Faraón kélyetcháseykekxoho xama yámet cedro
1 Epaqhetchessek axta ko'o Wesse' egegkok eyeynókxa axta ekxega émha amonye' ekhem, aptáhakxa axta apqántánxo pelten ma'a once apyeyam. Aptáhak axta seyáneya s'e: 2 “Etne sa' yának faraón se'e, wesse' apwányam nak Egipto tén han ma'a apyókxoho énxet'ák apagkok nak:
“¿Yaqsa egwanchek aghéshok
ektémakxa nak apteme
apwányam apagko' xép’?
3 Aphawók xép ma'a yámet ciprés
essenhan ma'a yámet cedro
émha nak yókxexma Líbano,
éltaqmalmal'a áwa',
ekyentaxnól'a pessesse agkok
katnamok ma'a naxma,
élwenaqte agko' la'a,
élweykekxohol'a naw'ék
ma'a yaphope.
4 Wánegkessegkek ma'a ekmámeye
tén han ma'a yegmen
ekyetno nak náxop;
wakhayak wátsam ma'a neyáwa
ekpayhókxa nak kélcheneykekxexa;
kelyásseseykegkek nahan chá'a
yegmen ényé agkok ma'a
ekyókxoho yenta'a nak yókxexma.
5 Tásek nahan ekteme
ekwányam neyseksa
m'a mók yenta'a nak naxma,
hakte awanhek
yegmen ma'a émhakxa;
xámeykegkek nahan ma'a aktegák
kelpayhegweykmók agko'.
6 Keláneykegkek axanák
mók ektémakxa nak chá'a
náta m'a aktegák nak;
palcháseykegkek nahan étkók
mók ektémakxa nak
chá'a aqsok nawha'ák
ma'a kóneg nak.
Apwanchek nahan exnakha
apxámokma apagko'
pók aptémakxa nak
chá'a énxet ma'a
kóneg pessesse agkok nak.
7 Yámet ektaqmalma
émha axta m'a, ekyawe,
ahóxekcha'awók agko'
axta m'a aktegák,
hakte kelántaxnegweykmek
axta kepmenák ma'a
ekyetnamakxa nak
yegmen ekyawe.
8 Méko axta xama
enxoho yámet ekyawe
egwanchek aghésho',
élámha axta m'a Dios yókxexma
ektaqmalma apagkok nak;
Méko axta nahan xama enxoho
pino yámet ekhémo aktegák ma'a
ekwánxa nak aktegák,
méko axta nahan xama enxoho
yámet castaño ekxámokma nak áwa'
ekhémo m'a ekweykenxa nak
ekxámokma áwa',
méko axta nahan xama enxoho
ekhémo ektaqmalma m'a
yámet élámha nak Dios
yókxexma ektaqmalma apagkok.
9 Ko'o sekteméssesso
ektaqmalma m'a
tén han ekxámokma
agko' ma'a áwa';
yásekkessegkek nahan ma'a
nekha yámet élámha nak Edén,
cham'a Dios yókxexma
ektaqmalma apagkok nak.
10 “Keso aptáhakxa nak appeywa Wesse' egegkok se'e: Ekwenaqte agko' táhak ma'a yámet, keltekxekwokmek naw'ék ma'a yaphope nak; wánegyek agko', eyeymáxkoho nahan táhak. 11 Cháxa keñamak sekyetnakhasa nak ko'o xa; wohok sa' ko'o emok ma'a xama wesse' apkeñama nak mók nekha, yaqwayam sa' etnéssesek, ekhawo m'a ektémakxa nak chá'a élane m'a ektémakxa ekmaso. 12 Eyaqtennek sa' ma'a énxet'ák megkalmayósa agko' nak elanok ma'a aqsok, apkeleñama nak mók nekha, eyenyók sa' aqsa nahan ma'a; kapallegmak sa' élekkexamaxche aktegák ma'a ekyókxoho néten meteymog élekhahéyak nak, tén han ma'a élyapwátegweykenxa nak chá'a xapop tén han ma'a élyapwáteyak nak chá'a m'a apkelókxa, keñe sa' yenyahagkok apyókxoho m'a énxet'ák apheykha nak chá'a kóneg pessesse agkok, eyenyók sa' aqsa. 13 Kalyáqwak sa' mók ektémakxa nak chá'a náta m'a néten nak yámet ekyaqnenma, keñe sa' kaxnagwak chá'a néten élekkexamaxche aktegák ma'a mók ektémakxa nak chá'a aqsok nawha'ák élmeymentakcha'a. 14 Megkawegqagkek agko' sa' chá'a kaxwók xama yámet enxoho, megkeyxek sa' chá'a émha m'a neyáwa yegmen, megkaltekxekwomók sa' chá'a kaxwók naw'ék ma'a yaphope, megkeyxek sa' ektaqmalma kélyássáseyak, megkawegqagkek agko' sa' nahan chá'a kaxwo'. Kelxénamaxcheyk kaletsapok ekyókxoho xa, kalweywagkok se'e kóneg xapop kañók agko' nak nélwanmégkaxa tén han kapáxaqwók ma'a aphagwayam nak ma'a kañe' takhaxpop.
