Babilonia ho'a
1 Kóva rire, ahecha ambue Tupã remimbou oguejýva yvágagui; tuicha imburuvicha reko reheve ha ko yvy ojehesapepa imimbikuépe. 2 Hatã osapukái:
“Ho'áma, ho'áma
Pe Babilonia guasuete!
Oiko chugui mba'epochy róga,
opaichagua espíritu ky'a
rekoha,
opaichagua guyra ky'a
ha tymba iky'áva
ha ñane mbojeguarúva rupa!
3 Opa tetã niko oka'u,
kaguy peguáicha heko vaípe;
mburuvicha guasu kuéra yvy arigua
heko vaipa hendive,
ha umi ñemuhára yvy arigua
oñemomba'e reta joa
umi ha'e omombopa reívagui.”
4 Ahendu jey yvága guive ambue he'íva:
“Pesẽ pe táva guasúgui,
peẽ che tavaguáva,
ani haguã peike
umi hembiapo vaípe
ha ani haguã pende rupyty'ỹ
isarambi vai guasu.
5 Iñangaipa kuerakue niko
yvága peve ijaty
ha Tupã ohecha kuaa
umi heko añangue.
6 Peme'ẽ chupe umi ha'e voi
ome'ẽ vaekue umi ambuépe.
Pembojoyvy chupe
umi ha'e ojapo vaekue.
Pembojehe'a omboy'u vaerã
imbaretevéva umi ha'e
ombojehe'a vaekuégui
ambue kuérape guarã.
7 Peipy'apy ha pembohasa asy,
ha'e oñemomba'e guasu haguéicha,
ha omombopa rei haguéicha.
He'i niko hína ipy'apýpe:
‘Ápe aime, mburuvicha guasu
kuña vaicha,
ndaha'éi imenave'ỹmava
ha ndahasa asy mo'ãi.’
8 Upévare peteĩ araitépe
oúta chupe teko asyeta:
mano, jepy'apy ha ñembyahýi,
ha ojehapýne tatápe,
ipu'akapágui pe Tupã
oinupãva chupe.”
9 Umi mburuvicha guasu oñemboheko vaipa vaekue ha vy'ápe oiko vaekue hendive, hasẽ ha ojahe'óta hese, ohechávo pe tatatĩ opu'ãva jehapy guasúgui. 10 Opyta mombyrýta hikuái okyhyjégui iñenupãgui, ha he'íta:
“Aichejáranga nde, táva guasu
Babilonia, táva ipu'akapáva!
Péina sapy'aitépe oguahẽ
ne ñenupã.”
11 Ñemuhára kuéra yvy arigua avei hasẽ ha ojahe'óta pe táva guasúre, ndaipóri mo'ã véimagui imba'érepy ojogua vaerã: 12 umi óro, pláta, itavera, pérla, aorã ipererĩ ha isỹiva, pytãite ha pytãva; opaichagua yvyra hyakuã porãva; heta mba'e marfil, yvyra porã, vrónse, hiérro ha ita morotĩgui ojejapo vaekue; 13 kanéla, tembi'u mohyakuãha; insíenso, mba'e ryakuã porã ha aysy; kaguy, ñandyry, hu'itĩ porã ha trígo; tymba oñemomba'apo vaerã, ha tembiguái jepeve, yvypóra rekovéva. 14 Ha he'íta hikuái pe táva guasúpe:
“Ndereguereko véima umi yva
hete vaekue ndéve;
opa ára guarãma
ndereguereko mo'ãvéi,
umi jegua ha mba'e reta!”
15 Umi oñemu vaekue ko'ã mba'ére ha oñemomba'e reta pe táva guasu rupi, mombyry opytáta okyhyjégui iñenupãgui, hasẽ ha ojahe'óta, 16 ha he'íta hikuái:
“Tojererekóke pe táva guasu!
Ha'ete umi kuña oñemondéva
ao líno pererĩ porãme,
pytãite ha pytãva,
ombojeguapáva pérla
ha ita vera.
17 Ha sapy'aitépe opa
umi mba'e reta!”
Umi ygára sãmbyhyha ha umi oikóva pe y rembe'y rupi, umi ygárape omba'apóva ha umi ojehekáva yguasúpe, opyta mombyry, 18 ha ohechávo tatatĩ opu'ãva pe táva guasúgui, osapukái joa: Mba'e táva guasúpa oiméne ikatu ñambojoja kóvare? 19 Ha oñohẽ hikuái yvyku'i iñakãre, hasẽ ha ojahe'o, ha he'i:
“Aichejáranga ko táva guasu!
Ipype oñemomba'e reta
umi oguereko vaekue ygára guasu.
Ha sapy'aitépe oñehundipa!”
20 Ha nde, yvága, evy'áke
pe táva guasu rupi,
ha pevy'áke peẽ
Tupã mba'éva,
apóstol ha maranduhára,
Tupã niko, oinupãvo,
pene mboheko joja.
21 Upévo, peteĩ Tupã remimbou ipu'akapáva ohupi peteĩ ita, ha'etéva ita apu'a guasu avati mongu'iháre oĩva, ha opoívo pe yguasúpe, he'i:
“Péicha re'áta hína,
nde Babilonia, táva guasu,
ha araka'evéma
nderejehecha mo'ãvéi.
22 Araka'evéma umi nde okáre
noñehenduvéi vaerã,
árpa, mimby ha turu pu,
ha ndaipóri mo'ã véima
mba'eveichagua omba'apóva,
ha noñehendu mo'ã véima
pe ita avati mongu'iha ryapu.
23 Araka'evéma
na nde resape mo'ãvéi
mba'e rendy,
ha noñehendu mo'ã véima
ku ñemenda rehegua ayvu,
jepevénte umi ne ñemuhára,
tuichavéva yvy arigua vaekue,
ha opa tetãme rembotavy
umi nde paje apópe.
24 Upe táva guasúpe niko
ojejuhu vaekue umi maranduhára,
ha umi Tupã mba'éva
ha opa yvy ári ojejuka vaekue
ruguy.”
© © Guarani DC Bible © Sociedad Bíblica Paraguaya, 1996.