Ñembo'e jejopy vaígui ñesẽ rire
(2 S 22.1-51)1 Ñandejára rembiguái David ojapo vaekue, upe ára Ñandejára onohẽ haguépe chupe umi hese ija'e'ỹva pógui ha ndohejái ramo guare chupe ho'a Saúl pópe.
2 Rohayhu Ñandejára,
nde hína pe che mombaretéva.
3 Nde reñangareko che rehe,
ne rendápe aguahẽ akañy haguã,
nde reime che jerekuévo,
nde hína pe che renohẽva jejopy vaígui.
Ne rendápe aguahẽ ramo,
nde che pytyvõ.
4 Añembo'e Ñandejárape,
chupe jaropurahéi vaerã.
Ha'e, che pe'a umi che rayhu'ỹvagui.
5 Ñemano ojerepa che rehe,
mba'e vai ysyrýicha ou che ári.
6 Aña retã che jura,
ñemano iñuhãme che reity.
7 Vaípe ajecha
ha Ñandejárape asapukái.
Chupe ajerure che pytyvõ haguã.
Tupao guive che rendu,
ijapysápe oguahẽ che remiandu.
8 Yvy oñepyrũ oryrýi,
yvyty hapo peve okuchu,
Ñandejára ipochýgui
péicha ojehu.
9 Itĩgui osẽ tatatĩ,
ijurúgui tata rendy,
tatapỹi opa rupi isarambi.
10 Tupã oipepy yvága ha oguejy,
arai ndetuichapa jepéva
ipy guýpe.
11 Ojupi ha oho
tekove ipepóva ári.
Yvytu pepo ári oveve oho.
12 Pytũme oñeñuãmba,
arai ypytũ
ýgui henyhẽva guýpe oñemo'ã.
13 Chugui opo ára vera,
amandáu ha tatapỹi
araígui ho'a.
14 Tupã, yvatete oĩva
osunu ha oñehenduka.
15 Opoi ihu'y kuéragui opa rupi,
ára mante overa ha otiri
ha sarambikue nde'áva opa rupi.
16 Ñandejára hatã osapukái,
yvytu hatã oipeju,
y kuéra oguevi
ha opyta hendague,
yvy rugua opyta ojekuaa.
17 Tupã oipyso chéve ipo
ha che rupi,
ysyry pypukúgui che renohẽ.
18 Che pe'a upe che rundisévagui
ha che hegui imbaretevévagui.
19 Aĩ vai jave ou chéve hikuái,
ha Ñandejára che pytyvõ.
20 Okáre che renohẽ,
che rayhúgui
che renohẽ jejopy vaígui.
21 Tupã upéicha omyengovia chéve,
che reko potĩ haguére.
22 Ñandejára rapégui
che ndapiáiva,
ha araka'eve namboykéiva Tupãme
che rembiapo vai haguã.
23 Opa árape
che mandu'a iñe'ẽre,
araka'eve ndahejáiva hembiapoukapy.
24 Henondépe che rekove ipotĩ,
ha mba'e vai apógui ajejoko.
25 Ñandejára omyengovia chéve
che reko potĩ haguére.
26 Nde ne mba'e porã
iñaña'ỹva ndive,
ha rehecha kuaa imarangatúvape.
27 Oñomi'ỹvagui mba'eve,
nde mba'eve nereñomíri,
hova mokõivagui reñembotavy.
28 Imboriahúvape reipe'a ivaívagui,
ojejapóvape remotĩ.
29 Ñandejára,
nde hína upe che resapéva.
Tupã, nde upe iñypytũha
chéve remyesakãva.
30 Che pytyvõ ramo
añemoĩ kuaa che rayhu'ỹvare,
ha itáva tápia kuéra ári
ajapyhara kuaa.
31 Tupã rape ndaipóri ojoavyha.
Jarovia kuaa
upe Ñandejára he'íva ojapotaha.
Tupã oñangareko
umi hendápe oguahẽvare.
32 Oĩ nga'u piko ambue Tupã?
Mávapa ñane pytyvõne
ndaha'éi ramo ha'e?
33 Tupã upe che mombaretéva,
upe che mboheko potĩva,
34 upe guasúicha che mokyre'ỹva,
ha yvate aĩ ramo che jokóva,
35 upe che mbo'éva ñorãirõrã,
che pyapy omombaretéva
hu'y vrónseva aipepy haguã.
36 Reñemoĩ che jerére
ha che pe'a ivaívagui,
nde pópe che joko,
ha rehecha kuaágui chéve
aĩ porã.
37 Che rape remopotĩ che renondépe
ha nañepysãngái.
38 Amuña ha ahupyty
umi che rayhu'ỹvape,
ha ndajevýi ahundipaite peve.
39 Ambo'ipaite
anive haguãtei opu'ã,
che py guýpe opytapa hikuái.
40 Ñorãirõme che mombarete,
ha nde rupi umi che rehe opu'ãva
oñemoĩmba che po guýpe,
41 ha che renonderã okañy
umi che rayhu'ỹva.
Péicha ahundipaite
umi che rayhu'ỹvape.
42 Osapukái hikuái
oñepytyvõ haguã chupe kuéra,
ndaipóri avave ohendúva.
Tupãme osapukái hikuái,
ha'e nopenái hese kuéra.
43 Amyangu'i ku yvy tĩmbo
yvytu ogueroveve vaicha,
ha apyrũmba hese kuéra
ku tuju tape rupi guáicha.
44 Tupã che pe'a
umi che rehe opu'ãvagui,
tetã nguéra ruvichárõ che moĩ,
tetã nguéra aikuaa'ỹva
chéve guarã omba'apo.
45 Maymávante che momba'e,
che rendúvo, ojapo upe ha'éva.
46 Okyhyjepa che hegui hikuái,
oryrýi osẽvo kañyhágui.
47 Toikove Ñandejára,
che pytyvõhára.
Toñemomba'e Tupã
che pe'áva ivaívagui.
48 Tupã upe omyengoviáva
umi che rehe oñemoĩvape,
ha upe omoĩva tetã nguéra
che po guýpe.
49 Che rayhu'ỹvagui,
che rehe opu'ãvagui,
ha umi che jukasévagui che pe'a.
50 Romomba'éne opa rupi,
ha nde réra aropurahéine Tupã.
51 Tuicha reipytyvõ
mburuvicha remoĩ vaekuépe,
na nde resaráiri
ne rembiporavo pyrégui.
David ha ita'ýra kuérape
opa árape rehayhu.
© © Guarani DC Bible © Sociedad Bíblica Paraguaya, 1996.