15 “Ektáhak ko'o sekpeywa s'e, sektáha nak Wesse': Teyekmek sa' agkok yámet ekyawe nak ma'a kañe' apkelmaheykegkaxa nak chá'a apkeletsapma, wának sa' ko'o keymek élapwayam ma'a wátsam ekwányam ekmattawóneg nak; amagkok sa' yegmen ma'a wátsam tén han ma'a élpexyaweykentamxa nak chá'a yegmen ényé; wának sa' ko'o kalapwagkashok agko' yókxexma Líbano xa yámet nak, keñe sa' kalyameygkok ma'a ekyókxoho yenta'a nak yókxexma. 16 Ekyeñenteyk sa' agkok ko'o kañe' apkelmaheykegkaxa nak chá'a apkeletsapma m'a, yaqwayam enxoho kapáxaqwók ma'a apkeletsapma nak chá'a, kalpexyennegkesek sa' ekyókxoho apheykegkaxa nak chá'a pók aptémakxa énxet'ák ma'a éxtegyawasso ekyennaqte nak ektéyam. Keñe sa' se'e kóneg xapop nélwanmégkaxa nak, kaltaqmelchessásekxak sa' awáxok ma'a yenta'a éleñama nak Edén, cham'a yenta'a éltaqmalma agko' nak, ektaqmalma nak éktegkesso yegmen ma'a Líbano. 17 Kalántexek sa' eyke nahan apkelmaheykegkaxa nak chá'a apkeletsapma xa, kapáxaqwók ma'a apkeletsapma axta neyseksa kempakhakma, ekhawo nak xa yámet nak. Keñe sa' ma'a apheykha axta chá'a kóneg pessesse agkok, yexpaqnek sa', elmahagkok sa' chá'a nepyeseksa m'a pók aptémakxa nak chá'a énxet'ák. 18 Méko axta xama yámet enxoho Edén egwanchek aghéshok ma'a, eyeymáxkoho tén han ekwenaqte; kapallamhok sa' eyke xamók ekpallakmo sa' kañók agko' xapop ma'a nekha yámet nak Edén, yaqwayam sa' kalhók nepyeseksa m'a énxet'ák melya'áseyak nak Dios, tén han ma'a énxet'ák apkeletsapma axta neyseksa kempakhakma.
“Faraón xa yámet nak tén han ma'a apyókxoho énxet'ák apagkok. Ko'o sekxeyenma xa, sektáha nak Wesse'.’”
Apvisqui co Egipto apyitsomacpo yamit cedro
1 Vocmec alhta acnim primero, najan piltin tercero, najan año once, naysicsa ningmomalhquilha moc yoclhilhma. Aptomjac alhta Visqui ingac seyanya coo. 2 Ilngas sat lhip sicpayvam napato faraón apvisqui co Egipto najan apquillhalhmaa:
¡Apmeyjec apanco lhip apvisqui! ¿Soc asoc yoyam oyitquisic lhip apmopvan?
3 Apyitsomacpo lhip yamit acvisay cedro ayimja payjoc Líbano. Altamila anco actengaoc, najan actamila anco pisquisca coning yamit. Inticlhicvocmec yipjopay ayitsicsic yamit.
