Job
1-2 Xámokmeyk ko'o seklege
xa ektéma nak amya'a.
Élyánchessásegko
aqsa seklegeykegkoho,
mehélpeykessásekxak ewáxok.
3 ¿Megkólwátesagkeya sa'
kélpaqméteykha naqsa?
¡Hélátegmowagkok aqsa chá'a!
4 Temék agkok han kéxegke
s'e setnamakxa nak ko'o,
atnehek ko'óxa alpaqhetchesek
kéxegke xa ektáha nak;
ayeykesha chá'a épátek
alanok kéxegke,
keñe alpaqhetchesek chá'a
ekxámokma agko',
5 cham'a sekpeywa
ektaqmeleykha,
ekpeykeseykekxa
nak egwáxok,
yaqwayam enxoho
agkeyásekxak kélyennaqte
tén han alwasqakkásekxoho'.
6 Ekpaqmetchek
aqsa agkok ko'o,
megkamasseksek
ma'a seklegeykegkoho,
ekwanmakkek agkok han,
megkaxyawásekxék
ma'a setnamakxa.
7 Apmasséssek
sekyennaqte m'a Dios;
élyementamákxeyk
han apyókxoho étchek,
8 exnéssegkek kañe'
negmomaxchexa'.
Énmexáha sexéneyncha'a;
apmopwána amya'a
aptáhak sexéneyncha'a.
9 Eyaqmáseyha
ko'o Wesse' egegkok,
apkelpáxqatchek émpehek,
máxa aqsok nawhak eklo
etnessásak apmako heyaqhek,
megyeyásak sélano,
máxa sénmexma aptáhak.
10 Apxámok énxet
sénmexma ko'o,
élántekkessáseyha apaqta'ák,
etekpagáha apkeltamho amegqe'.
11 Apchahayók Dios
semoma ko'o m'a
énxet'ák élmasagcha'a
nak apkeltémakxa',
tén han élyeyháxma nak.
12 Méko axta ko'o
ektémakxa sekha,
keñe seyaqhakkasa eyespok;
eyaqhapchek axta
setnéssásekxo nekha'a étkók.
Epékássawok nahan
semakta'a yágke apagkok.
13 Máxa keñamak
sélyáte yágke apagkok;
kelyaqxakkak sekyókxa',
meyke apmompyósa sélányo,
kexpaqnáha náxop
ekhéyak ewáxok.
14 Apxámássek sélyensasso,
máxa kempakhakma yáp
aptáhak sektamakmo.
15 Yetlo ekyentaxno
ewáxok élántaxneykxak ma'a
apáwa sẽlwáxaqxamo nak,
ekheyk náxop
sektekxeya xapop
épátek sekmegqakto.
16 Yephék nahát sekwóno;
kelhagqak ahaqta'ák,
17 meynnaqteyáseykegkaxho
émpehek alának xama énxet,
ektáhakxoho eyáxñeyo sélmaxnagko.
18 Keso ekmaso
sélteméssesakxa nak ko'o,
kéméxcheyk kalanaxchekxak
heykxa amya'a;
¡xapop, nágkakpós aqsa
m'a sélmaxneyeykha nak!
19 Apheyk xama énxet ma'a néten
yaqwayam hexének hepasmok,
20 apmopwána nak
exének nápaqtók
Dios ma'a ektémakxa
élchetámeykha ewáxok,
yaqwayam enxoho
étak ektémakxa
sélekxagweykha m'a;
21 xama énxet
yaqwayam epaqmétek
nápaqtók Dios hemyók ko'o,
aptémól'a énxet
elpaqhetchesakpohok pók
yaqwayam emyók
ma'a apxegexma.
22 Peyk kasawhaxchek
ekhem sekweynchámeykha,
kaxwók sa' axog
meyke sekweyktámho.
© © Enxet Lengua Sur Bible © Paraguayan Bible Society, 2015.