Job
1-2 ¿Háxko ekwánxa kólwátessók
séllegassáseykegkoho ewáxok,
tén han sélyenheykha kélpeywa?
3 Megkamassegweykmok
sexéneykha ekmaso;
¿yagkólmegkaqtók
sélteméssessama xa
ektáha nak?
4 Naqsók sa' agkok ko'o
sektáha seksexnánémaxche',
ko'o sa' aqsa han heyápekxak
xa sektémakxa nak.
5 Kélanagkamcheya
kéxegke kataqmelak
kéltémakxa', kaxnók ko'o,
nahaqtók ko'o élxénak
sekteme seksexnánémaxche'.
6 Kólya'asagkoho aptáha ko'o
señassáseykegkoho m'a Dios,
cham'a apkeltémo han hemok
ko'o m'a kelhanma nak.
7 Ektáhak agkok ko'o
sélpáxaméncha'a s'e:
“¡Peyk amátog!”
méko heyátegmowagkok;
éltamhók agkok nahan
hélpasmok, méko han
hélánekxések amya'a.
8 Apchápeykxeyk ámay
ahagkok Dios yaqwayam
enxoho ko'o mayeykhe';
ekyáqtessóxma aptemessásekxak
ma'a ámay ahagkok nak.
9 Élyementamákxeyk
ma'a aqsok ahagkok;
émentamákxeyk nahan
ma'a ektémakxa axta
sekteme ekha séláyo.
10 Máxa keñamak
sektámeyam ekwokmoho
semasséssekmo;
¡máxa yámet kélpátekkesso
aptemessásak ma'a
sélhaxanma nak!
11 Etaqnagkamók
apagko' ko'o m'a,
máxa sénmexma aptemék.
12 Eyhayak ko'o m'a
sẽlpextétamo apagkok;
apkelpakxeneykegkek
nepyáwa exagkok sewakhaya,
apkelánegkokxeyk han
aptamhágkaxa yaqwayam
hektámegmak ko'o.
13 Dios apkeltémo ko'o
heyenyók ma'a élyáxeg'a
tén han énámakkok,
tén han hetnéssesek
máxa séñama mók nekha.
14-15 Eyenyókek ko'o m'a
énámakkok ahagko' nak,
tén han sélxegexma'a;
massék élxéna apkelwáxok
ko'o m'a apheykha nak exagkok.
Máxa séñama mók nekha
etnéssessók ma'a séláneykha
kelwán'ák nak;
massék sey'ásegkoho.
16 Ekwóneyha agkok chá'a
xama seyásenneykha,
meheyátegmowagkehe',
megkeyxek séltémo hey'óta',
mehey'óte'.
17 Ekyepetchegwákxók
agkok etáwa',
hetaqnók chá'a;
weykmók ko'o
megkaleklo agko' apwáxok
hélanok ma'a étchek.
18 Weykmók nahan
sewanyémo m'a sakcha'a;
keytlawhok chá'a
sexéneykha ekmaso
sekxatakha'a enxoho.
19 Etaqnagkamchek
ma'a sélxegexma'a
ahancha'awo' nak;
énmexeykekxeyk ma'a
sélásekhayókxa
nak chá'a ko'o.
20 Kelánteyepmeyk exchakkok,
xegkessamók maweynchamha chá'a.
21 Kéxegke sélxegexma'a nak,
kapyósho héllanok ko'o,
eñassáseykegkók ko'o m'a
Dios apmopwána nak.
22 ¿Yaqsa ektéma
sélyaqmáseykencha'a
nak ko'o kéxegke,
aptémól'a m'a Dios?
¿Yaqsa ektáha
megkólwátesagko nak
séllegassáseykegkoho?
23 ¡Émenye' nak la'a
etaxaksek sekpeywa
xama énxet,
keñe epekkenekxak
aptáxésso xama
weykcha'áhak!
24 ¡Émenye' nak la'a
elqahaksek xama énxet
yáma énmaga aktek ekpayhe
emha m'a táxésso
élánamáxche nak sawo,
essenhan meteymog,
yaqwayam enxoho
megkamassegwome'!
25 Ekya'ásegkók ko'o
apha m'a Semasma,
yaqwayam heyátegmakkasagkok
amya'a keso náxop.
26 Kapallamok sa'
eykhe émpehek,
ko'o ahagko' sa'
eyke ótak ma'a Dios.
27 Ahaqta'ák
ahagko' sa' óta',
ko'o ahagko' sa',
háwe m'a pók énxet.
Ekyelqáxcheyk ko'o
28 sekleg'a kéltáha kélpeywa s'e:
“¿Háxko antéhek
negko'o agyaqmasha?
Apkelane apagko'
ma'a aqsok ekmaso.”
29 Eyke kóláwho
m'a sókwenaqte,
apmeykencha'awo nak
chá'a Dios eñássesagkohok
aqsok ekmaso.
Kólya'asagkoho apha
xama segyekpelchémo.
© © Enxet Lengua Sur Bible © Paraguayan Bible Society, 2015.