Ezequiel apkelxeyenma apkelpeykessamo nak chá'a kéleykmássesso
1 Epaqhetchessek axta ko'o Wesse' egegkok. Aptáhak axta seyáneya s'e: 2 “Yenmexho élámhakxa nak meteymog élwenaqte Israel. Eltennés sa' sektáhakxa ko'o sekxeyenma m'a. 3 Sa' etnehek elának se'e: ‘Egkexe Israel, kóleyxho aptáhakxa exchek Wesse' egegkok apkelxénagko m'a egkexe tén han ma'a egkexe yámnáxap'awo nak, tén han ma'a wátsam nak tén han ma'a élyapwátegweykenxa nak xapop: Wáphaksek sa' ko'o kempakhakma kélnepyeseksa kéxegke, wának sa' kólmasséssessók ma'a néten kélpeykessamókxa chá'a aqsok kéleykmássesso. 4 Nekha'a étkók sa' ko'o atnessásekxak ma'a meteymog kélnegkenmakxa nak chá'a kélnaqtósso kélnapma tén han kélwatnamakxa nak chá'a m'a aqsok ekmátsa agko' la'a ekpaqneyam éten agkok, wának sa' ko'o eletsapok aqsa naqta'awók kéleykmássesso apagkok ma'a énxet'ák kélagkok nak. 5 Akxák sa' ko'o aphopák amonye'e kéleykmássesso apagkok ma'a énxet'ák Israel, waxpánchesha sa' apexchakkok ma'a nekhaw'ék nak apwatnamakxa chá'a aqsok. 6 Kólmasséssók sa' chá'a tegma apkelyawe ekyókxoho yókxexma kélhámxa enxoho chá'a kéxegke, élmasagcha'a agko' sa' katnekxak ma'a néten kélpeykessamókxa nak chá'a kéleykmássesso kélagkok. Kólnaqtawasha agko' sa' ma'a kélwatnamakxa nak chá'a aqsok, nekha'a étkók sa' katnekxak ma'a kéleykmássesso kélagkok; kólpalchesek sa' ma'a kélwatnamakxa nak chá'a aqsok ekmátsa agko' nak ekpaqneyam éten agkok; kamassegwók sa' ekyókxoho m'a aqsok kéllánéyak nak chá'a kéxegke. 7 Kélwet'ak sa' agkok apxámokma apagko' apkeletsapma énxet kélnepyeseksa kéxegke, kólya'ásegwók sa' sektáha ko'o Wesse'. 8 Wának sa' eyke ko'o kólwomok teyp kélnápakha kéxegke tén han megkóltekyewe, kólexpaqnek sa' kólmahagkok ma'a nepyeseksa nak pók aptémakxa énxet. 9 Kalxénwók sa' ko'o apkelwáxok neyseksa apheykha nepyeseksa pók aptémakxa énxet'ák ma'a meletsapma nak, kalxénwakxohok sa' apkelwáxok ektáhakxa séllegassáseykegkoho eñama seyenseyam sétleykha, tén han eñama seyamasma, yaqwayam elpeykeshok ma'a aqsok kéleykmássesso. Megkalchek sa' apkelwáxok elanok apkeltémakxa eñama m'a ekyókxoho aqsok ekmaso apkelánéyak, tén han eñama m'a ekyókxoho apkeltémakxa ekmaso agko' nak. 10 Keñe sa' elya'ásegwók, ko'o sektáha nak Wesse', megkatnaha sekxeyenma naqsa m'a sekxénakxa axta atnéssesek, séltennasa axta wáphássesek se'e aqsok ekmaso nak.’”
11 Aptáhak axta seyáneya Wesse' egegkok se'e: “Eltekpogmakha sa' apmék kaqhek apwáxok, eltekpogmakha sa' nahan apmagkok xapop; elekxagwaha sa' ekyennaqte agko' eñama m'a apkeltémakxa élmasagcha'a agko' nak énxet'ák Israel, hakte emaskok sa' eñama kempakhakma m'a tén han meyk tén han ma'a negmasse ekmaso nak. 12 Emaskok sa' chá'a eñama negmasse m'a apheykha nak makhawo', keñe sa' ma'a apheykha nak chá'a keto', emaskok eñama kempakhakma, keñe sa' ma'a apkeleymomap nak meletsapma, emaskok sa' meyk élnapma. Keñe sa' kamaskok ko'o séltaqnawéyak ma'a, kamaskok sa' seklo. 13 Elya'ásegwók sa' ko'o sektáha Wesse', apkelwet'a sa' kaxnagkok kélhapák neyseksa kéleykmássesso apagkok xa énxet'ák nak, tén han ma'a nekhaw'ék nak kélwatnamakxa chá'a aqsok, tén han ma'a ekyókxoho egkexe yámnetna'awo nak, tén han ma'a egkexe étseksa'ák nak, tén han ma'a ekyókxoho kóneg yenta'a éltaqmalma nak áwa', tén han ma'a ekyókxoho kóneg nak yámet élyawe élyentaxno nak pessesse agkok, tén han ma'a apkelseykekxéssamakxa nak chá'a kéleykmássesso apagkok ma'a sokmátsa élmátsa agko' nak élpaqneyam. 14 Amha sa' ko'o sekmowána yaqwayam allegássesagkohok ma'a énxet'ák nak, atnessásekxak sa' ko'o apkelókxa ekmaso agko' ekyókxoho yókxexma apheykegkaxa nak chá'a énxet, eyeynamo m'a meykexa nak énxet ekpayho nak nepyeyam, ekweykmoho m'a Riblá ekpayho nak nexcheyha. Keñe sa' elya'ásegwók sektáha ko'o Wesse'.”
