Timoteo kéláphasso
1 Xama axta ekmassama nélenmáxamáxche mólweteykekxa kéxegke, xeyenmeyk axta egwáxok aghekxak aqsa Atenas, 2 keñe agáphaksek ma'a egyáxeg Timoteo, apteme nak han sempasmo nenteme Dios apkeláneykha, nenlegasso m'a amya'a ektaqmela ekxeyenma nak Cristo. Negáphassegkek axta, yaqwayam enxoho elyennaqtéssesek kélteme megkólya'ásseyam, tén han yának kólmáyhagkohok kóltamhagkok megkólya'ásseyam, 3 yaqwayam enxoho anhan megkayélaqtéssemek kélxama kéxegke m'a kéllegeykegkoho nak. Hakte kélya'ásegkok kéxegke megkatnehek manlegeykegkoho xa aqsok nak. 4 Néltennassegkek axta negko'o negmáheyo óllegagkoho', cham'a negheykegkaxa axta makham kélnepyeseksa kéxegke; temegkek axta nahan xa, ekhawo kélya'áseykegkoho nak kéxegke. 5 Axta keñamak ekmassama ko'o sélenmáxamaxche', séltémo kóltegyaha amya'a ektémakxa megkólya'ásseyam kéxegke, hakte tamheykha axta ko'o ewáxok kalyepkónek kéxegke kelyekhama', keñe katnégwók eyaqhémo m'a nentamheykha axta negko'o.
6 Keñe kaxwók apweykto Timoteo apkenyekto m'a Tesalónica, sensántegkesa negko'o amya'a ektaqmela ektémakxa megkólya'ásseyam kéxegke, tén han ektémakxa kélásekhamaxkoho. Ẽltennássakteyk axta megkamassegweykmo exnek chá'a ekxeyenma kélwáxok negko'o yetlo sẽlásekhayo, tén han kélmáheyo kélagko' hek hẽlwetekxak makham negko'o, ekhawo ektémakxa nak han negko'óxa negmámenyého ólwetekxak kéxegke. 7 Élyáxeg, cháxa keñamak negmoma nak negko'o ekyawe agko' éltaqmelwayam egwáxok nenlegaya megkólyenseykmo kéxegke kélteme megkólya'ásseyam, neyseksa m'a ekyókxoho ekyentaxno negheykha, tén han néllegeykegkoho. 8 Nélyenneykekxók nahan negko'o nenlegaya amya'a megkólyenseykmo kélteme megkólya'ásseyam kéxegke m'a Wesse' egegkok. 9 Mogwanchek negko'o ansáwak negmésso ekxeyenma egwáxok Dios kéxegke éñamakxa, tén han ekyawe ekpayheykekxa egwáxok nápaqtók Dios kéxegke éñamakxa. 10 Yókxoho ekhem chá'a negko'o nélmaxnagko Dios néltémo hẽghok ólwetekxak kéxegke, tén han yókxoho axta'a, tén han agmések ma'a eyeyméxchexa nak makham kélteme megkólya'ásseyam.
11 Egmenyeyk negko'o hempasmok Dios Egyáp, tén han Wesse' egegkok Jesús, yaqwayam ólwakxak makham ma'a kélheykegkaxa nak kéxegke, 12 Wesse' egegkok sa' eyánchessesagkohok kélteme kélásekhamaxkoho kéxegke, tén han apyókxoho énxet'ák, ekhawo ektémakxa nak nélásekhayo negko'o kéxegke. 13 Elwasqakkasek sa' kélwáxok, etnéssesek sa' nahan kélpagkanamaxche', tén han meyke kélxéncháseykekxoho kéltémakxa nápaqtók Dios Egyáp, cham'a apwa'akto sa' makham Wesse' egegkok Jesús yetlo m'a apyókxoho énxet'ák apagkok apkelpagkanamap nak. Katnahagkok sa'.
1 Alhtoc ningiljalhnac nincoo. Inlhenquic ingvalhoc onlhic sat mocjam tingma Atenas. 2 Ningiltamjoc ongilapajacsic nipyesicsa quellhip ingilyalhing Timoteo. Ayinyemaclha Timoteo aptomja Dios apquilancam najan aptomja ningiltamjaycamo lhama naysicsa ninlingascama tasic amyaa ayinyema Cristo. Apvanquic eyimnatesquisic apquilvalhoc quellhip najan epayesiclhac apquilvalhoc naysicsa melyasquiyam. 3 Yoyam mellhinganmejec quellhip naysicsa acyimtalhnamo. Apquilyasamcoc quellhip, mongvanquejec mongvita acmasca. 4 Ningiltimnasquic alhta inyicje naysicsa ningma alhta nipyesicsa quellhip, mongvanquejec mongvita nincoo acmasca. Eycaso acvaa quilhvo nac jay. Apquilvita najan quellhip lha. 5 Alhtoc aljalhnac coo amyaa ayinyema quellhip. Ayapajasquic alhta ingyalhing Timoteo nipyesicsa quellhip yoyam oyasamcojo actemaclha melyasquiyam quellhip. Incacoc enquenyic colsilhnana quellhip acvisay acyipconma. Cotnejic sat alhtoc nincoo ningiltamjaycam.
6 Apvoctac mocjam ingyalhing Timoteo apquinyectamo tingma Tesalónica. Ingiltimnasquic amyaa actamila actemaclha melyasquiyam quellhip najan actemaclha apquilasicjayo. Ingiltimnasquic najan actemaclha quellhip allheneycam apquilvalhoc nincoo najan actemaclha alipvameycaoc, acno nincoo lha. 7 Quellhip ingilyalhinga. Intamilaclhec mocjam ingilvalhoc ninlinga actemaclha melyasquiyam quellhip. Ayinyemaclha yimtilhec nincoo aso naysicsa ninlingaycamco acmasca. 8 Inpayjeclhec nincoo ingvalhoc ninglinga actemaclha apquilyiplovquiscama quellhip Visqui ingac, malha singilvoncayam actemaclha acyimtalhnamo. 9 Avanjec nincoo nintimem gracias Dios Ingyapam. Avanjec anco acpayjayclha ingilvalhoc napato Dios, quellhip ayinyemaclha. 10 Ningilmalhnaquic nincoo mataa Dios Ingyapam acnim anco najan alhtaa yoyam ongilviticlhac mocjam quellhip. Yitnec sat ancoc ayaymomalhca asoc actemaclha melyasquiyam, pac ongilpasmoc sat nincoo.
11 Ningiltamjoc yoyam jingnaliclhac nipyesicsa quellhip Dios Ingyapam najan Jesucristo Visqui ingac. 12 Ningiltamjoc nincoo yoyam eyancasiclhac Visqui ingac actemaclha apquilasicjayo nipyesicsa quellhip najan nipyesicsa aplhamoclhojo enlhitaoc. Acno nincoo lha ningilasicjayo quellhip. 13 Ningiltamjoc najan yoyam elyimnatesquisic apquilvalhoc Visqui ingac. Yoyam eltimjic quellhip apquilponquinomap najan mepqui apquilsilhnanomap napato Dios Ingyapam naysicsa apvoycta sat Jesucristo Visqui ingac najan apquillhalhmaa.
