Ani rejerovia oime raẽvare
1 Che ra'y,
reme'ẽ ramo ne ñe'ẽ
nde rapicháre,
térã rejerovia oime raẽvare,
2 ne ñe'ẽ voi nemoñuhãne.
Nde juru rupiete re'a
ha repytáma ipo guýpe.
3 Kóicha ejapo, che ra'y,
rejei haguã ipo guýgui:
“Eñesũ henondépe,
ha ani reheja rei chupe.
4 Ani reheja ho'a nde rehe
topehýi,
ha reñeno reke.
5 Guasúicha repo ñuhãgui,
guyráicha reveve ijapihágui.”
Ani ne ate'ỹ
6 Nde ne ate'ỹva,
tereho tahýi raitýpe,
emaña hese kuéra,
ha ne arandúta.
7 Ha'e kuéra ndahuvichái,
ndaipóri uru hi'ári kuéra,
térã chupe kuéra omyakãva.
8 Ára hakúpe
ha oñemono'õ aja kóga,
ombyaty hembi'urã.
9 Nde ne ate'ỹva,
Araka'e piko repáyta?
Araka'e piko repu'ãta?
10 “Erambi'imi, ha upéi eke.
Embojo'a nde po ne akã guýpe
ha epytu'u”.
11 Mondaháicha
tekotevẽ ho'áta nde ári,
kyse ipópe guáicha.
12 Heko añávante
oiko oñe'ẽ rei hapicháre.
13 Omaña sayke, heko rei,
ha he'ívape oporombotavyse.
14 Ivaíva mante ipy'ápe
oguereko,
ha opa rupi oporomoingo vaipa.
15 Upévare,
peichaháguinte oñehundíne,
peteĩ tesa pirĩme
oikopáne hese.
Ñandejára mbopochyha
16-19 Siéte mba'e oime
Ñandejárape ombopochýva:
ojejapóva ha ijapúva,
oporojuka reíva,
oporomoñuhãva,
omboja reíva hapicháre,
oporomoingo vaíva
ha hembiapo vaisénteva voi.
Myakãratĩ rehegua
20 Che ra'y,
ejapóke nde ru rembipota,
aníke nde resarái
nde sy remimbo'égui.
21 Ereko mante
nde py'a pýpe,
ha mbo'ýicha emoĩ nde ajúri.
22 Umíva ne sãmbyhýne,
oñangarekóne nde rehe
reke aja, ha repay rire,
oñemongetáta ne ndive.
23 Tembiapoukapy niko
tataindy,
temimbo'e katu oporohesape.
Ha umi mba'e ojapóva
oikovéne opa ára.
24 Nde pe'áne kuña vaígui,
ha nde rapicha rembireko
ijuru he'ẽvagui.
25 Ani rehecha ramo iporãha,
anítei hesa rory nemoñuhã.
26 Kuña vai oñeme'ẽ ramo
oimeháicha rei,
omendáva ombohypa nde rekove.
27 Ikatu piko oime okai'ỹre
ojatapýva hapypa'ũme?
28 Ikatu piko oime okai'ỹre
tata rehe opyrũva?
29 Péicha avei oñenóva
hapicha rembireko ndive.
Ojapo ramo upéva,
ndojeheja rei chéne chupe.
30 Mondaha noñemotĩri
omondárõ iñembyahýigui,
31 ojekuaárõnte
omyengoviáne hetaitevépe
ha opa oguerekóva ome'ẽne.
32 Omendáva ndive oikóva
naiñakã porãi,
ha ipo rupi oñehundi.
33 Ojeja'o ha oñenupãne,
ha oñemotĩháre oikovéne.
34 Hakate'ỹva hembirekóre
ipochýne,
ha ndéve, ndejuhuhápe,
ndoheja rei chéne.
35 Mba'eve reikuave'ẽva
naiporã mo'ãi chupe,
heta hetave ramo jepe.
© © Guarani DC Bible © Sociedad Bíblica Paraguaya, 1996.