Apquilayo quilaycmasquiscama
1 Aptomjac alhta Visqui ingac seyanya coo: 2 Ilanojo siclho inquilhe alvinatem, ilngas sat sicpayvam sicyanmongsayclha apquiltemaclha apancaoc. 3 Ilngas sat actema nac jay: Amyaa allhenamalhca inquilhe alvinatem najan yamalvinatem, allhenamalhca vatsam najan alvata. Elimpocjac sat cotnaja ingmoc. Conatovasalhcac sat acyitnamaclha quilaycmasquiscama netin inquilhe alvinatem. 4 Onatovacsic sat altares apquilvatnamaclha macmescama quilaycmasquiscama, najan apquilvatnama talha asoc acmasis. Elvitacpoc sat apjapaoc payjoc acyitnamaclha quilaycmasquiscama. 5 Ongvilhpansic sat apilhquipcoc niyava altares apquilvatnamaclha. 6 Enatovasacpoc sat tingma apquilvanyam lhalhma anco apquileyvomaclha quellhip. Conatovasalhcac sat acyovoclhojo altares acyitnamaclha quilaycmasquiscama, conatovasalhcac sat najan quilaycmasquiscama, najan altares apquilvatnamaclha asoc acmasis. Comascoc sat acyovoclhojo asoc apquillanay siclho enlhit. 7 Apquilvitac sat ancoc aplhamoclhojo apjapaoc apnaycaoc maa, jelyicpilcojoc sat coo, sicvisay Visqui sicyimtalhnamo.
8 Otnesquisic coo, yoyam elaymacpoc sat napocja quellhip mepqui apticyovam, ongvilhpansic sat nipyesicsa metnaja israelitas. 9 Colyitnam sat apatic maa, sicvisay Dios Visqui apancaoc, sictimesquiscama apquillingaycamco acyimtalhnama ayinyema selyamasma siclho, yoyam eltimjic apquilayo quilaycmasquiscama. Colyitnam apatic apquiltemaclha apancaoc siclho, coyiplovjoc sat apquilyiclhama. 10 Elyasamcojoc sat mepqui sicyeycajascaoc siclhanma, apquillinga inlhojo sicpayvam, yoyam oyanmongsiclhac sat apquiltemaclha apancaoc — alhta aptomjac.
11 Aptomjac alhta seyanya Visqui ingac: Ilticpam sat apmeoc, iltam sat apmancoc, ilpalhamam sat lhip: ¡Quellhip layi, ellingamcojoc sat apticyovam, najan mayic ataoc, najan ningmasquem ataoc! 12 Ningmasquem sat colnapoc apnaycam mocjay. Eticyoc sat apnaycam ningato. Mayic sat colnapoc enlhit apquilaymomap, elmasquingvomoc sat. Comascoc sat siclom natamin sicyanmongsayclha apquiltemaclha apancaoc. 13 Elyicpilcangvomoc sat sicvisay Dios Visqui apancaoc. Elvitacpoc sat apjapaoc niyava altares najan naysicsa quilaycmasquiscama apancaoc. Elvitacpoc sat payjoc acyitnamaclha quilaycmasquiscama netin inquilhe alvinatem najan yamalvinatem, najan payjoc ayimjaclha yamit acyivey anco, apquilmescamaclha asoc acmasis macmescama quilaycmasquiscama. 14 Oyanmongsiclhac sat apquiltemaclha apancaoc, otvacsic sat yoclhilhma, ayenmo yoclhilhma nipiyam acvaycmo Ribla payjoc nilhqueyja. Cotniclhac sat yoclhilhma actamopeycaoc lhalhma anco. Jelyicpolcangvomoc sat coo, sicvisay Dios Visqui apancaoc — sat itne elanic — alhta aptomjac Visqui ingac.