4 Yingmin actomja ayictinquiscama as yamit, ayinyema yingmin vatsam najan moc yingmin ayinyema ayimjaclha yamit, najan alimjaclha moc yamtaa alimja nalhma.
5 Avanjec alhta ayictingam as yamit, am colhno moc yamtaa alimja nalhma. Ajolhec anco actengaoc as yamit.
6 Inquillanac mataa alhanaoc nata, payjoc actengaoc as yamit. Impalacmec mataa ayitcavoc asoc navjac coning yamit. Apquilnaclhec alhta coning yamit aplhamoclhojo enlhitaoc lhalhma anco.
7 Actamila anco as yamit, ajolhec alhta actengaoc, congnoc alhta ayquipmenaoc acvaycmo yingmin congne lhopactic.
8 Am alhta colhno moc yamit cedro alimja amyip apanco Dios, am colhno moc yamit pino acma actengaoc alvinatem, am colhno moc yamit castaño acma ava altamila, am colhno moc yamit altamila maa.
9 Actamila alhta as yamit, altamila alhta actengaoc. Yiplovcoc alhta alyasipquiscama moc yamtaa alimja amyip apanco Dios, acvisay Edén — alhta aptomjac.
10 Aptomjac alhta mocjam: Quip ingyeylhojo mocjam sicpayvam: Inquictinquic alhta as yamit acticlhicvocmo yipjopay ayitsicsic, acyiplomo acyimtalhnesomalhco anco. 11 Acyinyovquic alhta as yamit. Evac sat lhama apvisqui, eyanmongsiclhac sat actemaclha anco as yamit acyimtalhnesomalhco anco. 12 Enlhit apquilmapsomcaa elvac sat, elyatemenic sat, elyinyoc sat acyitnaclha. Colvitalhcac sat actengaoc alintem lhalhma anco netin inquilhe najan payjoc alvata. Elinyajamcoc sat apyovoclhojo enlhit apnaycam siclho coning pisquisca as yamit. 13 Colvitalhcac sat nata alyanca netin avjac. Coleyoc sat asoc navjac naysicsa actingaoc alintem. 14 Cotalhquejec sat mocjam as nalhpop yamit acvinatem, acno as yamit. Cotalhquejec sat mataa yamit ayitsicsic, coticlhicvomoc sat yipjopay, ayimja inlhojo nicja yingmin, actomja ayictinquiscama. Colyatemenalhcac sat moclhama yamit, colpalhavomoc sat alyascamaclha ingjangaoc, apno enlhit apquilitsepma.
15 Aptomjac alhta mocjam: Copalhavomoc sat as yamit alyascamaclha ingjangaoc. Otnesquisic sat acyivey acmayovsa ingvalhoc, coymac sat yingmin acvanyam, coymac sat vatsam, mepqui yingmin ayinyem sat cotnejic. Colyamamcoc sat acyovoclhojo yamtaa netin inquilhe Líbano najan lhalhma anco. 16 Copalhavomoc sat as yamit alyascamaclha ingjangaoc, colngalhcac sat acyivey ayilhtingyovam acyanina. Cotnejic sat acyivey apquilay enlhitaoc as nalhpop. Copalhavomoc sat payjoc alyascamaclha ingjangaoc, aljalhanma moc yamtaa alyatemenamalhca najan alitsepma nano, payjoc amyip Edén. Siclhoc nat yamtaa altamila alimja nicja acyitnamaclha yingmin payjoc Líbano. 17 Elitsapoc sat apyovoclhojo enlhit apnaycam siclho coning pisquisca as yamit, elpalhavomoc sat payjoc alyascamaclha ingjangaoc, acyitnamaclha apquiljangaoc enlhit apticyovam siclhoc nat. 18 Paj lhama yamit alimja amyip Edén altomja altamila anco najan alvinatem anco, acno as yamit, apquilyitsomacpo co Egipto. Elpalhavomoc sat quellhip lha alyascamaclha ingjangaoc malhic congno, nipyesicsa apquiljangaoc enlhit apticyovam siclho. Apvisqui co Egipto najan apnaymacoc enlhit apquilyitsomacpo as yamit cedro. Eycaso sicpayvam sicvisay Visqui apancaoc — alhta aptomjac.
