1 Kóva rire, ahendu heta oñe'ẽ joáva yvágape, he'íva:
“Aleluya!
Ñepysyrõ,
vy'apavẽ ha pu'aka
ñane Tupã mba'e.
2 Ha'e oporombojovake
añetehápe ha heko joja,
oinupã niko pe kuña
reko vai guasuetépe
omongy'áva heko vaípe
opa yvypórape;
omyengovia pype,
umi Tupã rembiguái mano.”
3 Upéi he'i jey hikuái:
“Aleluya!
Hatatĩngue opa ára
ojupi vaerã.”
4 Ha umi 24 karai myakãhára ha umi irundy oikovéva ojayvy yvy peve ha omomba'e guasu Tupãme, oĩva hína iguapyhápe. Ha he'i hikuái: “Amén!” “Aleluya!” 5 Pe guapyha guive oñehendu upe jave peteĩ ñe'ẽ he'íva:
“Pemomba'e guasu
ñane Tupãme,
peẽ michĩ ha tuicháva,
peẽ hembiguái kuéra
peẽ chugui pekyhyjéva,
ha pemomba'éva chupe.”
Purahéi jererohory
6 Ahendu avei peteĩ mba'e ojoguáva heta yvypóra ñe'ẽme, ku y ho'áva yvatégui ryapúicha ha ára sunu hatãicha, he'íva:
Aleluya!
Oñepyrũ oisãmbyhy Ñandejára,
ñane Tupã ipu'akapáva.
7 Javy'a ha ñande rorýke
ha vy'ápe ñamomba'ete chupe,
oguahẽ niko ára
pe Ovecha Ra'y omendávo.
Hembireko oñembosako'íma:
8 Ojeheja chupe oñemonde
líno pererĩgui,
ipotĩ ha overáva
upe líno niko hína
umi Tupã mba'éva
reko joja.
9 Pe Tupã remimbou he'i chéve: “Emoĩ kuatiáre: ‘Ovy'aiténe umi ohóva pe Ovecha Ra'y menda karu guasuhápe.’” Ha he'ive: “Ko'ãva ha'e Ñandejára Ñe'ẽ añetegua.”
10 Añesũ pe Tupã remimbou renondépe, amomba'e guasu haguã chupe, ha'e katu he'i chéve: “Ani rejapo upéicha, che niko Tupã rembiguái, nde ha ne pehẽngue kuéraicha, jeroviápe omomba'éva Jesús ñe'ẽngue. Emomba'e guasu Tupãme!”
Upe Jesús ñe'ẽngue niko pe omoarandúva umi maranduhárape.
Pe kavaju morotĩ arigua
11 Ahecha pe ára ojepe'áva, ha ojekuaa peteĩ kavaju morotĩ, ha pe hi'arigua héra Heko jeroviaháva ha Añeteguáva, teko jojápe niko oisãmbyhy ha ojapo ñorãirõ. 12 Umi hesa overa tata rendýicha. Heta akã rehegua jeguaka iñakãre ha oguereko ijehe peteĩ téra ha'e mante oikuaáva. 13 Oñemonde ao huguypávape, ha héra: Ñandejára Ñe'ẽ. 14 Oho hapykuéri umi yvága pegua ñorãirõhára, oñemondéva líno pererĩ, morotĩ ha ipotĩvape, kavaju morotĩ ári. 15 Ijurúgui osẽ peteĩ kyse puku hãimbéva, oikutu haguã ipype tetã nguérape. Oisãmbyhýta chupe kuéra pyapy mbaretépe. Ha ha'ete opyrũta umi parral'áre oñami haguã kaguýicha Tupã ipu'akapáva pochy pohyikue. 16 Ijahoja ha hetyma ári ojehai ñe'ẽ he'íva: “Mburuvicha guasu ruvicha guasu ha mba'e Jára.”
17 Ha ahecha peteĩ Tupã remimbou, oñembo'ýva kuarahýpe, osapukái hatã umi yryvúpe, oveve joáva árare: “Peju ha peñembyaty Tupã karu guasurã, 18 pe'u haguã mburuvicha guasu, ñorãirõhára ruvicha ha kuimba'e py'a guasu ro'o, kavaju ha hi'arigua ro'o, opavave ro'o: iñakãsã'ỹva ha tembiguái, michĩ ha tuicháva ro'o.”
19 Ahecha pe tymba vai guasu ha mburuvicha guasu kuéra yvy ári guápe, iñorãirõhára aty reheve, oñembyaty vaekue oñorãirõ haguã pe kavaju morotĩ arigua ha iñorãirõhára aty ndive. 20 Pe tymba vai guasu oñemyakãsã, pe maranduhára japu ndive, ojapo vaekue henondépe mba'e hechapyrãva. Umi mba'e hechapyrãva rupi, upe maranduhára japu ombotavy ra'e umi omoĩka vaekue ijehépe pe tymba vai guasu mba'e rechaukaha ha omomba'e guasu vaekue ha'ãnga. Upévo pe tymba vai guasu ha pe maranduhára japu oñemombo hekove reheve tatápe, okaihápe azufre. 21 Ha umi ambue katu ojejuka pe kyse puku osẽvape kavaju arigua jurúgui, ha umi yryvu hyguãtãmba ho'o kuerakuépe.
© © Guarani DC Bible © Sociedad Bíblica Paraguaya, 1996.