1 Tamo ra'e nde che kyvy
rekambu vaekue che sýre,
ñañuguãitĩvo rohetũne
ha avave nde'i chéne mba'eve.
2 Che sy rógape rogueraháne
ha romoingéne ikotýpe,
ha che mbo'éne nde.
Ndéve ha'ukáne
kaguy iporãvéva,
ha umi che yva rykue.
3 Nde asúpe rejoko che akã,
ha nde akatúape che añuã!
Karia'y
4 Pejéke chéve peẽ
kuña kuéra Jerusalengua,
na pe mombáy mo'ãiha
che rembiayhu,
ha'e opayseha peve.
Purahéi 6ha
Opurahéi joáva
5 Máva piko pe oúva
yvy ojeiko'ỹhágui,
iñakã ombojekóva
hembiayhu ati'y ári?
Karia'y
Peteĩ yvyra guýpe romombáy,
nde sy nde rereko haguépe.
Nde apo ñepyrũ haguépe.
Kuñataĩ
6 Che ra'ãnga eraha
nde py'ápe,
ha emoĩ nde jyváre!
Manóicha imbarete
pe mborayhu,
ha manóicha ijero
takate'ỹ mborayhúre
jarekóva.
Ihu'y, hu'y hatáva.
Ha hata, Ñandejára rata.
7 Ýnte ramo,
mborayhu nomboguéi chéne,
ysyry kuéra katu,
ndojaho'i chéne.
Oime ramo ojoguaséva
mborayhu,
jejahéi mante ohupytýne.
Ikyvy kuéra
8 Ñane reindy niko michĩ,
ha ne'ĩra ipyti'a.
Mba'éiko jajapóta
ñane reindymígui,
oúrõ ojejerure hese hikuái?
9 Korapy jere yvate katu ha'e,
pe hi'ári jajapóne
ñama'ẽha mombyry
plátagui guare.
Okẽ ramo katu,
ñamoanambusuvéne
yvyra porãme.
Teindýra michĩvéva
10 Korapy jere yvate hína che,
ha che pyti'a óga yvatéicha.
Upévare,
che rembiayhu oikuaa
ajuhúma hague vy'a.
11 Baal-Hamónpe, Salomón
oguereko vaekue iparralty.
Upépe omoĩ iñangarekoharã,
ha áño ohasávo,
peteĩ-teĩ ome'ẽ chupe
mil pláta pehẽngue,
pype omono'õvare.
12 Che parralty chéve guarãnte,
ndéve guarã katu, Salomón,
umi mil pláta pehẽngue,
ha 200 ohupyty
umi hese oñangarekóvape.
Karia'y
13 Nde, reikóva yvotytýpe,
che irũ nguéra ne rendu.
Ehejána che ave
tahendumi.
Kuñataĩ
14 Eñani, che rembiayhu,
ku guasu ra'y rusúicha
umi yvyty ru'ãre,
mba'e ryakuã porãgui
henyhẽva!
© © Guarani DC Bible © Sociedad Bíblica Paraguaya, 1996.