yaqwánxa sa' kóllókassók kélyampe.” 14 Kólána sa' kaxnekxak kélnaqteyegka'a s'e tén han ma'a sakcha'áletkók, keñe han ma'a kélnaqtósso nak, keso yókxexma apméssamakxa axta kéxegke Moisés ekpayho nak se'e halep nak Jordán. Keñe sa' apyókxoho énxet'ák apmopwána nak yempakha', kólmekxa sa' kélmeykha tén sa' kólxog apmonye'e nak kélyáxeg, yaqwayam kólpasmok apkelnápomap, 15 ekwokmoho apmésa sa' Wesse' egegkok ma'a xama yókxexma yaqwánxa enxoho ellókassók apkelyampe, ekhawo m'a ektáhakxa axta apmésa kéxegke, kenhan ekwokmoho sa' aptáha apagkok apagko' xa xapop peya nak egkések Wesse' egegkok. Keñe sa' kéxegke kélwanchek kólmeyenták makham se'e xapop kélagkok ekpayhókxa nak ekteyapmakxa ekhem ma'a wátsam, yaqwayam kóltéhek kélagkok kélagko' xa xapop nak, apmésso axta m'a Moisés, apteme axta Dios apchásenneykha.
16 Keñe axta apkelátegmowágko m'a énxet'ák:
—Anlának sa' ekyókxoho xa apkeltamhókxa nak anlána', ólmahagkok sa' han ma'a sẽláphasakxa enxoho. 17 Ólyahakxohok sa' han chá'a ekhawo m'a ektémakxa axta nélyeheykekxoho Moisés. Wánxa aqsa néltamho negko'o Wesse' egegkok nak Dios etnehek apxegexma, ekhawo m'a aptéma axta chá'a apxegexma Moisés. 18 Apyókxoho énxet ektáha enxoho apkenmexeykha, tén han memako enxoho elyahakxohok ma'a apkeltamhókxa enxoho etnehek, emátog sa'. Wánxa aqsa néltamho negko'o exchep ewasqápekxoho' tén han énnaqtéshok apwáxok.
Apcanyomap nic nat Josué
1 Apquitsepquic nic nat Moisés, Dios apquilancam. Apnec nic nat Josué, Nun apquitca, Moisés apquilancam.
Aptomjac nic nat Dios apcanya Josué: 2 —Apquitsepquic alhta selancam Moisés. Ingva, iltama sat lhip vatsam Jordán najan aplhamoclhojo enlhitaoc. Coo sat omquecsic yoclhilhma eltimjic apancaoc aplhamoclhojo enlhitaoc Israel. 3 Altimnasquic siclhoc alhta Moisés: Cotnejic sat apancaoc yoclhilhma acvamlha apquiltomja apquilvoyam quellhip. Coo sat cotnejic sicmescama. 4 Ayenmo sat cotnejic yoclhilhma actamopeycaoc acvocmo inquilhe Líbano najan acvocmo vatsam acyivey Eufrates. Acyovoclhojo apquilaoclha enlhitaoc heteos acvocmo yingmin acvanyam actalhningvamlha acnim. Cotnejic sat quellhip yoclhilhma apancaoc. 5 Etnejic sat mataa apyimnatem lhip aclhamoclhojo acnim aptiyascamcalha. Otnejic sat siclhalhma lhip acno alhta Moisés sictomja alhta mataa siclhalhma. Opasmoc sat mataa, moyinyovejec sat mataa lhip. 6 Ivascap sat lhip, iyimnaticsojo sat apvalhoc. Lhip sat emlascoc amyipayc yoyam eltimjic apancaoc as enlhitaoc. Eycaso yoclhilhma siclhanma alhta actomja nasoc anco yoyam ellhovac apquilyeyjamcaa. 7 Iyimnaticsojo sat apvalhoc, ivascap sat yoyam eyiplovcasojo aclhamoclhojo actemaclha apcanamaclha Moisés. Lhip alhta aplhenacpoc. Noyinyov nasa mataa actemaclha apcanamaclha yoyam cotamilic aptiyascam lhalhma anco. 8 Noyinyov nasa aplhanma vaycajac actalhesomalhca singanamaclha. Colhen sat mataa apvalhoc acnim anco najan alhtaa. Itamilquis sat mataa. Iyiplovquis sat aclhamoclhojo actemaclha singanamaclha. Cotamilic sat lhip aptiyascam apyasaclha lhalhma anco. 9 Actomjac coo siyanya lhip: Ivascap sat lhip, iyimnaticsojo sat apvalhoc. Ningya nasa mataa, nocotnajam nasa apvalhoc. Coo nac Dios, lhip Visqui pac. Sictomja mataa siclhalhma apyasaclha lhip lhalhma anco — nic nat aptomjac Dios.
10 Apcansaclhec nic nat Josué apquilimja apmamyi enlhitaoc Israel. Aptomjac nic nat apquilanya: 11 —Elpayes sat amyaa nipyesicsa enlhitaoc. Eltime sat elanic: Elpenacsojo sat eltingyacsic aptoycaoc. Yicpintama natqui acnim ongiltamaoc sat vatsam Jordán. Ongilyacsic sat yoclhilhma yoyam ontimjic ingancoc. Dios Apyimtalhnamo aptomja singmescama as yoclhilhma — sat eltime elanic enlhitaoc — nic nat aptomjac Josué.
12 Appamejitcasquic nic nat Josué enlhitaoc Rubén apmolhama najan Gad apmolhama najan napocja enlhitaoc Manasés apmolhama.
Aptomjac nic nat Josué apquilanya: 13 —Elyasingvoclhojo actemaclha appayvam alhta Moisés, Dios apquilancam. Aptomjac alhta Moisés apquilanya: Dios Apyimtalhnamo ayinyema apmescama as yoclhilhma najan ayinyema ningnayclha. 14 Colhnam sat yoclhilhma jalip vatsam quellhip apnatamcaa najan apquitquic najan apnatoscama. Eycaso actomja alhta apcanama Moisés. Quellhip enlhitaoc acma apquilmaycam: Elyas sat apquilmamyi. Elvascap sat elpasmoc apnaymacoc 15 acvocmo acnim apnayclha apnaymacoc. Colhojoc sat apnayclha quellhip ayinyema Dios. Eltimjic sat apancaoc yoclhilhma apmescama Dios. Natamin eltajojo sat mocjam quellhip actomjaclha yoclhilhma apancaoc. Ayinyema alhta Moisés, Dios apquilancam apmescama quellhip, jalip vatsam Jordán acpayjo actiyapmaclha acnim. Eltimjic sat quellhip apancaoc as yoclhilhma — nic nat aptomjac Josué.
16 Apquilatingmavoc nic nat napato Josué: —Ongilyejiclhojoc sat mataa aclhamoclhojo actemaclha singanamaclha lhip. Ongilyacsic sat apquiltamjoclha ongilyacsic. 17 Ningilyajaclhoc alhta mataa Moisés appayvam. Colhojoc sat ningilyajayquiclho lhip appayvam. Ningiltamjoc etnejic aplhalhma lhip Dios Apyimtalhnamo pac, acno alhta aplhalhma Moisés. 18 Incaymalhquic ematong aptomja melyajayquiclho lhip appayvam, aptomja apquinmelhaycam lhip apcanamaclha. Ivascap sat lhip, iyimnaticsojo sat apvalhoc — nic nat apquiltomjac.
