Job apyekpelchágwayam apteme Dios apya'áseykegkoho aqsok
Job
1-2 Ekya'ásegkók ko'o
exchep apmopwána
elának ekyókxoho aqsok,
méko xama aqsok
megkapwagkexa elána'.
3 Mowanchek ko'o
matnéssesek naqso'
ma'a ektémakxa nak
apya'áseykegkoho aqsok.
Ekxeyenmeyk axta aqsa
chá'a ko'o m'a aqsok
may'ásegko nak,
cham'a aqsok élyawe
mamowána nak ay'asagkoho'.
4 Axta aptáhak
xép seyáneya s'e:
“Yeyxho, peyk ko'o
apaqhetchesek xeyep;
yátegmowák sa' se'e
sélmaxneyeykha nak.”
5 Amya'a seklege
axta aqsa chá'a
ekya'áseykegkohok xép,
keñe kaxwók sekwet'a
ahaqta'ák ahagko'.
6 Cháxa keñamak
sekmegqágwokmo
nak ko'o eñama m'a
sektémakxa axta
chá'a sekpeywa,
tén han sekhama náxop
tén han neyseksa táhap.
Dios apxámassáseykekxa makham aqsok apagkok Job
7 Axta aptáhak han Wesse' egegkok apcháneya Elifaz, natámen axta han apteme apkenagko Job xa ektáha nak: “Ektaqnókkók ahagko' ko'o exchep tén han ma'a apqánet apkelxegexma'a nak, hakte megkólpékessamók chá'a sélxeyenma ko'o, aptéma nak ma'a séláneykha Job appékessamo chá'a sexeyenma. 8 Kólnáhap sa' kaxwók siete weyke kelennay'awo, tén han siete nepkések apkelennay'awo, keñe sa' kólyo'ókxak ma'a séláneykha Job, kóltemésses sa' aqsok élwatnamáxche eñama kéxegke. Séláneykha Job sa' elmaxnéssesek kéxegke, keñe sa' ko'o amok takha' apkelmaxnagko, matnéssessamók sa' exma ekmaso xama enxoho, payhawok eykhe atnéssesek eñama megkólteméssesso chá'a naqsók sélxeyenma, aptéma nak ma'a séláneykha Job apteméssessama chá'a naqsók sexeyenma.”
9 Apkelxegkek axta m'a Elifaz, Bildad tén han Sofar, apkelánegko m'a apkeltamhókxa axta elanagkok ma'a Wesse' egegkok, apmeyk axta han takha' Wesse' egegkok apkelmaxnagko m'a Job.
10 Keñe axta natámen apkelmaxnéssesso Job ma'a apkelxegexma'a nak, apmeyásekxeyk axta makham Dios ektaqmalma apheykha, ektéma axta m'a nanók axta, apyeykhássessekmók axta apkelmésso m'a aqsok, cham'a ekwánxa axta ekyetnama m'a sekxók axta. 11 Keñe axta apkelyo'ókmo apyókxoho aptáha meyk'a m'a apkelyáxeg apkelennay'a, tén han kelwán'ák tén han ma'a apnámakkok nak, keñe han ma'a apyókxoho nanók apkelweteykxa nak, apkelánegkek axta xamók ektámáxche ekyawe m'a apxagkok. Apkelxénchek axta han éllapwámegkoho xamo', tén axta aptaqmelchessásekxo apwáxok, eñama m'a ekyókxoho aqsok ekmaso apchahe axta m'a Wesse' egegkok. Xama axta han chá'a apmeyásak selyaqye, tén han ma'a kélatchesso kélaphék sawo ekyátekto ekmomnáwa.
12 Appasmomchek axta Dios amonye' yaqwayam katnégwók néxa apha m'a Job, apyeykhássesseykmók axta apkelmésso aqsok ma'a ekweykenxa axta m'a nanók axta. Catorce mil axta apweykmok nepkések apnaqtósso, seis mil yányátnáxeg, mil axta m'a weyke kéltéteykekxa nak mók, keñe mil yámelyeheykok. 13 Catorce axta han apyókxoho apketchek apkelennay'a, keñe ántánxo m'a apketchek kelwán'ák. 14 Jemimá axta apteméssessók ekwesey m'a katnaha étkok nak, keñe axta m'a ektétéyak nak Quesiá, keñe axta m'a mók nak Queren-hapuc. 15 Méko axta han kelán'a éltaqmalma agko' ekyókxoho keso nélwanmeygkaxa', ektéma axta m'a Job apketchek. Apxeyenmeyk axta han elmeyásekxak aqsok apagkok neptámen ma'a yáp, yetlo m'a kelyapma nak.
