Opurahéi joáva
1 Mamópa oho ra'e
ne rembiayhu,
nde, kuñataĩ porãite?
Mamópa oho ra'e,
toroheka ne ndive?
Kuñataĩ
2 Oime oho ijyvotytýpe
che rembiayhu,
ijyvotyty ryakuãvúpe,
hymba kuéra omongarúvo
ha omono'õvo yvoty.
3 Che rembiayhu chéve guarã,
ha che, chupe guarã.
Ha'e yvoty apytépe
hymba kuéra omongaru.
Purahéi 5ha
Karia'y
4 Nde, che rembiayhu,
ne porã Jerusaléncha
ha Tírsaicha nde juky.
5 Erována che hegui
nde resa kuéra,
che py'a reraháva!
Nde áva niko ojogua
umi kavara atýra,
oguejýva Galaádgui.
6 Ne rãi nguéra morotĩ asy
ha ndaipóri ipa'ũha.
7 Nde rova katu ojajái,
mokõi granáda voréicha
nde rova mo'ãha kupépe.
8 Mburuvicha guasu
hembireko heta,
ha hetaiteve ikuña;
heta hetave kuña ipyahúva
oñemoĩ chupe.
9 Ha peteĩnte che pykasu,
iporãite ha ijojaha'ỹva.
Ha'e isy memby
oñembojeroviavéva.
Kuñataĩ nguéra oguerohory
chupe ohechávo,
ha oguerohory eterei chupe
mburuvicha guasu
rembireko kuéra
ha opa ikuña kuéra.
Opurahéi joáva
10 Máva piko pe kuñataĩ
iñapysẽva ko'ẽjúicha,
jasýicha iporãva,
omimbíva kuarahýicha,
ndaijojaháiva,
ñaimo'ãva umi mbyja
pe árare iñasãiva?
Kuñataĩ
11 Aguejy che yvatýpe
ahecha haguã
heñóipa che parralty
ha ipotýpa umi granáda.
12 Ha aikuaa'ỹre
mba'éicha rupípa,
che rembiayhu Kárrope
ajejuhu.
© © Guarani DC Bible © Sociedad Bíblica Paraguaya, 1996.