16-17 Ciento cuarenta apyeyam apagkok axta han weykmok apha Job natámen xa, apwányamók apagko' axta aptemék apketsapma, apkelwetayók axta m'a apketchek, aptawán'ák tén han ma'a pók aptawán'ák nak, tén han ma'a apketchek aptawán'ák nak.
Job napato Dios
1-2 Aptomjac nic nat Job apcanya Dios: Acyasamcoc coo apmopvan apanco lhip, ellanac aclhamoclhojo asoc lhalhma anco.
3 Movanquejec coo oyascomoc lhip apyimtalhnamo, naysicsa mepqui sicyascamco. Altimnasquic coo sicpayvam, najan simpilapquiscama mepqui sicyascamco.
4 Aptomjac alhta lhip seyanya coo: Ingyeylhojo sicpayvam. Olmalhnam sat lhip jeyatingmojo — alhta aptomjac lhip.
5 Aclingac alhta amyaa aplhenacpo lhip. Quilhvo eyca sicvita lhip najato.
6 Acmancaquic coo siclhanma sicpayvam. Naso, sicsilhnanomalhca ajanco, sicna coo netin lhopactic najan tajap — nic nat aptomjac Job.
Mayasicjayclha Job
7 Appenasquic nic nat Dios appamejitquiscama Job. Aptomjac nic nat Dios Ingyapam apcanya Elifaz: —Inlovquic evalhoc coo sicvita lhip najan apcanit apnaymacoc. Apquilmopvancaa amyaa nac quellhip. Nasoc alhta appayvam Job selhanma coo. 8 Eltingya sat quellhip siete vayqui inquilinava najan siete nipquesic. Enaliclha sat apnaclha Job. Elaa sat actemaclha selmescama coo acyanmongam melyascalhma. Job sat elmalhnesquisic, ongvaylhojoc sat apquilmalhnesquiscama. Motvacsejec sat quellhip, apquiltomja inlhojo apquilmopvancaa amyaa sellhanma coo. Nasoc alhta appayvam Job selhanma coo — nic nat aptomjac Dios Apyimtalhnamo.
9 Apquillhinquic nic nat Elifaz, najan Bildad, najan Zofar. Apquilyiplovcasquic nic nat actema nac apcanama Dios. Apjalhnoc nic nat Dios apquilmalhnesquiscama Job.
10 Appenasquic nic nat apquilmalhnesquiscama Job. Intamilaclhec nic nat apyimpejic Job. Aplhocac nic nat Job aclhamoclhojo apquilnatam, najan aclhamoclhojo apnatoscama, am colhnoc siclhoc alhta, dos veces más. 11 Apquilmiyantac nic nat apnaclha Job eltimjic maycaa apquilpipma, apquilyalho, apquilyalhinga, apquilmolhama, najan apnaymacoc nano. Apquillanac nic nat fiesta Job tingma pac. Apquillhenquic nic nat acmayovsa apquilvalhoc naysicsa aplingaycamco acmasom Job. Apquiltamilquiscacmec nic nat apvalhoc Job. Innec nic nat almesa nicja solyayem najan alatquiscama apopejic oro alyinmom.
12 Avanjec anco appasmom Dios as apquilvamlha nac jay Job, am colhno nano. Apquilyipsatquic nic nat catorce mil apnatoscama nipquesic. Seis mil apnatoscama camellos voncayispoc. Dos mil vayqui yamquilvanaa najan mil apnatoscama yamelyeyjaycoc. 13 Apvitac nic nat catorce apquitquic apquilinava najan tres quilvanaa apquitquic. 14 Actiyam amamyi acvisay nic nat Jemima Valhaay moc acvisay nic nat Cesia Asoc Masis, moc acvisay nic nat Keren-hapuc, ningiltimem Ningiltilhnamalhca Acmasis. 15 Altamila anco as quilvanaa, am colhno moc quilvanaa lhalhma anco. Inquillhocac nic nat almayclha inquilyap apquilnatam. Najan inquilyipmaa, apquillhoy nic nat apquilnatam ayinyema apquilyap.
16-17 Aptiyasam nic nat mocjam Job ciento cuarenta años. Apquitsepmec nic nat aptomjaclha apvanyam apanco. Apvitac nic nat apyovoclhojo apquitquic, najan aptovana, najan aptovana apquitquic.
